Chapter 22

vīkṣamāṇastu mandāsuḥ sarvato mandamucchvasan |
ādāveva tu sugrīvaṃ dadarśa tvātmajāgrataḥ || 1 ||
[Analyze grammar]

taṃ prāptavijayaṃ vālī sugrīvaṃ plavageśvaram |
ābhāṣya vyaktayā vācā sasnehamidamabravīt || 2 ||
[Analyze grammar]

sugrīvadoṣeṇa na māṃ gantumarhasi kilbiṣāt |
kṛṣyamāṇaṃ bhaviṣyeṇa buddhimohena māṃ balāt || 3 ||
[Analyze grammar]

yugapadvihitaṃ tāta na manye sukhamāvayoḥ |
sauhārdaṃ bhrātṛyuktaṃ hi tadidaṃ jātamanyathā || 4 ||
[Analyze grammar]

pratipadya tvamadyaiva rājyameṣāṃ vanaukasām |
māmapyadyaiva gacchantaṃ viddhi vaivasvatakṣayam || 5 ||
[Analyze grammar]

jīvitaṃ ca hi rājyaṃ ca śriyaṃ ca vipulāmimām |
prajahāmyeṣa vai tūrṇaṃ mahaccāgarhitaṃ yaśaḥ || 6 ||
[Analyze grammar]

asyāṃ tvahamavasthāyāṃ vīra vakṣyāmi yadvacaḥ |
yadyapyasukaraṃ rājan kartumeva tadarhasi || 7 ||
[Analyze grammar]

sukhārhaṃ sukhasaṃvṛddhaṃ bālamenamabāliśam |
bāṣpapūrṇamukhaṃ paśya bhūmau patitamaṅgadam || 8 ||
[Analyze grammar]

mama prāṇaiḥ priyataraṃ putraṃ putramivaurasaṃ |
mayā hīnamahīnārthaṃ sarvataḥ paripālaya || 9 ||
[Analyze grammar]

tvamapyasya hi dātā ca paritrātā ca sarvataḥ |
bhayeṣvabhayadaścaiva yathāhaṃ plavageśvara || 10 ||
[Analyze grammar]

eṣa tārātmajaḥ śrīmāṃstvayā tulyaparākramaḥ |
rakṣasāṃ tu vadhe teṣāmagrataste bhaviṣyati || 11 ||
[Analyze grammar]

anurūpāṇi karmāṇi vikramya balavān raṇe |
kariṣyatyeṣa tāreyastarasvī taruṇo'ṅgadaḥ || 12 ||
[Analyze grammar]

suṣeṇaduhitā ceyamarthasūkṣmaviniścaye |
autpātike ca vividhe sarvataḥ pariniṣṭhitā || 13 ||
[Analyze grammar]

yadeṣā sādhviti brūyāt kāryaṃ tanmuktasaṃśayam |
na hi tārāmataṃ kiṃ cidanyathā parivartate || 14 ||
[Analyze grammar]

rāghavasya ca te kāryaṃ kartavyamaviśaṅkayā |
syādadharmo hyakaraṇe tvāṃ ca hiṃsyādvimānitaḥ || 15 ||
[Analyze grammar]

imāṃ ca mālāmādhatsva divyāṃ sugrīvakāñcanīm |
udārā śrīḥ sthitā hyasyāṃ saṃprajahyānmṛte mayi || 16 ||
[Analyze grammar]

ityevamuktaḥ sugrīvo vālinā bhrātṛsauhṛdāt |
harṣaṃ tyaktvā punardīno grahagrasta ivoḍurāṭ || 17 ||
[Analyze grammar]

tadvālivacanācchāntaḥ kurvanyuktamatandritaḥ |
jagrāha so'bhyanujñāto mālāṃ tāṃ caiva kāñcanīm || 18 ||
[Analyze grammar]

tāṃ mālāṃ kāñcanīṃ dattvā vālī dṛṣṭvātmajaṃ sthitam |
saṃsiddhaḥ pretya bhāvāya snehādaṅgadamabravīt || 19 ||
[Analyze grammar]

deśakālau bhajasvādya kṣamamāṇaḥ priyāpriye |
sukhaduḥkhasahaḥ kāle sugrīvavaśago bhava || 20 ||
[Analyze grammar]

yathā hi tvaṃ mahābāho lālitaḥ satataṃ mayā |
na tathā vartamānaṃ tvāṃ sugrīvo bahu maṃsyate || 21 ||
[Analyze grammar]

māsyāmitrairgataṃ gacchermā śatrubhirariṃdama |
bharturarthaparo dāntaḥ sugrīvavaśago bhava || 22 ||
[Analyze grammar]

na cātipraṇayaḥ kāryaḥ kartavyo'praṇayaśca te |
ubhayaṃ hi mahādoṣaṃ tasmādantaradṛgbhava || 23 ||
[Analyze grammar]

ityuktvātha vivṛttākṣaḥ śarasaṃpīḍito bhṛśam |
vivṛtairdaśanairbhīmairbabhūvotkrāntajīvitaḥ || 24 ||
[Analyze grammar]

hate tu vīre plavagādhipe tadā plavaṃgamāstatra na śarma lebhire |
vanecarāḥ siṃhayute mahāvane yathā hi gāvo nihate gavāṃ patau || 25 ||
[Analyze grammar]

tatastu tārā vyasanārṇava plutā mṛtasyā bharturvadanaṃ samīkṣya sā |
jagāma bhūmiṃ parirabhya vālinaṃ mahādrumaṃ chinnamivāśritā latā || 26 ||
[Analyze grammar]