Chapter 20

iti bruvati rāme tu lakṣmaṇo'dhaḥśirā muhuḥ |
śrutvā madhyaṃ jagāmeva manasā duḥkhaharṣayoḥ || 1 ||
[Analyze grammar]

tadā tu baddhvā bhrukuṭīṃ bhruvormadhye nararṣabha |
niśaśvāsa mahāsarpo bilastha iva roṣitaḥ || 2 ||
[Analyze grammar]

tasya duṣprativīkṣyaṃ tadbhrukuṭīsahitaṃ tadā |
babhau kruddhasya siṃhasya mukhasya sadṛśaṃ mukham || 3 ||
[Analyze grammar]

agrahastaṃ vidhunvaṃstu hastī hastamivātmanaḥ |
tiryagūrdhvaṃ śarīre ca pātayitvā śirodharām || 4 ||
[Analyze grammar]

agrākṣṇā vīkṣamāṇastu tiryagbhrātaramabravīt |
asthāne saṃbhramo yasya jāto vai sumahānayam || 5 ||
[Analyze grammar]

dharmadoṣaprasaṅgena lokasyānatiśaṅkayā |
kathaṃ hyetadasaṃbhrāntastvadvidho vaktumarhati || 6 ||
[Analyze grammar]

yathā daivamaśauṇḍīraṃ śauṇḍīraḥ kṣatriyarṣabhaḥ |
kiṃ nāma kṛpaṇaṃ daivamaśaktamabhiśaṃsasi || 7 ||
[Analyze grammar]

pāpayoste kathaṃ nāma tayoḥ śaṅkā na vidyate |
santi dharmopadhāḥ ślakṣṇā dharmātman kiṃ na budhyase || 8 ||
[Analyze grammar]

lokavidviṣṭamārabdhaṃ tvadanyasyābhiṣecanam |
yeneyamāgatā dvaidhaṃ tava buddhirmahīpate |
sa hi dharmo mama dveṣyaḥ prasaṅgād yasya muhyasi || 9 ||
[Analyze grammar]

yadyapi pratipattiste daivī cāpi tayormatam |
tathāpyupekṣaṇīyaṃ te na me tadapi rocate || 10 ||
[Analyze grammar]

viklavo vīryahīno yaḥ sa daivamanuvartate |
vīrāḥ saṃbhāvitātmāno na daivaṃ paryupāsate || 11 ||
[Analyze grammar]

daivaṃ puruṣakāreṇa yaḥ samarthaḥ prabādhitum |
na daivena vipannārthaḥ puruṣaḥ so'vasīdati || 12 ||
[Analyze grammar]

drakṣyanti tvadya daivasya pauruṣaṃ puruṣasya ca |
daivamānuṣayoradya vyaktā vyaktirbhaviṣyati || 13 ||
[Analyze grammar]

adya matpauruṣahataṃ daivaṃ drakṣyanti vai janāḥ |
yaddaivādāhataṃ te'dya dṛṣṭaṃ rājyābhiṣecanam || 14 ||
[Analyze grammar]

atyaṅkuśamivoddāmaṃ gajaṃ madabaloddhatam |
pradhāvitamahaṃ daivaṃ pauruṣeṇa nivartaye || 15 ||
[Analyze grammar]

lokapālāḥ samastāste nādya rāmābhiṣecanam |
na ca kṛtsnāstrayo lokā vihanyuḥ kiṃ punaḥ pitā || 16 ||
[Analyze grammar]

yairvivāsastavāraṇye mitho rājan samarthitaḥ |
araṇye te vivatsyanti caturdaśa samāstathā || 17 ||
[Analyze grammar]

ahaṃ tadāśāṃ chetsyāmi pitustasyāśca yā tava |
abhiṣekavighātena putrarājyāya vartate || 18 ||
[Analyze grammar]

madbalena viruddhāya na syāddaivabalaṃ tathā |
prabhaviṣyati duḥkhāya yathograṃ pauruṣaṃ mama || 19 ||
[Analyze grammar]

ūrdhvaṃ varṣasahasrānte prajāpālyamanantaram |
āryaputrāḥ kariṣyanti vanavāsaṃ gate tvayi || 20 ||
[Analyze grammar]

pūrvarājarṣivṛttyā hi vanavāso vidhīyate |
prajā nikṣipya putreṣu putravat paripālane || 21 ||
[Analyze grammar]

sa ced rājanyanekāgre rājyavibhramaśaṅkayā |
naivamicchasi dharmātman rājyaṃ rāma tvamātmani || 22 ||
[Analyze grammar]

pratijāne ca te vīra mā bhūvaṃ vīralokabhāk |
rājyaṃ ca tava rakṣeyamahaṃ veleva sāgaram || 23 ||
[Analyze grammar]

maṅgalairabhiṣiñcasva tatra tvaṃ vyāpṛto bhava |
ahameko mahīpālānalaṃ vārayituṃ balāt || 24 ||
[Analyze grammar]

na śobhārthāvimau bāhū na dhanurbhūṣaṇāya me |
nāsirābandhanārthāya na śarāḥ stambhahetavaḥ || 25 ||
[Analyze grammar]

amitradamanārthaṃ me sarvametaccatuṣṭayam |
na cāhaṃ kāmaye'tyarthaṃ yaḥ syācchatrurmato mama || 26 ||
[Analyze grammar]

asinā tīkṣṇadhāreṇa vidyuccalitavarcasā |
pragṛhītena vai śatruṃ vajriṇaṃ vā na kalpaye || 27 ||
[Analyze grammar]

khaḍganiṣpeṣaniṣpiṣṭairgahanā duścarā ca me |
hastyaśvanarahastoruśirobhirbhavitā mahī || 28 ||
[Analyze grammar]

khaḍgadhārāhatā me'dya dīpyamānā ivādrayaḥ |
patiṣyanti dvipā bhūmau meghā iva savidyutaḥ || 29 ||
[Analyze grammar]

baddhagodhāṅgulitrāṇe pragṛhītaśarāsane |
kathaṃ puruṣamānī syāt puruṣāṇāṃ mayi sthite || 30 ||
[Analyze grammar]

bahubhiścaikamatyasyannekena ca bahūñjanān |
viniyokṣyāmyahaṃ bāṇānnṛvājigajamarmasu || 31 ||
[Analyze grammar]

adya me'straprabhāvasya prabhāvaḥ prabhaviṣyati |
rājñaścāprabhutāṃ kartuṃ prabhutvaṃ ca tava prabho || 32 ||
[Analyze grammar]

adya candanasārasya keyūrāmokṣaṇasya ca |
vasūnāṃ ca vimokṣasya suhṛdāṃ pālanasya ca || 33 ||
[Analyze grammar]

anurūpāvimau bāhū rāma karma kariṣyataḥ |
abhiṣecanavighnasya kartṝṇāṃ te nivāraṇe || 34 ||
[Analyze grammar]

bravīhi ko'dyaiva mayā viyujyatāṃ tavāsuhṛt prāṇayaśaḥ suhṛjjanaiḥ |
yathā taveyaṃ vasudhā vaśe bhavettathaiva māṃ śādhi tavāsmi kiṃkaraḥ || 35 ||
[Analyze grammar]

vimṛjya bāṣpaṃ parisāntvya cāsakṛt sa lakṣmaṇaṃ rāghavavaṃśavardhanaḥ |
uvāca pitrye vacane vyavasthitaṃ nibodha māmeṣa hi saumya satpathaḥ || 36 ||
[Analyze grammar]