Chapter 21

taṃ samīkṣya tvavahitaṃ piturnirdeśapālane |
kausalyā bāṣpasaṃruddhā vaco dharmiṣṭhamabravīt || 1 ||
[Analyze grammar]

adṛṣṭaduḥkho dharmātmā sarvabhūtapriyaṃvadaḥ |
mayi jāto daśarathāt kathamuñchena vartayet || 2 ||
[Analyze grammar]

yasya bhṛtyāśca dāsāśca mṛṣṭānyannāni bhuñjate |
kathaṃ sa bhokṣyate nātho vane mūlaphalānyayam || 3 ||
[Analyze grammar]

ka etacchraddadhecchrutvā kasya vā na bhavedbhayam |
guṇavāndayito rājño rāghavo yadvivāsyate || 4 ||
[Analyze grammar]

tvayā vihīnāmiha māṃ śokāgniratulo mahān |
pradhakṣyati yathā kakṣaṃ citrabhānurhimātyaye || 5 ||
[Analyze grammar]

kathaṃ hi dhenuḥ svaṃ vatsaṃ gacchantaṃ nānugacchati |
ahaṃ tvānugamiṣyāmi yatra putra gamiṣyasi || 6 ||
[Analyze grammar]

tathā nigaditaṃ mātrā tadvākyaṃ puruṣarṣabhaḥ |
śrutvā rāmo'bravīdvākyaṃ mātaraṃ bhṛśaduḥkhitām || 7 ||
[Analyze grammar]

kaikeyyā vañcito rājā mayi cāraṇyamāśrite |
bhavatyā ca parityakto na nūnaṃ vartayiṣyati || 8 ||
[Analyze grammar]

bhartuḥ kila parityāgo nṛśaṃsaḥ kevalaṃ striyāḥ |
sa bhavatyā na kartavyo manasāpi vigarhitaḥ || 9 ||
[Analyze grammar]

yāvajjīvati kākutsthaḥ pitā me jagatīpatiḥ |
śuśrūṣā kriyatāṃ tāvat sa hi dharmaḥ sanātanaḥ || 10 ||
[Analyze grammar]

evamuktā tu rāmeṇa kausalyā śubha darśanā |
tathetyuvāca suprītā rāmamakliṣṭakāriṇam || 11 ||
[Analyze grammar]

evamuktastu vacanaṃ rāmo dharmabhṛtāṃ varaḥ |
bhūyastāmabravīdvākyaṃ mātaraṃ bhṛśaduḥkhitām || 12 ||
[Analyze grammar]

mayā caiva bhavatyā ca kartavyaṃ vacanaṃ pituḥ |
rājā bhartā guruḥ śreṣṭhaḥ sarveṣāmīśvaraḥ prabhuḥ || 13 ||
[Analyze grammar]

imāni tu mahāraṇye vihṛtya nava pañca ca |
varṣāṇi paramaprītaḥ sthāsyāmi vacane tava || 14 ||
[Analyze grammar]

evamuktā priyaṃ putraṃ bāṣpapūrṇānanā tadā |
uvāca paramārtā tu kausalyā putravatsalā || 15 ||
[Analyze grammar]

āsāṃ rāma sapatnīnāṃ vastuṃ madhye na me kṣamam |
naya māmapi kākutstha vanaṃ vanyaṃ mṛgīṃ yathā |
yadi te gamane buddhiḥ kṛtā piturapekṣayā || 16 ||
[Analyze grammar]

tāṃ tathā rudatīṃ rāmo rudan vacanamabravīt |
jīvantyā hi striyā bhartā daivataṃ prabhureva ca |
bhavatyā mama caivādya rājā prabhavati prabhuḥ || 17 ||
[Analyze grammar]

bharataścāpi dharmātmā sarvabhūtapriyaṃvadaḥ |
bhavatīmanuvarteta sa hi dharmarataḥ sadā || 18 ||
[Analyze grammar]

yathā mayi tu niṣkrānte putraśokena pārthivaḥ |
śramaṃ nāvāpnuyāt kiṃ cidapramattā tathā kuru || 19 ||
[Analyze grammar]

vratopavāsaniratā yā nārī paramottamā |
bhartāraṃ nānuvarteta sā ca pāpagatirbhavet || 20 ||
[Analyze grammar]

śuśrūṣameva kurvīta bhartuḥ priyahite ratā |
eṣa dharmaḥ purā dṛṣṭo loke vede śrutaḥ smṛtaḥ || 21 ||
[Analyze grammar]

pūjyāste matkṛte devi brāhmaṇāścaiva suvratāḥ |
evaṃ kālaṃ pratīkṣasva mamāgamanakāṅkṣiṇī || 22 ||
[Analyze grammar]

prāpsyase paramaṃ kāmaṃ mayi pratyāgate sati |
yadi dharmabhṛtāṃ śreṣṭho dhārayiṣyati jīvitam || 23 ||
[Analyze grammar]

evamuktā tu rāmeṇa bāṣpaparyākulekṣaṇā |
kausalyā putraśokārtā rāmaṃ vacanamabravīt |
gaccha putra tvamekāgro bhadraṃ te'stu sadā vibho || 24 ||
[Analyze grammar]

tathā hi rāmaṃ vanavāsaniścitaṃ samīkṣya devī parameṇa cetasā |
uvāca rāmaṃ śubhalakṣaṇaṃ vaco babhūva ca svastyayanābhikāṅkṣiṇī || 25 ||
[Analyze grammar]