Chapter 64

atha haimavatīṃ rāma diśaṃ tyaktvā mahāmuniḥ |
pūrvāṃ diśamanuprāpya tapastepe sudāruṇam || 1 ||
[Analyze grammar]

maunaṃ varṣasahasrasya kṛtvā vratamanuttamam |
cakārāpratimaṃ rāma tapaḥ paramaduṣkaram || 2 ||
[Analyze grammar]

pūrṇe varṣasahasre tu kāṣṭhabhūtaṃ mahāmunim |
vighnairbahubhirādhūtaṃ krodho nāntaramāviśat || 3 ||
[Analyze grammar]

tato devāḥ sagandharvāḥ pannagāsurarākṣasāḥ |
mohitāstejasā tasya tapasā mandaraśmayaḥ |
kaśmalopahatāḥ sarve pitāmahamathābruvan || 4 ||
[Analyze grammar]

bahubhiḥ kāraṇairdeva viśvāmitro mahāmuniḥ |
lobhitaḥ krodhitaścaiva tapasā cābhivardhate || 5 ||
[Analyze grammar]

na hyasya vṛjinaṃ kiṃ ciddṛśyate sūkṣmamapyatha |
na dīyate yadi tvasya manasā yadabhīpsitam |
vināśayati trailokyaṃ tapasā sacarācaram |
vyākulāśca diśaḥ sarvā na ca kiṃ cit prakāśate || 6 ||
[Analyze grammar]

sāgarāḥ kṣubhitāḥ sarve viśīryante ca parvatāḥ |
prakampate ca pṛthivī vāyurvāti bhṛśākulaḥ || 7 ||
[Analyze grammar]

buddhiṃ na kurute yāvannāśe deva mahāmuniḥ |
tāvat prasādyo bhagavānagnirūpo mahādyutiḥ || 8 ||
[Analyze grammar]

kālāgninā yathā pūrvaṃ trailokyaṃ dahyate'khilam |
devarājye cikīrṣeta dīyatāmasya yanmatam || 9 ||
[Analyze grammar]

tataḥ suragaṇāḥ sarve pitāmahapurogamāḥ |
viśvāmitraṃ mahātmānaṃ vākyaṃ madhuramabruvan || 10 ||
[Analyze grammar]

brahmarṣe svāgataṃ te'stu tapasā sma sutoṣitāḥ |
brāhmaṇyaṃ tapasogreṇa prāptavānasi kauśika || 11 ||
[Analyze grammar]

dīrghamāyuśca te brahmandadāmi samarudgaṇaḥ |
svasti prāpnuhi bhadraṃ te gaccha saumya yathāsukham || 12 ||
[Analyze grammar]

pitāmahavacaḥ śrutvā sarveṣāṃ ca divaukasām |
kṛtvā praṇāmaṃ mudito vyājahāra mahāmuniḥ || 13 ||
[Analyze grammar]

brāhmaṇyaṃ yadi me prāptaṃ dīrghamāyustathaiva ca |
oṃkāro'tha vaṣaṭkāro vedāśca varayantu mām || 14 ||
[Analyze grammar]

kṣatravedavidāṃ śreṣṭho brahmavedavidāmapi |
brahmaputro vasiṣṭho māmevaṃ vadatu devatāḥ |
yadyayaṃ paramaḥ kāmaḥ kṛto yāntu surarṣabhāḥ || 15 ||
[Analyze grammar]

tataḥ prasādito devairvasiṣṭho japatāṃ varaḥ |
sakhyaṃ cakāra brahmarṣirevamastviti cābravīt || 16 ||
[Analyze grammar]

brahmarṣitvaṃ na saṃdehaḥ sarvaṃ saṃpatsyate tava |
ityuktvā devatāścāpi sarvā jagmuryathāgatam || 17 ||
[Analyze grammar]

viśvāmitro'pi dharmātmā labdhvā brāhmaṇyamuttamam |
pūjayāmāsa brahmarṣiṃ vasiṣṭhaṃ japatāṃ varam || 18 ||
[Analyze grammar]

kṛtakāmo mahīṃ sarvāṃ cacāra tapasi sthitaḥ |
evaṃ tvanena brāhmaṇyaṃ prāptaṃ rāma mahātmanā || 19 ||
[Analyze grammar]

eṣa rāma muniśreṣṭha eṣa vigrahavāṃstapaḥ |
eṣa dharmaḥ paro nityaṃ vīryasyaiṣa parāyaṇam || 20 ||
[Analyze grammar]

śatānandavacaḥ śrutvā rāmalakṣmaṇasaṃnidhau |
janakaḥ prāñjalirvākyamuvāca kuśikātmajam || 21 ||
[Analyze grammar]

dhanyo'smyanugṛhīto'smi yasya me munipuṃgava |
yajñaṃ kākutstha sahitaḥ prāptavānasi dhārmika || 22 ||
[Analyze grammar]

pāvito'haṃ tvayā brahmandarśanena mahāmune |
guṇā bahuvidhāḥ prāptāstava saṃdarśanānmayā || 23 ||
[Analyze grammar]

vistareṇa ca te brahman kīrtyamānaṃ mahattapaḥ |
śrutaṃ mayā mahātejo rāmeṇa ca mahātmanā || 24 ||
[Analyze grammar]

sadasyaiḥ prāpya ca sadaḥ śrutāste bahavo guṇāḥ || 25 ||
[Analyze grammar]

aprameyaṃ tapastubhyamaprameyaṃ ca te balam |
aprameyā guṇāścaiva nityaṃ te kuśikātmaja || 26 ||
[Analyze grammar]

tṛptirāścaryabhūtānāṃ kathānāṃ nāsti me vibho |
karmakālo muniśreṣṭha lambate ravimaṇḍalam || 27 ||
[Analyze grammar]

śvaḥ prabhāte mahātejo draṣṭumarhasi māṃ punaḥ |
svāgataṃ tapasāṃ śreṣṭha māmanujñātumarhasi || 28 ||
[Analyze grammar]

evamuktvā muniśreṣṭhaṃ vaideho mithilādhipaḥ |
pradakṣiṇaṃ cakārāśu sopādhyāyaḥ sabāndhavaḥ || 29 ||
[Analyze grammar]

viśvāmitro'pi dharmātmā saharāmaḥ salakṣmaṇaḥ |
svaṃ vāṭamabhicakrāma pūjyamāno maharṣibhiḥ || 30 ||
[Analyze grammar]