Chapter 57

tatastriśaṅkorvacanaṃ śrutvā krodhasamanvitam |
ṛṣiputraśataṃ rāma rājānamidamabravīt || 1 ||
[Analyze grammar]

pratyākhyāto'si durbuddhe guruṇā satyavādinā |
taṃ kathaṃ samatikramya śākhāntaramupeyivān || 2 ||
[Analyze grammar]

ikṣvākūṇāṃ hi sarveṣāṃ purodhāḥ paramā gatiḥ |
na cātikramituṃ śakyaṃ vacanaṃ satyavādinaḥ || 3 ||
[Analyze grammar]

aśakyamiti covāca vasiṣṭho bhagavānṛṣiḥ |
taṃ vayaṃ vai samāhartuṃ kratuṃ śaktāḥ kathaṃ tava || 4 ||
[Analyze grammar]

bāliśastvaṃ naraśreṣṭha gamyatāṃ svapuraṃ punaḥ |
yājane bhagavāñ śaktastrailokyasyāpi pārthiva || 5 ||
[Analyze grammar]

teṣāṃ tadvacanaṃ śrutvā krodhaparyākulākṣaram |
sa rājā punarevaitānidaṃ vacanamabravīt || 6 ||
[Analyze grammar]

pratyākhyāto'smi guruṇā guruputraistathaiva ca |
anyāṃ gatiṃ gamiṣyāmi svasti vo'stu tapodhanāḥ || 7 ||
[Analyze grammar]

ṛṣiputrāstu tacchrutvā vākyaṃ ghorābhisaṃhitam |
śepuḥ paramasaṃkruddhāścaṇḍālatvaṃ gamiṣyasi |
evamuktvā mahātmāno viviśuste svamāśramam || 8 ||
[Analyze grammar]

atha rātryāṃ vyatītāyāṃ rājā caṇḍālatāṃ gataḥ |
nīlavastradharo nīlaḥ paruṣo dhvastamūrdhajaḥ |
cityamālyānulepaśca āyasābharaṇo'bhavat || 9 ||
[Analyze grammar]

taṃ dṛṣṭvā mantriṇaḥ sarve tyaktvā caṇḍālarūpiṇam |
prādravan sahitā rāma paurā ye'syānugāminaḥ || 10 ||
[Analyze grammar]

eko hi rājā kākutstha jagāma paramātmavān |
dahyamāno divārātraṃ viśvāmitraṃ tapodhanam || 11 ||
[Analyze grammar]

viśvāmitrastu taṃ dṛṣṭvā rājānaṃ viphalīkṛtam |
caṇḍālarūpiṇaṃ rāma muniḥ kāruṇyamāgataḥ || 12 ||
[Analyze grammar]

kāruṇyāt sa mahātejā vākyaṃ parama dhārmikaḥ |
idaṃ jagāda bhadraṃ te rājānaṃ ghoradarśanam || 13 ||
[Analyze grammar]

kimāgamanakāryaṃ te rājaputra mahābala |
ayodhyādhipate vīra śāpāccaṇḍālatāṃ gataḥ || 14 ||
[Analyze grammar]

atha tadvākyamākarṇya rājā caṇḍālatāṃ gataḥ |
abravīt prāñjalirvākyaṃ vākyajño vākyakovidam || 15 ||
[Analyze grammar]

pratyākhyāto'smi guruṇā guruputraistathaiva ca |
anavāpyaiva taṃ kāmaṃ mayā prāpto viparyayaḥ || 16 ||
[Analyze grammar]

saśarīro divaṃ yāyāmiti me saumyadarśanam |
mayā ceṣṭaṃ kratuśataṃ tacca nāvāpyate phalam || 17 ||
[Analyze grammar]

anṛtaṃ nokta pūrvaṃ me na ca vakṣye kadā cana |
kṛcchreṣvapi gataḥ saumya kṣatradharmeṇa te śape || 18 ||
[Analyze grammar]

yajñairbahuvidhairiṣṭaṃ prajā dharmeṇa pālitāḥ |
guravaśca mahātmānaḥ śīlavṛttena toṣitāḥ || 19 ||
[Analyze grammar]

dharme prayatamānasya yajñaṃ cāhartumicchataḥ |
paritoṣaṃ na gacchanti guravo munipuṃgava || 20 ||
[Analyze grammar]

daivameva paraṃ manye pauruṣaṃ tu nirarthakam |
daivenākramyate sarvaṃ daivaṃ hi paramā gatiḥ || 21 ||
[Analyze grammar]

tasya me paramārtasya prasādamabhikāṅkṣataḥ |
kartumarhasi bhadraṃ te daivopahatakarmaṇaḥ || 22 ||
[Analyze grammar]

nānyāṃ gatiṃ gamiṣyāmi nānyaḥ śaraṇamasti me |
daivaṃ puruṣakāreṇa nivartayitumarhasi || 23 ||
[Analyze grammar]