Chapter 34

upāsya rātriśeṣaṃ tu śoṇākūle maharṣibhiḥ |
niśāyāṃ suprabhātāyāṃ viśvāmitro'bhyabhāṣata || 1 ||
[Analyze grammar]

suprabhātā niśā rāma pūrvā saṃdhyā pravartate |
uttiṣṭhottiṣṭha bhadraṃ te gamanāyābhirocaya || 2 ||
[Analyze grammar]

tacchrutvā vacanaṃ tasya kṛtvā paurvāhṇikīṃ kriyām |
gamanaṃ rocayāmāsa vākyaṃ cedamuvāca ha || 3 ||
[Analyze grammar]

ayaṃ śoṇaḥ śubhajalo gādhaḥ pulinamaṇḍitaḥ |
katareṇa pathā brahman saṃtariṣyāmahe vayam || 4 ||
[Analyze grammar]

evamuktastu rāmeṇa viśvāmitro'bravīdidam |
eṣa panthā mayoddiṣṭo yena yānti maharṣayaḥ || 5 ||
[Analyze grammar]

te gatvā dūramadhvānaṃ gate'rdhadivase tadā |
jāhnavīṃ saritāṃ śreṣṭhāṃ dadṛśurmunisevitām || 6 ||
[Analyze grammar]

tāṃ dṛṣṭvā puṇyasalilāṃ haṃsasārasasevitām |
babhūvurmuditāḥ sarve munayaḥ saharāghavāḥ |
tasyāstīre tataścakruste āvāsaparigraham || 7 ||
[Analyze grammar]

tataḥ snātvā yathānyāyaṃ saṃtarpya pitṛdevatāḥ |
hutvā caivāgnihotrāṇi prāśya cāmṛtavaddhaviḥ || 8 ||
[Analyze grammar]

viviśurjāhnavītīre śucau muditamānasāḥ |
viśvāmitraṃ mahātmānaṃ parivārya samantataḥ || 9 ||
[Analyze grammar]

saṃprahṛṣṭamanā rāmo viśvāmitramathābravīt |
bhagavañ śrotumicchāmi gaṅgāṃ tripathagāṃ nadīm |
trailokyaṃ kathamākramya gatā nadanadīpatim || 10 ||
[Analyze grammar]

codito rāma vākyena viśvāmitro mahāmuniḥ |
vṛddhiṃ janma ca gaṅgāyā vaktumevopacakrame || 11 ||
[Analyze grammar]

śailendro himavānnāma dhātūnāmākaro mahān |
tasya kanyā dvayaṃ rāma rūpeṇāpratimaṃ bhuvi || 12 ||
[Analyze grammar]

yā meruduhitā rāma tayormātā sumadhyamā |
nāmnā menā manojñā vai patnī himavataḥ priyā || 13 ||
[Analyze grammar]

tasyāṃ gaṅgeyamabhavajjyeṣṭhā himavataḥ sutā |
umā nāma dvitīyābhūt kanyā tasyaiva rāghava || 14 ||
[Analyze grammar]

atha jyeṣṭhāṃ surāḥ sarve devatārthacikīrṣayā |
śailendraṃ varayāmāsurgaṅgāṃ tripathagāṃ nadīm || 15 ||
[Analyze grammar]

dadau dharmeṇa himavāṃstanayāṃ lokapāvanīm |
svacchandapathagāṃ gaṅgāṃ trailokyahitakāmyayā || 16 ||
[Analyze grammar]

pratigṛhya trilokārthaṃ trilokahitakāriṇaḥ |
gaṅgāmādāya te'gacchan kṛtārthenāntarātmanā || 17 ||
[Analyze grammar]

yā cānyā śailaduhitā kanyāsīd raghunandana |
ugraṃ sā vratamāsthāya tapastepe tapodhanā || 18 ||
[Analyze grammar]

ugreṇa tapasā yuktāṃ dadau śailavaraḥ sutām |
rudrāyāpratirūpāya umāṃ lokanamaskṛtām || 19 ||
[Analyze grammar]

ete te śaila rājasya sute lokanamaskṛte |
gaṅgā ca saritāṃ śreṣṭhā umā devī ca rāghava || 20 ||
[Analyze grammar]

etatte dharmamākhyātaṃ yathā tripathagā nadī |
khaṃ gatā prathamaṃ tāta gatiṃ gatimatāṃ vara || 21 ||
[Analyze grammar]