Chapter 31

brahmayonirmahānāsīt kuśo nāma mahātapāḥ |
vaidarbhyāṃ janayāmāsa caturaḥ sadṛśān sutān |
kuśāmbaṃ kuśanābhaṃ ca ādhūrtarajasaṃ vasum || 1 ||
[Analyze grammar]

dīptiyuktānmahotsāhān kṣatradharmacikīrṣayā |
tānuvāca kuśaḥ putrāndharmiṣṭhān satyavādinaḥ |
kriyatāṃ pālanaṃ putrā dharmaṃ prāpsyatha puṣkalam || 2 ||
[Analyze grammar]

kuśasya vacanaṃ śrutvā catvāro lokasaṃmatāḥ |
niveśaṃ cakrire sarve purāṇāṃ nṛvarāstadā || 3 ||
[Analyze grammar]

kuśāmbastu mahātejāḥ kauśāmbīmakarot purīm |
kuśanābhastu dharmātmā paraṃ cakre mahodayam || 4 ||
[Analyze grammar]

ādhūrtarajaso rāma dharmāraṇyaṃ mahīpatiḥ |
cakre puravaraṃ rājā vasuścakre girivrajam || 5 ||
[Analyze grammar]

eṣā vasumatī rāma vasostasya mahātmanaḥ |
ete śailavarāḥ pañca prakāśante samantataḥ || 6 ||
[Analyze grammar]

sumāgadhī nadī ramyā māgadhān viśrutāyayau |
pañcānāṃ śailamukhyānāṃ madhye māleva śobhate || 7 ||
[Analyze grammar]

saiṣā hi māgadhī rāma vasostasya mahātmanaḥ |
pūrvābhicaritā rāma sukṣetrā sasyamālinī || 8 ||
[Analyze grammar]

kuśanābhastu rājarṣiḥ kanyāśatamanuttamam |
janayāmāsa dharmātmā ghṛtācyāṃ raghunandana || 9 ||
[Analyze grammar]

tāstu yauvanaśālinyo rūpavatyaḥ svalaṃkṛtāḥ |
udyānabhūmimāgamya prāvṛṣīva śatahradāḥ || 10 ||
[Analyze grammar]

gāyantyo nṛtyamānāśca vādayantyaśca rāghava |
āmodaṃ paramaṃ jagmurvarābharaṇabhūṣitāḥ || 11 ||
[Analyze grammar]

atha tāścārusarvāṅgyo rūpeṇāpratimā bhuvi |
udyānabhūmimāgamya tārā iva ghanāntare || 12 ||
[Analyze grammar]

tāḥ sarvaguṇasaṃpannā rūpayauvanasaṃyutāḥ |
dṛṣṭvā sarvātmako vāyuridaṃ vacanamabravīt || 13 ||
[Analyze grammar]

ahaṃ vaḥ kāmaye sarvā bhāryā mama bhaviṣyatha |
mānuṣastyajyatāṃ bhāvo dīrghamāyuravāpsyatha || 14 ||
[Analyze grammar]

tasya tadvacanaṃ śrutvā vāyorakliṣṭakarmaṇaḥ |
apahāsya tato vākyaṃ kanyāśatamathābravīt || 15 ||
[Analyze grammar]

antaścarasi bhūtānāṃ sarveṣāṃ tvaṃ surottama |
prabhāvajñāśca te sarvāḥ kimasmānavamanyase || 16 ||
[Analyze grammar]

kuśanābhasutāḥ sarvāḥ samarthāstvāṃ surottama |
sthānāccyāvayituṃ devaṃ rakṣāmastu tapo vayam || 17 ||
[Analyze grammar]

mā bhūt sa kālo durmedhaḥ pitaraṃ satyavādinam |
nāvamanyasva dharmeṇa svayaṃ varamupāsmahe || 18 ||
[Analyze grammar]

pitā hi prabhurasmākaṃ daivataṃ paramaṃ hi saḥ |
yasya no dāsyati pitā sa no bhartā bhaviṣyati || 19 ||
[Analyze grammar]

tāsāṃ tadvacanaṃ śrutvā vāyuḥ paramakopanaḥ |
praviśya sarvagātrāṇi babhañja bhagavānprabhuḥ || 20 ||
[Analyze grammar]

tāḥ kanyā vāyunā bhagnā viviśurnṛpatergṛham |
dṛṣṭvā bhagnāstadā rājā saṃbhrānta idamabravīt || 21 ||
[Analyze grammar]

kimidaṃ kathyatāṃ putryaḥ ko dharmamavamanyate |
kubjāḥ kena kṛtāḥ sarvā veṣṭantyo nābhibhāṣatha || 22 ||
[Analyze grammar]