Chapter 8

tasya tvevaṃ prabhāvasya dharmajñasya mahātmanaḥ |
sutārthaṃ tapyamānasya nāsīdvaṃśakaraḥ sutaḥ || 1 ||
[Analyze grammar]

cintayānasya tasyaivaṃ buddhirāsīnmahātmanaḥ |
sutārthaṃ vājimedhena kimarthaṃ na yajāmyaham || 2 ||
[Analyze grammar]

sa niścitāṃ matiṃ kṛtvā yaṣṭavyamiti buddhimān |
mantribhiḥ saha dharmātmā sarvaireva kṛtātmabhiḥ || 3 ||
[Analyze grammar]

tato'bravīdidaṃ rājā sumantraṃ mantrisattamam |
śīghramānaya me sarvān gurūṃstān sapurohitān || 4 ||
[Analyze grammar]

etacchrutvā rahaḥ sūto rājānamidamabravīt |
ṛtvigbhirupadiṣṭo'yaṃ purāvṛtto mayā śrutaḥ || 5 ||
[Analyze grammar]

sanatkumāro bhagavānpūrvaṃ kathitavān kathām |
ṛṣīṇāṃ saṃnidhau rājaṃstava putrāgamaṃ prati || 6 ||
[Analyze grammar]

kāśyapasya tu putro'sti vibhāṇḍaka iti śrutaḥ |
ṛśyaśṛṅga iti khyātastasya putro bhaviṣyati || 7 ||
[Analyze grammar]

sa vane nityasaṃvṛddho munirvanacaraḥ sadā |
nānyaṃ jānāti viprendro nityaṃ pitranuvartanāt || 8 ||
[Analyze grammar]

dvaividhyaṃ brahmacaryasya bhaviṣyati mahātmanaḥ |
lokeṣu prathitaṃ rājan vipraiśca kathitaṃ sadā || 9 ||
[Analyze grammar]

tasyaivaṃ vartamānasya kālaḥ samabhivartata |
agniṃ śuśrūṣamāṇasya pitaraṃ ca yaśasvinam || 10 ||
[Analyze grammar]

etasminneva kāle tu lomapādaḥ pratāpavān |
aṅgeṣu prathito rājā bhaviṣyati mahābalaḥ || 11 ||
[Analyze grammar]

tasya vyatikramād rājño bhaviṣyati sudāruṇā |
anāvṛṣṭiḥ sughorā vai sarvabhūtabhayāvahā || 12 ||
[Analyze grammar]

anāvṛṣṭyāṃ tu vṛttāyāṃ rājā duḥkhasamanvitaḥ |
brāhmaṇāñ śrutavṛddhāṃśca samānīya pravakṣyati || 13 ||
[Analyze grammar]

bhavantaḥ śrutadharmāṇo lokacāritravedinaḥ |
samādiśantu niyamaṃ prāyaścittaṃ yathā bhavet || 14 ||
[Analyze grammar]

vakṣyanti te mahīpālaṃ brāhmaṇā vedapāragāḥ |
vibhāṇḍakasutaṃ rājan sarvopāyairihānaya || 15 ||
[Analyze grammar]

ānāyya ca mahīpāla ṛśyaśṛṅgaṃ susatkṛtam |
prayaccha kanyāṃ śāntāṃ vai vidhinā susamāhitaḥ || 16 ||
[Analyze grammar]

teṣāṃ tu vacanaṃ śrutvā rājā cintāṃ prapatsyate |
kenopāyena vai śakyamihānetuṃ sa vīryavān || 17 ||
[Analyze grammar]

tato rājā viniścitya saha mantribhirātmavān |
purohitamamātyāṃśca preṣayiṣyati satkṛtān || 18 ||
[Analyze grammar]

te tu rājño vacaḥ śrutvā vyathitā vanatānanāḥ |
na gacchema ṛṣerbhītā anuneṣyanti taṃ nṛpam || 19 ||
[Analyze grammar]

vakṣyanti cintayitvā te tasyopāyāṃśca tān kṣamān |
āneṣyāmo vayaṃ vipraṃ na ca doṣo bhaviṣyati || 20 ||
[Analyze grammar]

evamaṅgādhipenaiva gaṇikābhirṛṣeḥ sutaḥ |
ānīto'varṣayaddevaḥ śāntā cāsmai pradīyate || 21 ||
[Analyze grammar]

ṛśyaśṛṅgastu jāmātā putrāṃstava vidhāsyati |
sanatkumārakathitametāvadvyāhṛtaṃ mayā || 22 ||
[Analyze grammar]

atha hṛṣṭo daśarathaḥ sumantraṃ pratyabhāṣata |
yatharṣyaśṛṅgastvānīto vistareṇa tvayocyatām || 23 ||
[Analyze grammar]