Chapter 5

pañcamaḥ paṭalaḥ |
kalādīkṣā sureśāna kathitā parameśvara |
tattvadīkṣā samāsena kathayasva prasādataḥ || 1 ||
[Analyze grammar]

samāsātkathayiṣyāmi tvatpriyārthaṃ varānane |
ṣaṭtriṃśattattvamukhyāni yathā śodhyāni pārvati || 2 ||
[Analyze grammar]

pṛthivyādiśivāntāni svavyāptyānuguṇaiḥ saha |
yathā śuddhyānti deveśi tathā te kathayāmyaham || 3 ||
[Analyze grammar]

vidyārājasya ye varṇā navasaṃkhyopalakṣitāḥ |
vācakāste ca tattvānāṃ kathayāmyanupūrvaśaḥ || 4 ||
[Analyze grammar]

dharitryādipradhānāntamūkāro vācakaḥ smṛtaḥ |
puruṣasya yakāro vai rāgatattvānvitasya ca || 5 ||
[Analyze grammar]

niyāmikāṃ vakāreṇa vidyātattvasamanvitām |
kālaṃ kalāṃ lakāreṇa kalpayettu varānane || 6 ||
[Analyze grammar]

māyātattvaṃ makāreṇa vidyātattvaṃ kṣakārataḥ |
repheṇa caiśvaraṃ tattvaṃ hakāreṇa sadāśivaḥ || 7 ||
[Analyze grammar]

praṇavena tathā śaktirnyasitavyā varānane |
vyāpinīṃ samanāṃ cordhvaṃ tatraiva tu viśodhayet || 8 ||
[Analyze grammar]

śodhayitvā krameṇaiva mūlamantreṇa suvrate |
yojya ātmā pare tattve unmanātītasarvage || 9 ||
[Analyze grammar]

nirābhāse pare śānte īśāne cāvyaye tvaje |
ṣaṭtriṃśattattvamākhyātaṃ navatattvaṃ pracakṣmahe || 10 ||
[Analyze grammar]

prakṛtiḥ puruṣaścaiva niyatiḥ kāla eva ca |
māyā vidyā tatheśaśca sadāśivaśivau tathā || 11 ||
[Analyze grammar]

śodhayitvā tu vidhivadvyāptyātmānaṃ niyojayet |
pañcatattvī yadā śodhyā vaktramantrāstu vācakāḥ || 12 ||
[Analyze grammar]

dharitryādi khaparyantaṃ śodhayettatkrameṇa tu |
kalānāṃ yāvatī vyāptistattvānāṃ tāvadeva hi || 13 ||
[Analyze grammar]

tritattvamadhunā vakṣye yathā śodhyaṃ varānane |
akāra ātmatattvasya vācakaḥ parikīrtitaḥ || 14 ||
[Analyze grammar]

māyāntaṃ tadvijānīyāt vidyākhyasyāpyukārakaḥ |
sakalāvadhi tajjñeyaṃ śivasya tu makārakaḥ || 15 ||
[Analyze grammar]

khasvaraḥ khasvarūpasya śivatattvasya vācakaḥ |
śodhayitvā krameṇaiva pare tattve niyojayet || 16 ||
[Analyze grammar]

tattvadīkṣā samākhyātā caturbhedavyavasthitā |
paradīkṣāṃ pravakṣyāmi yathāvadanupūrvaśaḥ || 17 ||
[Analyze grammar]

vidyārāje tu ye varṇā navasaṃkhyopalakṣitāḥ |
pṛthagbhedena teṣāṃ tu vinyāsaṃ kathayāmi te || 18 ||
[Analyze grammar]

navanābhaṃ puraṃ kṛtvā navapadmopalakṣitam |
navahastaṃ likhedveśma aṣṭaparvādhikaṃ budhaḥ || 19 ||
[Analyze grammar]

saptabhāgīkṛtaṃ tattu dakṣiṇottarabhājitam |
caturaśraṃ vibhajyādau matsyaiścaivātra cihnitam || 20 ||
[Analyze grammar]

koṣṭhakaikonapañcāśatsūtreṇa tu samālikhet |
madhyame koṣṭhake sūtraṃ dvātriṃśāṅgulasammitam || 21 ||
[Analyze grammar]

samālikhya mahādevi caturbhāgavibhājite |
prathame karṇikāṃ kuryātkesarāṇi dvitīyake || 22 ||
[Analyze grammar]

tṛtīye dalasandhīṃśca dalāgrāṇi caturthake |
dikṣu rekhāṣṭakaṃ dattvā pratidikṣu tathaiva ca || 23 ||
[Analyze grammar]

bhrāmayeccaturo vṛttāṃścaturaṅgulasammitān |
dvābhyāṃ pratidigrekhābhyāṃ madhye sūtraṃ nidhāpya tat || 24 ||
[Analyze grammar]

sūtrāgraṃ tu tato bhrāmyamardhacandravidhānataḥ |
madhyasūtraṃ ca dātavyaṃ kiñjalkasthaṃ vipaścitā || 25 ||
[Analyze grammar]

pūrvapatraṃ prasādhyavamitarāṇyevameva hi |
kesarāṇi ca saṃlikhya caturviṃśatisaṃkhyayā || 26 ||
[Analyze grammar]

patrāgrato nyasellekhāṃ vartulāṃ tu suśobhanām |
tasyāntaṃ caturaśraṃ tu kartavyaṃ tatpramāṇataḥ || 27 ||
[Analyze grammar]

pūrvaṃ brahma prasādhyaṃ tu viṣuvatsthena helinā |
pūrvapaścāttataṃ sūtraṃ śaṅkunā sādhayetpriye || 28 ||
[Analyze grammar]

dvādaśāṅgulamānena madhye śaṅkuṃ praropya tam |
pārśveṣu bhrāmayedrekhāṃ ṣoḍaśāṅgulasammitām || 29 ||
[Analyze grammar]

pūrvāhne grāhayecchāyāmaparasthāṃ sucihnitām |
aparasthena sūryeṇa prākchāyāṃ lāñchayetpriye || 30 ||
[Analyze grammar]

dhruveṇottaradakṣasthāṃ lāñchayettu varānane |
tataḥ samālikhetpadmamaṣṭapatraṃ sakarṇikam || 31 ||
[Analyze grammar]

dikkoṣṭhakāṃśca saṃgṛhya aṣṭasaṃkhyopalakṣitam |
śeṣā lopyā varārohe ekāntaritayogataḥ || 32 ||
[Analyze grammar]

padmāṣṭakaṃ tato dikṣu bāhye dvārāṇi cālikhet |
vīthyardhasammitāṃ devi śobhāṃ caiva prakalpayet || 33 ||
[Analyze grammar]

upaśobhāṃ ca tanmānāṃ kapolāntaṃ samālikhet |
tathā kaṇṭhaṃ ca tanmānaṃ dvārametatprakīrtitam || 34 ||
[Analyze grammar]

dvārāṣṭakavibhāgena navanābhaṃ puraṃ smṛtam |
snātvā tu vidhivaddevi praviśedbhavanaṃ guruḥ || 35 ||
[Analyze grammar]

pūrvoktena vidhānena sakalīkaraṇādikam |
tataḥ sampūjayeddevaṃ bhairavaṃ parameśvaram || 36 ||
[Analyze grammar]

praṇavenāsanaṃ dattvā śivāntaṃ varavarṇini |
madhye sampūjayeddevaṃ svacchandaṃ parameśvaram || 37 ||
[Analyze grammar]

pūrvoktena vidhānena aṅgaṣaṭkasamanvitam |
patrāṣṭake nyasedvarṇānpūrvādīśāṃśtataḥ kramāt || 38 ||
[Analyze grammar]

sadāśivaṃ hakāreṇetyevamādi varānane |
prakṛtyantaṃ vijānīyānmadhye pīṭheśakalpanā || 39 ||
[Analyze grammar]

dikpadmakarṇikāsaṃsthānaṣṭau devānprapūjayet |
tatsthāne bhairavaḥ pūjyaḥ śeṣā varṇairyathākramam || 40 ||
[Analyze grammar]

śodhayecca prakṛtyādiśivāntaṃ surasundari |
īśānadiśa ārabhya madhyapīṭhaṃ viśodhayet || 41 ||
[Analyze grammar]

yojayettu pare tattve śive paramakāraṇe |
evaṃ varṇāstathā mantrānbhuvanāni viśodhayet || 42 ||
[Analyze grammar]

kālāgnyādi śivāntaṃ tu kalāvidhi samāśrayet |
samayān śrāvayetpaścāttantrāmnāyotthitānpriye || 43 ||
[Analyze grammar]

na nindedbhairavaṃ devaṃ śāstraṃ vānyasamudbhavam |
sāṃkhyaṃ yogaṃ pāñcarātraṃ vedāṃścaiva na nindayet || 44 ||
[Analyze grammar]

yataḥ śivodbhavāḥ sarve hyapavargaphalapradāḥ |
smārtaṃ dharmaṃ na nindettu ācārapathadarśakam || 45 ||
[Analyze grammar]

brahmādidevatā yāśca mātaraścumbako giriḥ |
vīrāścaiva bhaginyaśca gāvo bhūtagaṇāstathā || 46 ||
[Analyze grammar]

devadravyaṃ na hiṃsyāttu siddhānte yadvyavasthitam |
gurorannaṃ na bhuñjīta adattaṃ parameśvari || 47 ||
[Analyze grammar]

madyaṃ māṃsaṃ tathā matsyānanyāni ca varānane |
sācārāśca nirācārāṃl liṅgino na jugupsayet || 48 ||
[Analyze grammar]

carukaṃ prāśayannityaṃ gurūn sampūjayetsadā |
upaskarānmahādevi pādena tu na saṃspṛśet || 49 ||
[Analyze grammar]

saṃhitāṃ cintayennityaṃ bhaktānāṃ śrāvayetsadā |
āhnikaṃ na vilumpettu sandhyākarma varānane || 50 ||
[Analyze grammar]

adīkṣitānāṃ purato noccarecchāstrapaddhatim |
trikālaṃ pūjayeddevaṃ japadhyānarataḥ sadā || 51 ||
[Analyze grammar]

samayānpālayannityamubhayārthaphalepsayā |
ato vijñānadīkṣāṃ tu pravakṣyāmyanupūrvaśaḥ || 52 ||
[Analyze grammar]

adhyātmagaticāreṇa kevalena viśodhikām |
śiṣyātmānaṃ gṛhītvā tamātmaprāṇe niyojayet || 53 ||
[Analyze grammar]

abhimānaṃ tathoccārya kuryādvai pūrvavattadā |
udghātaiśca tato'dhvānaṃ śiṣyasya tu viśodhayet || 54 ||
[Analyze grammar]

tataḥ samuccaraṃstattvaṃ pṛthivyādyaṃ tu suvrate |
bhinnābhinnasvarūpeṇa ekaikaṃ tu yathākramam || 55 ||
[Analyze grammar]

sasvaraṃ hyakṣaroccāraṃ devatābhiḥ samanvitam |
bindunā śaktisaṃyogādudghātaḥ prathamaḥ smṛtaḥ || 56 ||
[Analyze grammar]

devatātrayanirmuktaḥ caturthāntasamanvitaḥ |
udghātaḥ sa tu deveśi dvitīyaḥ parikīrtitaḥ || 57 ||
[Analyze grammar]

haṃsākṣarasamuccāraḥ sudīrgho bindusaṃyutaḥ |
ardhacandrānnirodhinyāmudghātastu tṛtīyakaḥ || 58 ||
[Analyze grammar]

bhinnodghātau yadā devi nādāntastu tadā bhavet |
udghātaḥ sa tu deveśi caturthaḥ parikīrtitaḥ || 59 ||
[Analyze grammar]

sa eva cākṣaroccāro vyāpinyante vyavasthitaḥ |
udghātaḥ sa tu deveśi pañcamaḥ parikīrtitaḥ || 60 ||
[Analyze grammar]

pañcodghātāṃstato dattvā pṛthivīṃ śodhayedbudhaḥ |
akārokāramakārāntamevaṃ śuddhyati nānyathā || 61 ||
[Analyze grammar]

śuddhe'tha pārthive tattve cintitavyaṃ tu yogibhiḥ |
jalībhūtaṃ tadevaitadātmanā saha yogataḥ || 62 ||
[Analyze grammar]

jalībhūte punarmantrī tadeva caturuccaret |
bindvantaṃ dhāraṇāyuktaṃ śiṣyādātmani cintayet || 63 ||
[Analyze grammar]

śodhite toyasaṃghāte tejobhūtaṃ vicintayet |
tejodghātāstrayasteṣu nirodhyantamavasthitāḥ || 64 ||
[Analyze grammar]

nāsti tejastato vāyurudghātadvayaśodhitaḥ |
ākāśe līyamānaṃ tamudghātena tu cintayet || 65 ||
[Analyze grammar]

naṣṭe vāyau tataḥ śūnyamudghātaikena yojayet |
vyāpinī sā tu vijñeyā pañcamānte vyavasthitā || 66 ||
[Analyze grammar]

samanāyāṃ tato hyātmā tattvavyāpī sa ucyate |
ātmavyāpī tataścordhvaṃ sarvavyāpī tataḥ punaḥ || 67 ||
[Analyze grammar]

tattvāntasaṃsthito hyātmā udghātaikena yogavit |
yojayetparame tattve unmanātītasarvage || 68 ||
[Analyze grammar]

yojanāṃ tu pare tattve śṛṇu devi vadāmyaham |
mantramuccārayeddevi hrasvaṃ dīrghaṃ plutaṃ param || 69 ||
[Analyze grammar]

parāparavibhāgena yāvattattvaṃ paraṃ gatam |
tridevaṃ bindusaṃyuktamardhacandraṃ nirodhikām || 70 ||
[Analyze grammar]

nādaṃ ca śaktisaṃyuktaṃ vyāpinīsamanonmanāḥ |
unmanā ca paraścaiva sarvavyāpī śivo'vyayaḥ || 71 ||
[Analyze grammar]

jñātvā sarvamaśeṣeṇa vidhimeṣāṃ yathākramam |
tadā tu yojayenmantrī anyathā naiva yojayet || 72 ||
[Analyze grammar]

bindusthaṃ tritayaṃ śabde caturtho bindureva hi |
brahmā viṣṇustathā rudraḥ trimāṇaṃ varṇa ucyate || 73 ||
[Analyze grammar]

īśvaro bindudevastu kaṇṭhe śabdaḥ pravartate |
tatra śabdaḥ kriyāntasthaḥ kriyāśaktiriti smṛtā || 74 ||
[Analyze grammar]

sa śabdastāluke devi īritaḥ sampravartate |
tasya kiṃcidgataḥ śabdo nāsikānte pravartate || 75 ||
[Analyze grammar]

jñānaśaktistuvijñeyā yatnataḥ parameśvari |
mūrdhasthānagataḥ śabdo lalāṭāntamavasthitaḥ || 76 ||
[Analyze grammar]

varṇaḥ śabdagataḥ teṣāmudghātaḥ sa tu kīrtitaḥ |
tatrasthā vinivartante śivajñānavivarjitāḥ || 77 ||
[Analyze grammar]

pañcadhāvasthito bindurardhacandro nirodhikā |
tasyātīto bhavennādaḥ avicchinnastvasau bhavet || 78 ||
[Analyze grammar]

īṣatprasārite vaktre devadevaḥ sadāśivaḥ |
caturvidho bhavecchabdo yaḥ suvegavahaḥ smṛtaḥ || 79 ||
[Analyze grammar]

pañcamo na vahecchabdaḥ ūrdhvagāminyasau smṛtā |
tasyātītā bhavecchaktiḥ pañcadhā tu vyavasthitā || 80 ||
[Analyze grammar]

sparśastatra bhaveddevi ātmavittatra pūrvavat |
vyāpinī parataścaiva pañcadhā tu vyavasthitā || 81 ||
[Analyze grammar]

vālāgramāśritaṃ sparśaṃ kadācidvetti vā na vā |
vyāpinī sā samuddiṣṭā na jñānaṃ parameśvari || 82 ||
[Analyze grammar]

tasyāpi samanātītā manastatra na kārayet |
unmanāpadamārohan śuddhātmā tu tato bhavet || 83 ||
[Analyze grammar]

śiṣyātmānaṃ guruvara unmanyante niyojayet |
tatra yuktaḥ pare śānte mahāśāntimavāpnuyāt || 84 ||
[Analyze grammar]

gurupāramparāyātaḥ sampradāyaḥ prakāśitaḥ |
yojane tu pare tattve upāyaḥ kathitastava || 85 ||
[Analyze grammar]

evaṃ jñātvā varārohe sarvakarmāṇi kārayet |
tattvādhvānaṃ kalādhvānaṃ bhuvanādhvānameva ca || 86 ||
[Analyze grammar]

varṇamantrapadādhvānaṃ kṛtvaivaṃ śuddhyati priye |
eṣā vai dhāraṇādīkṣā kartavyā yoginātra tu || 87 ||
[Analyze grammar]

mantrasiddhena vā devi kṛtā vai sukṛtā bhavet |
iti svacchandatantre tattvadīkṣāprakāśanaṃ nāma pañcamaḥ paṭalaḥ || 88 ||
[Analyze grammar]