Chapter 52

[English text for this chapter is available]

pulastya uvāca |
tato gacchennṛpaśreṣṭha īśānīśikharaṃ mahat |
yatra gauryā tapastaptaṃ supuṇyaṃ lokaviśrutam || 1 ||
[Analyze grammar]

yasya saṃdarśanenāpi naraḥ pāpātpramucyate |
labhate cātisaubhāgyaṃ saptajanmāṃtarāṇi ca || 2 ||
[Analyze grammar]

yayātiruvāca |
kasminkāle tapastaptaṃ devyā tatra munīśvara |
kimarthaṃ ca mahattvetatkautukaṃ vaktumarhasi || 3 ||
[Analyze grammar]

pulastya uvāca |
śṛṇu rājankathāṃ divyāmadbhutāṃ lokaviśrutām |
yasyāḥ saṃśravaṇādeva mucyate sarvapātakaiḥ || 4 ||
[Analyze grammar]

purā gauryā samāsaktaṃ jñātvā devāḥ savāsavāḥ |
maṃtraṃ cakrurbhayāviṣṭā ekāṃte samupāśritāḥ || 9 ||
[Analyze grammar]

vīryaṃ yadi trinetrasya kṣetre gauryāḥ patiṣyati |
asmākaṃ patanaṃ nūnaṃ jagataśca bhaviṣyati || 6 ||
[Analyze grammar]

saṃtatestu vināśāya tato gacchāmahe vayam || 7 ||
[Analyze grammar]

evaṃ saṃmaṃtrya devāste kailāsaṃ parvataṃ gatāḥ |
tatastu naṃdinā sarve niṣiddhāḥ samayaṃ vinā || 8 ||
[Analyze grammar]

naṃdyuvāca |
ekāṃte bhagavānrudraḥ sahagauryā vyavasthitaḥ |
tasmāddevagaṇāḥ sarve gacchadhvaṃ nilayaṃ svakam || 9 ||
[Analyze grammar]

atha devagaṇāḥ sarve vañcayitvā ca taṃ gaṇam |
praiṣayaṃstatra vāyuṃ ca guptamūcurvacastvidam || 10 ||
[Analyze grammar]

gatvā vāyo bhavaṃ brūhi na kāryā saṃtatistvayā |
evaṃ devagaṇā deva prārthayaṃti bhayāturāḥ || 11 ||
[Analyze grammar]

tato vāyurdrutaṃ gatvā sthito yatra maheśvaraḥ |
uccairjagāda tadvākyaṃ yaduktaṃ tridaśālayaiḥ || 12 ||
[Analyze grammar]

tatastu bhagavāñcharvo vrīḍayā parayā yutaḥ |
gaurīṃ tyaktvā samuttasthau bāḍhamityeva cābravīt || 13 ||
[Analyze grammar]

tato gaurī suduḥkhārtā śaśāpa tridaśālayān || 14 ||
[Analyze grammar]

gauryuvāca |
yasmādahaṃ kṛtā devaiḥ putrahīnā samāgataiḥ |
tasmātte'pi bhaviṣyanti santānena vivarjjitāḥ || 15 ||
[Analyze grammar]

yasmādvāyo samāyātaḥ sthāne'smiñjanavarjite |
tasmātkāyavinirmuktastvaṃ bhaviṣyasi sarvadā || 16 ||
[Analyze grammar]

evamuktvā tato dīrghaṃ bhartuḥ kopaparāyaṇā |
tyaktvā pārśvaṃ gatā rājannarbudaṃ nagasattamam || 17 ||
[Analyze grammar]

sutārthaṃ sā tapastepe yatavākkāyamānasā |
tato varṣasahasrānte devadevo maheśvaraḥ || 918 ||
[Analyze grammar]

indrādyairvibudhaiḥ sārddhaṃ tadaṃtikamupāgamat |
atha śakro vinītātmā devīṃ tā pratyabhāṣata || 19 ||
[Analyze grammar]

eṣa devaḥ śivaḥ prāptastava pārśvaṃ svalajjayā |
nāyāti tatprasādo'sya kriyatā mahatī bhava || 20 ||
[Analyze grammar]

devyuvāca |
tyaktā'haṃ tava vākyena patinā samayānvitā |
putraṃ labdhvā prayāsyāmi tasya pārśve sureśvara || 21 ||
[Analyze grammar]

tasyāstaṃ niścayaṃ jñātvā svayaṃ devaḥ samāyayau |
abravītprahasanvākyaṃ prasādaḥ kriyatāmiti || 22 ||
[Analyze grammar]

dṛṣṭidānena deveśi bhāṣaṇena varānane |
mayā devahitaṃ kāryaṃ sarvāvasthāsu pārvati || 23 ||
[Analyze grammar]

akāle tena muktā'si nivṛttiḥ surate kṛtā |
putrārthaṃ te samāraṃbho yataścāsītsureśvari || 24 ||
[Analyze grammar]

tasmātte bhavitā putro nijadehasamudbhavaḥ |
matprasādādasaṃdigdhaṃ caturthe divase priye || 25 ||
[Analyze grammar]

nijāṃgamalamādāya yādṛgrūpaṃ sureśvari |
kariṣyasi na sandehastādṛgeva bhaviṣyati || 26 ||
[Analyze grammar]

sadyo devagaṇānāṃ ca daityānāṃ ca viśeṣataḥ |
tathā vai sarvamarttyānāṃ siddhido bahurūpadhṛk || 27 ||
[Analyze grammar]

evamuktā trinetreṇa parituṣṭā sureśvarī |
ālāpaṃ patinā cakre sārddhaṃ harṣasamanvitā || 28 ||
[Analyze grammar]

caturthe divase prāpte tataḥ snātvā śivā nṛpa |
tadodvarttanajaṃ lepaṃ gṛhītvā kautukātkila |
caturbhujaṃ cakārā'tha haravākyādvināyakam || 29 ||
[Analyze grammar]

tataḥ sajīvatāṃ prāpya haravākyena taṃ tadā |
viśeṣeṇa mahārāja nāyako'sau kṛtaḥ kṣitau |
sarveṣāṃ caiva martyānāṃ tataḥ khyāto babhūva ha || 30 ||
[Analyze grammar]

vināyaka iti śrīmānpūjyastrailokyavāsinām |
sarveṣāṃ devamukhyānāṃ babhūva hi vināyakaḥ || 31 ||
[Analyze grammar]

tato devagaṇāḥ sarve devīpriyahite ratāḥ |
tasmai dadurvarāndivyānprocurdevīṃ ca pārthiva || 32 ||
[Analyze grammar]

devā ūcuḥ |
tavāyaṃ tanayo devi sarveṣāṃ naḥ puraḥsaraḥ |
prathamaṃ pūjite cāsminpūjā grāhyā tataḥ suraiḥ || 33 ||
[Analyze grammar]

etacchṛṃgaṃ gire ramyaṃ tava saṃsevanācchubhe |
sarvapāpaharaṃ nṛṇāṃ darśanācca bhaviṣyati || 34 ||
[Analyze grammar]

ye'tra snānaṃ kariṣyanti supuṇye salilāśraye |
te yāṃsyaṃti paraṃ sthānaṃ jarāmaraṇavarjitam || 35 ||
[Analyze grammar]

māghamāse tṛtīyāyāṃ śuklāyāṃ ye samāhitāḥ |
 saptajanmāṃtarāṇyeva bhaviṣyanti sukhānvitāḥ || 36 ||
[Analyze grammar]

evamuktvā surāḥ sarve svasthānaṃ tu tato gatāḥ |
devo'pi sahito devyā kailāsaṃ parvataṃ gataḥ || 37 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṇḍa īśānīśikharamāhātmyavarṇanaṃnāma dvipañcāśattamo'dhyāyaḥ || 52 ||
[Analyze grammar]