Chapter 48

[English text for this chapter is available]

pulastya uvāca |
kulasaṃtāraṇaṃ gacchettatra tīrthamanuttamam |
yatra snāto naraḥ samyakkulaṃ tārayate'khilam || 1 ||
[Analyze grammar]

daśa pūrvānbhaviṣyāṃśca tathātmānaṃ nṛpottama |
uddharecchraddhayāyuktastatra dānena mānavaḥ || 2 ||
[Analyze grammar]

āsīdaprastuto nāma rājā pūrvaṃ sa pāpakṛt |
nāpi dānaṃ tathā jñānaṃ na dhyānaṃ na ca satkriyā || 3 ||
[Analyze grammar]

tasmiñchāsati lokānāṃ nāsītsaukhyaṃ kadācana |
paradāra rucirnityaṃ mahādaṇḍaparaśca saḥ || 4 ||
[Analyze grammar]

nyāyato'nyāyato vāpi karoti dhanasaṃgraham |
sa ghātayati lokāṃśca nirdoṣānpāpakṛttamaḥ || 5 ||
[Analyze grammar]

tato vārdhakyamāpannastathāpi na śamaṃ gataḥ |
kasyacittvatha kālasya pitṛbhiḥ pratibodhitaḥ |
taṃ prasuptaṃ samāsādya nārakeyaiḥ suduḥkhitaiḥ || 6 ||
[Analyze grammar]

pitara ūcuḥ |
vayaṃ śuddhasamācārā nityaṃ dharmaparāyaṇāḥ |
dānayajñatapaḥśīlāḥ svadāraniratāstathā || 7 ||
[Analyze grammar]

svakarmabhiḥ kulāṃgāra divaṃ prāptā yathārhataḥ |
kuputraṃ tvāṃ samāsādya narakaṃ samupasthitāḥ |
tasmāduddhara naḥ sarvānkṛtvā kiṃcicchubhārcanam || 8 ||
[Analyze grammar]

karmabhistava pāpātmanvayaṃ narakamāśritāḥ |
narakaṃ daśa yāsyaṃti bhaviṣyāśca tathā bhavān || 9 ||
[Analyze grammar]

evamuktvā ca te sarve pitarastu suduḥkhitāḥ |
yātāśca narakaṃ bhūyaḥ prabuddhaḥ so'pi pārthivaḥ || 10 ||
[Analyze grammar]

tato duḥkhamanuprāptaḥ pitṛvākyāni saṃsmaran |
ruroda prātarutthāya taṃ bhāryā pratyabhāṣata || 11 ||
[Analyze grammar]

indumatyuvāca |
kimarthaṃ rājaśārdūla tvaṃ rodiṣi mahāsvanam |
kathaṃ te kuśalaṃ rājye śarīre vā pure'thavā || 12 ||
[Analyze grammar]

rājovāca |
mayā dṛṣṭo'dya svapnāṃte pitā hyatha pitāmahaḥ |
apaśyaṃ duḥkhitāndevi tābhyāmathāgrajānpitṝn || 13 ||
[Analyze grammar]

upālabdho'smi taiḥ sarvaistava karmabhirīdṛśaiḥ |
dāruṇe narake prāptā adharmādiviceṣṭitaiḥ || 14 ||
[Analyze grammar]

athānye daśa yāsyanti bhaviṣyāśca bhavānapi |
tasmātkṛtvā śubhaṃ karma durgateścoddharasva naḥ || 15 ||
[Analyze grammar]

evamuktaḥ prabuddho'haṃ pitṛbhirvaravarṇini |
tenāhaṃ duḥkhamāpannastadvākyaṃ hṛdi saṃsmaran || 16 ||
[Analyze grammar]

indumatyuvāca |
satyametanmahārāja yadukto'si pitāmahaiḥ |
na tvayā sukṛtaṃ karma saṃsmare'haṃ kṛtaṃ purā || 17 ||
[Analyze grammar]

yathā suputramāsādya taraṃti pitaro nṛpa |
kuputreṇa tathā yāṃti narakaṃ nātra saṃśayaḥ || 18 ||
[Analyze grammar]

sa tvamāhūya vipreṃdrāndharmaśāstravicakṣaṇān |
pṛṣṭvā tānkuru yacchreyaḥ pitṝṇāmātmanā saha || 19 ||
[Analyze grammar]

ānayāmāsa rājā'sau tato viprānanekaśaḥ |
vedavedāṃgatattvajñāndharmaśāstravicakṣaṇān |
uvāca vinayopeto bhāryayā sahito hitān || 20 ||
[Analyze grammar]

rājovāca |
karmaṇā kena pitaro nirayasthā dvijottamāḥ |
svargaṃ yāṃti suputreṇa tāritāḥ procyatāṃ sphuṭam || 21 ||
[Analyze grammar]

brāhmaṇā ūcuḥ |
pitṛmedhena rājeṃdra kṛtena vidhipūrvakam |
nirayasthā divaṃ yāṃti yadyapi syuḥ supāpinaḥ || 22 ||
[Analyze grammar]

rājovāca |
dīkṣayaṃtu dvijāḥ sarve tadarthaṃ māṃ dhṛtavratam |
yatkiṃcidatra karttavyaṃ procyatāmakhilaṃ hi tat || 23 ||
[Analyze grammar]

tathoktāste nṛpeṃdreṇa brāhmaṇāḥ satyavādinaḥ |
samagrāḥ pārthivaṃ procuryaduktaṃ yajñakarmaṇi || 24 ||
[Analyze grammar]

dīkṣā grāhyā nṛpaśreṣṭha puraścaraṇamāditaḥ |
kṛtvā kāyaviśuddhyarthaṃ tataḥ śreyaskarī bhavet || 25 ||
[Analyze grammar]

sa tvaṃ pāpasamācāro bālyātprabhṛti pārthiva |
asaṃkhyaṃ pātakaṃ tasmāttīrthayātrāṃ samācara || 26 ||
[Analyze grammar]

sarvatīrthābhiṣiktastvaṃ yadā syānnṛpasattama |
prāyaścittena yogyaḥ syāstato yajñasya nānyathā || 27 ||
[Analyze grammar]

prabhāsādīni tīrthāni yāni saṃti dharātale |
gaṃtavyaṃ teṣu sarveṣu snānaṃ kuru samāhitaḥ || 28 ||
[Analyze grammar]

manasā gaccha durgāṇi dadaddānamanuttamam |
naśyettenāśubhaṃ kiṃcidapi brahmavadhodbhavam |
yanna yāti nṛṇāṃ rājaṃstīrthasnānādinā bhuvi || 29 ||
[Analyze grammar]

pulastya uvāca |
viprāṇāṃ vacanaṃ śrutvā sa rājā śraddhayā'nvitaḥ |
tīrthayātrāparo bhūtvā paribabhrāma medinīm || 30 ||
[Analyze grammar]

niyato niyatāhāro dadaddānāni bhūriśaḥ |
rājye putraṃ pratiṣṭhāpya vasuṃ satyaparākramam || 31 ||
[Analyze grammar]

kasyacittvatha kālasya tīrthayātrānuṣaṃgataḥ |
yāto'sau nṛpatiścaiva hyarbude nirmalodakam || 32 ||
[Analyze grammar]

sa snānamakarottatra śraddhāpūtena cetasā |
snātamātrasya tasyātha tasminneva jalāśaye || 33 ||
[Analyze grammar]

vimuktāḥ pitaro raudrānnarakātsupraharṣitāḥ |
tato divyavimānasthā divyamālyāṃbarānvitāḥ || 34 ||
[Analyze grammar]

tamūcustāritāḥ sarve vayaṃ putra tvayā'dhunā |
tīrthasyāsya prabhāveṇa bhaviṣyāśca tathā daśa || 35 ||
[Analyze grammar]

ātmā ca pārthivaśreṣṭha snānācca jalatarpaṇāt |
yasmātkulaṃ tvayā putra tīrthe'smiṃstāritaṃ tataḥ || 36 ||
[Analyze grammar]

kulasaṃtāraṇaṃnāma tīrthametadbhaviṣyati |
tasmāttvamapi rājeṃdra sahā'smābhirdivaṃ prati |
āgacchānena dehena tīrthasyāsya prabhāvataḥ || 37 ||
[Analyze grammar]

pulastya uvāca |
evamuktaḥ sa rājeṃdro divyakāṃtivapustadā |
taṃ vimānamathāruhya gataḥ svargaṃ ca taiḥ saha || 38 ||
[Analyze grammar]

eṣa prabhāvo rājarṣe kulasaṃtāraṇasya ca |
mayā te varṇitaḥ samyagbhūyaḥ kiṃ paripṛcchasi || 39 ||
[Analyze grammar]

yayātiruvāca |
sa kiṃprabhāvo rājā sa tathā pāpasamanvitaḥ |
svadehena gataḥ svargametanme kautukaṃ mahat || 40 ||
[Analyze grammar]

pulastya uvāca |
rākāsomavyatīpāta samakāle nṛpottama |
sa snāto yatra bhūpālastanmahacchreyase param || 41 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe tṛtīye'rbudakhaṃḍe kulasaṃtāraṇatīrthamāhātmyavarṇanaṃnāmāṣṭacatvāriṃśo'dhyāyaḥ || 48 ||
[Analyze grammar]