Chapter 7

[English text for this chapter is available]

pulastya uvāca |
tato gacchennṛpaśreṣṭha supuṇyamacaleśvaram |
yaṃ dṛṣṭvā siddhimāpnoti naraḥ śraddhāsamanvitaḥ || 1 ||
[Analyze grammar]

tatra kṛṣṇacaturdaśyāṃ yaḥ śrāddhaṃ kurute naraḥ |
āśvine phālgune vāpi sa yāti paramāṃ gatim || 2 ||
[Analyze grammar]

yastu pūjayate bhaktyā dakṣiṇāṃ diśamāsthitaḥ |
puṣpaiḥ patraiḥ phalaiścaiva so'śvamedhaphalaṃ labhet || 3 ||
[Analyze grammar]

paṃcāmṛtena yastatra tarpaṇaṃ kuru te naraḥ |
so'pi devasya sāṃnidhyaṃ śivalokamavāpnuyāt || 4 ||
[Analyze grammar]

pradakṣiṇāṃte yastasya praṇāmaṃ kurute naraḥ |
naśyaṃti sarvapāpāni pradakṣiṇapadepade || 5 ||
[Analyze grammar]

tatrāścaryamabhūtpūrvaṃ tattvaṃ śṛṇu mahāmate |
mayā pūrvaṃ śrutaṃ svarge nāradācchakrasannidhau || 6 ||
[Analyze grammar]

tatra pūrvaṃ śuko nīḍaṃ vṛkṣe caivākaroddvijaḥ |
gatāgatena nīḍasya kurute taṃ pradakṣiṇām || 7 ||
[Analyze grammar]

na ca bhaktyā mahārāja pakṣiyonisamudbhavaḥ |
athāsau mṛtyumāpannaḥ kālena mahatā śukaḥ || 8 ||
[Analyze grammar]

saṃjātaḥ pārthive vaṃśe rājā veṇuriti smṛtaḥ |
jātismaro mahārāja sarvaśatrunikṛntanaḥ || 9 ||
[Analyze grammar]

sa taṃ smṛtvā prabhāvaṃ hi pradakṣiṇāsamudbhavam |
acaleśvaramāsādya pradakṣiṇāmathākarot || 10 ||
[Analyze grammar]

naktaṃ dinaṃ mahārāja nānyatkiṃcitkaroti saḥ |
na tathā tapase yatno na naivedye kathaṃcana || 11 ||
[Analyze grammar]

na puṣpe dhūpadāne ca pradakṣiṇāparaḥ sadā |
kenacittvatha kālena munayo'tra samāgatāḥ || 12 ||
[Analyze grammar]

nāradaḥ śaunakaścaiva hārīto devalastathā |
gālavaḥ kapilo naṃdaḥ suhotraḥ kaśyapo nṛpaḥ || 13 ||
[Analyze grammar]

ete cānye ca bahavo devavrataparāyaṇāḥ |
kecitsnānaṃ kārayaṃti tasya liṃgasya bhaktitaḥ || 14 ||
[Analyze grammar]

anye ca vividhāṃ pūjāṃ japamanye samāhitāḥ |
eke nṛtyaṃti rājeṃdra gāyaṃti ca tathā pare || 15 ||
[Analyze grammar]

balimanye prayacchaṃti stutiṃ kurvaṃti cāpare |
athāścaryaṃ paraṃ dṛṣṭvā pradakṣiṇāparaṃ nṛpam || 16 ||
[Analyze grammar]

paraṃ kautukamāpannā vākyametadathābruvan |
pradakṣiṇāsamudbhūtaṃ kāraṇaṃ jñātumicchavaḥ || 17 ||
[Analyze grammar]

ṛṣaya ūcuḥ |
kasmāttvaṃ pārthivaśreṣṭha pradakṣiṇāparaḥ sadā |
devasyāsya viśeṣeṇa satyaṃ no vaktumarhasi || 18 ||
[Analyze grammar]

na dadāsi jalaṃ liṃge prabhūtaṃ sumanoharam |
puṣpadhūpādikaṃ vātha stotrāṇi vividhāni ca || 19 ||
[Analyze grammar]

samartho'si tathānyeṣāṃ dānānāṃ tvaṃ mahīpate |
etannaḥ kautukaṃ sarvaṃ yathāvadvaktumarhasi || 20 ||
[Analyze grammar]

veṇuruvāca |
yadahaṃ saṃpravakṣyāmi śrūyatāṃ dvijasattamāḥ |
pūrvadehāṃtare vṛttaṃ sarvaṃ satyaṃ viśeṣataḥ || 21 ||
[Analyze grammar]

prāsāde'sminpurā pakṣī śuko'haṃ sthitavāṃstadā |
kṛtavāṃśca tadā devaṃ pradakṣiṇāmaharniśam || 22 ||
[Analyze grammar]

kṛpayā'sya prabhāvācca jāto jātismarastvaham |
adhunā parayā bhaktyā yatkaromi pradakṣiṇām || 23 ||
[Analyze grammar]

na jāne kiṃ phalaṃ me'dya devasyāsya prasādataḥ |
etasmātkāraṇāccāhaṃ nānyatkiṃcitkaromi bhoḥ || 24 ||
[Analyze grammar]

pulastya uvāca |
veṇuvākyaṃ tataḥ śrutvā munayaḥ śaṃsitavratāḥ |
vismayotphullanayanāḥ sādhusādhviti cābruvan || 25 ||
[Analyze grammar]

tataḥ pradakṣiṇa parāḥ sarve tatra maharṣayaḥ |
 babhūvurmunayaḥ sarve śraddhayā parayā yutāḥ || 26 ||
[Analyze grammar]

so'pi rājā mahābhāgo veṇuḥ śaṃbhoḥ prasādataḥ |
śāśvataṃ sthānamāpanno durllabhaṃ tridaśairapi || 27 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe'caleśvaraprabhāvavarṇanaṃnāma saptamo'dhyāyaḥ || 7 ||
[Analyze grammar]