Chapter 11

[English text for this chapter is available]

īśvara uvāca |
sārasvatasya viprasya śrutvā bhojanṛpo vacaḥ |
vivarṇavadano bhūtvā pragṛhyāṃghrī vaco'bravīt || 1 ||
[Analyze grammar]

mune naivaṃ tvayā vācyaṃ gaṃtavyaṃ niścitaṃ mayā |
narāṇāṃ puṇyadā yātrā kathayasva kathaṃ bhavet || 2 ||
[Analyze grammar]

kiṃ grāhyaṃ kiṃ ca moktavyaṃ kiṃ deyaṃ kiṃ na dīyate |
tīrthopavāsaḥ snānaṃ ca saṃdhyāsnānavidhikramaḥ |
pūjā nidrā japo rātrau sarvaṃ saṃkṣepato vada || 3 ||
[Analyze grammar]

sārasvata uvāca |
surāṣṭradeśe gantavyaṃ girau raivatake yadi |
nṛpa yātrāvidhiṃ vakṣye tvamekāgramanāḥ śṛṇu || 4 ||
[Analyze grammar]

bṛhaspatibalaṃ gṛhya sūryaṃ saṃtarpya cottamam |
vāmataḥ pṛṣṭhataḥ sarvaṃ vṛtvā saṃśodhya vāsaram || 5 ||
[Analyze grammar]

caṃdralagnaṃ grahājjñātvā baliṣṭhājjanmarāśitaḥ |
śakunaṃ ca śubhaṃ labdhvā prasthātavyaṃ nṛpairnṛpa || 6 ||
[Analyze grammar]

tīrthe sadaiva gaṃtavyaṃ sarve māsāśca śobhanāḥ |
tithayaścottamāḥ sarvāḥ snānadānārcanādiṣu || 7 ||
[Analyze grammar]

aṣṭamyāṃ ca caturdaśyāṃ māsāṃte pūrṇimādine |
saṃkrāṃtau grahaṇe kālā ete proktā bhavārcane || 8 ||
[Analyze grammar]

kailāsaṃ parvataṃ tyaktvā devīṃ devāṃśca saṃgatān |
vaiśākhe paṃcadaśyāṃ tu bhūmiṃ bhittvā bhavo'bhavat || 9 ||
[Analyze grammar]

tasminneva dine devī svarṇarekhā nadī talāt |
paṃthānaṃ vāsukiṃ prāpya sarvapāpapraṇāśanī || 10 ||
[Analyze grammar]

airāvatapadākrāṃta ujjayanto mahāgiriḥ |
susrāva toyaṃ bahudhā gajapādodbhavaṃ śuci || 11 ||
[Analyze grammar]

devā brahmādayaḥ sarve gaṃgādyāḥ saritastathā |
vastrāpathe mahākṣetre bhavabhāvena saṃgatāḥ || 12 ||
[Analyze grammar]

vastrāpathasya kṣetrasya pramāṇaṃ śṛṇu bhūpate |
harasya tyajato bhūmau patitaṃ vastrabhūṣaṇam || 13 ||
[Analyze grammar]

tāvanmātraṃ smṛtaṃ kṣetraṃ devairvastrāpathaṃ kṛtam |
uttareṇa nadī bhadrā pūrvasyāṃ yojanadvayam || 14 ||
[Analyze grammar]

dakṣiṇena baleḥ sthānamujjayanto nadīmanu |
aparasyāṃ paraṃ nadyo saṃgamaṃ vāmanātpurāt || 15 ||
[Analyze grammar]

etadvastrāpathaṃ kṣetraṃ bhuktimuktipradāyakam |
kṣetrasya vistaro jñeyo yojanānāṃ catuṣṭayam || 16 ||
[Analyze grammar]

vaiśākhapaṃcadaśyāṃ tu bhavo bhāvena bhūpate |
pūjyate śivaloke tu sthīyate brahmavāsaram || 17 ||
[Analyze grammar]

ato vasaṃte saṃprāpte prayāṇaṃ kuru bhūpate |
nigṛhya niyamānbhūtvā śuciḥ snāto jitendriyaḥ || 18 ||
[Analyze grammar]

gajavājirathāṃstyaktā padābhyāṃ yāti yo naraḥ |
puṣpakeṇa vimānena sa yāti śivamaṃdiram || 19 ||
[Analyze grammar]

ekabhaktena naktena tathaivāyācitena ca |
bhikṣāhāreṇa toyena phalāhāreṇa vā yadi || 20 ||
[Analyze grammar]

upavāsena kṛcchreṇa śākāhāreṇa yāti yaḥ |
sa yāti sundarīvṛndairvījyamāno gaṇairdivi || 21 ||
[Analyze grammar]

malasnānaṃ vinā mārge pādābhyaṃgavivarjitaḥ |
maladhārī kṣīṇatanuryaṣṭihasto jitendriyaḥ || 22 ||
[Analyze grammar]

śītātapajalakliṣṭaḥ śivasmaraṇatatparaḥ |
yadi yāti naro yāti sa bhittvā sūryamaṃḍalam || 23 ||
[Analyze grammar]

narakasthānapi pitṝnmātṛtaḥ pitṛto nṛpa |
akṣayaṃ sapta saptaiva nayedevaṃ śivālaye || 24 ||
[Analyze grammar]

luṇṭhanbhūmau yadā yāti mṛgacarmāvaguṃṭhitaḥ |
daṇḍapramāṇabhūmervā saṃkhyāṃ kurvannaro yadi || 25 ||
[Analyze grammar]

araṇye nirjale sthāne jalāṃtaḥparipīḍitaḥ |
śaraṇyaṃ śaṃkaraṃ kṛtvā mano niścalamātmanaḥ || 26 ||
[Analyze grammar]

saptadvīpavatīṃ pṛthvīṃ samudravasanāṃ nṛpa |
sa labdhvā bahubhiryajñairyajñe dattvā ca medinīm || 27 ||
[Analyze grammar]

saptabhaumavimānastho divyadeho harākṛtiḥ |
nirīkṣya medinīṃ maṃdaṃ kṛta maṃgalamaṇḍanam || 28 ||
[Analyze grammar]

mṛganetrābhujasparśalagnapīnapayodharaḥ |
gītavādyavinodena satyalokaṃ vrajennaraḥ || 29 ||
[Analyze grammar]

vidhāya bhujavegaṃ vā pādau baddhvā śanaiḥ śanaiḥ |
maunena mānuṣo māyāṃ tyaktvā yāti śivālaye || 30 ||
[Analyze grammar]

brahmaghno vā surāpo vā steyī vā gurutalpagaḥ |
kṛtaghno mucyate pāpairmṛto muktimavāpnuyāt || 31 ||
[Analyze grammar]

mātaraṃ pitaraṃ deśaṃ bhrātaraṃ svajanabāṃdhavān |
grāmaṃ bhūmiṃ gṛhaṃ tyaktvā kṛtvā ceṃdriyasaṃyamam || 32 ||
[Analyze grammar]

gṛhītvā śivasaṃskāraṃ naro bhrāmyati bhūtale |
draṣṭuṃ tīrthānyanekāni puṇyānyāyatanāni ca || 33 ||
[Analyze grammar]

kasmiṃstīrthe śubhe sthāne chittvā saṃsārabandhanam |
abhayāṃ dakṣiṇāṃ dattvā śivaśiveti bhāṣakaḥ || 34 ||
[Analyze grammar]

ekāṃte nirjane sthāne śivasmaraṇatatparaḥ |
yadi tiṣṭhati taṃ yānti namaskartuṃ narādhipa || 35 ||
[Analyze grammar]

āyāṃti devatāḥ sarve cihnaṃ tasya nirīkṣitum |
vimānavṛndairnetavyaḥ kadāsau puruṣottamaḥ || 36 ||
[Analyze grammar]

yadā tu pañcatvamupaiti kāle kalevaraṃ skandhakṛtaṃ naraiśca |
nirīkṣyamāṇaḥ surasundarībhiḥ sa nīyamāno madavihvalābhiḥ || 37 ||
[Analyze grammar]

surendrasūryāgnidhaneśarudraiḥ saṃpūjyamānaḥ śivarūpadhārī |
surādilokānpravimucya vegācchivālaye tiṣṭhati rudrabhaktaḥ || 38 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe dvitīye vastrāpathakṣetra māhātmye vastrāpathayātrāvidhānavarṇanaṃnāmaikādaśo'dhyāyaḥ || 11 ||
[Analyze grammar]