Chapter 297

[English text for this chapter is available]

devyuvāca |
devadeva jagannātha saṃsārārṇavatāraka |
savistaraṃ tu me brūhi ṛṣitoyāmahodayam || 1 ||
[Analyze grammar]

ṛṣitoyeti tannāma kathaṃ khyātaṃ dharātale |
kathaṃ sā punarāyātā devadāruvane śubhe || 2 ||
[Analyze grammar]

īśvara uvāca |
śṛṇu devi pravakṣyāmi sāvadhānā vaco mama |
māhātmyamṛṣitoyāyāḥ sarvapātakanāśanam || 3 ||
[Analyze grammar]

devadāruvane puṇya ṛṣayastapasā yutāḥ |
nivasaṃti varārohe śataśotha sahasraśaḥ || 4 ||
[Analyze grammar]

teṣāṃ nivasatāṃ tatra bahukālo gataḥ priye |
putrapautraiḥ pravṛddhāste dārukaṃ vyāpya saṃsthitāḥ || 85 ||
[Analyze grammar]

te sarve ciṃtayāmāsuḥ sametya ca parasparam |
sarasvatī mahāpuṇyā śirasyādhāya vāḍavam || 6 ||
[Analyze grammar]

prabhāsaṃ cirakālena kṣetraṃ caiva gamiṣyati |
vāpīkūpataḍāgādi muktvā sāgaragāminīm || 7 ||
[Analyze grammar]

nāhlādaṃ kurute cetaḥ snānadānajapeṣu ca |
brahmāṇaṃ prārthayiṣyāmo gatvā brahmaniketanam || 8 ||
[Analyze grammar]

īśvara uvāca |
evaṃ nimantrya te sarve ṛṣayastapasojjvalāḥ |
gatāste brahmalokaṃ tu draṣṭuṃ devaṃ pitāmaham |
tuṣṭuvurvividhaiḥ stotrairbrahmāṇaṃ kamalodbhavam || 9 ||
[Analyze grammar]

ṛṣaya ūcuḥ |
namaḥ praṇavarūpāya viśva kartre namonamaḥ |
tathā viśvasya rakṣitre namo'stu paramātmane || 10 ||
[Analyze grammar]

tathā tasyaiva saṃhartre namo brahmasvarūpiṇe |
pitāmaha namastubhyaṃ surajyeṣṭha namo'stu te || 11 ||
[Analyze grammar]

caturvaktra namastubhyaṃ padmayone namo'stu te |
viraṃcaye namastubhyaṃ vidhaye vedhase namaḥ || 12 ||
[Analyze grammar]

cidānanda namastubhyaṃ hiraṇyagarbha te namaḥ |
haṃsavāhana te nityaṃ padmāsana namo'stute || 13 ||
[Analyze grammar]

evaṃ saṃstuvatāṃ teṣāmṛṣīṇāmūrdhvaretasām |
uvāca paramaprīto brahmā loka pitāmahaḥ || 14 ||
[Analyze grammar]

svāgataṃ vai dvijaśreṣṭhā yuṣmākaṃ kṛtavānaham |
stotreṇānena divyena vṛṇudhvaṃ varamuttamam || 15 ||
[Analyze grammar]

ṛṣaya ūcuḥ |
abhiṣekāya no deva nadī pāpapraṇāśinī |
vilokyate suraśreṣṭha dehi no varamuttamam || 16 ||
[Analyze grammar]

īśvara uvāca |
ityuktastaistadā brahmā munibhistapasojjvalaiḥ |
vīkṣāṃcakre tadā sarvā mūrtimatyaśca nimnagāḥ || 17 ||
[Analyze grammar]

gaṅgā ca yamunā caiva tathā devī sarasvatī |
candrabhāgā ca revā ca śarayūrgaṃḍakī tathā || 18 ||
[Analyze grammar]

tāpī caiva varārohe tathā godāvarī nadī |
kāverī candraputrī ca śiprā carmaṇvatī tathā || 19 ||
[Analyze grammar]

sindhuśca vedikā caiva nadāḥ sarve varānane |
mūrtimatyaḥ sthitāḥ sarvāḥ pavitrāḥ pāpanāśinī || 20 ||
[Analyze grammar]

dṛṣṭvā pitāmahaḥ sarvā gatvarā dharaṇīṃ prati |
devadāruvane ramye prabhāse kṣetra uttame |
kamaṇḍalau kṛtā dṛṣṭirviviśustāḥ kamaṇḍalum || 21 ||
[Analyze grammar]

|brahmovāca |
dhṛtāḥ sarvā mahāpuṇyā nadyo brahmakamaṇḍalau |
praviṣṭāḥ pṛthivīṃ yāṃtu ṛṣīṇāmanukampayā || 22 ||
[Analyze grammar]

prahiṇomi yadyekāṃ ca hyanyā ruṣyati me dvijāḥ |
tasmātsarvāḥ pramokṣyāmi kamaṇḍalukṛtālayāḥ || 23 ||
[Analyze grammar]

īśvara uvāca |
tato brahmā mumocā'tha tatrasthāśca mahāpagāḥ |
muktvā brahmā munīnsarvānprovācedaṃ punaḥpunaḥ || 24 ||
[Analyze grammar]

ṛṣibhiḥ prārthyamānena nadyo muktā mayā yataḥ |
toyarūpā mahāvegā abhiṣekāya satvarāḥ || 25 ||
[Analyze grammar]

ṛṣitoyeti nāmnā sā bhaviṣyati dharātale |
ṛṣīṇāṃ vallabhā devī sarvapātakanāśinī || 26 ||
[Analyze grammar]

īśvara uvāca |
evaṃ devi samāyātā devadāruvane nadī |
ṛṣitoyeti vikhyātā pavitrā ca varānane || 27 ||
[Analyze grammar]

tūryaduṃdubhinirghoṣairvedamaṅgalaniḥsvanaiḥ |
samudraṃ prāpitā devī ṛṣibhirvedapāragaiḥ || 28 ||
[Analyze grammar]

sarvatra sulabhā devī triṣu sthāneṣu durlabhā |
mahodaye mahātīrthe mūlacaṃḍīśasannidhau || 29 ||
[Analyze grammar]

samudreṇa sametā tu yatra sā pūrvavāhinī |
yatrarṣitoyā labhyeta tatra kiṃ mṛgyate param || 30 ||
[Analyze grammar]

manuṣyāste sadā dhanyāstattoyaṃ tu pibaṃti ye |
asthīni yatra līyaṃte ṣaṇmāsābhyantareṇa tu || 31 ||
[Analyze grammar]

prātaḥkāle vahedgaṃgā sāyaṃ ca yamunā tathā || 32 ||
[Analyze grammar]

nadīsahasrasaṃyuktā madhyāhne tu sarasvatī |
aparāhṇe vahedrevā sāyāhne sūryaputrikā || 33 ||
[Analyze grammar]

evaṃ jānannaro yastu tatra snāna vicakṣaṇaḥ |
ācaredvidhinā śrāddhaṃ sa tasyāḥ phalabhāgbhavet || 34 ||
[Analyze grammar]

evaṃ saṃkṣepataḥ proktamṛṣitoyāmahodayam |
sarvapāpaharaṃ nṛṇāṃ sarvakāmaphalapradam || 35 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmya ṛṣitoyāmāhātmyavarṇanaṃnāma saptanavatyuttaradviśatatamo'dhyāyaḥ || 297 ||
[Analyze grammar]