Chapter 290

[English text for this chapter is available]

īśvara uvāca |
tato gacchenmahādevi kuberasthānamuttamam |
yatra siddhaḥ purā devi kubero dhanado'bhavat || 1 ||
[Analyze grammar]

brāhmaṇaścaurarūpeṇa tatra sthāne'vasatpurā |
sa ca me bhaktiyogena purā vai dhanadaḥ kṛtaḥ || 2 ||
[Analyze grammar]

devyuvāca |
kathaṃ sa brāhmaṇo bhūtvā caurarūpo narādhamaḥ |
tanme kathaya deveśa dhanadaḥ sa yathā'bhavat || 3 ||
[Analyze grammar]

īśvara uvāca |
tasminnarthe mahādevi yadvṛttaṃ cauttameṃ'tare |
kathayiṣyāmi tatsarvaṃ śivamāhātmyasūcakam || 4 ||
[Analyze grammar]

kaścidāsīddvijo devi devaśarmeti viśrutaḥ |
prabhāsakṣetranilayo nyaṃkumatyāstaṭe'vasat || 5 ||
[Analyze grammar]

putrakṣetrakalatrādivyāpāraikarataḥ sadā |
vihāyātha sa gārhasthyaṃ dhanārthaṃ lobha mohitaḥ |
pracacāra mahīmetāṃ sagrāmanagarāṃtarām || 6 ||
[Analyze grammar]

bhāryā tasya vilolākṣī tasya gehādvinirgatā |
svacchaṃdacāriṇī nityaṃ nityaṃ cānaṃgamohitā || 7 ||
[Analyze grammar]

tasyāṃ kadācitputrastu śūdrājjāto vidhervaśāt |
duṣṭātmā'tīva nirmukto nāmnā duḥsaha ityataḥ || 8 ||
[Analyze grammar]

so'tha kālena mahatā nāmakarmapravartitaḥ |
vyasanopahataḥ pāpastyakto bandhujanaistathā || 9 ||
[Analyze grammar]

pūjopakaraṇaṃ dravyaṃ sa kasmiṃścicchivālaye |
bahudoṣāmukhe dṛṣṭvā hartukāmo'viśattataḥ || 10 ||
[Analyze grammar]

yāvaddīpo gataprāyo vartticchedo'bhavatkila |
tāvattena daśā dattā dravyānveṣaṇakāraṇāt || 11 ||
[Analyze grammar]

prabuddhaścotthitastatra devapūjākaro naraḥ |
ko'yaṃ koyamiti proccairvyāharatparighāyudhaḥ || 12 ||
[Analyze grammar]

sa ca prāṇabhayānnaṣṭaḥ śūdrajaścāpi mūḍhadhīḥ |
vinindannātmano janma karma cāpi suduḥkhita || 13 ||
[Analyze grammar]

purapālairhato'vanyāṃ mṛtaḥ kālādabhūcca saḥ |
gaṃdhāraviṣaye rājā khyāto nāmnā sudurmukhaḥ || 14 ||
[Analyze grammar]

gītavādyaratastatra veśyāsu nirato bhṛśam |
prajopadravakṛnmūrkhaḥ sarvadharmabahiṣkṛtaḥ || 15 ||
[Analyze grammar]

kintvarcayansadaivāsau liṃgaṃ rājyakramāgatam |
puṣpasragdhūpanaivedyagaṃdhādibhiramantravat || 16 ||
[Analyze grammar]

mukhyeṣu ca sadā kāle devatāyataneṣu ca |
dadyātsa bahulāndīpānvartibhiśca samujjvalān || 17 ||
[Analyze grammar]

kadācinmṛgayāsakto babhrāma sa ca vīryavān |
prabhāsa kṣetramāgātya pūrvasaṃskārabhāvitaḥ || 18 ||
[Analyze grammar]

parairabhihato yuddhe nyaṃkumatyāstaṭe śubhe |
śivapūjāvidhānena vidhvastāśeṣapātakaḥ || 19 ||
[Analyze grammar]

tato viśravasaścāsau putro'bhūdbhuvi viśrutaḥ |
yaḥ sa eva mahātejāḥ sarvayajñādhipo balī || 20 ||
[Analyze grammar]

kubera iti dharmātmā śrutaśīlasamanvitaḥ |
liṃgaṃ pratiṣṭhayāmāsa nyaṃkumatyāśca pūrvataḥ || 21 ||
[Analyze grammar]

kauberātpaścime bhāge somanātheti viśrutam |
saṃpūjya ca yatheśānaṃ nyaṃkumatyāstaṭe śubhe |
stotreṇānena cāstauṣīdbhaktyā taṃ sarvakāmadam || 22 ||
[Analyze grammar]

mūrtiḥ kvāpi maheśvarasya mahatī yajñasya mūlodayā tumbī tuṃgaphalāvatī ca śataśo brahmāṇḍakoṭistathā |
yanmānaṃ na pitāmaho na ca harirbrahmāṇḍamadhyasthito jānātyanyasureṣu kā ca gaṇanā sā saṃtataṃ vo'vatāt || 23 ||
[Analyze grammar]

namāmyahaṃ devamajaṃ purāṇamu pendramindrāvararājajuṣṭam |
śaśāṃkasūryāgnisamānanetraṃ vṛṣendracihnaṃ pralayādihetum || 24 ||
[Analyze grammar]

sarveśvaraikatribalaikabandhuṃ yogādhigamyaṃ jagato'dhivāsam |
taṃ vismayādhāramanaṃtaśaktiṃ jñānodbhavaṃ dhairyaguṇādhikaṃ ca || 25 ||
[Analyze grammar]

pinākapāśāṃkuśaśūlahastaṃ kapardinaṃ meghasamānaghoṣam |
sakālakaṇṭhaṃ sphaṭikāvabhāsaṃ namāmi śaṃbhuṃ bhuvanaikanātham || 26 ||
[Analyze grammar]

kapālinaṃ mālinamādidevaṃ jaṭādharaṃ bhīmabhujaṃgahāram |
prabhāsitāraṃ ca sahasramūrtiṃ sahasraśīrṣaṃ puruṣaṃ viśiṣṭam || 27 ||
[Analyze grammar]

yadakṣaraṃ nirguṇamaprameyaṃ sajyotirekaṃ pravadaṃti saṃtaḥ |
dūraṃgamaṃ vedyamaniṃdyavandyaṃ sarveṣu hṛtsthaṃ paramaṃ pavitram || 28 ||
[Analyze grammar]

tejonibhaṃ bālamṛgāṃkamauliṃ namāmi rudraṃ sphuradugravaktram |
kālendhanaṃ kāmadamastasaṃgaṃ dharmāsanasthaṃ prakṛtidvayastham || 29 ||
[Analyze grammar]

atīndriyaṃ viśvabhujaṃ jitāriṃ guṇatrayātītamajaṃ nirīham |
tamomayaṃ vedamayaṃ cidaṃśaṃ prajāpatīśaṃ puruhūtamindram |
anāgataikadhvanirūpamādyaṃ dhyāyaṃti yaṃ yogavido yatīndrāḥ || 30 ||
[Analyze grammar]

saṃsārapāśacchiduraṃ vimuktaḥ punaḥ punastvāṃ praṇamāmi devam || 31 ||
[Analyze grammar]

nirūpamāsyaṃ ca balaprabhāvaṃ na ca svabhāvaṃ paramasya puṃsaḥ |
vijñāyate viṣṇupitāmahādyaistaṃ vāmadevaṃ praṇamāmyaciṃtyam || 32 ||
[Analyze grammar]

śivaṃ samārādhya tamugramū्rttiṃ papau samudraṃ bhagavānagastyaḥ |
lebhe dilīpo'pyakhilāṃśca kāmāṃstaṃ viśvayoniṃ śaraṇaṃ prapadye || 33 ||
[Analyze grammar]

devendravandyoddhara māmanāthaṃ śambho kṛpākāruṇikaḥ kila tvam |
duḥkhā'rṇave magnamumeśa dīnaṃ samuddhara tvaṃ bhava śaṃkaro'si || 34 ||
[Analyze grammar]

saṃpūjayanto divi devasaṃghā brahmendrarudrā viharaṃti kāmam |
taṃ staumi naumīha japāmi śarvaṃ vande'bhivaṃdyaṃ śaraṇaṃ prapannaḥ || 35 ||
[Analyze grammar]

stutvaivamīśaṃ virarāma yāvattāvatsa rudro'rkasahasratejāḥ |
dadau ca tasmai varadoṃ'dhakārirvaratrayaṃ vaiśravaṇāya devaḥ |
sakhyaṃ ca dikpālapadaṃ caturthaṃ dhanādhipatyaṃ ca divaukasāṃ ca || 36 ||
[Analyze grammar]

yasmādatra tvayā samyaṅnyaṃkumatyāstaṭe śubhe |
ārādhito'haṃ vidhivatkṛtvā mūrttiṃ mahīmayīm || 37 ||
[Analyze grammar]

tasmāttavaiva nāmnā tatsthānaṃ khyātaṃ bhaviṣyati |
kuberanagaretyevaṃ mama prītipradāyakam || 38 ||
[Analyze grammar]

tvayā pratiṣṭhitaṃ liṃgamasmātsthānācca paścime |
umānāthasya vidhivatsomanātheti tatsmṛtam || 39 ||
[Analyze grammar]

śrīpaṃcamyāṃ vidhānena yastacca pūjayiṣyati |
saptapuruṣāvadhiryāvattasya lakṣmīrbhaviṣyati || 40 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye nyaṃkumatīmāhātmye kuberanagarotpattikuberasthāpitasomanāthamāhātmyavarṇanaṃnāma navatyuttaradviśatatamo'dhyāyaḥ || 290 ||
[Analyze grammar]