Chapter 281

[English text for this chapter is available]

īśvara uvāca |
kasyacittvatha kālasya tridaśāvaśvinau priye |
kṛtābhiṣekāṃ vivṛtāṃ sukanyāṃ tāmapaśyatām || 1 ||
[Analyze grammar]

tāṃ dṛṣṭvā darśanīyāṃgīṃ devarājasutāmiva |
ūcatuḥ samabhidrutya nāsatyāvaśvināvatha || 2 ||
[Analyze grammar]

kasya tvamasi vāmoru kiṃ vane'smiṃścikīrṣasi |
icchāvastvāṃ ca vijñātuṃ tattvamākhyāhi śobhane || 3 ||
[Analyze grammar]

tataḥ sukanyā saṃvītā tāvuvāca surottamau |
śaryātitanayāṃ vittaṃ bhāryāṃ ca cyavanasya mām || 4 ||
[Analyze grammar]

tato'śvinau prahasyaināmabrūtāṃ punareva tu |
kathaṃ tvaṃ ca viditvā tu pitrā dattā'gatā vane || 5 ||
[Analyze grammar]

bhrājase gaganoddeśe vidyutsaudāmanī yathā |
na deveṣvapi tulyāṃ hi tava paśyāva bhāmini || 6 ||
[Analyze grammar]

sarvābharaṇasaṃpannā paramāṃbaradhāriṇī |
māmaivamanavadyāṃgi tyajainamavivekinam || 7 ||
[Analyze grammar]

kasmādevaṃvidhā bhūtvā jarājarjaritaṃ bhuvi |
tvamupāsye hi kalyāṇi kāmabhāvabahiṣkṛtam || 8 ||
[Analyze grammar]

asamarthaṃ paritrāṇe poṣaṇe vā śucismite |
sā tvaṃ cyavanamutsṛjya varayasvaikamāvayoḥ || 9 ||
[Analyze grammar]

patyarthaṃ devagarbhābhe mā vṛthā yauvanaṃ kṛthāḥ |
evamuktā sukanyā sā surau tāvidamabravīt || 10 ||
[Analyze grammar]

ratā'haṃ cyavane patyau na caivaṃ pariśaṃkatam |
tāvabrūtāṃ punaścaitāmāvāṃ devabhiṣagvarau || 11 ||
[Analyze grammar]

yuvānaṃ rūpasaṃpannaṃ kariṣyāvaḥ patiṃ tava |
tatastasyāvayoścaiva patimekatamaṃ vṛṇu || 12 ||
[Analyze grammar]

etena samayenāvāṃ śamaṃ naya sumadhyame |
sā tayorvacanāddevi upasaṃgamya bhārgavam |
uvāca vākyaṃ yattābhyāmuktaṃ bhṛgusutaṃ prati || 13 ||
[Analyze grammar]

tadvākyaṃ cyavano bhāryāmuvācādriyatāmiti |
ityuktā cyavanenātha sukanyā tāvuvāca vai || 14 ||
[Analyze grammar]

evaṃ devau bhavadbhyāṃ yatproktaṃ tatkiyatāṃ laghu |
ityuktau bhiṣajau tatra tayā caiva sukanyayā |
ūcatū rājaputrīṃ tāṃ patistava viśatvapaḥ || 15 ||
[Analyze grammar]

tato'paścyavanaḥ śīghraṃ rūpārthī praviveśa ha |
aśvināvapi taddevi tataḥ prāviśatāṃ jalam || 16 ||
[Analyze grammar]

tato muhūrttāduttīrṇāḥ sarve te sarasastataḥ |
divyarūpadharāḥ sarve yuvāno mṛṣṭakuṇḍalāḥ || 17 ||
[Analyze grammar]

divyaveṣadharāścaiva manasaḥ prītivarddhanāḥ |
te'bruvansahitāḥ sarve vṛṇīṣvānyatamaṃ śubhe || 18 ||
[Analyze grammar]

asmākamīpsitaṃ bhadre yatastvaṃ varavarṇinī |
yatra vāpyabhi kāmāsi taṃ vṛṇīṣva suśobhane || 19 ||
[Analyze grammar]

sā samīkṣya tu tānsarvāṃstulyarūpadharānsthitān |
niścitya manasā buddhyā devi vavre patiṃ svakam || 20 ||
[Analyze grammar]

labdhvā tu cyavano bhāryāṃ vayorūpamavasthitaḥ |
hṛṣṭo'bravīnmahātejāstau nāsatyāvidaṃ vacaḥ || 21 ||
[Analyze grammar]

yadahaṃ rūpasaṃpanno vayasā ca samanvitaḥ |
kṛto bhavadbhyāṃ vṛddhaḥ sanbhāryāṃ ca prāptavānnijām |
tadbrūtaṃ vai vidhāsyāmi bhavatoryadabhīpsitam || 22 ||
[Analyze grammar]

aśvināvūcatuḥ |
āvāṃ tu devabhiṣajau na ca śakraḥ karoti nau |
somapānārhatāṃ tasmātkuru nau somapāyinau || 23 ||
[Analyze grammar]

cyavana uvāca |
ahaṃ vāṃ yajñabhāgārhau kariṣye somapāyinau || 24 ||
[Analyze grammar]

īśvara uvāca |
tatastau hṛṣṭamanasau nāsatyau divi jagmatuḥ |
cyavano'pi sukanyā ca surāviva vijahratuḥ || 25 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye cyavaneśvara māhātmyavarṇanaṃnāmaikāśītyuttaradviśatatamo'dhyāyaḥ || 281 ||
[Analyze grammar]