Chapter 251

[English text for this chapter is available]

gālava uvāca |
ityuktvā'kāśajāvāṇī virarāma śubhapradā |
te'pi devāstadāścaryaṃ mahaddṛṣṭvā mahāvratāḥ || 1 ||
[Analyze grammar]

catuṣṭayaṃ ca vṛkṣāṇāṃ cāturmāsye samāgate |
apūjayaṃśca vidhivadaikyabhāvena śūdraja || 2 ||
[Analyze grammar]

cāturmāsye'tha saṃpūrṇe devo hariharātmakaḥ |
prasannastānuvācātha bhaktyā pratyakṣarūpadhṛk || 3 ||
[Analyze grammar]

yūyaṃ gacchata deveśa mahā vrataparāyaṇāḥ |
bhuṃkta svānsvāṃścādhikārānmayā te dānavā hatāḥ || 4 ||
[Analyze grammar]

ityuktvā devadeveśāvaikyarūpadharau yadā |
gaṇānāṃ devatānāṃ ca buddhiṃ nirbhedatāṃ tadā || 5 ||
[Analyze grammar]

nayantau tau tadā ceśā babhūvaturarindamau |
te'pi devā nirābādhā hṛṣṭacittā hyabhedataḥ || 6 ||
[Analyze grammar]

prayayuḥ svāṃścādhikārānvimānagaṇa koṭibhiḥ |
gālava uvāca |
tathā tatrāpi te devāḥ pārvatyāḥ śāpamohitāḥ || 7 ||
[Analyze grammar]

stutvā tāṃ bilvapatraiśca pūjayitvā maheśvarīm |
prasannavadanāṃ stutvā praṇipatya punaḥpunaḥ || 8 ||
[Analyze grammar]

sā provāca tato devānviśvamātā tu saṃstutā |
mama śāpo vṛthā naiva bhaviṣyati surottamāḥ || 9 ||
[Analyze grammar]

tathāpi kṛtapāpānāṃ karavāṇi kṛpāṃ ca vaḥ |
svarge dṛṣanmayā naiva bhaviṣyatha surottamāḥ || 10 ||
[Analyze grammar]

martyalokaṃ ca saṃprāpya pratimāsu ca sarvaśaḥ |
sarve devāśca varadā lokānāṃ prabhaviṣyatha || 11 ||
[Analyze grammar]

pāṇigraheṇa vihitā ye kumārāḥ kumārikāḥ |
teṣāṃteṣāṃ prajāścaiva bhaviṣyatha na saṃśayaḥ || 12 ||
[Analyze grammar]

ityuktvā sā bhagavatī devatānāṃ varapradā |
viṣṇuṃ maheśvaraṃ caiva provāca kupitā bhṛśam || 13 ||
[Analyze grammar]

devāstasyā bhayānnaṣṭā martyeṣu pratimāṃ gatāḥ |
bhaktānāṃ mānasaṃ bhāvaṃ pūrayantaḥ susaṃsthitāḥ || 14 ||
[Analyze grammar]

yasmādviṣṇo maheśānastvayā'pi na niṣedhitaḥ |
tasmāttvamapi pāṣāṇo bhaviṣyasi na saṃśayaḥ || 15 ||
[Analyze grammar]

haro'pyaśmamayaṃ rūpaṃ prāpya lokavigarhitam |
liṃgākāraṃ vipraśāpānmahadduḥkhamavāpsyati || 16 ||
[Analyze grammar]

tacchrutvā bhagavānviṣṇuḥ pārvatīmanukūlayan |
uvāca praṇato bhūtvā harabhāryāṃ maheśvarīm || 17 ||
[Analyze grammar]

śrīviṣṇuruvāca |
mahāvrate mahādevi mahādevapriyā sadā |
tvaṃ hi sattvarajaḥsthā ca tāmasī śaktiruttamā || 18 ||
[Analyze grammar]

mātrātrayasamopetā guṇatrayavibhāvinī |
māyādīnāṃ janitrī tvaṃ viśvavyāpakarūpiṇī || 19 ||
[Analyze grammar]

vedatrayastutā tvaṃ ca sādhyārūpeṇa rāgiṇī |
arūpā sarvarūpā tvaṃ janasantānadāyinī || 20 ||
[Analyze grammar]

phalavelā mahākālī mahālakṣmīḥ sarasvatī |
oṃkāraśca vaṣaṭkārastvameva hi sureśvari || 21 ||
[Analyze grammar]

bhūtadhātri namaste'stu śivāyai ca namo'stu te |
rāgiṇyai ca virāgiṇyai vikarāle namaḥ śubhe || 22 ||
[Analyze grammar]

evaṃ stutā prasannākṣī prasannenāṃtarātmanā |
uvāca paramodāraṃ mithyāroṣayutaṃ vacaḥ || 23 ||
[Analyze grammar]

macchāpo nā'nyathā bhāvī janārdana tavāpyayam |
tatrā'pi saṃsthitastvaṃ hi yogīśvaravimuktidaḥ || 24 ||
[Analyze grammar]

kāmapradaśca bhaktānāṃ cāturmāsye viśeṣataḥ |
nimnagā gaṃḍakīnāma brahmaṇo dayitā sutā || 25 ||
[Analyze grammar]

pāṣāṇasārasaṃbhūtā puṇyadātrī mahājalā |
tasyāḥ suvimale nīre tava vāso bhaviṣyati || 26 ||
[Analyze grammar]

caturviṃśatibhedena purāṇajñairnirīkṣitaḥ |
mukhe jāṃbūnadaṃ caiva śālagrāmaḥ prakīrtitaḥ || 27 ||
[Analyze grammar]

varttulastejasaḥ piṃḍaḥ śriyā yukto bhaviṣyasi |
sarvasāmarthyasaṃyukto yogināmapi mokṣadaḥ || 28 ||
[Analyze grammar]

ye tvāṃ śilāgataṃ viṣṇuṃ pūjayiṣyaṃti mānavāḥ |
teṣāṃ sucintitāṃ siddhiṃ bhaktānāṃ saṃprayacchasi || 29 ||
[Analyze grammar]

śilāgataṃ ca deveśaṃ tulasyā bhakti tatparāḥ |
pūjayiṣyaṃti manujāsteṣāṃ muktirna dūrataḥ || 30 ||
[Analyze grammar]

śilāsthitaṃ ca yaḥ paśyettvāṃ viṣṇuṃ pratimāgatam |
sucakrāṃkitasarvāṃgaṃ na sa gacchedyamālayam || 31 ||
[Analyze grammar]

gālava uvāca |
iti te kathitaṃ sarvaṃ śālagrāmasya kāraṇam |
yathā sa bhagavānviṣṇuḥ pāṣāṇatvamupā gataḥ || 32 ||
[Analyze grammar]

govindo'pi mahāśāpaṃ labdhvā svabhavanaṃ gataḥ |
pārvatī ca maheśānaṃ kupitā praṇamayya ca || 33 ||
[Analyze grammar]

evaṃ sa eva bhagavānbhavabhūta bhavyabhūtādikṛtsakalasaṃsthitināśanāṃkaḥ |
so'pi śriyā saha bhavo'pi girīśaputryā sārddhaṃ caturṣu ca drumeṣu nivāsamāpa || 34 ||
[Analyze grammar]

iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye paija vanopākhyāne viṣṇuśāponāmaikapañcāśaduttaradviśatatamo'dhyāyaḥ || 251 ||
[Analyze grammar]