Chapter 239

[English text for this chapter is available]

nārada uvāca |
upacāraiḥ ṣoḍaśabhiḥ pūjanaṃ kriyate katham |
te ke ṣoḍaśa bhāvāḥ syurnityaṃ ye śayane hareḥ || 1 ||
[Analyze grammar]

etadvistarato brūhi pṛcchato me prajāpate |
tava prasādamāsādya jagatpūjyo bhavāmyaham || 2 ||
[Analyze grammar]

brahmovāca |
viṣṇubhaktirdṛḍhā kāryā vedaśāstravidhānataḥ |
vedamūlamidaṃ sarvaṃ vedo viṣṇuḥ sanātanaḥ || 3 ||
[Analyze grammar]

te vedā brāhmaṇādhārā brāhmaṇāścāgnidaivatāḥ |
agnau prāstāhutirvipro yajñe devaṃ yajansadā || 4 ||
[Analyze grammar]

jagatsaṃdhārayetsarvaṃ viṣṇupūjārataḥ sadā |
nārāyaṇaḥ smṛto dhyātaḥ kleśaduḥkhādināśanaḥ || 5 ||
[Analyze grammar]

cāturmāsye viśeṣeṇa jalarūpagato hariḥ |
jalādannāni jāyaṃte jagatāṃ tṛptihetave || 6 ||
[Analyze grammar]

viṣṇudehāṃśasaṃbhūtaṃ tadannaṃ brahma iṣyate |
tadannaṃ viṣṇave dattvā hyāvāhanapuraḥsaram || 7 ||
[Analyze grammar]

punarjanmajarākleśasaṃskārairnābhibhūyate |
ākāśasaṃbhavo veda eka eva purā'bhavat || 8 ||
[Analyze grammar]

tato yajuḥsāmasaṃjñāmṛgvedaḥ prāpa bhūtaye |
ṛgvedo'bhihitaḥ pūrvaṃ yajuḥsahasraśīrṣeti ca || 9 ||
[Analyze grammar]

ṣoḍaśarcaṃ mahāsūktaṃ nārāyaṇamayaṃ param |
tasyāpi pāṭhamātreṇa brahmahatyā niva rtate || 10 ||
[Analyze grammar]

vipraḥ pūrvaṃ nyaseddehe smṛtyuktena nije budhaḥ |
tatastu pratimāyāṃ ca śālagrāme viśeṣataḥ || 11 ||
[Analyze grammar]

krameṇa ca tataḥ kuryātpaścādāvāhanādikam |
āvāhya sakalaṃ rūpaṃ vaikuṇṭhasthānasaṃsthitam || 12 ||
[Analyze grammar]

kaustubhena virājaṃtaṃ sūryakoṭisamaprabham |
daṃḍahastaṃ śikhāsūtrasahitaṃ pītavāsasam || 13 ||
[Analyze grammar]

mahāsaṃnyāsinaṃ dhyāyeccāturmāsye viśeṣataḥ |
evaṃ rūpamayaṃ viṣṇuṃ sarvapāpaughahāriṇam || 14 ||
[Analyze grammar]

āvāhayecca purato dhyānasaṃsthaṃ dvijottama |
ṛcā prathamayā cāsyoṃkārādisamudīrṇayā || 15 ||
[Analyze grammar]

dvitīyayā cāsanaṃ ca pārṣadaiśca samanvitam |
sauvarṇānyāsanānyeṣāṃ manasā paricintayet || 16 ||
[Analyze grammar]

cintanairbhaktiyogena paripūrṇaṃ ca tadbhavet |
pādyaṃ tṛtīyayā kāryaṃ gaṃgāṃ tatra smaredbudhaḥ || 17 ||
[Analyze grammar]

arghyaḥ kāryastato viṣṇoḥ saridbhiḥ saptasāgaraiḥ |
punarācamanaṃ kāryamamṛtena jagatpateḥ || 18 ||
[Analyze grammar]

tribhirācamanaiḥ śuddhirbrāhmaṇasya nigadyate |
adbhistu prakṛtisthābhirhīnābhiḥ phenabudbudaiḥ || 19 ||
[Analyze grammar]

hṛtkaṇṭha tālugābhiśca yathāvarṇaṃ dvijātayaḥ |
śudhyeranstrī ca śūdraśca sakṛtspṛṣṭābhiraṃtataḥ || 20 ||
[Analyze grammar]

pañcamyā'camanaṃ kāryaṃ bhaktiyuktena cetasā |
bhaktigrāhyo hṛṣīkeśo bhaktyā'tmānaṃ prayacchati || 21 ||
[Analyze grammar]

tataḥ suvāsitaistoyaiḥ sarvoṣadhisamanvitaiḥ |
śeṣodakaiḥ svarṇaghaṭaiḥ snānaṃ devasya kārayet || 22 ||
[Analyze grammar]

tīrthodakaiḥ śraddhayā ca manasā samupāhṛtaiḥ |
aśraddhayā ratnarāśiḥ pradatto niṣphalo bhavet || 23 ||
[Analyze grammar]

vāryapi śraddhayā dattamanaṃtatvāya kalpate |
cāturmāsye viśeṣeṇa śraddhayā pūyate naraḥ || 24 ||
[Analyze grammar]

ṣaṣṭhyā snānaṃ tataḥ kāryaṃ punarācamanaṃ bhavet |
dadyācca vāsasī svarṇasahite bhaktiśaktitaḥ || 25 ||
[Analyze grammar]

ācchāditaṃ jagatsarvaṃ vastreṇācchādito hariḥ |
cāturmāsye viśeṣeṇa vastradānaṃ mahāphalam || 26 ||
[Analyze grammar]

punarācamanaṃ deyaṃ yataye viṣṇurūpiṇe |
vastradānaṃ ca saptamyā kāryaṃ viṣṇormunīśvara || 27 ||
[Analyze grammar]

yajñopavītamaṣṭamyā taccādhyātmatayā śṛṇu |
sūryakoṭisamasparśaṃ tejasā bhāsvaraṃ tathā || 28 ||
[Analyze grammar]

krodhābhibhūte vipre tu taḍitkoṭisabhaprabham |
sūryenduvahnisaṃyogādguṇatrayasamanvitam || 29 ||
[Analyze grammar]

trayīmayaṃ brahmaviṣṇurudrarūpaṃ triviṣṭapam |
yasya prabhāvādvipreṃdra mānavo dvija ucyate || 30 ||
[Analyze grammar]

janmanā jāyate śūdraḥ saṃskārāddvija ucyate |
śāpānugrahasāmarthyaṃ tathā krodhaḥ prasannatā || 31 ||
[Analyze grammar]

trailokyapravaratvaṃ ca brāhmaṇādeva jāyate |
na brāhmaṇasamo bandhurna brāhmaṇasamā gatiḥ || 32 ||
[Analyze grammar]

na brāhmaṇasamaḥ kaścittrailokye sacarācare |
dattopavīte brahmaṇye supte deve janārdane || 33 ||
[Analyze grammar]

sarvajagadbrahmamayaṃ saṃjātaṃ nātra saṃśayaḥ |
navamyā ca sulepaśca kartavyo yajñamūrtaye || 34 ||
[Analyze grammar]

suyakṣakardamairlipto viṣṇuryena jagadguruḥ |
tenā pyāyitametaddhi vāsitaṃ yaśasā jagat || 35 ||
[Analyze grammar]

tejasā bhāskaro loke devatvaṃ prāpya mānavaḥ |
brahmalokādike loke modate caṃdanapradaḥ || 36 ||
[Analyze grammar]

caṃdanālepasubhagaṃ viṣṇuṃ paśyaṃti mānavāḥ |
na te yamapuraṃ yāṃti cāturmāsye viśeṣataḥ || 37 ||
[Analyze grammar]

daśamyā puṣpapūjā ca bhaktipūjā tathaiva ca |
puṣpe caiva sadā lakṣmīrvasatyeva niraṃtaram || 381 ||
[Analyze grammar]

lakṣmyāḥ sarvatra gāminyā doṣo naiva prajāyate |
yathā sarvamayo viṣṇurna doṣairanubhūyate || 39 ||
[Analyze grammar]

tathā sarvamayī lakṣmīḥ satītvānnaiva hīyate |
pratimāsu ca sarvāsu sarvabhūteṣu nityadā || 40 ||
[Analyze grammar]

manuṣyadevapitṛṣu puṣpapūjā vidhīyate |
puṣpaiḥ saṃpūjito yena harirekaḥ śriyā saha || 41 ||
[Analyze grammar]

ābrahmastaṃbaparyaṃtaṃ pūjitaṃ tena vai jagat |
ataḥ suśvetakusumairviṣṇuṃ saṃpūjayetsadā || 42 ||
[Analyze grammar]

cāturmāsye viśeṣeṇa bhaktiyuktaḥ sadā śuciḥ |
bhaktyā suvihitā brahmanpuṣpapūjā narairyadi || 43 ||
[Analyze grammar]

yaṃyaṃ kāmamabhidhyāyettasya siddhirniraṃtarā |
puṣpairupacitaṃ viṣṇuṃ yadyanye praṇamaṃti ca || 44 ||
[Analyze grammar]

teṣāmapyakṣayā lokāścāturmāsye'dhikaṃ phalam |
ekādaśyā dhūpadānaṃ kartavyaṃ yataye harau || 45 ||
[Analyze grammar]

vanaspati raso divyo gaṃdhāḍhyo gandha uttamaḥ |
āghreyaḥ sarvadevānāṃ dhūpo'yaṃ pratigṛhyatām || 46 ||
[Analyze grammar]

imaṃ maṃtraṃ samuccārya dhūpamāgurujaṃ śubham |
dadyādbhagavate nityaṃ cāturmāsye mahāphalam || 47 ||
[Analyze grammar]

karpūracandanadalaiḥ sitāmadhusamanvitam |
māṃsījaṭābhiḥ sahitaṃ supte deve'tha sattama || 48 ||
[Analyze grammar]

devā ghrāṇena tuṣyaṃti dhūpaṃ ghrāṇaharaṃ śubham |
dvādaśyā dīpadānaṃ tu kartavyaṃ muktimicchubhiḥ || 49 ||
[Analyze grammar]

dīpaḥ sarveṣu kāryeṣu prathamastejasāṃ patiḥ |
dīpastamaughanāśāya dīpaḥ kāṃtiṃ prayacchati || 50 ||
[Analyze grammar]

tasmāddīpapradānena prīyatāṃ me janārdanaḥ |
ayaṃ paurāṇajo maṃtro vedarcena samanvitaḥ |
dīpapradāne sakalaḥ prayukto nāśayedagham || 51 ||
[Analyze grammar]

cāturmāsye dīpadānaṃ kurute yo hareḥ puraḥ |
tasya pāpamayo rāśirnimeṣādapi dahyate || 52 ||
[Analyze grammar]

tāvatpāpāni garjaṃti tāvadbibheti pātakī |
yāvanna vihito bhāsvāndīpo nārāyaṇālaye || 53 ||
[Analyze grammar]

darśanādapi dīpasya sarvasiddhirnṛṇāṃ bhavet || 54 ||
[Analyze grammar]

kāmanāṃ yāṃ samuddiśya dīpaṃ kārayate harau |
sāsā siddhyati nirvighnā supte'naṃte guṇottaram || 55 ||
[Analyze grammar]

paṃcāyatanasaṃstheṣu tathā deveṣu paṃcasu |
vihitaṃ dīpadānaṃ ca cāturmāsye mahāphalam || 56 ||
[Analyze grammar]

eko viṣṇustuṣyate muktidātā nityaṃ dhyātaḥ pūjitaḥ saṃstutaśca |
yaccābhīṣṭaṃ yacca gehe śubhaṃ vā tattaddeyaṃ muktihetornṛvaryaiḥ || 57 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye tapo'dhikāraṣoḍaśopacāradīpamahimavarṇanaṃnāmaikonacatvāriṃśaduttara dviśatatamo'dhyāyaḥ || 239 ||
[Analyze grammar]