Chapter 238

[English text for this chapter is available]

brahmovāca |
tapaḥ śṛṇuṣva vipreṃdra vistareṇa mahāmate |
yasya śravaṇamātreṇa cāturmāsye' ghanāśanam || 1 ||
[Analyze grammar]

ṣoḍaśairupacāraiśca viṣṇoḥ pūjā sadā tapaḥ |
tataḥ supte jagannāthe mahattapa udāhṛtam || 2 ||
[Analyze grammar]

karaṇaṃ paṃcayajñānāṃ satataṃ tapa eva hi |
tannivedya harau caiva cāturmāsye mahattapaḥ || 3 ||
[Analyze grammar]

ṛtuyānaṃ gṛhasthasya tapa eva sadaiva hi |
cāturmāsye hariprītyai tanniṣevyaṃ mahattapaḥ || 4 ||
[Analyze grammar]

satyavādastapo nityaṃ prāṇināṃ bhuvi durlabham |
supte devapatau kurvannanaṃtaphalabhāgbhavet || 5 ||
[Analyze grammar]

ahiṃsādiguṇānāṃ ca pālanaṃ satataṃ tapaḥ |
cāturmāsye tyaktavairaṃ mahattapa udāradhīḥ || 6 ||
[Analyze grammar]

tapa eva mahanmartyaḥ paṃcāyatanapūjanam |
cāturmāsye viśeṣeṇa hariprītyā samācaret || 7 ||
[Analyze grammar]

nārada uvāca |
paṃcāyatanasaṃjñeyaṃ kasyoktā sā kathaṃ bhavet |
kathaṃ pūjā ca kartavyā vistareṇāśu tadvada || 8 ||
[Analyze grammar]

brahmovāca |
prātarmadhyāhnapūjāyāṃ madhye pūjyo raviḥ sadā |
rātrau madhye bhaveccaṃdrastadvarṇakusumaiḥ śubhaiḥ || 9 ||
[Analyze grammar]

vahnikoṇe tu heraṃbaṃ sarvavighnopaśāṃtaye |
raktacaṃdana puṣpaiśca cāturmāsye viśeṣataḥ || 10 ||
[Analyze grammar]

nairṛtaṃ dalamāsthāya bhagavānduṣṭadarpahā |
gṛhasthasya sadā śatruvināśaṃ vidadhāti saḥ || 11 ||
[Analyze grammar]

nairṛtyakoṇagaṃ viṣṇuṃ pūjayetsarvadā budhaḥ |
sugandhacaṃdanaiḥ puṣpairnaivedyaiścātiśobhanaiḥ || 12 ||
[Analyze grammar]

gotrajā vāyukoṇe tu pūjanīyā sadā budhaiḥ |
putrapautrapravṛddhyarthaṃ sumanobhirmanoharaiḥ || 13 ||
[Analyze grammar]

aiśāne bhagavānrudraḥ śvetapuṣpaiḥ sadā'rcitaḥ |
apamṛtyuvināśāya sarvadoṣāpanuttaye || 14 ||
[Analyze grammar]

jāgarti mahimā yasya brahmādyairnaiva likhyate |
paṃcāyatanametaddhi pūjyate gṛhamedhibhiḥ || 15 ||
[Analyze grammar]

tapa etatsadā kāryaṃ cāturmāsye mahāphalam |
parvakāleṣu sarveṣu dānaṃ deyaṃ tapaḥ sadā |
cāturmāsye viśeṣeṇa tadanaṃtaṃ prajāyate || 16 ||
[Analyze grammar]

śaucaṃ tu dvividhaṃ grāhyaṃ bāhyamābhyaṃtaraṃ sadā |
jalaśaucaṃ tathā bāhyaṃ śraddhayā cāṃtaraṃ bhavet || 17 ||
[Analyze grammar]

idriyāṇāṃ grahaḥ kāryastapaso lakṣaṇaṃ param |
nivṛttyeṃdriyalaulyaṃ ca cāturmāsye mahattapaḥ || 18 ||
[Analyze grammar]

indriyāśvānsanniyamya satataṃ sukhamedhate |
narake pātyate prāṇaistairevotpathagāmibhiḥ || 19 ||
[Analyze grammar]

mamatārūpiṇīṃ grāhīṃ duṣṭāṃ nirbhartsya nigrahet |
tapa eva sadā puṃsāṃ cāturmāsye'dhigauravam || 20 ||
[Analyze grammar]

kāma eṣa mahāśatrustamekaṃ nirjayeddṛḍham |
jitakāmā mahātmānastairjitaṃ nikhilaṃ jagat || 21 ||
[Analyze grammar]

etacca tapaso mūlaṃ tapaso mūlameva tat |
sarvadā kāmavijayaḥ saṃkalpavijayastathā || 22 ||
[Analyze grammar]

tadeva hi paraṃ jñānaṃ kāmo yena prajāyate |
mahattapastadevāhuścātumāsye phalottamam || 23 ||
[Analyze grammar]

lobhaḥ sadā parityājyaḥ pāpaṃ lobhe samāsthitam |
tapastasyaiva vijayaścāturmāsye viśeṣataḥ || 24 ||
[Analyze grammar]

mohaḥ sadā'vivekaśca varjanīyaḥ prayatnataḥ |
tena tyakto naro jñānī na jñānī mohasaṃśrayāta || 25 ||
[Analyze grammar]

mada eva manuṣyāṇāṃ śarīrastho mahāripuḥ |
sadā sa eva nigrāhyaḥ supte deve viśeṣataḥ || 26 ||
[Analyze grammar]

mānaḥ sarveṣu bhūteṣu vasatyeva bhayāvahaḥ |
kṣamayā taṃ vinirjitya cāturmāsye guṇādhikaḥ || 27 ||
[Analyze grammar]

mātsaryaṃ nirjayetprājño mahāpātakakāraṇam |
cāturmāsye jitaṃ tena trailokyamamaraiḥ saha || 28 ||
[Analyze grammar]

ahaṃkārasamākrāṃtā munayo vijiteṃdriyāḥ |
dharmamārgaṃ parityajya kurvatyunmārgajāṃ kriyām || 29 ||
[Analyze grammar]

ahaṃkāraṃ parityajya satataṃ sukhamāpnuyāt |
cāturmāsye viśeṣeṇa tasya tyāge mahāphalam || 3 ||
[Analyze grammar]

etaddhi tapaso mūlaṃ yadetanmanasastyajet |
tyakteṣveteṣu sarveṣu para brahmamayo bhavet || 31 ||
[Analyze grammar]

prathamaṃ kāyaśuddhyarthaṃ prājāpatyaṃ samācaret |
śayane devadevasya viśeṣeṇa mahattapaḥ || 32 ||
[Analyze grammar]

harestu śayane nityamekāṃtaramu poṣaṇam |
yaḥ karoti naro bhaktyā na sa gacchedyamālayam || 33 ||
[Analyze grammar]

harisvāpe naro nityamekabhaktaṃ samācaret |
divasedivase tasya dvādaśāhaphalaṃ labhet || 34 ||
[Analyze grammar]

cāturmāsye naro yastu śākāhāraparo yadi |
puṇyaṃ kratusahasrāṇāṃ jāyate nātra saṃśayaḥ || 35 ||
[Analyze grammar]

cāturmāsye naro nityaṃ cāṃdrāya ṇavrataṃ caret |
ekaikamāse tatpuṇyaṃ varṇituṃ naiva śakyate || 36 ||
[Analyze grammar]

supte deve ca pārākaṃ yaḥ karoti viśuddhadhīḥ |
nārī vā śraddhayā yuktā śatajanmāgha nāśanam || 37 ||
[Analyze grammar]

kṛcchrasevī bhavedyastu supte deve janārdane |
pāparāśiṃ vinirdhūya vaikuṇṭhe gaṇatāṃ vrajet || 38 ||
[Analyze grammar]

taptakṛcchraparo yastu supte deve janārdane |
kīrtiṃ saṃprāpya vā putraṃ viṣṇusāyujyatāṃ vrajet || 39 ||
[Analyze grammar]

dugdhāhāraparo yastu cāturmāsye'bhijāyate |
tasya pāpasahasrāṇi vilayaṃ yāṃti dehinaḥ || 40 ||
[Analyze grammar]

mitānnāśanakṛddhīraścāturmāsye naro yadi |
nirdhūya sakalaṃ pāpaṃ vaikuṇṭhapadamāpnuyāt || 41 ||
[Analyze grammar]

ekānnāśanakṛnmartyo na rogairabhi bhūyate |
akṣāralavaṇāśī ca cāturmāsye na pāpabhāk || 42 ||
[Analyze grammar]

kṛtāhāro mahāpāpairnirmukto jāyate dhruvam |
harimuddiśya māseṣu caturṣu ca na saṃśayaḥ || 43 ||
[Analyze grammar]

kandamūlāśanakaraḥ pūrvajānsaha cātmanā |
uddhṛtya narakādghorādyāti viṣṇusalokatām || 44 ||
[Analyze grammar]

nityāṃbuprāśanakaraścāturmāsye yadā bhavet |
dinedine'śvamedhasya phalamāpnotyasaṃśayam || 45 ||
[Analyze grammar]

śītavṛṣṭisaho yastu cāturmāsye naro bhavet |
hariprītyai jagannāthastasyātmānaṃ prayacchati || 46 ||
[Analyze grammar]

mahāpārākasaṃjñaṃ tu mahattapa udāhṛtam |
māsaikamupavāsena sarvaṃ pūrṇaṃ prajāyate || 47 ||
[Analyze grammar]

devasvāpadinādau tu yāvatpavitradvādaśī |
pavitradvādaśīpūrvaṃ yāvacchravaṇadvādaśī || 48 ||
[Analyze grammar]

mahāpārākametaddhi dvitīyaṃ parikīrtitam |
śravaṇadvādaśīpūrvaṃ prāptā cāśvinadvādaśī || 49 ||
[Analyze grammar]

mahāpārāka tṛtīyaṃ prājñaiśca samudāhṛtam |
āśvinadvādaśī cādau prāptā devasubodhinī || 50 ||
[Analyze grammar]

mahāpārākametaddhi caturthaṃ parikathyate |
eteṣāmekamapi ca nārī vā puruṣo'pi vā || 51 ||
[Analyze grammar]

yaḥ karoti naro bhaktyā sa ca viṣṇuḥ sanātanaḥ |
idaṃ ca sarvatapasāṃ mahattapa udāhṛtam || 52 ||
[Analyze grammar]

duṣkaraṃ durlabhaṃ loke cāturmāsye makhādhikam |
divasedivase tasya yajñāyutaphalaṃ smṛtam || 53 ||
[Analyze grammar]

mahattapa idaṃ yena kṛtaṃ jagati durlabham |
idameva mahāpuṇyamidameva mahatsukham |
idameva paraṃ śreyo mahāpārākasevanam || 54 ||
[Analyze grammar]

nārāyaṇo vaseddehe jñānaṃ tasya prajāyate |
jīvanmuktaḥ sa bhavati mahāpātakakārakaḥ || 55 ||
[Analyze grammar]

tāvadgarjaṃti pāpāni narakāstāvadeva hi |
tāvanmāyāsahasrāṇi yāvanmāso pavāsakaḥ || 56 ||
[Analyze grammar]

cāturmāsyupavāsī yo yasya prāṃgaṇiko bhavet |
so'pi hatyāsahasrāṇi tyaktvā niṣkalmaṣo bhavet || 57 ||
[Analyze grammar]

ya idaṃ śrāvayenmartyo yaḥ paṭhetsatataṃ svayam || 58 ||
[Analyze grammar]

so'pi vācaspatisamaḥ phalaṃ prāpnotyasaṃśayam || 59 ||
[Analyze grammar]

idaṃ purāṇaṃ paramaṃ pavitraṃ śṛṇvangṛṇanpāpaviśuddhihetu |
nārāyaṇaṃ taṃ manasā vicintya mṛto'bhigacchatyamṛtaṃ surādhikam || 60 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye tapomahimāvarṇanaṃ nāmāṣṭatriṃśaduttaradviśatatamo'dhyāyaḥ || 238 ||
[Analyze grammar]