Chapter 233

[English text for this chapter is available]

ṛṣaya ūcuḥ |
sūta sūta mahābhāga śrotumicchāmahe vayam |
cāturmāsyavratānāṃ hi tvatto māhātmyavistaram || 1 ||
[Analyze grammar]

tadasmākaṃ mahābhāga kṛpāṃ kṛtvā'dhunā vada |
tvadvaco'mṛtapānena bhūyaḥ śraddhābhivardhate || 2 ||
[Analyze grammar]

sūta uvāca |
śṛṇudhvaṃ munayaḥ sarve cāturmāsyavratodbhavam |
māhātmyaṃ vistareṇaiva kathayiṣyāmi vo'grataḥ || 3 ||
[Analyze grammar]

purā brahmamukhācchrutvā nānāvratavidhānakam |
nāradaḥ paripapraccha bhūyo brahmāṇamādarāt || 4 ||
[Analyze grammar]

nārada uvāca |
devadeva mahābhāga vratāni subahūnyapi |
śrutāni tvanmukhādbrahmanna tṛptimadhigacchati || 5 ||
[Analyze grammar]

adhunā śrotumicchāmi cāturmāsyavrataṃ śubham || 6 ||
[Analyze grammar]

brahmovāca |
śṛṇu devamune mattaścāturmāsyavrataṃ śubham |
yacchrutvā bhārate khaṃḍe nṛṇāṃ muktirna durlabhā || 7 ||
[Analyze grammar]

muktiprado'yaṃ bhagavānsaṃsārottārakāraṇam |
yasya smaraṇamātreṇa sarvapāpaiḥ pramucyate || 8 ||
[Analyze grammar]

mānuṣye durlabhaṃ loke tatrā'pi ca kulīnatā |
tatrāpi sadayatvaṃ ca tatra satsaṃgamaḥ śubhaḥ || 9 ||
[Analyze grammar]

satsaṃgamo na yatrāsti viṣṇubhaktirvratāni ca |
cāturmāsye viśeṣeṇa viṣṇuvratakaraḥ śubhaḥ || 10 ||
[Analyze grammar]

cāturmāsye'vratī yastu tasya puṇyaṃ nirarthakam |
sarvatīrthāni dānāni puṇyānyāyatanāni ca || 11 ||
[Analyze grammar]

viṣṇumāśritya tiṣṭhaṃti cāturmāsye samāgate |
supuṣṭenāpi dehena jīvitaṃ tasya śobhanam || 12 ||
[Analyze grammar]

cāturmāsye samāyāte hariṃ yaḥ praṇamedbudhaḥ |
kṛtārthāstasya vibudhā yāvajjīvaṃ varapradāḥ || 13 ||
[Analyze grammar]

saṃprāpya mānuṣaṃ janma cāturmāsyaparāṅmukhaḥ |
tasya pāpaśatānyāhurdehasthāni na saṃśayaḥ || 14 ||
[Analyze grammar]

mānuṣyaṃ durlabhaṃ loke haribhaktiśca durlabhā |
cāturmāsye viśeṣeṇa supte deve janārdane || 15 ||
[Analyze grammar]

cāturmāsye naraḥ snānaṃ prātareva samācaret |
sarvakratuphalaṃ prāpya devavaddivi modate || 16 ||
[Analyze grammar]

cāturmāsye tu yaḥ snānaṃ kuryātsiddhimavāpnuyāt |
tathā nirjharaṇe snāti taḍāge kūpikāsu ca || 17 ||
[Analyze grammar]

tasya pāpasahasrāṇi vilayaṃ yāṃti tatkṣaṇāt |
puṣkare ca prayāge vā yatra kvāpi mahājale |
cāturmāsyeṣu yaḥ snāti puṇyasaṃkhyā na vidyate || 18 ||
[Analyze grammar]

revāyāṃ bhāskarakṣetre prācyāṃ sāgarasaṃgame |
ekāhamapi yaḥ snātaścāturmāsye na doṣabhāk || 19 ||
[Analyze grammar]

dinatrayaṃ ca yaḥ snāti narmadāyāṃ samāhitaḥ |
supte deve jagannāthe pāpaṃ yāti sahasradhā || 20 ||
[Analyze grammar]

pakṣamekaṃ tu yaḥ snāti godāvaryāṃ dinodaye |
sa bhittvā karmajaṃ dehaṃ yāti viṣṇoḥ salokatām || 21 ||
[Analyze grammar]

tilodakena yaḥ snāti tathā caivāmalodakaiḥ |
bilvapatrodakaiścaiva cāturmāsye na doṣabhāk || 22 ||
[Analyze grammar]

gaṃgāṃ smarati yo nityamudapātrasamīpataḥ |
tadgāṃgeyaṃ jalaṃ jātaṃ tena snānaṃ samācaret || 23 ||
[Analyze grammar]

gaṃgā'pi devadevasya caraṇāṃguṣṭhavāhinī |
pāpaghnī sā sadā proktā cāturmāsye viśeṣataḥ || 24 ||
[Analyze grammar]

yataḥ pāpasahasrāṇi viṣṇurdahati saṃsmṛtaḥ |
tasmātpādodakaṃ śīrṣe cāturmāsye dhṛtaṃ śivam || 25 ||
[Analyze grammar]

cāturmāsye jalagato devo nārāyaṇo bhavet |
sarvatīrthādhikaṃ snānaṃ viṣṇutejoṃśasaṃgatam || 26 ||
[Analyze grammar]

snānaṃ daśavidhaṃ kāryaṃ viṣṇunāma mahāphalam |
supte deve viśeṣeṇa naro devatvamāpnuyāt || 27 ||
[Analyze grammar]

vinā snānaṃ tu yatkarma puṇyakāryamayaṃ śubham |
kriyate niṣphalaṃ brahmaṃstatpragṛhṇaṃti rākṣasāḥ || 28 ||
[Analyze grammar]

snānena satyamāpnoti snānaṃ dharmaḥ sanātanaḥ |
dharmānmokṣaphalaṃ prāpya punarnaivāvasīdati || 29 ||
[Analyze grammar]

ye cādhyātmavidaḥ puṇyā ye ca vedāṃgapāragāḥ |
sarvadānapradā ye ca teṣāṃ snānena śuddhatā || 3 ||
[Analyze grammar]

kṛtasnānasya ca harirdehamāśritya tiṣṭhati |
sarvakriyākalāpeṣu saṃpūrṇa phalado bhavet || 31 ||
[Analyze grammar]

sarvapāpavināśāya devatā toṣaṇāya ca |
cāturmāsye jalasnānaṃ sarvapāpakṣayāvaham || 32 ||
[Analyze grammar]

niśāyāṃ caiva na snāyātsaṃdhyāyāṃ grahaṇaṃ vinā |
uṣṇodakena na snānaṃ rātrau śuddhirna jāyate || 33 ||
[Analyze grammar]

bhānusaṃdarśanācchuddhirvihitā sarvakarmasu |
cāturmāsye viśeṣeṇa jalaśuddhistu bhāvinī || 34 ||
[Analyze grammar]

aśaktyā tu śarīrasya bhasmasnānena śudhyati |
maṃtrasnānena vipreṃdra viṣṇupādodakena vā || 358 ||
[Analyze grammar]

nārāyaṇāgrataḥ snānaṃ kṣetra tīrthanadīṣu ca |
yaḥ karoti viśuddhātmā cāturmāsye viśeṣataḥ || 36 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne cāturmāsyamāhātmye brahmanāradasaṃvāde gaṃgodakasnānaphalamāhātmyavarṇanaṃnāma trayastriṃśaduttaradviśatatamo'dhyāyaḥ || 233 ||
[Analyze grammar]