Chapter 93

[English text for this chapter is available]

sūta uvāca |
athānyadapi tatrāsti gomukhākhyaṃ suśobhanam |
yadgovaktrātpurā labdhaṃ sarvapātakanāśanam || 1 ||
[Analyze grammar]

purāsīdatra gopālaḥ kaścitkuṣṭhasamāvṛtaḥ |
camatkārapuraṃ vipra atīva kṣāmatāṃ gataḥ || 2 ||
[Analyze grammar]

kasyacittvatha kālasya tena mārgeṇa gokulam |
madhyāhnasamaye prāptaṃ caṃdre citrāsamanvitaḥ || 3 ||
[Analyze grammar]

ekādaśyāṃ tṛṣārttaṃ ca bhāskare vṛṣasaṃsthite |
ekayāpi tato dhenvā tṛṇastambamatīva hi |
nīlamālokitaṃ tatra dūrādetya praharṣitā || 4 ||
[Analyze grammar]

dantairdrutaṃ samutpāṭya yāvadākarṣati dvijāḥ |
tāvattajjaḍamārgeṇa toyadhārā vinirgatā || 5 ||
[Analyze grammar]

athāsvādya tṛṇaṃ tasmāttṛṣārtā ca śanaiḥśanaiḥ |
papau toyaṃ suviśrabdhā susvādu kṣīrasaṃnibham || 6 ||
[Analyze grammar]

tasyā vegena tattoyaṃ pibantyāstatrabhūtale |
gartā jātā suvistīrṇā salilena samāvṛtā || 7 ||
[Analyze grammar]

tato'nyāḥ śataśo gāvaḥ papustoyaṃ munirmalam |
tṛṣārttāstaddvijaśreṣṭhāḥ pīyūṣarasasaṃnibham || 8 ||
[Analyze grammar]

yathāyathā gatā gāvastatra toyaṃ pibaṃti tāḥ |
sā gartā vaktrasaṃsparśādvṛddhiṃ yāti tathā tathā || 9 ||
[Analyze grammar]

tataśca gokule kṛtsne jāte tṛṣṇāvivarjite |
gopālo'pi tṛṣārtastu tasmiṃstoye viveśa ca || 10 ||
[Analyze grammar]

aṃgaṃ prakṣālya pītvāpo yāvanniṣkrāmati drutam |
tāvatpaśyati gātraṃ svaṃ dvādaśārkasamaprabham || 11 ||
[Analyze grammar]

tato vismayamāpanno gatvā svīyaṃ niketanam |
vṛtāṃtaṃ kathayāmāsa lokānāṃ purato'khilam || 12 ||
[Analyze grammar]

tṛṇastambaṃ yathā dhenvā tatrotpāṭya praśaktitaḥ |
yathā vinirgataṃ toyaṃ yathā tenāvagāhitam || 13 ||
[Analyze grammar]

taddṛṣṭvā mānavāḥ sarve gatvā divyaṃ jalaṃ ca tat |
vyādhigrastā viśeṣeṇa snānaṃ cakruḥ samāhitāḥ || 4 ||
[Analyze grammar]

bhavaṃti ca vinirmuktā rogaiḥ pāpaiśca tatkṣaṇāt |
apāpāśca punaryāṃti tatkṣaṇāttridivālayam || 15 ||
[Analyze grammar]

tataḥprabhṛti tatkhyātaṃ tīrthaṃ gomukhasaṃjñitam |
gomukhādbhūtale jātaṃ yataścaivaṃ dvijottamāḥ || 16 ||
[Analyze grammar]

atha bhītaḥ sahasrākṣastaddṛṣṭvā svargadāyakam |
akleśena manuṣyāṇāṃ pūrayāmāsa pāṃsubhiḥ || 17 ||
[Analyze grammar]

ṛṣaya ūcuḥ |
kiṃ tatkāraṇamādiṣṭaṃ yena tattādṛśaṃ jalam |
tasmātsthānādviniṣkrāṃtaṃ sūtaputra vadasva naḥ || 18 ||
[Analyze grammar]

sūta uvāca |
atra pūrvaṃ tapastaptamambarīṣeṇa bhūbhujā |
putra śokābhibhūtena toṣito garuḍadhvajaḥ || 19 ||
[Analyze grammar]

tasya putraḥ suvikhyātaḥ suvarcā iti viśrutaḥ |
eko babhūva vṛddhatve kathaṃciddvijasattamāḥ || 20 ||
[Analyze grammar]

pūrvakarmavipākena sa bālo'pi ca tatsutaḥ |
kuṣṭhavyādhisamākrāṃtaḥ pitṛmātṛsuduḥkhadaḥ || 21 ||
[Analyze grammar]

atha tatkāmikaṃ kṣetraṃ sa gatvā pṛthivīpatiḥ |
cakāra roganāśāya svaputrārthaṃ mahattapaḥ || 22 ||
[Analyze grammar]

tatastuṣṭiṃ gatastasya svayameva janārdanaḥ |
pradāya darśanaṃ vākyaṃ tataḥ provāca sādaram || 23 ||
[Analyze grammar]

parituṣṭo'smi te vatsa tasmāccitte'bhivāṃchitam |
prārthayasva prayacchāmi varaṃ putra na saṃśayaḥ || 24 ||
[Analyze grammar]

rājovāca |
mamāyaṃ saṃmataḥ putro grastaḥ kuṣṭhena keśava |
bālo'pi tatkuruṣvāsya kuṣṭhavyādhiparikṣayam || 25 ||
[Analyze grammar]

śrībhagavānuvāca |
eṣa āsītpurā rājā meghavāhanasaṃjñitaḥ |
brahmaṇyaśca kṛtajñaśca sarvaśāstrārthapāragaḥ || 26 ||
[Analyze grammar]

kasyacittvatha kālasya brāhmaṇo'nena ghātitaḥ |
aṃtaḥpure niśākāle praviṣṭo jārakarmakṛta || 27 ||
[Analyze grammar]

atha paśyati yāvatsa prabhāte'bhyudite ravau |
yajñopavītasaṃyuktastāvatsa dvijarūpadhṛk || 28 ||
[Analyze grammar]

atha taṃ brāhmaṇaṃ matvā ghṛṇāviṣṭaḥ suduḥkhitaḥ |
gatvā kāśīpurīṃ paścāttapaścakre samāhitaḥ || 29 ||
[Analyze grammar]

rājye putraṃ samādhāya vairāgyaṃ paramaṃ gataḥ |
niyato niyatāhāro bhikṣānnakṛtabhojanaḥ || 30 ||
[Analyze grammar]

tataḥ kālena saṃprāpto yamasya sadanaṃ prati |
vipāpmāpi ca cihnena yukto'yaṃ pṛthivīpatiḥ || 31 ||
[Analyze grammar]

brahmaghātodbhavenaiva bālabhāve'pi saṃsthite |
ye'tra kuṣṭhasamāyuktā dṛśyaṃte mānavā bhuvi |
tairnūnaṃ brāhmaṇāghāto vihitaścānyajanmani || 32 ||
[Analyze grammar]

hāṭakeśvaraje kṣetre yo gatvā śrāddhamācaret |
pitṝṇāṃ caiva sarveṣāmanṛṇaḥ sa prajāyate || 33 ||
[Analyze grammar]

na brāhmaṇavadhādbāhyaṃ kuṣṭhavyādhiḥ prajāyate |
etatsatyaṃ vijānīhi vadato mama bhūpate || 34 ||
[Analyze grammar]

aṃbarīṣa uvāca |
etadarthaṃ surādhīśa mayā tvaṃ pūjitaḥ prabho |
prasanne tvayi deveśa nāsādhyaṃ vidyate bhuvi || 35 ||
[Analyze grammar]

evamuktastatastena bhagavānmadhusūdanaḥ |
pātālajāhnavītoyaṃ sa sasmāra samādhinā || 36 ||
[Analyze grammar]

sā dhyātā sahasā tena viṣṇunā prabhaviṣṇunā |
kṛtvā tu vivaraṃ sūkṣmaṃ viniṣkrāṃtā'tha tatkṣaṇāt || 37 ||
[Analyze grammar]

tataḥ provāca vacanamaṃbarīṣaṃ caturbhujaḥ |
nimajjatu sutaste'tra supuṇye jāhnavījale || 38 ||
[Analyze grammar]

yena kuṣṭhavinirmuktastatkṣaṇādeva jāyate |
tathā brahmavadhodbhūtaiḥ pātakairupapātakaiḥ || 39 ||
[Analyze grammar]

etasminneva kāle tu samānīya sutaṃ nṛpaḥ |
snāpayāmāsa tattoyaiḥ pratyakṣaṃ śārṅgadhanvanaḥ || 40 ||
[Analyze grammar]

tataḥ sa bālakaḥ sadyaḥ snātamātro dvijottamāḥ |
kuṣṭhavyādhivinirmukto jāto bālārkasaṃnibhaḥ || 41 ||
[Analyze grammar]

tataḥ praṇamya taṃ devaṃ harṣeṇa mahatā'nvitaḥ |
pitrā samaṃ jagāmātha svakīyaṃ bhavanaṃ dvijāḥ || 42 ||
[Analyze grammar]

tasmingate mahīpāle saputre tatkṣaṇāddhariḥ |
tadraṃdhraṃ pūrayāmāsa yathā no vetti kaścana || 43 ||
[Analyze grammar]

etasmātkāraṇātpūrvaṃ tattoyaṃ sarvapāpahṛt |
yadgomukhena bhūyo'pi bhūtale prakaṭīkṛtam || 44 ||
[Analyze grammar]

adyāpi tajjalasparśātsupavitro dharātale |
yaḥ snānaṃ sūryavāreṇa kurute'rkodayaṃ prati |
tasya nāśaṃ drutaṃ yāṃti galagaṃḍādikā iha || 49 ||
[Analyze grammar]

vyādhayopi mahāraudrā dadrupāmā samudbhavāḥ |
upasargodbhavāścaiva visphoṭakavicarcikā || 46 ||
[Analyze grammar]

niṣkāmastu punarmartyo yaḥ snānaṃ tatra bhaktitaḥ |
kurute yāti lokaṃ sa devadevasya cakriṇaḥ || 47 ||
[Analyze grammar]

yasmindine samānītā sā gaṃgā tatra viṣṇunā |
tasmindine vṛṣe sūryaḥ sthitaścitrāsu caṃdramāḥ || 48 ||
[Analyze grammar]

tithiścaikādaśī caiva devadevasya śārṅgiṇaḥ |
govaktreṇa tṛṇastaṃbaṃ yasmiṃścaiva tu vāsare |
samākṛṣṭaṃ ca tatraiva yoga evaṃ vyavasthitaḥ || 49 ||
[Analyze grammar]

tathānye'pi dine tasminyadi toyamavāpya ca |
snānaṃ karoti sadbhaktyā tatphalaṃ so'pi cāpnuyāt || 50 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye gomukhatīrthamāhātmyavarṇanaṃnāma trinavatitamo'dhyāyaḥ || 93 ||
[Analyze grammar]