Chapter 92

[English text for this chapter is available]

sūta uvāca |
agnitīrthasya māhātmyametadvaḥ parikīrtitam |
brahmakuṃḍasamutpattiradhunā śrūyatāṃ dvijāḥ || 1 ||
[Analyze grammar]

yadā saṃsthāpito brahmā mārkaṃḍena mahātmanā |
tadā vinirmitaṃ tatra kuṇḍaṃ śucijalānvitam || 2 ||
[Analyze grammar]

proktaṃ ca kārtike māsi kṛttikāsthe niśākare |
samyagbhīṣmavrataṃ kṛtvā snātvātra salile śubhe || 3 ||
[Analyze grammar]

pūjayiṣyati yo devaṃ padmayoniṃ tataḥ param |
sa śūdro'pi tanuṃ tyaktvā brahmayonau prayāsyati || 4 ||
[Analyze grammar]

brāhmaṇo'pi yadi snānaṃ tatra kuṇḍe kariṣyati |
kṛtvā bhīṣmavrataṃ samyagbrahmalokaṃ prayāsyati || 5 ||
[Analyze grammar]

evaṃ pravadatastasya mārkaṃḍeyasya sanmuneḥ |
śrutaṃ tatsakalaṃ vākyaṃ paśupālena kenacit || 6 ||
[Analyze grammar]

tataḥ śraddhāprayuktena tena tadbhīṣmapaṃcakam |
yathāvadvihitaṃ samyakkārtike māsi saṃsthite || 7 ||
[Analyze grammar]

tataśca kṛttikāyoge pūrṇimāyāṃ yathāvidhi |
saṃpūjya padmajaṃ paścātpūjitaḥ puruṣottamaḥ || 8 ||
[Analyze grammar]

tataḥ kālavipākena sa paṃcatvamupāgataḥ |
brāhmaṇasya gṛhe jātaḥ pure'traiva dvijottamāḥ |
jātismaraḥ prabhāyuktaḥ pitṛmātṛpratuṣṭidaḥ || 9 ||
[Analyze grammar]

evaṃ pragacchatastasya vṛddhiṃ tatra purottame |
pitṛmātṛsamudbhūto yādṛksneho vyavasthitaḥ || 10 ||
[Analyze grammar]

anyadehodbhave vāpi tasya śūdreparisthitaḥ |
sa tasya dhanasaṃpannaḥ sadaiva kurute dvijaḥ || 11 ||
[Analyze grammar]

upakārapradānaṃ ca yatkiṃcittasya saṃmatam |
anyasmindivase śūdraḥ sa pitā pūrvajanmanaḥ |
tasya pañcatvamāpannaḥ saṃprāpte cāyuṣaḥ kṣaye || 12 ||
[Analyze grammar]

atha tasya mahāśokaṃ sa kṛtvā tadanaṃtaram |
cakāra pretakāryāṇi niḥśeṣāṇi prabhaktitaḥ || 13 ||
[Analyze grammar]

atha tasya samālokya tādṛśaṃ tadviceṣṭitam |
pṛṣṭaḥ sa kautukāviṣṭaiḥ pitṛmātṛsutādibhiḥ || 14 ||
[Analyze grammar]

kasmāttvamasya nīcasya paśupālasya sarvadā |
atisnehasamāyukto niḥspṛhasyāpi śaṃsa naḥ || 15 ||
[Analyze grammar]

tasyāpi pretakāryāṇi mṛtasyāpi karoṣi kim |
etannaḥ sarvamācakṣva na cedguhyaṃ vyavasthitam || 16 ||
[Analyze grammar]

teṣāṃ tadvacanaṃ śrutvā kiṃcillajjāsamanvitaḥ |
tānabravīcchṛṇudhvaṃ ca kathayiṣyāmyasaṃśayam || 17 ||
[Analyze grammar]

ahamasyānyadehatve putra āsaṃ susaṃmataḥ |
paśupālanakarmajñaḥ prāṇebhyo vallabhaḥ sadā || 18 ||
[Analyze grammar]

kasyacittvatha kālasya mārkaṃḍasya mahāmuneḥ |
śrutaṃ pravadato vākyaṃ brahmakuṇḍasamudbhavam || 19 ||
[Analyze grammar]

kārtikyāṃ kṛttikāyoge bhīṣmapañcakakṛnnaraḥ |
samyakchraddhāsamutpanno yo'tra snānaṃ kariṣyati || 20 ||
[Analyze grammar]

dṛṣṭvā pitāmahaṃ devaṃ pūjayitvā janārdanam |
sa bhaviṣyati śūdro'pi brāhmaṇaścānyajanmani || 21 ||
[Analyze grammar]

tanmayā vihitaṃ samyaksnātvā tatra śubhāvahe |
sukuṇḍe kārtike māsi tena jāto'smi saddvijaḥ || 22 ||
[Analyze grammar]

candrodayasya viprarṣeranvaye bhuvi viśrute |
saṃsmaranpūrvikāṃ jāti tena sneho mama sthitaḥ |
tasyopari mahānnityaṃ śūdrasyāpi nirargalaḥ || 23 ||
[Analyze grammar]

ato'haṃ kṛttikāyoge kārtikyāṃ bhaktisaṃyutaḥ |
jñātvā karomi bhīṣmasya paṃcakaṃ vratamuttamam || 24 ||
[Analyze grammar]

sūta uvāca |
evaṃ tasya vacaḥ śrutvā te cānye ca dvijottamāḥ || |
bhīṣmasya pañcakaṃ cakruḥ samyakchraddhāsamanvitāḥ || 25 ||
[Analyze grammar]

tataḥprabhṛti tatkuṇḍaṃ vikhyātaṃ dharaṇītale |
sthitamuttaradigbhāge brahmakuṇḍamiti smṛtam || 26 ||
[Analyze grammar]

yaḥ snānaṃ sarvadā tatra brāhmaṇaḥ prakaroti vai |
sa saṃbhavati vipreṃdro jāyamānaḥ punaḥ punaḥ || 27 ||
[Analyze grammar]

itiśrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye brahmakuṇḍamāhātmyavarṇanaṃnāma dvinavatitamodhyāyaḥ || 92 ||
[Analyze grammar]