Chapter 229

[English text for this chapter is available]

śrīmārkaṇḍeya uvāca |
evaṃ te kathitaṃ rājanpurāṇaṃ dharmasaṃhitam |
śivaprītyā yathā proktaṃ vāyunā devasaṃsadi || 1 ||
[Analyze grammar]

ṣaṣṭitīrthasahasrāṇi ṣaṣṭikoṭistathaiva ca |
ādimadhyāvasāneṣu narmadāyāṃ pade pade || 2 ||
[Analyze grammar]

mayā dvādaśasāhasrī saṃhitā yā śrutā purā |
devadevasya gadataḥ sāmprataṃ kathitā tava || 3 ||
[Analyze grammar]

pṛṣṭastvayāhaṃ bhūpāla parvate'marakaṇṭake |
sthitaḥ saṃkṣepataḥ sarvaṃ mayā tatkathitaṃ tava || 4 ||
[Analyze grammar]

narmadācaritaṃ puṇyaṃ śṛṇu tasyāsti yatphalam |
yatphalaṃ sarvavedaiḥ syātsaṣaḍaṅgapadakramaiḥ || 5 ||
[Analyze grammar]

paṭhitaiśca śrutairvāpi tasmādbahutaraṃ bhavet |
satrayājī phalaṃ yatra labhate dvādaśābdikam || 6 ||
[Analyze grammar]

carite tu śrute devyā labhate tādṛśaṃ phalam |
sarvatīrtheṣu yatpuṇyaṃ snātvā sāgaramāditaḥ || 7 ||
[Analyze grammar]

sakṛtsnātvā tathā śrutvā narmadāyāṃ phalaṃ hi tat |
ādimadhyāvasānena narmadācaritaṃ śubham || 8 ||
[Analyze grammar]

yaḥ śṛṇoti naro bhaktyā tasya puṇyaphalaṃ śṛṇu |
sa prāpya śivasaṃsthānaṃ rudrakanyāsamāvṛtaḥ || 9 ||
[Analyze grammar]

rudrasyānucaro bhūtvā tenaiva saha modate |
etaddharmamupākhyānaṃ sarvaśāstreṣu sattamam || 10 ||
[Analyze grammar]

deśe vā maṇḍale vāpi vā grāme nagare'pi vā |
gṛhe vā tiṣṭhate yasya cāturvarṇyasya bhārata || 11 ||
[Analyze grammar]

sa brahmā sa śivaḥ sākṣātsa ca devo janārdanaḥ |
trividhaṃ kāraṇaṃ loke dharmapanthānamuttamam || 12 ||
[Analyze grammar]

devatānāṃ guruṃ śāstraṃ paramaṃ siddhikāraṇam |
śrutveśvaramukhātpārtha mayāpi tava kīrtitam || 13 ||
[Analyze grammar]

dakṣiṇe cottare kūle yāni tīrthāni kānicit |
pradhānataḥ supuṇyāni kathitāni viśeṣataḥ || 14 ||
[Analyze grammar]

sparśanāddarśanātteṣāṃ kīrtanācchravaṇāttathā |
mucyate sarvapāpebhyo rudralokaṃ sa gacchati || 15 ||
[Analyze grammar]

idaṃ yaḥ śṛṇuyānnityaṃ purāṇaṃ śivabhāṣitam |
brāhmaṇo vedavidyāvān kṣatriyo vijayī bhavet || 16 ||
[Analyze grammar]

dhanabhāgī bhavedvaiśyaḥ śūdro vai dharmabhāgbhavet |
saubhāgyaṃ santatiṃ svargaṃ nārī śrutvāpnuyāddhanam || 17 ||
[Analyze grammar]

brahmaghnaśca surāpaśca steyī ca gurutalpagaḥ |
māhātmyaṃ narmadāyāstu śrutvā pāpabahiṣkṛtāḥ || 18 ||
[Analyze grammar]

pāpabhedī kṛtaghnaśca svāmiviśvāsaghātakaḥ |
goghnaśca garadaścaiva kanyāvikrayakārakaḥ || 19 ||
[Analyze grammar]

ete śrutvaiva pāpebhyo mucyante nātra saṃśayaḥ |
ye punarbhāvitātmānaḥ śṛṇvanti satataṃ nṛpa || 20 ||
[Analyze grammar]

pūjayanta idaṃ devāḥ pūjitā guravaśca taiḥ |
narmadā pūjitā tena bhagavāṃśca maheśvaraḥ || 21 ||
[Analyze grammar]

tasmātsarvaprayatnena gandhapuṣpavibhūṣaṇaiḥ |
pūjitaṃ parayā bhaktyā śāstrametatphalapradam || 22 ||
[Analyze grammar]

lekhāpayitvā sakalaṃ narmadācaritaṃ śubham |
uttamaṃ sarvaśāstrebhyo yo dadāti dvijanmane || 23 ||
[Analyze grammar]

narmadāsarvatīrtheṣu snāne dāne ca yatphalam |
tatphalaṃ samavāpnoti sa naro nātra saṃśayaḥ || 24 ||
[Analyze grammar]

etatpurāṇaṃ rudroktaṃ mahāpuṇyaphalapradam |
svargadaṃ putradaṃ dhanyaṃ yaśasyaṃ kīrtivardhanam || 25 ||
[Analyze grammar]

sarvapāpaharaṃ pārtha duḥkhaduḥsvapnanāśanam |
paṭhatāṃ śṛṇvatāṃ rājan sarvakāmārthasiddhidam || 26 ||
[Analyze grammar]

śāntirastu śivaṃ cāstu lokāḥ santu nirāmayāḥ |
gobrāhmaṇebhyaḥ svastyastu dharmaṃ dharmātmajāśrayaḥ || 27 ||
[Analyze grammar]

narakāntakarī revā satīrthā viśvapāvanī |
narmadā dharmadā cāstu śarmadā pārtha te sadā || 28 ||
[Analyze grammar]