Chapter 189

[English text for this chapter is available]

adhyāya || 189 ||
[Analyze grammar]

śrīmārkaṇḍeya uvāca |
tato gacchettu rājendra tīrthaṃ paramaśobhanam |
udīrṇo yatra vārāho hyabhavaddharaṇīdharaḥ || 1 ||
[Analyze grammar]

dhanvadaṃṣṭrāṃ karālāgrāṃ bibhracca pṛthivīmimām |
sa eva pañcamaḥ prokto vārāho muktidāyakaḥ || 2 ||
[Analyze grammar]

yudhiṣṭhira uvāca |
kathamudīrṇarūpo'bhūdvārāho dharaṇīdharaḥ |
vārāhatvaṃ gataḥ kena pañcamaḥ kena saṃjñitaḥ || 3 ||
[Analyze grammar]

mārkaṇḍeya uvāca |
ādikalpe purā rājankṣīrode bhagavān hariḥ |
śete sa bhogiśayane yoganidrāvimohitaḥ || 4 ||
[Analyze grammar]

babhūva nṛpatiśreṣṭha gatvā vai devasaṃnidhau |
avocadbhārakhinnāhaṃ gamiṣyāmi rasātalam || 5 ||
[Analyze grammar]

dṛṣṭvā devāḥ samudvignā gatā yatra janārdanaḥ |
tuṣṭuvurvāgbhiriṣṭābhiḥ keśavaṃ jagatpatim || 6 ||
[Analyze grammar]

devā ūcuḥ |
namo namaste deveśa surārtihara sarvaga |
viśvamūrte namastubhyaṃ trāhi sarvānmahadbhayāt || 7 ||
[Analyze grammar]

ityukto daivatairdevo hyuvāca kimupasthitam |
kāryaṃ vadadhvaṃ me devā yatkṛtyaṃ mā ciraṃ kṛthāḥ || 8 ||
[Analyze grammar]

devā ūcuḥ |
dharā dharitrī bhūtānāṃ bhārodvignā nimajjati |
tāmuddhara hṛṣīkeśa lokānsaṃsthāpaya sthitau || 9 ||
[Analyze grammar]

evamuktaḥ suraiḥ sarvaiḥ keśavaḥ parameśvaraḥ |
vārāhaṃ rūpamāsthāya sarvayajñamayaṃ vibhuḥ || 10 ||
[Analyze grammar]

daṃṣṭrākarālaṃ piṅgākṣaṃ samākuñcitamūrdhajam |
kṛtvā'nantaṃ pādapīṭhaṃ daṃṣṭrāgreṇoddharanbhuvam || 11 ||
[Analyze grammar]

saparvatavanāmurvīṃ samudraparimekhalām |
uddhṛtya bhagavān viṣṇurudīrṇaḥ samajāyata || 12 ||
[Analyze grammar]

darśayanpañcadhātmānamuttare narmadātaṭe |
tathādyaṃ koralāyāṃ tu dvitīyaṃ yodhanīpure || 13 ||
[Analyze grammar]

jayakṣetrābhidhāne tu jayeti parikīrtitam |
asurānmohayalliṅgastṛtīyaḥ parikīrtitaḥ || 14 ||
[Analyze grammar]

pāvanāya jagaddhetoḥ sthito yasmācchaśiprabhaḥ |
atastu nṛpaśārdūla śveta ityābhidhīyate || 15 ||
[Analyze grammar]

uddhṛtya jagatāṃ devīmudīrṇo bhṛgukacchake |
tataḥ pañcama udīrṇo varāha iti saṃjñitaḥ || 16 ||
[Analyze grammar]

iti pañcavarāhāste kathitaḥ pāṇḍunandana |
yugapaddarśanaṃ caiṣāṃ brahmahatyāṃ vyapohati || 17 ||
[Analyze grammar]

jyeṣṭhe māsi site pakṣa ekādaśyāṃ viśeṣataḥ |
gatvā hyādivarāhaṃ tu samprāpte daśamīdine || 18 ||
[Analyze grammar]

haviṣyamannaṃ bhuñjīyāllaghusāyaṃ gate ravau |
rātrau jāgaraṇaṃ kuryādvārāhe hyādisaṃjñake || 19 ||
[Analyze grammar]

tataḥ prabhāte hyuṣasi saṃsnātvā narmadājale |
saṃtarpya pitṛdevāṃśca tilairyavavimiśritaiḥ || 20 ||
[Analyze grammar]

dhenuṃ dadyāddvije yogye sarvābharaṇabhūṣitām |
nirmamo nirahaṅkāro dānaṃ dadyāddvijātaye || 21 ||
[Analyze grammar]

gatvā sampūjayeddevaṃ vārāhaṃ hyādisaṃjñitam |
anena vidhinā pūjya paścādgacchejjayaṃ tvaran || 22 ||
[Analyze grammar]

tvaritaṃ tu jayaṃ gatvā pūrvakaṃ vidhimācaret |
aśvaṃ dadyāddvijāgryāya jayapūrvābhinirgatam || 23 ||
[Analyze grammar]

liṅge caiva tilā deyāḥ śvete hiraṇyameva ca |
udīrṇe ca bhuvaṃ dadyātpūrvakaṃ vidhimācaret || 24 ||
[Analyze grammar]

anastamita āditye varāhānpañca paśyataḥ |
yatphalaṃ labhate pārtha tadihaikamanāḥ śṛṇu || 25 ||
[Analyze grammar]

brahmahatyā surāpānaṃ steyaṃ gurvaṅganāgamaḥ |
ebhistu saha saṃyogo viśvastānāṃ ca vañcanam || 26 ||
[Analyze grammar]

svasṛduhitṛbhaginīkuladāropabṛṃhaṇam |
ā janmamaraṇādyāvatpāpaṃ bharatasattama || 27 ||
[Analyze grammar]

tīrthapañcakapūtasya vaiṣṇavasya viśeṣataḥ |
yugapaccavinaśyeta tūlarāśirivānalāt || 28 ||
[Analyze grammar]

nārāyaṇānusmaraṇājjapadhyānādviśeṣataḥ |
vipraṇaśyanti pāpāni girikūṭasamānyapi || 29 ||
[Analyze grammar]

dṛṣṭvā pañca varāhānvai pauruṣe mahati sthitaḥ |
āplavannarmadātoye śrāddhaṃ kṛtvā yathāvidhi || 30 ||
[Analyze grammar]

udayāstamanādarvāgyaḥ paśyelloṭaṇeśvaram |
kalevaravimuktaḥ sa ityevaṃ śaṅkaro'bravīt || 31 ||
[Analyze grammar]

muktiṃ prayāti sahasā duṣprāpāṃ parameśvarīm |
pauruṣe kriyamāṇe'pi na siddhirjāyate yadi || 32 ||
[Analyze grammar]

bruvanti svargagamanamapi pāpānvitasya ca |
yatra tatra gatasyaiva bhavetpañcavarāhakī || 33 ||
[Analyze grammar]

jyeṣṭhasyaikādaśītithau dhruvaṃ tatra vasennaraḥ |
ādiṃ jayaṃ tathā śvetaṃ liṅgamudīrṇameva ca || 34 ||
[Analyze grammar]

āśritya tasyā draṣṭavyā varāhāstu yatastataḥ |
jyeṣṭhasyaikādaśītithau viṣṇunā prabhuviṣṇunā || 35 ||
[Analyze grammar]

vārāhaṃ rūpamāsthāya uddhṛtā dharaṇī vibho |
puṇyātpuṇyatamā tena hyaśeṣāghaughanāśinī || 36 ||
[Analyze grammar]

dṛṣṭvā pañcavarāhānvai kroḍamudīrṇarūpiṇam |
pūjayitvā vidhānena paścājjāgaraṇaṃ caret || 37 ||
[Analyze grammar]

sapañcavartikān dīpān ghṛtenojjvālya bhaktitaḥ |
purāṇaśravaṇairnṛtyairgītavādyaiḥ sumaṅgalaiḥ || 38 ||
[Analyze grammar]

vedajāpyaiḥ pavitraiśca kṣapayitvā ca śarvarīm |
yatpuṇyaṃ labhate martyo hyājamīḍha śṛṇuṣva tat || 39 ||
[Analyze grammar]

revājalaṃ puṇyatamaṃ pṛthivyāṃ tathā ca devo jagatāṃ patirhariḥ |
ekādaśī pāpaharā narendra bahvāyāsairlabhyate mānavānām || 40 ||
[Analyze grammar]

ekaikaśo brahmahatyādikāni śaktāni hantuṃ pāpasaṅghāni rājan |
naite sarve yugapadvai sametā hantuṃ śaktāḥ kiṃ na tadbrūhi rājan || 41 ||
[Analyze grammar]

yathedamuktaṃ tava dharmasūno śrutaṃ ca yacchaṅkarāccandramauleḥ |
śrutvedamicchanmucyate sarvapāpaiḥ paṭhanpadaṃ yāti hi vṛtraśatroḥ || 42 ||
[Analyze grammar]