Chapter 178

[English text for this chapter is available]

| śrīmārkaṇḍeya uvāca |
tato gacchettu rājendra gaṅgāvāhakamuttamam |
narmadāyāṃ mahāpuṇyaṃ bhṛgutīrthasamīpataḥ || 1 ||
[Analyze grammar]

tatra gaṅgā mahāpuṇyā cacāra vipulaṃ tapaḥ |
purā varṣaśataṃ sāgraṃ paramaṃ vratamāsthitā || 2 ||
[Analyze grammar]

dhyātvā devaṃ jagadyoniṃ nārāyaṇamakalmaṣam |
ātmānaṃ paramaṃ dhāma saritsā jagatīpate || 3 ||
[Analyze grammar]

tato janārdano deva āgatyedamuvāca ha || 4 ||
[Analyze grammar]

viṣṇuruvāca |
tapasā tava tuṣṭo'haṃ matpādāmbujasambhave |
mattaḥ kimicchase devi brūhi kiṃ karavāṇi te || 5 ||
[Analyze grammar]

gaṅgovāca |
tvatpādakamalādbhraṣṭā gaṅgā sahacarā vibho |
yadṛcchayā trilokeśa vandyamānā divaukasaiḥ || 6 ||
[Analyze grammar]

nṛpo bhagīrathastasmāttapaḥ kṛtvā suduṣkaram |
samārādhya jagannāthaṃ śaṅkaraṃ lokaśaṅkaram || 7 ||
[Analyze grammar]

avatārayāmāsa hi māṃ pṛthivyāṃ dharaṇīdhara |
mayā vai yuvayorvākyādavatāraḥ kṛto bhuvi || 8 ||
[Analyze grammar]

vaiṣṇavīmiti māṃ matvā janaḥ sarvāpluto mayi |
ye vai brahmaṇo loke ye ca vai gurutalpagāḥ || 9 ||
[Analyze grammar]

tyāginaḥ pitṛmātṛbhyāṃ ye ca svarṇaharā narāḥ |
goghnā ye manujā loke tathā ye prāṇihiṃsakāḥ || 10 ||
[Analyze grammar]

agamyāgāmino ye ca hyabhakṣyasya ca bhakṣakāḥ |
ye cānṛtapravaktāro ye ca viśvāsaghātakāḥ || 11 ||
[Analyze grammar]

devabrāhmaṇavittānāṃ hartāro ye narādhamāḥ |
devabrahmagurustrīṇāṃ ye ca nindākarā narāḥ || 12 ||
[Analyze grammar]

brahmaśāpapradagdhā ye ye caivātmahano dvijāḥ |
bhraṣṭānaśanasaṃnyāsaniyatavratacāriṇaḥ || 13 ||
[Analyze grammar]

tathaivāpeyapeyāśca ye ca svagurunindakāḥ |
niṣedhakā ye dānānāṃ pātradānaparāṅmukhāḥ || 14 ||
[Analyze grammar]

ṛtughnā ye svapatnīnāṃ pitroḥ sehaparā na hi |
bāndhaveṣu ca dīneṣu karuṇā yasya nāsti vai || 15 ||
[Analyze grammar]

kṣetrasetuvibhedī ca pūrvamārgapralopakaḥ |
nāstikaḥ śāstrahīnastu vipraḥ sandhyāvivarjitaḥ || 16 ||
[Analyze grammar]

ahutāśī hyasaṃtuṣṭaḥ sarvāśī sarvavikrayī |
kadaryā nāstikāḥ krūrāḥ kṛtaghnā ye dvijāyaḥ || 17 ||
[Analyze grammar]

paiśunyā rasavikreyāḥ sarvakālavinākṛtāḥ |
svagotrāṃ paragotrāṃ vā ye bhuñjanti dvijādhamāḥ || 18 ||
[Analyze grammar]

te māṃ prāpya vimucyante pāpasaṅghaiḥ susaṃcitaiḥ |
tatpāpakṣārataptāyā na śarma mama vidyate || 19 ||
[Analyze grammar]

tathā kuru jagannātha yathāhaṃ śarma cāpnuyām |
evamuktastu deveśastuṣṭaḥ provāca jāhnavīm || 20 ||
[Analyze grammar]

viṣṇuruvāca |
ahamatra vasiṣyāmi gaṅgādharasahāyavān |
praviśasva sadā revāṃ tvamatraiva ca mūrtinā || 21 ||
[Analyze grammar]

mama pādatalaṃ prāpya vaha tripathagāmini |
yadā bahūdakakāle narmadājalasaṃbhṛtā || 22 ||
[Analyze grammar]

prāvṛṭkālaṃ samāsādya bhaviṣyati jalākulā |
plāvyobhayataṭaṃ devī prāpya māmuttarasthitam || 23 ||
[Analyze grammar]

plāvayiṣyati toyena yadā śaṅkhaṃ kare sthitam |
tadā parvaśatodyuktaṃ vaiṣṇavaṃ parvasaṃjñitam || 24 ||
[Analyze grammar]

na tena sadṛśaṃ kiṃcidvyatīpātādisaṃkramam |
ayane dve ca na tathā puṇyātpuṇyataraṃ yathā || 25 ||
[Analyze grammar]

tasminparvaṇi deveśi śaṅkhaṃ saṃspṛśya mānavaḥ |
snānamācarate toye miśre gāṅgeyanārmade || 26 ||
[Analyze grammar]

puṇyaṃ tvaśeṣapuṇyānāṃ maṅgalānāṃ ca maṅgalam |
viṣṇunā vidhṛto yena tasmācchāntiḥ pracakrame || 27 ||
[Analyze grammar]

tatrāntaṃ pāpasaṅghasya dhruvamāpnoti mānavaḥ |
śaṅkhoddhāre naraḥ snātvā tarpayetpitṛdevatāḥ || 28 ||
[Analyze grammar]

tṛptāste dvādaśābdāni siddhiṃ ca sārvakāmikīm |
gaṅgāvahe tu yaḥ śrāddhaṃ śaṅkhoddhāre pradāsyati || 29 ||
[Analyze grammar]

tena piṇḍapradānena nṛtyanti pitarastathā |
śaṅkhoddhāre naraḥ snātvā pūjayedbalakeśavau || 30 ||
[Analyze grammar]

rātrau jāgaraṇaṃ kṛtvā śuddho bhavati jāhnavi |
yattvaṃ lokakṛtaṃ karma manyase bhuvi duḥsaham || 31 ||
[Analyze grammar]

tasminparvaṇi tatsarvaṃ tatra snātvā vyapohaya |
evamuktvā naraśreṣṭha viṣṇuścāntaradhīyata || 32 ||
[Analyze grammar]

tadāprabhṛti tattīrthaṃ gaṅgāvāhakamuttamam |
brahmādyairṛṣibhistāta pāramparyakramāgataiḥ || 33 ||
[Analyze grammar]

tatra tīrthe tu yaḥ snātvā bhaktibhāvena bhārata |
gaṅgātīrthe tu sa snātaḥ samasteṣu na saṃśayaḥ || 34 ||
[Analyze grammar]

tatra tīrthe mṛtānāṃ tu narāṇāṃ bhāvitātmanām |
anivartikā gatisteṣāṃ viṣṇulokātkadācana || 35 ||
[Analyze grammar]