Chapter 111

[English text for this chapter is available]

| adhyāya || 111 ||
[Analyze grammar]

śrīmārkaṇḍeya uvāca |
narmadādakṣiṇe kūle tīrthaṃ paramaśobhanam |
skandena nirmitaṃ pūrvaṃ tapaḥ kṛtvā sudāruṇam || 1 ||
[Analyze grammar]

yudhiṣṭhira uvāca |
skandasya caritaṃ sarvamājanma dvijasattama |
tīrthasya ca vidhiṃ puṇyaṃ kathayasva yathārthataḥ || 2 ||
[Analyze grammar]

śrīmārkaṇḍeya uvāca |
devadevena vai taptaṃ tapaḥ pūrvaṃ yudhiṣṭhira |
vijñaptena suraiḥ sarvairumādevī vivāhitā || 3 ||
[Analyze grammar]

nāsti senāpatiḥ kaściddevānāṃ surasattama |
nīyante dānavairghoraiḥ sarve devāḥ savāsavāḥ || 4 ||
[Analyze grammar]

yathā niśā vinā candraṃ divaso bhāskaraṃ vinā |
na śobhate muhūrtaṃ vai tathā senā vināyakā || 5 ||
[Analyze grammar]

evaṃ jñātvā mahādeva parayā dayayā vibho |
senānīrdīyatāṃ kaścittriṣu lokeṣu viśrutaḥ || 6 ||
[Analyze grammar]

etacchrutvā śubhaṃ vākyaṃ devānāṃ parameśvaraḥ |
kāmayāna umāṃ devīṃ sasmāra manasā smaram || 7 ||
[Analyze grammar]

tena mūrchitasarvāṅgaḥ kāmarūpo jagadguruḥ |
kāmayāmāsa rudrāṇīṃ divyaṃ varṣaśataṃ kila || 8 ||
[Analyze grammar]

devarājastato jñātvā mahāmaithunagaṃ haram |
saṃmantrya daivataiḥ sārddhaṃ praiṣayajjātavedasam || 9 ||
[Analyze grammar]

tena gatvā mahādevaḥ paramānandasaṃsthitaḥ |
sahasā tena dṛṣṭo'sau hāhetyuktvā samutthitaḥ || 10 ||
[Analyze grammar]

tataḥ kruddhā mahādevī śāpavācamuvāca ha |
vepamānā mahārāja śṛṇu yatte vadāmyaham || 11 ||
[Analyze grammar]

ahaṃ yasmātsuraiḥ sarvairyācitā putrajanmani |
kṛtā ratiśca viphalā saṃpreṣya jātavedasam || 12 ||
[Analyze grammar]

tasmātsarve putrahīnā bhaviṣyanti na saṃśayaḥ |
hareṇoktastato vahnirasmākaṃ bījamāvaha || 13 ||
[Analyze grammar]

yathā bhavati lokeṣu tathā tvaṃ kartumarhasi |
mama tejastvayā śakyaṃ gṛhītuṃ surasattama |
devakāryārthasiddhyarthaṃ nānyaḥ śakto jagattraye || 14 ||
[Analyze grammar]

agniruvāca |
tejasastava me deva kā śaktirdhāraṇe vibho |
karoti bhasmasātsarvaṃ trailokyaṃ sacarācaram || 15 ||
[Analyze grammar]

īśvara uvāca |
udarasthena bījena yadi te jāyate rujā |
tadā kṣipasva tattejo gaṅgātoye hutāśana || 16 ||
[Analyze grammar]

evamuktvā mahādevo'moghaṃ bījamuttamam |
havyavāhamukhe sarvaṃ prakṣipyāntaradhīyata || 17 ||
[Analyze grammar]

gate cādarśanaṃ deve dahyamāno hutāśanaḥ |
gaṅgātoye vinikṣipya jagāma svaṃniveśanam || 18 ||
[Analyze grammar]

asahantī tu tattejo gaṅgāpi saritāṃ varā |
śarastambe vinikṣipya jagāmāśu yathāgatam || 19 ||
[Analyze grammar]

tatra jātaṃ tu taddṛṣṭvā sarve devāḥ savāsavāḥ |
kṛttikāṃ preṣayāmāsuḥ stanyaṃ pāyayituṃ tadā || 20 ||
[Analyze grammar]

dṛṣṭvā tā āgatāḥ sarvā gaṅgāgarbhe mahāmateḥ |
ṣaṇmukhaiḥ ṣaṇmukho bhūtvā pipāsurapibatstanam || 21 ||
[Analyze grammar]

jātakarmādisaṃskārānvedoktānpadmasambhavaḥ |
cakāra sarvāndājendra vidhidṛṣṭena karmaṇā || 22 ||
[Analyze grammar]

ṣaṇmukhātṣaṇmukho nāma kārttikeyastu kṛttikāt |
kumāraśca kumāratvādgaṅgāgarbho'gnijo'paraḥ || 23 ||
[Analyze grammar]

evaṃ kumāraḥ sambhūto hyanadhītya sa vedavit |
śāstrāṇyanekāni veda cacāra vipulaṃ tapaḥ || 24 ||
[Analyze grammar]

devāraṇyeṣu sarveṣu nadīṣu ca nadeṣu ca |
pṛthivyāṃ yāni tīrthāni samudrādyāni bhārata || 25 ||
[Analyze grammar]

tataḥ paryāyayogena narmadātaṭamāśritaḥ |
narmadādakṣiṇe kūle cacāra vipulaṃ tapaḥ || 26 ||
[Analyze grammar]

ṛgyajuḥsāmavihitaṃ japañjāpyamaharniśam |
dhyāyamāno mahādevaṃ śucirdhamanisaṃtataḥ || 27 ||
[Analyze grammar]

tato varṣasahasrānte pūrṇe devo maheśvaraḥ |
umayā sahitaḥ kāle tadā vacanamabravīt || 28 ||
[Analyze grammar]

īśvara uvāca |
ahaṃ te varadastāta gaurī mātā pitā hyaham |
varaṃ vṛṇīṣva yacceṣṭaṃ triṣu lokeṣu durlabham || 29 ||
[Analyze grammar]

ṣaṇmukha uvāca |
yadi tuṣṭo mahādeva umayā saha śaṅkara |
vṛṇomi mātāpitarau nānyā gatirmatirmama || 30 ||
[Analyze grammar]

etacchrutvā śubhaṃ vākyaṃ putrasya vadanāccyutam |
tathetyuktvā tu snehena premṇā taṃ pariṣasvaje || 31 ||
[Analyze grammar]

tatastaṃ mūrdhnyupāghrāya hyumayovāca śaṅkaraḥ || 32 ||
[Analyze grammar]

īśvara uvāca |
akṣayaścāvyayaścaiva senānīstvaṃ bhaviṣyasi || 33 ||
[Analyze grammar]

śikhī ca te vāhanaṃ divyarūpo datto mayā śaktidharasya saṃkhye |
surāsurādīṃśca jayeti coktvā jagāma kailāsavaraṃ mahātmā || 34 ||
[Analyze grammar]

gate cādarśanaṃ deve tadā sa śikhivāhanaḥ |
sthāpayitvā mahādevaṃ jagāma surasannidhau || 35 ||
[Analyze grammar]

tadāprabhṛti tattīrthaṃ skandatīrthamiti śrutam |
sarvapāpaharaṃ puṇyaṃ martyānāṃ bhuvi durlabham || 36 ||
[Analyze grammar]

tatra tīrthe tu yo rājanbhaktyā snātvārcayecchivam |
gandhamālyābhiṣekaiśca yājñikaṃ sa labhetphalam || 37 ||
[Analyze grammar]

skandatīrthe tu yaḥ snātvā pūjayetpitṛdevatāḥ |
tilamiśreṇa toyena tasya puṇyaphalaṃ śṛṇu || 38 ||
[Analyze grammar]

piṇḍadānena caikena vidhiyuktena bhārata |
dvādaśābdāni tuṣyanti pitaro nātra saṃśayaḥ || 39 ||
[Analyze grammar]

tatra tīrthe tu rājendra śubhaṃ vā yādi vāśubham |
iha loke pare caiva tatsarvaṃ jāyate'kṣayam || 40 ||
[Analyze grammar]

tatra tīrthe tu yaḥ kaścitprāṇatyāgaṃ kariṣyati |
śāstrayuktena vidhinā sa gacchecchivamandiram || 41 ||
[Analyze grammar]

kalpamekaṃ vasitvā tu devagandharvapūjitaḥ |
atra bhāratavarṣe tu jāyate vimale kule || 42 ||
[Analyze grammar]

vedavedāṅgatattvajñaḥ sarvavyādhivivarjitaḥ |
jīvedvarṣaśataṃ sāgraṃ putrapautrasamanvitaḥ || 43 ||
[Analyze grammar]

idaṃ te kathitaṃ rājanskandatīrthasya sambhavam |
dhanyaṃ yaśasyamāyuṣyaṃ sarvaduḥkhaghnamuttamam |
sarvapāpaharaṃ puṇyaṃ devadevena bhāṣitam || 44 ||
[Analyze grammar]