Chapter 67

[English text for this chapter is available]

| adhyāya || 67 ||
[Analyze grammar]

śrīmārkaṇḍeya uvāca |
tasyaivānantaraṃ tāta jalamadhye vyavasthitam |
luṅkeśvaramiti khyātaṃ surāsuranamaskṛtam || 1 ||
[Analyze grammar]

idaṃ tīrthaṃ mahāpuṇyaṃ nānāścaryaṃ mahītale |
asya tīrthasya māhātmyamutpattiṃ śṛṇu bhārata || 2 ||
[Analyze grammar]

āsītpurā mahāvīryo dānavo baladarpitaḥ |
kālapṛṣṭha iti khyātaḥ suto brahmasutasya ca || 3 ||
[Analyze grammar]

gaṅgātaṭaṃ samāśritya cacāra vipulaṃ tapaḥ |
adhomukho'pi saṃsthitvāpibaddhūmamaharniśam || 4 ||
[Analyze grammar]

tataścānantaraṃ devastiṣṭhate hyumayā saha |
dṛṣṭvā taṃ pārvatī sā tu tapasyugre vyavasthitam || 5 ||
[Analyze grammar]

paśya paśya mahādeva dhūmāśī tiṣṭhate naraḥ |
prasīda taṃ kuruṣvādya dehi śīghraṃ varaṃ vibho || 6 ||
[Analyze grammar]

īśvara uvāca |
yaduktaṃ vacanaṃ devi na tanme rocate priye |
svakāryaṃ ca sadā cintyaṃ parakāryaṃ visarjayet || 7 ||
[Analyze grammar]

mūrkhastrībālaśatrūṇāṃ yaśchandenānuvartate |
vyasane patate ghore satyametadudīritam || 8 ||
[Analyze grammar]

devyuvāca |
bhāryayābhyarthito bhartā kāraṇaṃ bahu bhāṣate |
laghutvaṃ yāti sā nārī evaṃ śāstreṣu paṭhyate || 9 ||
[Analyze grammar]

prāṇatyāgaṃ kariṣyāmi yadi māṃ tvaṃ na manyase |
pārvatyā prerito devo gato'sau dānavaṃ prati || 10 ||
[Analyze grammar]

īśvara uvāca |
kimarthaṃ pibase dhūmaṃ kimarthaṃ tapyase tapaḥ |
kiṃ duḥkhaṃ kiṃ nu santāpo vada kāryamabhīpsitam || 11 ||
[Analyze grammar]

yuvā tvaṃ dṛśyase'dyāpi varṣaviṃśatireva ca |
tadācakṣva hi me sarvaṃ tapasaḥ kāraṇaṃ mahat || 12 ||
[Analyze grammar]

dānava uvāca |
acalā dīyatāṃ bhaktirmama sthairyaṃ tavopari |
aparaṃ varṣasāhasraṃ nirvighnaṃ me gataṃ vibho || 13 ||
[Analyze grammar]

divasānāṃ sahasre dve pūrṇe tvattapasā mama || 14 ||
[Analyze grammar]

īśvara uvāca |
yācayābhīpsitaṃ kāryaṃ tuṣṭo'haṃ tava suvrata |
devasya vacanaṃ śrutvā cintayāmāsa dānavaḥ || 15 ||
[Analyze grammar]

kiṃ nākaṃ yācayāmyadya kimadya sakalāṃ mahīm |
evaṃ saṃcintayāmāsa kāmabāṇena pīḍitaḥ || 16 ||
[Analyze grammar]

dānava uvāca |
yadi tuṣṭo'si me deva varaṃ dāsyasi me prabho |
saṅgrāmaistu na tuṣṭo'haṃ balaṃ nāstīti kiṃcana || 17 ||
[Analyze grammar]

yasya mūrdhanyahaṃ deva pāṇinā samupaspṛśe |
devadānavagandharvo bhasmasādyātu tatkṣaṇāt || 18 ||
[Analyze grammar]

īśvara uvāca |
yattvayā cintitaṃ kiṃcittatsarvaṃ saphalaṃ tava |
uttiṣṭha gaccha śīghraṃ tvaṃ bhavanaṃ prati dānava || 19 ||
[Analyze grammar]

dānava uvāca |
sthīyatāṃ devadeveśa yāvajjñāsyāmi te varam |
yuṣmanmūrdhni nyase pāṇiṃ pratyayo me bhavedyathā || 20 ||
[Analyze grammar]

tataścānantaraṃ devaścintayāno maheśvaraḥ |
na skando na harirbrahmā yaḥ kāryeṣu kṣamo'dhunā || 21 ||
[Analyze grammar]

jñātvā caivāpadaṃ prāptāṃ devaḥ prārthayate vṛṣam |
anena saha pāpena yudhyasva sāmprataṃ kṣaṇam || 22 ||
[Analyze grammar]

karaṃ prāsārayaddaityo devaṃ mūrdhni kila spṛśet |
lāṅgūlenāhato daityo viṣaṇṇaḥ patito bhuvi || 23 ||
[Analyze grammar]

devastu dakṣiṇāmāśāṃ gataścaivomayā saha |
bhayabhīto nirīkṣeta grīvāṃ bhajya punaḥpunaḥ || 24 ||
[Analyze grammar]

gate cādarśanaṃ deve yuyudhe vṛṣabheṇa saḥ |
dvāvetau balināṃ śreṣṭhau yuyudhāte mahābalau || 25 ||
[Analyze grammar]

prahārairvajrasadṛśaiḥ kopena ghaṭikātrayam |
pāṇibhyāṃ na spṛśedyo vai vṛṣabhasya śirastathā || 26 ||
[Analyze grammar]

hatvā lāṅgūlapātena āgato vṛṣabhastadā |
utthitaścāpyasau daityo vrajate vṛṣapṛṣṭhataḥ || 27 ||
[Analyze grammar]

vāyuvegena samprāpto yatra devo maheśvaraḥ |
āgataṃ dānavaṃ dṛṣṭvā vṛṣo vacanamabravīt || 28 ||
[Analyze grammar]

āruhya pṛṣṭhe me deva śīghrameva hi gamyatām |
āruhya vṛṣabhaṃ devo jagāma comayā saha || 29 ||
[Analyze grammar]

nākaṃ prāptastato devo gataḥ śakrasya mandiram |
nātyajaddevapṛṣṭhaṃ tu dānavo baladarpitaḥ || 30 ||
[Analyze grammar]

indralokaṃ parityajya brahmalokaṃ gatastadā |
yatrayatra vrajeddevo bhayātsaha divaukasaiḥ || 31 ||
[Analyze grammar]

apaśyattatra tatraiva pṛṣṭhe lagnaṃ tu dānavam |
sarvāṃllokān bhramitvā tu devo vismayamāgataḥ || 32 ||
[Analyze grammar]

na sthānaṃ vidyate kiṃcidyatra viśramyate kṣaṇam |
devadānavayostatra yuddhaṃ jñātvā sudāruṇam || 33 ||
[Analyze grammar]

harṣitātmā munistatra ciraṃ nṛtyati nāradaḥ |
dhanyo'hamadya me janma jīvitaṃ ca sujīvitam || 34 ||
[Analyze grammar]

mahāntaṃ ca kaliṃ dṛṣṭvā saṃtoṣaḥ paramo'bhavat |
devadānavayostatra yuddhaṃ tyaktvā ca nāradaḥ || 35 ||
[Analyze grammar]

ājagāma tato vipro yatra devo maheśvaraḥ |
dṛṣṭvā devo'tha taṃ vipraṃ pratipūjyābravīdidam || 36 ||
[Analyze grammar]

bho nārada muniśreṣṭha jānīṣe keśavaṃ kvacit |
gatvā tatra ca śīghraṃ tvaṃ keśavāya nivedaya || 37 ||
[Analyze grammar]

nārada uvāca |
devadānavasiddhānāṃ gandharvoragarakṣasām |
sarveṣāmeva deveśo harate dhruvamāpadam || 38 ||
[Analyze grammar]

asaṃbhāvyaṃ na vaktavyaṃ manasāpi na cintayet |
īdṛśīṃ naiva budhyāmi āpadaṃ ca vibho tava || 39 ||
[Analyze grammar]

īśvara uvāca |
gaccha nārada śīghraṃ tvaṃ yatra devo janārdanaḥ |
viditaṃ ca tvayā sarvaṃ yatkṛtaṃ dānavena tu || 40 ||
[Analyze grammar]

avadhyo dānavo hyeṣa sendrairapi marudgaṇaiḥ |
gatvā tu keśavaṃ devaṃ nivedaya mahāmune || 41 ||
[Analyze grammar]

nārada uvāca |
na tu gacchāmyahaṃ deva suptaḥ kṣīrodadhau sukhī |
keśavaḥ preraṇe hyeṣāmādeśo dīyatāṃ prabho || 42 ||
[Analyze grammar]

mātrā svasrā duhitrā vā rājānaṃ ca tathā prabhum |
guruṃ caivāditaḥ kṛtvā śayānaṃ na prabodhayet || 43 ||
[Analyze grammar]

īśvara uvāca |
yadi kvacidagāreṣu vahnirutpadyate mahān |
nidhanaṃ yānti tatrasthā yadbudhyerannasūrayaḥ || 44 ||
[Analyze grammar]

nārada uvāca |
śīghraṃ gaccha mahādeva ātmānaṃ rakṣa suprabho |
gacchāmyahaṃ na sandeho yatra devo janārdanaḥ || 45 ||
[Analyze grammar]

tato nandimahākālau stambhahastau bhayānakau |
jaghnaturdānavaṃ tatra mudgarādibhirāyudhaiḥ || 46 ||
[Analyze grammar]

trayo'pi ca mahākāyāḥ saptatālapramāṇakāḥ |
na śamo jāyate teṣāṃ yudhyatāṃ ca parasparam || 47 ||
[Analyze grammar]

tataścānantaraṃ vipro'gacchattaṃ keśavaṃ prati |
suptaṃ kṣīrārṇave'paśyaccheṣaparyaṅkasaṃsthitam || 48 ||
[Analyze grammar]

lakṣmyā pādayugaṃ gṛhya ūrūpari niveśitam |
apsarogīyamānaṃ tu bhaktyānamya ca keśavam || 49 ||
[Analyze grammar]

adya me saphalaṃ janma jīvitaṃ ca sujīvitam |
utthāpayasva deveśaṃ lakṣmi tvamaviśaṅkitā || 50 ||
[Analyze grammar]

nāradasya vacaḥ śrutvā padāṅguṣṭhaṃ vyamardayat |
nāradastiṣṭhate dvāri uttiṣṭha madhusūdana || 51 ||
[Analyze grammar]

devo'pi nāradaṃ dṛṣṭvā paraṃ harṣamupāgataḥ |
svāgataṃ tu muniśreṣṭha suprabhātādya śarvarī || 52 ||
[Analyze grammar]

nārada uvāca |
adya me saphalaṃ deva prabhātaṃ tava darśanāt |
kuśalaṃ ca na devānāṃ śīghramuttiṣṭha gamyatām || 53 ||
[Analyze grammar]

śrīviṣṇuruvāca |
brahmā cendraśca rudraśca ye cānye tu marudgaṇāḥ |
āpadaḥ kāraṇaṃ yacca tatsamākhyātumarhasi || 54 ||
[Analyze grammar]

nārada uvāca |
dānavena mahātīvraṃ tapastaptaṃ sudāruṇam |
rudreṇa ca varo datto bhasmatvaṃ manasepsitam || 55 ||
[Analyze grammar]

varadānabalenaiva sa devaṃ hantumarhati |
īdṛśaṃ ceṣṭitaṃ jñātvā nīto devo'maraiḥ saha || 56 ||
[Analyze grammar]

nāradasya vacaḥ śrutvā jagāma samunirhariḥ |
dṛṣṭvā devastamīśānaṃ gacchantaṃ diśamuttarām || 57 ||
[Analyze grammar]

dṛṣṭvā devaṃ ca rudro'tha pariṣvajya punaḥpunaḥ |
namaskṛtya jagannāthaṃ devaṃ ca madhusūdanaḥ || 58 ||
[Analyze grammar]

viṣṇuruvāca |
bhayasya kāraṇaṃ deva kathyatāṃ ca maheśvara |
devadānavayakṣāṇāṃ preṣayeyaṃ yamālayam || 59 ||
[Analyze grammar]

lalāṭe ca kṛto dharmo yuṣmākaṃ ca maheśvara |
chittvā śirastathāṅgāni indriyāṇi na saṃśayaḥ || 60 ||
[Analyze grammar]

īśvara uvāca |
nāsti saukhyaṃ ca mūrkheṣu nāsti saukhyaṃ ca rogiṣu |
parādhīnena saukhyaṃ tu strījite ca viśeṣataḥ || 61 ||
[Analyze grammar]

strījitena mayā viṣṇo varo dattastu dānave |
yasya mūrdhni nyasetpāṇiṃ sa bhavedbhasmapuṃjavat || 62 ||
[Analyze grammar]

ajeyaścāmaraścaiva mayā hyuktaḥ sa keśava |
hantumicchati māṃ pāpa upāyastava vidyate || 63 ||
[Analyze grammar]

viṣṇuruvāca |
gacchantu amarāḥ sarve yuṣmābhiḥ saha śaṅkara |
upāyaṃ sarjayāmyadya vadhārthaṃ dānavasya ca || 64 ||
[Analyze grammar]

revāyāśca taṭe tiṣṭha deva tvamamaraiḥ saha |
kālakṣepo na kartavyo gamyatāṃ tvaritaṃ prabho || 65 ||
[Analyze grammar]

dakṣiṇā yatra gaṅgā ca revā caiva mahānadī |
yatrayatra ca dṛśyeta prācī caiva sarasvatī || 66 ||
[Analyze grammar]

tatsamaṃ ca mahātīrthaṃ na martye caiva dṛśyate |
snānaṃ ye tatra kurvanti dānaṃ caiva tu bhaktitaḥ || 67 ||
[Analyze grammar]

saptajanmakṛtaṃ pāpaṃ naśyate nātra saṃśayaḥ |
etattīrthaṃ mahāpuṇyaṃ sarvapātakanāśanam || 68 ||
[Analyze grammar]

gamyatāṃ tatra deveśa luṅkeśaṃ tvaṃ sahāmaraiḥ |
viṣṇostu vacanādeva praviṣṭo hradamuttamam || 69 ||
[Analyze grammar]

ratiṃ sumahatīṃ cakre saha tatra marudgaṇaiḥ |
tataścānantaraṃ devo māyāṃ kṛtvā hyanekadhā || 70 ||
[Analyze grammar]

vasantamāsaṃ saṃsṛjya udyānavanaśobhitam |
aśokairbakulaiścaiva brahmavṛkṣaiḥ suśobhanaiḥ || 71 ||
[Analyze grammar]

śrīvṛkṣaiśca kapitthaiśca śirīṣairrājacampakaiḥ |
śrīphalaiśca tathā tālaiḥ kadambodumbaraistathā || 72 ||
[Analyze grammar]

aśvatthādidrumaiścaiva nānāvṛkṣairanekaśaḥ |
nānāpuṣpaiḥ sugandhāḍhyairbhramaraiśca nināditam || 73 ||
[Analyze grammar]

tasminmadhye mahāvṛkṣo nyagrodhaśca suśobhanaḥ |
bahupakṣisamāyuktaḥ kokilārāvanāditaḥ || 74 ||
[Analyze grammar]

kṛṣṇena ca kṛtaṃ tasminkanyārūpaṃ ca tatkṣaṇāt |
na tasyāḥ sadṛśī kanyā trailokye sacarācare || 75 ||
[Analyze grammar]

anyāśca kanyakāḥ sapta surūpāḥ śubhalocanāḥ |
divyarūpadharāḥ sarvā divyābharaṇabhūṣitāḥ || 76 ||
[Analyze grammar]

pumāṃsamabhikāṅkṣantyo yadyekaḥ kāmayetstriyaḥ |
mauktikairratnamāṇikyairvaiḍūryaiśca suśobhanaiḥ || 77 ||
[Analyze grammar]

kāmahāraiśca vaṃśaiśca baddho hindolakaḥ kṛtaḥ |
ārūḍhāśca mahākanyā gāyante susvaraṃ tadā || 78 ||
[Analyze grammar]

mārutaḥ śītalo vāti vanaṃ spṛṣṭvā suśobhanam |
vātena prerito gandho dānavo ghrāṇapīḍitaḥ || 79 ||
[Analyze grammar]

tataḥ kusumagandhena vismayaṃ paramaṃ gataḥ |
āghrāya cedṛśaṃ puṇyaṃ na dṛṣṭaṃ na śrutaṃ mayā || 80 ||
[Analyze grammar]

vane cintayataḥ kiṃciddhvanigītaṃ suśobhanam |
gītasya ca dhvaniṃ śrutvā mohito māyayā hareḥ || 81 ||
[Analyze grammar]

vyādhasyaiva mahākūṭe patanti ca yathā mṛgāḥ |
kālaspṛṣṭastathā kṛṣṇe patitaśca narādhipa || 82 ||
[Analyze grammar]

dṛṣṭvā kanyāṃ ca tāṃ daityo mūrcchayā patito bhuvi |
patitena tu dṛṣṭaikā kanyā vaṭatale sthitā || 83 ||
[Analyze grammar]

āsyaṃ dṛṣṭvā tu nārīṇāṃ punaḥ kāmena pīḍitaḥ |
gṛhītvā hemadaṇḍaṃ tu tāṃ pātayitumicchati || 84 ||
[Analyze grammar]

kanyovāca |
mā mānusparśayatvaṃ hi kumāryahaṃ kulottama |
bho muñca muñca māṃ śīghraṃ yāvadgacchāmyahaṃ gṛham || 85 ||
[Analyze grammar]

dānava uvāca |
ahaṃ vivāhamicchāmi tvayā saha suśobhane |
bhūpṛṣṭhe sakale rājñī bhavasyevaṃ na saṃśayaḥ || 86 ||
[Analyze grammar]

kanyovāca |
pitā rakṣati kaumārye bhartā rakṣati yauvane |
putro rakṣati vṛddhatve na strī svātantryamarhati || 87 ||
[Analyze grammar]

na svātantryaṃ mamaivāsti utpannāhaṃ mahatkule |
yācyastu matpitā bhrātā mātāpi hi tathaiva ca || 88 ||
[Analyze grammar]

dānava uvāca |
yadi māṃ necchase tvadya svātantryaṃ nāvalambase |
mamāpi ca tadā hatyā satyaṃ ca śubhalocane || 89 ||
[Analyze grammar]

kanyovāca |
viśvāso naiva kartavyo yādṛśe tādṛśe nare |
narāḥ strīṣu vicitrāśca lampaṭāḥ kāmamohitāḥ || 90 ||
[Analyze grammar]

pariṇīya tu māṃ tvaṃ hi bhuṅkṣva bhogānmayā saha |
janmanāśo bhavetpaścānna tvaṃ nānyo bhavenmama || 91 ||
[Analyze grammar]

brāhmaṇī kṣatriṇī vaiśī śūdrī yāvattathaiva ca |
dvitīyo na bhavedbhartā ekākī ceha janmani || 92 ||
[Analyze grammar]

dānava uvāca |
yattvayā gaditaṃ vākyaṃ tanmayā dhāritaṃ hṛdi |
pratyayaṃ me kuruṣvādya yatte manasi rocate || 93 ||
[Analyze grammar]

kanyovāca |
jānīṣva gopakanyāṃ māṃ krīḍāmi sakhibhiḥ saha |
asmatkuleṣu yaddivyaṃ tatkuruṣva yathāvidhi || 94 ||
[Analyze grammar]

na taddivyaṃ kule'smākaṃ viṣaṃ kośaṃ na tattulā |
gopānvayeṣu sarveṣu hastaḥ śirasi dīyate || 95 ||
[Analyze grammar]

kāmāndhenaiva rājendra nikṣipto mastake karaḥ |
tatkṣaṇādbhasmasādbhūto dagdhastṛṇacayo yathā || 96 ||
[Analyze grammar]

keśavopari devaistu puṣpavṛṣṭiḥ śubhā kṛtā |
hṛṣṭāḥ sarve'gamandevāḥ svasthānaṃ vigatajvarāḥ || 97 ||
[Analyze grammar]

kṣīrodaṃ keśavo gacchatkālapṛṣṭhe nipātite |
ya idaṃ śṛṇuyādbhaktyā caritaṃ dānavasya ca || 98 ||
[Analyze grammar]

sa jayī jāyate nityaṃ śaṅkarasya vaco yathā |
etasmātkāraṇādrājaṃlliṅgeśvaramiti śrutam || 99 ||
[Analyze grammar]

līnaṃ ca pātakaṃ yasmātsnānamātreṇa naśyati |
tvagasthi śoṇitaṃ māṃsaṃ medaḥsnāyustathaiva ca || 100 ||
[Analyze grammar]

majjāśukragataṃ pāpaṃ naśyate janmakoṭijam |
luṅkeśvare mahārāja toyaṃ pibati bhaktitaḥ || 101 ||
[Analyze grammar]

tribhiḥ prasṛtimātrābhiḥ pāpaṃ yāti sahasradhā |
viśeṣeṇa caturdaśyāmubhau pakṣau tu cāṣṭamī || 102 ||
[Analyze grammar]

upoṣya yo naro bhaktyā pitḥṇāṃ pāṇḍunandana |
uddhṛtāstena te sarve nārakīyāḥ pitāmahāḥ || 103 ||
[Analyze grammar]

kākiṇīṃ caiva yo dadyādbrāhmaṇe vedapārage |
tena dānaphalaṃ sarvaṃ kurukṣetrādikaṃ ca yat || 104 ||
[Analyze grammar]

prāptaṃ tu nānyathā rājañchaṅkaro vadate tvidam |
sparśaliṅgamidaṃ rājañchaṅkareṇa tu nirmitam || 105 ||
[Analyze grammar]

sparśamātre manuṣyāṇāṃ rudravāso'bhijāyate |
tena dānaphalaṃ sarvaṃ kurukṣetrādikaṃ ca yat || 106 ||
[Analyze grammar]

etasmātkāraṇādrājaṃllokapālāśca rakṣakāḥ |
durgā ca rakṣaṇe sṛṣṭā caturhastadharā śubhā || 107 ||
[Analyze grammar]

dhanado lokapāleśo rakṣakaśceśvarasya ca |
rakṣati ca sadā kālaṃ grahavyāpārarūpataḥ || 108 ||
[Analyze grammar]

putrabhrātṛsamārūpaiḥ svāmisambandharūpibhiḥ |
laṅkeśvaraṃ ca rājendra devairnādyāpi mucyate || 109 ||
[Analyze grammar]