Chapter 27

[English text for this chapter is available]

śrīmahādeva uvāca |
saptaviṃśatimaṃ devyanarakeśvarasaṃjñakam |
yasya darśanamātreṇa svapnepi narakaḥ kutaḥ || 1 ||
[Analyze grammar]

purā kaliyuge devi kalpe vārāhasaṃjñake |
kaluṣaṃ kālamāsādya satye ca pralayaṃ gate || 2 ||
[Analyze grammar]

nirmaryādā nirādhārā niraukā nāstikā janāḥ |
varṇāśramāśca saṃjātā vaṃcayaṃti parasparam || 3 ||
[Analyze grammar]

nārcayaṃti surānviprāḥ karma kurvaṃti kutsitam |
lobhamohaparā bhūtvā kāmāsaktāśca mānavāḥ || 4 ||
[Analyze grammar]

vairabaddhāśca saṃjātāḥ parasparavadhe ratāḥ |
nivṛttayajñasvādhyāyapiṃḍodakavivarjitāḥ || 5 ||
[Analyze grammar]

brāhmaṇāḥ sarvabhakṣyāśca mṛṣāvādaparāyaṇāḥ |
bhūyiṣṭhaṃ kūṭamānaiśca paṇyaṃ vikrīṇate tadā || 6 ||
[Analyze grammar]

dṛśyaṃte ṣoḍaśe varṣe narāḥ palitinaḥ priye |
āyuḥkṣayo manuṣyāṇāṃ kṣiprameva prapadyate || 7 ||
[Analyze grammar]

evaṃvidhāḥ samudbhūtā narā nāryaśca pātakaiḥ |
narakeṣu prapadyaṃte kramātpāpānusārataḥ || 8 ||
[Analyze grammar]

kuṭhārairbhinnamūrddhānaḥ krakacaiḥ pāṭitāḥ pare |
agnivarṇaiśca saṃdaṃśairutpāṭitavilocanāḥ || 9 ||
[Analyze grammar]

bhinnāścāyomayaistīkṣṇairagnitaptaiśca kīlakaiḥ |
pīḍyaṃte śailaśikharaiścūrṇyaṃte krūrabhūdharaiḥ || 10 ||
[Analyze grammar]

kṣipyaṃte taptakuṇḍeṣu dahyaṃte vahnirāśiṣu |
amedhye'dhomukhāścānye mardditā daṃḍapāṇinā || 11 ||
[Analyze grammar]

lauhaiśca śṛṅkhalairbaddhā hyadhovaktraiśca laṃbitaiḥ |
aṃtarikṣe parikṣepātkraṃdaṃto'tīva duḥkhitāḥ || 12 ||
[Analyze grammar]

kṛmibhirbhramaraistīkṣṇairdaṃśaiśca maśakaistathā |
lohatuṃḍaiśca vihagairnirdayairbhakṣitā narāḥ || 13 ||
[Analyze grammar]

kecitkṛttāḥ pradhāvaṃti toyārthaṃ ca tṛṣāturāḥ |
 svamūtraṃ pāyitāścaṃḍaiḥ kṣubhitāścāpi ghātanaiḥ || 14 ||
[Analyze grammar]

yaiścāṃgaiḥ patitaṃ karma kriyate puruṣairbhuvi |
teṣāṃ tānyeva cāṃgāni śodhyaṃte yātanāgataiḥ || 15 ||
[Analyze grammar]

ye paśyaṃti guruṃ devānbrāhmaṇānkruddhacakṣuṣā |
duṣṭena paradārāṃśca vīkṣaṃte locanena ye |
teṣāṃ netrāṇi bhidyaṃte kṛṣyaṃte lohaśaṃkubhiḥ || 16 ||
[Analyze grammar]

śravaṇau ca prapūryaṃte lauhena śaṃkunā tataḥ |
punaśca śastraiḥ kṛṣyaṃte punastaptaiśca kīlakaiḥ || 17 ||
[Analyze grammar]

lauhairvegānnikhanyaṃte yaiḥ śrutaṃ guruniṃdanam |
mitrāṇāṃ devatānāṃ ca sādhvīnāmathavā kvacit || 18 ||
[Analyze grammar]

śataśaḥ pāṭyate jihvā vahnivarṇairayomukhaiḥ |
śaṃkubhi stīkṣṇasūkṣmāgraiḥ pūryaṃte cānilaiḥ punaḥ || 19 ||
[Analyze grammar]

tadvaktrāṇi bahūnvārānyepavādaratā narāḥ |
ye guruṃ mātaraṃ vāpi pāruṣyeṇa vadaṃti vai || 20 ||
[Analyze grammar]

ye nighnaṃti durācārāḥ surārthāyopakalpite |
ārāme puṣpapatrāṇi teṣāmaṃgāni kṛṃtati || 21 ||
[Analyze grammar]

yairapyāliṃgitā nārī parasya ca durātmabhiḥ |
teṣāmayomayī nārī vahnivarṇā tu vakṣasi || 22 ||
[Analyze grammar]

sthāpyate vadhyate cāpi pracaṃḍairyamakiṃkaraiḥ |
nāryaśca puruṣaistaptairāliṃgyaṃte hyayomayaiḥ || 23 ||
[Analyze grammar]

tadā lohamaye gehe jvalitānalasaṃstare |
nikṣipyaṃte naraiḥ sārddhamāsādya kālasaṃkṣayam || 24 ||
[Analyze grammar]

yāvatī vedanā dehe iha loke pradṛśyate |
narāṇāmaṃgapīḍā vai tasmācchataguṇā bhavet || 25 ||
[Analyze grammar]

kākaiśca vṛścikairgṛdhrairbhakṣyaṃte'pyapare narāḥ |
dahyamānā vilapaṃti bhrātastāteti cākulāḥ |
vadaṃtyasakṛdudvignā na ca śāṃtiṃ labhaṃti vai || 26 ||
[Analyze grammar]

duḥkhāni te prāpnuvaṃti yānyasahyāni pārvati |
evaṃ te yātanāduḥkhaṃ prāpnuvaṃti suniścitam |
nimirnāma mahābhāgo yamamārgaṃ dadarśa ha || 27 ||
[Analyze grammar]

raudraṃ bhayānakaṃ durgaṃ pūritaṃ pāpakarmabhiḥ |
tamasā saṃvṛtaṃ caiva keśaśaivālaśādvalam || 28 ||
[Analyze grammar]

saṃpṛktaṃ pāpakṛdgaṃdhairmāṃsaśoṇitakarddamaiḥ |
vahnijvālena dīptena samaṃtātparivāritam || 29 ||
[Analyze grammar]

adhomukhaiśca karkoṭairgṛdhraiśca samabhidrutam |
sūcīmukhaistathā pretaiviṃdhyaśailopamairvṛtam || 30 ||
[Analyze grammar]

vṛkṣai rudhiramāṃsaiśca chinnabāhūrupāṇibhiḥ |
nikṛttodarahastaiśca tatratatra pracāritaiḥ || 31 ||
[Analyze grammar]

vṛtaṃ kuṇapadurgaṃdhairaśivaṃ bhogavarjitam |
asipatra vanaṃ caiva samaṃtātparivāritam || 32 ||
[Analyze grammar]

karaṃbhavālukākīrṇamāyasīśca śilāḥ pṛthak |
dadarśa cāpi dehotthayātanāṃ pāpakarmaṇām || 33 ||
[Analyze grammar]

sa taṃ durgaṃdhamālakṣya puruṣaṃ tamuvāca ha |
kiyadadhvānamasmābhirgaṃtavyamidamabravīt || 34 ||
[Analyze grammar]

deśo'yaṃ kaśca devānāmetadicchāmi veditum |
ityukto yamadūtastu daṇḍahasto'gnisaprabhaḥ |
purato darśayanmārgamita ehītyuvāca ha || 35 ||
[Analyze grammar]

bhūyaḥ sa rājā taṃ prāha kiṃkaraṃ vinayānvitaḥ |
bho yāmyapuruṣācakṣva kiṃ mayā duṣkṛtaṃ kṛtam || 36 ||
[Analyze grammar]

yenedaṃ vyasanaṃ prāptaṃ mayā ca dhārmikeṇa hi |
nimirnāmāhaṃ vikhyāto janakānāmahaṃ kule || 37 ||
[Analyze grammar]

jāto videhaviṣaye samyagmanujapālakaḥ |
cāturvarṇyaṃ ca dharmasthaṃ kṛtvā saṃrakṣitaṃ mayā || 38 ||
[Analyze grammar]

dharmapradhānakalpena manunātra yathā purā |
yajñairmayeṣṭaṃ bahubhirdharmataḥ pālitā mahī || 39 ||
[Analyze grammar]

notsṛṣṭaścaiva saṃgrāmo nātithirvimukho'bhavat |
kṛtā spṛhā ca na mayā parastrīvibhavādiṣu || 40 ||
[Analyze grammar]

so'haṃ kathamimaṃ prāpto narakaṃ bhṛśadāruṇam |
iti pṛṣṭastadā tena niminā yamakiṃkaraḥ |
uvāca praṇato bhūtvā krūro'pi praśritaṃ vacaḥ || 41 ||
[Analyze grammar]

puruṣa uvāca |
mahārāja yathāttha tvaṃ tathaitannātra saṃśayaḥ |
kintu svalpaṃ kṛtaṃ pāpaṃ bhavaṃtaṃ smārayāmi tat || 42 ||
[Analyze grammar]

uktā yā dakṣiṇā śrāddhe na dattā sā tvayā nṛpa |
pramādādvismṛtā caiva tasyedaṃ karmaṇaḥ phalam || 43 ||
[Analyze grammar]

etāvadeva te pāpaṃ nānya tkiṃcana vidyate |
vaidehāgaccha puṇyānāmupabhogāya pārthiva || 44 ||
[Analyze grammar]

evaṃ śrutvā tu rājarṣirnimirdūtamathābravīt |
yāsyāmi devānucara yatra māṃ tvaṃ hi neṣyasi || 45 ||
[Analyze grammar]

kiṃcitpṛcchāmi te tattvaṃ yathāvadvaktumarhasi |
vajratuṃḍāstvamī kākāḥ puṃsāṃ nayanahāriṇaḥ || 46 ||
[Analyze grammar]

punaḥ punaśca netrāṇi tadvatteṣāṃ bhavaṃti hi |
kiṃ kṛtaṃ karma dūteṃdra kathayaitajjugupsitam || 47 ||
[Analyze grammar]

haraṃtyeṣāṃ tathā jihvāṃ jāyamānāṃ punarnavām |
karapatreṇa pāṭyaṃte kasmādete suduḥkhitāḥ || 48 ||
[Analyze grammar]

kimete naṣṭacittāśca tudyaṃte'harniśaṃ narāḥ |
etāścānyāśca dṛśyaṃte yātanāḥ pāpakarmiṇām |
kiyatkālaṃ bhaviṣyaṃti tanmamodde śato vada || 49 ||
[Analyze grammar]

puruṣa uvāca |
yanmāṃ pṛcchasi bhūpāla pāpakarmaphalodayam |
tattehaṃ saṃpravakṣyāmi saṃkṣepeṇa yathātatham || 50 ||
[Analyze grammar]

puṇyā puṇye hi puruṣaḥ paryāyeṇa samaśnute |
bhuṃjataśca kṣayaṃ yāti puṇyaṃ pāpamathāpi vā || 51 ||
[Analyze grammar]

na tu bhogādṛte puṇyaṃ pāpaṃ karma ca mānavaḥ |
parityajati rājendra satyametadudāhṛtam || 52 ||
[Analyze grammar]

evamete mahāpāpā yātanābhiraharniśam |
kṣapayaṃti mahāghoraṃ narakāṃtaravarttinaḥ || 53 ||
[Analyze grammar]

devatve'tha manuṣyatve tiryaktve'tha śubhāśubham |
puṇyapāpodbhavaṃ bhuṃkte sukhaduḥkhaṃ na saṃśayaḥ || 54 ||
[Analyze grammar]

etaduddeśato rājanbhavatā kathitaṃ mayā |
svakarmaphalamokṣāṇāṃ puṇyānāṃ pāpināṃ tathā || 55 ||
[Analyze grammar]

tadehyanyatra gacchāvi yathā dṛṣṭaṃ tvayādhunā |
tatastamagrataḥ kṛtvā sa rājā gaṃtumudyataḥ || 56 ||
[Analyze grammar]

tadā hi sarvairudghuṣṭaṃ yātanā sthāyibhirnṛbhiḥ |
prasādaṃ kuru bhūpeti tiṣṭha tāvanmuhūrttakam |
tvadaṃgasaṃgī pavano dehānhlādayate hi naḥ || 57 ||
[Analyze grammar]

paritāpaṃ ca gātrebhyaḥ pīḍā bādhāśca kṛtsnaśaḥ |
apahaṃti naravyāghra kṛpāṃ kuru mahīpate || 58 ||
[Analyze grammar]

etacchrutvā vacasteṣāṃ taṃ yāmyapuruṣaṃ nṛpaḥ |
papraccha kathameteṣāmāhlādo mayi tiṣṭhati || 59 ||
[Analyze grammar]

kiṃ mayā karma tatpuṇyaṃ martyaloke mahatkṛtam |
prahlādajananī dṛṣṭiryasyeyaṃ tadudīryatām || 60 ||
[Analyze grammar]

puruṣa uvāca |
tvayā dṛṣṭo mahākāle vikhyāto'narakeśvaraḥ |
āśvinasya caturdaśyāṃ tasyedaṃ phalamīdṛśam || 61 ||
[Analyze grammar]

tatastadgātrasaṃsargī pavano hlādadāyakaḥ |
pāpakarmakṛtāṃ rājanyātanā na prabādhate || 62 ||
[Analyze grammar]

rājovāca |
yadi matsaṃnidhāne sā yātanā na prabādhate |
tato bhadramukhātrāhaṃ sthāsye sthāṇurivācalaḥ || 63 ||
[Analyze grammar]

puruṣa uvāca |
ehi rājeṃdra gacchāvo nijapuṇyasamārjitān |
bhuṃkṣva bhogānna yāsyetāṃ yātanāṃ pāpakarmaṇām || 64 ||
[Analyze grammar]

rājovāca |
na svarge brahmaloke vā tatsukhaṃ prāpyate naraiḥ |
yadārttajaṃtuṃ nirvāṇamānetumiti me matiḥ || 65 ||
[Analyze grammar]

tasmānna tāvadyāsyāmi yāvadete suduḥkhitāḥ |
matsaṃnidhānātsukhino bhavaṃtu narakaukasaḥ || 66 ||
[Analyze grammar]

prāpsyaṃte te yadi sukhaṃ bahavo duḥkhite mayi |
kiṃ tu prāptaṃ mayā sarvaṃ tasmāttvaṃ vraja mā ciram || 67 ||
[Analyze grammar]

puruṣa uvāca |
eṣa dharmaśca śakraśca tvāṃ netuṃ samupāgatau |
avaśyamasmādgaṃtavyaṃ tasmātpārthiva gamyatām || 68 ||
[Analyze grammar]

etasminnaṃtare dharmaḥ śakreṇa sahitobravīt |
nime paramadharmajña prītā devagaṇāstava || 69 ||
[Analyze grammar]

ehyehi puruṣavyāghra kṛtametāvatā prabho |
siddhiḥ prāptā tvayā rājaṃllokāścāpyakṣayānvitāḥ || 70 ||
[Analyze grammar]

na ca manyustvayā kāryaḥ śṛṇu me vacanaṃ vibho |
avaśyaṃ narakastāvaddraṣṭavyaḥ sarvarājabhiḥ || 71 ||
[Analyze grammar]

nayāmi tvāmahaṃ svargaṃ tvayā samyagupāsitaḥ |
vimānavaramāruhya vimalaṃ cādya gamyatām || 72 ||
[Analyze grammar]

nimiruvāca |
narake mānavā dharma pīḍyaṃte'tra sahasraśaḥ |
trāhīti vārttāṃ kraṃdaṃto māmato na vrajāmyaham || 73 ||
[Analyze grammar]

indra uvāca |
karmaṇā narake prāptireṣāṃ ca pāpakarmaṇām |
svarge tvayāpi gaṃtavyaṃ nṛpa puṇyena karmaṇā || 74 ||
[Analyze grammar]

rājovāca |
parijānāsi dharmajña tvaṃ vā śakra śacīpate |
viśiṣṭaṃ mama kiṃ puṇyaṃ śubhaṃ tadvaktumarhasi || 75 ||
[Analyze grammar]

dharma uvāca |
āśvinasya tu māsasya kṛṣṇapakṣe caturdaśī |
tasyāṃ tvayā mahābāho mahākālavanottame |
dṛṣṭo devaḥ suvikhyātaḥ svargado'narakeśvaraḥ || 76 ||
[Analyze grammar]

tadviśiṣṭaṃ ca te puṇyaṃ tasya saṃkhyā na vidyate |
svakarmopārjitaṃ puṇyaṃ bhuṃkṣva rājanyathāsukham |
ete nārakikāḥ sarve kṣapayaṃtu svakarmajām || 77 ||
[Analyze grammar]

rājovāca |
kathaṃ spṛhāṃ kariṣyaṃti satsaṃgeṣu ca mānavāḥ |
yadi matsaṃnidhāveṣāmutkarṣo nopajāyate || 78 ||
[Analyze grammar]

tasmādyatsukṛtaṃ kiṃcidviśiṣṭataramasti vai |
tena mucyaṃtu narakātpāpino yātanāgatāḥ || 79 ||
[Analyze grammar]

dharma uvāca |
rājaṃstvayā kṛtaṃ pūrve'narakeśvaradarśanam |
tadutpannasya puṇyasya kalāmebhyaḥ prayaccha vai || 80 ||
[Analyze grammar]

tatpuṇyasya prabhāveṇa mokṣyaṃte narakādime |
tathā kṛte tatastena vimuktā narakācca te || 81 ||
[Analyze grammar]

tato'bravīddharmarājo nimiṃ śakrasamanvitaḥ |
evaṃ śreṣṭhataraṃ sthānaṃ tvayā prāptaṃ mahīpate || 82 ||
[Analyze grammar]

etāṃśca nārakānpaśya vimuktānpāpakarmaṇaḥ |
tato'patatpuṣpavṛṣṭistasyopari mahīpateḥ || 83 ||
[Analyze grammar]

vimānaṃ cādhiropyainaṃ svarlokamanayaddhariḥ |
yeye tatrābhavanpāpā yātanābhyaḥ paricyutāḥ || 84 ||
[Analyze grammar]

prabhāvāttasya devasya svargalokaṃ gatāḥ priye |
ato devaḥ suvikhyātaḥ sadevo'narakeśvaraḥ || 85 ||
[Analyze grammar]

stuto devagaṇaiḥ sarvairnarakādavatārakaḥ |
jātaḥ sa eva sukṛtī kulaṃ tenaiva pāvitam || 86 ||
[Analyze grammar]

yaḥ paśyati naro nityaṃ devaṃ cānarakeśvaram |
teṣāṃ vilīyate pāpaṃ pūrvajanmaśatodbhavam || 87 ||
[Analyze grammar]

yenumodaṃti devasya darśanaṃ parvatātmaje |
te'pi pāpavinirmuktāḥ prayāṃti mama maṃdire || 88 ||
[Analyze grammar]

samatītaṃ bhaviṣyacca kulānāmayutaṃ naraḥ |
mama lokaṃ nayatyāśu tasya liṃgasya darśanāt || 89 ||
[Analyze grammar]

śivayogasamāyuktā kṛṣṇā yā ca caturdaśī |
sā proktā vallabhā tasya sarvapāpapraṇāśinī || 90 ||
[Analyze grammar]

ye cāyāti narāstasyāṃ devaṃ cānarakeśvaram |
upoṣya pāpairmucyaṃte te narāḥ śatajanmajaiḥ || 91 ||
[Analyze grammar]

karmaṇā manasā vācā yatpāpaṃ samupārjitam |
tatkṣālayati devosau tithau tasyāṃ samarcitaḥ || 92 ||
[Analyze grammar]

eṣa te kathito devi prabhāvaḥ pāpanāśanaḥ |
jaṭeśvarasya devasya śṛṇu māhātmyamuttamam || 93 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṃgamāhātmye'narakeśvaramāhātmyavarṇanaṃnāma saptaviṃśo'dhyāyaḥ || 27 ||
[Analyze grammar]