Chapter 23

[English text for this chapter is available]

śrīhara uvāca |
meghanādeśvaraṃ devi trayoviṃśatimaṃ śṛṇu |
yasya darśanamātreṇa prāpyate sarvasiddhayaḥ || 1 ||
[Analyze grammar]

rājamūlā mahādevi yogakṣemāḥ suvṛṣṭayaḥ |
prajāśca vyādhayaścaiva maraṇaṃ ca bhayāni ca || 2 ||
[Analyze grammar]

rājā kṛtaṃ tathā tretā dvāparaśca tathā kaliḥ |
rājamūlāni sarvāṇi rājādharmasya kāraṇam || 3 ||
[Analyze grammar]

rājā babhūva loke'sminmadāṃdhonāma pārvati |
ahaṃkārāvṛto duṣṭo devabrāhmaṇakaṃṭakaḥ || 4 ||
[Analyze grammar]

kali dvāparayoḥ saṃdhau tasya doṣācca bhāmini |
anāvṛṣṭirabhūddhorā loke dvādaśavārṣikī || 5 ||
[Analyze grammar]

na vavarṣa sahasrākṣaḥ pratilomo'bhavatprabhuḥ |
nādṛśyantāpi rātryaṃte kuta evābhrajātayaḥ || 6 ||
[Analyze grammar]

nadyaḥ saṃkṣiptatoyaughāḥ kvacidaṃtarhitāstadā |
nivṛttayajñasvādhyāyā nirvaṣaṭkāramaṃgalāḥ || 7 ||
[Analyze grammar]

ucchinnakṛṣi gorakṣā nivṛttavipaṇāstathā |
asthikaṃkālasaṃkīrṇā hāhābhūtanarākulāḥ || 8 ||
[Analyze grammar]

śūnyabhūyiṣṭhanagarā dagdhagrāmaniveśinaḥ |
gojāśvamahiṣairhīnā bhakṣyamāṇāḥ parasparam || 9 ||
[Analyze grammar]

āśramānsaṃparityajya paryadhāvannitastataḥ |
brāhmaṇā duḥkhabahulā mṛtā naṣṭāśca pārvati || 10 ||
[Analyze grammar]

sūṣṭirunmūlitā sarvā jaṃgamā sthāvarākhilā |
etasminnaṃtare devāḥ śakrādyā bhayavihvalāḥ || 11 ||
[Analyze grammar]

śaraṇyaṃ śaraṇaṃ jagmurdevadevaṃ janārdanam |
kṣīrodasyottare kūle śvetadvīpaṃ manoramam || 12 ||
[Analyze grammar]

brahmalokādibhirlokairanaupamyaguṇaṃ śubham |
sadānaṃdakaraṃ śāṃtaṃ sūryakoṭisamaprabham || 13 ||
[Analyze grammar]

svecchākalpitavi nyāsaprāsādaśayanāsanam |
vajreṃdranīlavaiḍūryacaṃdrakāṃtādidīpitam || 14 ||
[Analyze grammar]

jarāmṛtyubhayopetasarvavyādhivivarjitam |
tasmindvīpe tato devi sūrya koṭisamaprabham |
sāṣṭāṃgāṃ praṇatiṃ kṛtvā te devāḥ stutimabruvan || 15 ||
[Analyze grammar]

bhavānbrahmā ca rudraśca maheṃdro devasattamaḥ |
bhavānkarttā vikarttā ca lokānāṃ prabhavo'vyayaḥ || 16 ||
[Analyze grammar]

evaṃ ca satyaṃ paramaṃ tapaśca paramaṃ tathā |
pavitraṃ paramamārgaṃ yajñastvaṃ paramaḥ prabho || 17 ||
[Analyze grammar]

paraṃ hautraṃ paraṃ dhāma tvāmāhuḥ puruṣaṃ param |
evaṃ stutastadā taistu devadevo varānane || 18 ||
[Analyze grammar]

prāha devāṃstataḥ kṛṣṇaḥ kiṃ karomyadya vaḥ surāḥ |
vijñaptastairharirdevo hyanāvṛṣṭyā prapīḍitaiḥ || 19 ||
[Analyze grammar]

upāyaḥ kathyatāṃ deva tuṣṭiḥ dhuṣṭiryathā bhavet |
dhyānena ciṃtayitvā ca kathayāmāsa keśavaḥ || 20 ||
[Analyze grammar]

gacchadhvaṃ tridaśāḥ sarve mahākālavane śubhe |
liṃgaṃ vṛṣṭikaraṃ tatra purā meghaiḥ pratiṣṭhitam || 21 ||
[Analyze grammar]

meghā vṛṣṭikarāḥ sarve tasmiṃlliṃge ca saṃti vai |
tasya liṃgasya māhātmyādvṛṣṭireva bhaviṣyati || 22 ||
[Analyze grammar]

pratīhāreśvarāddevādīśāne vidyate surāḥ |
tasya tadvacanaṃ śrutvā vāsudevasya pārvati || 23 ||
[Analyze grammar]

mahākālavane prāptā yatrāste liṃgamuttamam |
tuṣṭuvuḥ parayā bhaktyā dṛṣṭvā devaṃ manoramam || 24 ||
[Analyze grammar]

namaste'stu maheśāya namo'naṃtāya māline |
namastaijasamūrttāya namaḥ sauṃdaryaśāline || 25 ||
[Analyze grammar]

namo yogāya vedāya namaḥ piṃgajaṭāya te |
anaṃtajñānadehāya nama īśvaramūrttaye || 26 ||
[Analyze grammar]

namaḥ śubhrāṭṭahāsāya namaste'stu śikhaṃḍine |
śaṃkarāya namaste'stu namastestu pinākine || 27 ||
[Analyze grammar]

namoṃ'takāya bhavyāya tryaṃbakāyāstu te namaḥ |
namaste bahurūpāya namaste'ciṃtyamūrttaye || 28 ||
[Analyze grammar]

namo yogaśarīrāya namaste sarva sarvadā |
naṣṭaṃ deva jagatsarvamanāvṛṣṭyā prapīḍitam || 29 ||
[Analyze grammar]

suvṛṣṭyā devadeveśa pāhi naḥ śaraṇāgatān |
etasminnaṃtare meghā pārvaṇāṃgāravarcasaḥ || 30 ||
[Analyze grammar]

liṃgamadhyātsamuttasthurvādayaṃto nabhastalam |
anyonyavegābhihatā vavṛṣurbhūtale tadā || 31 ||
[Analyze grammar]

jātaṃ viniṣprabhaṃ sarvaṃ na prājñāyata kiṃcana |
timiraughaparikṣiptā rejuścātha diśo daśa || 32 ||
[Analyze grammar]

te tasya devadevasya māhātmyena pratoṣitāḥ |
devāḥ prītiṃ parāṃ jagmuḥ sarve'mṛtamivottamāḥ || 33 ||
[Analyze grammar]

tatastamaḥ saṃharato vineśuśca balāhakā |
pravavuḥ śītalā vātāḥ praśāṃtāśca diśo daśa || 34 ||
[Analyze grammar]

śuddhaprabhāṇi jyotīṃṣi somaṃ cakruḥ pradakṣiṇām |
avigrahaṃ grahāścakruḥ praśāṃtāścāpi sindhavaḥ || 35 ||
[Analyze grammar]

maharṣayo viśokāśca gaṃdharvāśca kalaṃ jaguḥ |
abhūtsṛṣṭiḥ punaḥ sarvā liṃgasyāsya prabhāvataḥ || 36 ||
[Analyze grammar]

suraiḥ saṃpūjya bhaktyā te cakrurnāma yathārthataḥ |
asya liṃgasya māhātmyaṃ dṛṣṭvā prītāḥ surā bahu || 37 ||
[Analyze grammar]

meghanādeśvaraṃ nāma bhaviṣyatyasya sarvataḥ |
meghanādeśvarākhyānaṃ mayā te kathitaṃ priye || 38 ||
[Analyze grammar]

bhaviṣyaṃti narā bhūmau kṛtārthāstatprabhāvataḥ |
darśanādasya liṃgasya kāmavṛṣṭirbhaviṣyati || 39 ||
[Analyze grammar]

kalpakoṭisahasrāṇi kalpakoṭiśatāni ca |
kurvaṃlliṃgasya snapanaṃ rudraloke mahīyate || 40 ||
[Analyze grammar]

prabhāvaḥ paṭhyate yatra meghanādasya pārvati |
ativṛṣṭiścaiva tato bhaviṣyati ca bhūtale || 41 ||
[Analyze grammar]