Chapter 24

[English text for this chapter is available]

īśvara uvāca |
mahālayaṃ mahābhāge caturviṃśatikaṃ śubham |
brahmādistaṃbaparyaṃtaṃ trailokyaṃ sacarā caram || 1 ||
[Analyze grammar]

utpāditaṃ dhṛtaṃ vyāptaṃ tvayā deva mayā śrutam |
tvayaikena viśuddhena sarvagena mahātmanā || 2 ||
[Analyze grammar]

atyarthaṃ munayaḥ sarve muditā maunino 'vyayāḥ |
vadaṃti kāraṇaṃ cāsya trailokyasya maheśvara || 3 ||
[Analyze grammar]

tvayā sarvamidaṃ sṛṣṭaṃ trailokyaṃ bhūrbhuvādikam |
utpādyamānamutpannaṃ pralīyacca sahasraśaḥ || 4 ||
[Analyze grammar]

devadānavagaṃdharvamunicāraṇabhoginām |
utpattisthitisaṃhārāstvayā dṛṣṭā muhurmuhuḥ || 5 ||
[Analyze grammar]

jagaccarācaraṃ deva kutra sthitvāsṛjasya lam |
līlayā saṃharasyetatprasādādvaktumarhasi || 6 ||
[Analyze grammar]

ko'sau mahālayo raudragraharūpī vyavasthitaḥ |
yasmindhṛtaṃ tvayā sarvaṃ trailokyaṃ bhūrbhuvādikam || 7 ||
[Analyze grammar]

iti pṛṣṭastvayā devi mayā te kathitaṃ purā |
idānīṃ kathayiṣyāmi śṛṇuṣvaikāgramānasā || 8 ||
[Analyze grammar]

pṛthivyādīni bhūtāni mahākālavane priye |
dhṛtāni pralayasyāṃte ekoddeśe mahālaye || 9 ||
[Analyze grammar]

brahmalokādibhirlokairanaupamyaguṇaṃ śubham |
sthānaṃ mahālayaṃ tatra mamānaṃdakaraṃ param || 10 ||
[Analyze grammar]

paraṃ brahmamayaṃ liṃgaṃ tatra tiṣṭhati sarvadā |
tasya liṃgasya madhye tu dhṛtaṃ kṛtsnaṃ carācaram || 11 ||
[Analyze grammar]

tatra brahmādayo devā viṣṇustatraiva saṃsthitaḥ |
liṃgasyābhyaṃtare devi sarvamevādhitiṣṭhati |
tasmālliṃgātsamutpanno mahānātmā mahāmatiḥ || 12 ||
[Analyze grammar]

bhūtādiścāpyahaṃkāro viṣṇuḥ śaṃbhuśca pārvati |
buddhiḥ prajñā dhṛtiḥ khyātiḥ smṛtirlajjā sarasvatī || 13 ||
[Analyze grammar]

sarvataḥ pāṇipādaṃ tatsarvato'kṣiśiromukham |
sarvataḥ śrutimalloke sarvamāvṛtya tiṣṭhati || 14 ||
[Analyze grammar]

asmādbhūtāni liṃgāni mahābhūtāni pañca vai |
pṛthivī vāyurākāśamāpo jyotiḥ pralīyate || 15 ||
[Analyze grammar]

sthalamāpastathākāśaṃ janma cāpi caturvidham |
aṇḍajodbhijjaṃ ca sasvedaṃ jarāyujamathāpi vā || 16 ||
[Analyze grammar]

caturddhā janmacihnaṃ yalliṃgesminneva lakṣyate |
tapaḥ karma ca puṇyaṃ ca vrataṃ dānaṃ tathaiva ca || 17 ||
[Analyze grammar]

rajaḥsattvaṃ tamobhāvastasmālliṃgācca jāyate |
tasmiṃstacchrūyate satyaṃ jyotirbrahma sanātanam || 18 ||
[Analyze grammar]

avyaktakāraṇaṃ sūkṣmaṃ yattatsadasadātmakam |
yasmātpitāmaho jajñe prabhurekaḥ prajāpatiḥ || 19 ||
[Analyze grammar]

viśvedevāstathādityā vasavo'thāśvināvapi |
yakṣāḥ sādhyāḥ piśācāśca guhyakāḥ pitara stathā || 20 ||
[Analyze grammar]

āpo dyauḥ pṛthivī vāyuraṃtarikṣaṃ diśastathā |
saṃvatsarartavo māsāḥ pakṣāhorātrayastathā || 21 ||
[Analyze grammar]

yaccānyadapi tatsarvaṃ saṃbhūtaṃ loka sākṣikam |
yadidaṃ dṛśyate kiṃcittasyāṃte ca pralīyate || 22 ||
[Analyze grammar]

ato mahālayonāma vikhyāto bhuvanatraye |
muktīśvarasya devasya dakṣiṇe saṃvyava sthitaḥ || 23 ||
[Analyze grammar]

yaḥ pūjayati talliṃgaṃ rudramūrtyā mahālayam |
trailokyavijayī nityaṃ kīrttimānsa naro bhavet || 24 ||
[Analyze grammar]

mahālayeśvare puṇye pūjite parameśvare |
bhaktyā paramayā caiva sarve devāḥ supūjitāḥ |
bhavaṃtīha mahābhāge yatastairapi pūjyate || 25 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye mahālayeśvaramāhātmyavarṇanaṃnāma caturviṃśo'dhyāyaḥ || 24 ||
[Analyze grammar]