Chapter 11

[English text for this chapter is available]

śrīmahādeva uvāca |
liṃgamekādaśaṃ viddhi devi siddheśvaraṃ śubham |
vīrabhadrasamīpe tu sarvasiddhipradāyakam || 1 ||
[Analyze grammar]

deva dāruvane pūrvaṃ viprā yogasamanvitāḥ |
sparddhayā siddhilabdhyarthaṃ tapo'kurvata saṃyatāḥ || 2 ||
[Analyze grammar]

śākāhārā nirāhārāḥ parṇāhārāstathāpare |
daṃtolūkhalinaḥ kecidaśmakuṭṭāstathā pare || 3 ||
[Analyze grammar]

kecidvīrāsanaratā dhūmrapānaratāḥ pare |
pādairūrdhvairadhovaktraiḥ kecidabhrāvakāśikāḥ || 4 ||
[Analyze grammar]

kṛcchracāṃdrāyaṇādīni kurvantyanye samāhitāḥ |
na cāpi paramā prāptā siddhirvarṣaśatairapi || 5 ||
[Analyze grammar]

duḥkhārttāściṃtayāmāsuḥ kathaṃ siddhirbhaviṣyati |
tapasā duṣkareṇaiva siddhirna vātra labhyate || 6 ||
[Analyze grammar]

vyarthā śrutistathā jātā yā gītā munibhiḥ purā |
tapasā labhyate sarvaṃ tapomūlamidaṃ jagat || 7 ||
[Analyze grammar]

aṃjanaṃ guṭikā caiva pādukāgamanaṃ tathā |
khaḍgasiddhirbile vāsaściṃtāmaṇirapekṣitam || 8 ||
[Analyze grammar]

evaṃ te'ciṃtayasiddhāḥ paramāmarṣapūritāḥ |
utsārya tattapodharmaṃ nāstikyaṃ bhāvamāgatāḥ || 9 ||
[Analyze grammar]

etasminneva kāle tu vāguvācāśarīriṇī |
āśvāsayaṃtī tānsiddhānmātā putramivaurasam || 10 ||
[Analyze grammar]

mā'vamanyadhvamāryā hi śrutirvyarthā mahītale |
tapo na niṃdyaṃ dharmo vā śrūyatāmatra kāraṇam || 11 ||
[Analyze grammar]

bhavitā bhavatāṃ siddhiratra naiva tapodhanāḥ |
sparddhayā siddhikāmaiśca tapastaddhi kṛtaṃ vṛthā || 12 ||
[Analyze grammar]

kāmācca tapaso hānirahaṃkārācca vismayaḥ |
krodhāllobhāttathā mohājjāyate nātra saṃśayaḥ || 13 ||
[Analyze grammar]

sparddhayā rahito yastu kāmakrodhavivarjitaḥ |
karoti karma bhāvena sa tapaḥphalamaśnute || 14 ||
[Analyze grammar]

vāsanāvāsito yastu ekacittaḥ samāhitaḥ |
āstikaḥ śraddadhānaśca sa tapaḥphalamaśnute || 15 ||
[Analyze grammar]

mātṛvatparadārāṇi paradravyāṇi loṣṭavat |
yaḥ paśyati naro nityaṃ sa tapaḥ phalamaśnute || 16 ||
[Analyze grammar]

īdṛśe puruṣe viprāstapaḥsiddhiśca dṛśyate |
bhavaṃtaḥ sparddhayā caiva kṛtavaṃtaśca duṣkaram || 17 ||
[Analyze grammar]

tasmādvarṣasahasreṇa naiva siddhirbhaviṣyati |
yadi madvacanaṃ kāryaṃ nirvikalpena cetasā || 18 ||
[Analyze grammar]

mahākālavanaṃ gatvā yūyaṃ sarve samāhitāḥ |
ārādhayadhvaṃ deveśaṃ sadā siddhipradāyakam || 19 ||
[Analyze grammar]

darśanāttasya devasya labhyate siddhiruttamā |
sanakādayo'pi ye devamāsādya yogatatparāḥ |
pūjayitvāpi bhāvena saṃsiddhiṃ paramāṃ gatāḥ || 20 ||
[Analyze grammar]

rājñā vasumatā pūrvaṃ khaṅgasiddhiḥ sudurlabhā |
prāptā darśanamātreṇa liṃgasyāsya prabhāvataḥ || 21 ||
[Analyze grammar]

pādukāgamanaṃ labdhaṃ haihayena mahātmanā |
kṛtavīrātmajenaiva vāhānāṃ ca sahasrakam || 22 ||
[Analyze grammar]

adṛśyakaraṇaṃ caiva prāptaṃ cānūruṇā purā |
svarṇasiddhiśca siddhena pādalepo rasāyanam |
aṃjanaṃ ca tathā labdhaṃ liṃgasyāsya ca darśanāt || 23 ||
[Analyze grammar]

ākāśavacanaṃ śrutvā te siddhā vismayānvitāḥ |
samāyātā mudā yuktā mahākālavanottame || 24 ||
[Analyze grammar]

sarvasiddhipradaṃ caiva dadṛśurliṃgamuttamam |
darśanāttasya liṃgasya saṃsiddhiṃ paramāṃ gatāḥ || 25 ||
[Analyze grammar]

tataḥprabhṛti vikhyāto devaiḥ siddheśvaraḥ paraḥ |
ye paśyaṃti narā devi devaṃ siddheśvaraṃ param |
na teṣāṃ durlabhā siddhirbhaviṣyati mahītale || 26 ||
[Analyze grammar]

siddheśvaraṃ gamiṣyaṃti bhāvahīnāḥ prasaṃgataḥ |
saṃsiddhāste bhaviṣyaṃti niyatā nātra saṃśayaḥ || 27 ||
[Analyze grammar]

mahāpātakasaṃyukto yastu siddheśvaraṃ smaret |
saṃsiddhastu bhavennūnaṃ jñānaiśvaryasamanvitaḥ || 28 ||
[Analyze grammar]

niyamena tu yaḥ paśyeddevaṃ siddheśvaraṃ param |
ṣaṇmāsājjāyate siddhirvāṃchitā yā bhaveddhṛdi || 29 ||
[Analyze grammar]

aṣṭamyāṃ ca caturddaśyāṃ kṛṣṇapakṣe viśeṣataḥ |
siddheśvaraṃ tu yaḥ paśyetsa paśyenmama maṃdiram || 30 ||
[Analyze grammar]

aputro labhate putraṃ nirdhanastu dhanaṃ labhet |
vidyārthī labhate vidyāṃ bhāryārthī labhate striyam || 31 ||
[Analyze grammar]

saṃkrāṃtau somavāre ca grahaṇe caiva yo'rcayet |
kulānāṃ śatamuddhṛtya paitṛkaṃ svādhikaṃ priye |
modate mama loke ca yāvadiṃdrāścaturdaśa || 32 ||
[Analyze grammar]

eṣa te kathito devi prabhāvaḥ pāpanāśanaḥ |
siddheśvarasya devasya lokapāleśvaraṃ śṛṇu || 33 ||
[Analyze grammar]