Chapter 11

[English text for this chapter is available]

agastiruvāca |
śṛṇu suśroṇi subhage vaiśvānarasamudbhavam |
puṇyaśīlasuśīlābhyāṃ yathoktaṃ śivaśarmaṇe || 1 ||
[Analyze grammar]

atha kālena tadyoṣidaṃtarvatnī babhūva ha |
vidhivadvihite tena garbhādhānākhya karmaṇi || 2 ||
[Analyze grammar]

tataḥ puṃsavanaṃ tena spaṃdanātprāgvipaścitā |
gṛhyoktavidhinā samyakkṛtaṃ puṃstvavivṛddhaye || 3 ||
[Analyze grammar]

sīmantothāṣṭame māsi garbharūpasamṛddhikṛt |
sukhaprasava siddhyai ca tenākāri kriyāvidā || 4 ||
[Analyze grammar]

athātaḥ satsutārāsu tārādhipa varānanaḥ |
keṃdre gurau śubhe lagne sugraheṣvayugeṣu ca || 5 ||
[Analyze grammar]

ariṣṭaṃ dīpayandīptyā sarvāriṣṭavināśakṛt |
tanayo nāma tasyāṃ tu śuciṣmatyāṃ babhūva ha || 6 ||
[Analyze grammar]

sadyaḥ samastasukhado bhūrbhuvaḥsvarnivāsinām |
gaṃdhavāhāgandhavāhādigvadhūmukhavāsanāḥ || 7 ||
[Analyze grammar]

iṣṭagandhaprasūnaughairvavarṣuste ghanāghanāḥ |
devadundubhayo neduḥ praseduḥ sarvatodiśaḥ || 8 ||
[Analyze grammar]

paritaḥ saritaḥ svacchā bhūtānāṃ mānasaiḥ saha || 9 ||
[Analyze grammar]

tamo'tāmyattu nitarāṃ rajopi virajobhavat || 9 ||
[Analyze grammar]

sattvāḥ sattvasamāyuktā vasudhāsīcchubhā tadā |
kalyāṇī sarvato vāṇī prāṇinaḥ prīṇayaṃtyabhūt || 10 ||
[Analyze grammar]

tilottamorvaśīraṃbhā prabhā vidyutprabhā śubhā |
sumaṃgalā śubhālāpā suśīlāḍyā varāṃganāḥ || 11 ||
[Analyze grammar]

kvaṇatkaṃkaṇa pātrāṇi kṛtvā karatalaṃ mudā |
muktamuktāphalāḍhyāni yakṣakardamavaṃti ca || 12 ||
[Analyze grammar]

vajravaidūrya dīpāni haridrā lepanāni ca |
gārutmataikarūpāṇi śaṃkhaśuktidadhīni ca || 13 ||
[Analyze grammar]

padmarāgapravālākhyaratnakuṃkumavaṃti ca |
gomedapuṣparāgeṃdra nīlasanmālyabhāṃji ca || 14 ||
[Analyze grammar]

vidyādharyaśca kinnaryastathā'maryaḥ sahasraśaḥ |
cāmara vyagrahastāgra maṃgaladravyapāṇayaḥ || 15 ||
[Analyze grammar]

gaṃdharvoragayakṣāṇāṃ suvāsinyaḥ śubhasvarāḥ |
gāyaṃtyo lalitaṃ gītaṃ tatrājagmuranekaśaḥ || 16 ||
[Analyze grammar]

marīciratri pulahaḥ pulastyaḥ kraturaṃgirāḥ |
vasiṣṭhaḥ kaśyapaścāhaṃ vibhāṃḍo māṃḍavīsutaḥ || 17 ||
[Analyze grammar]

lomaśo lomacaraṇo bharadvājotha gautamaḥ |
bhṛgustu gālavo gargo jātūkarṇyaḥ parāśaraḥ || 18 ||
[Analyze grammar]

āpastaṃbo yājñavalkya dakṣavālmīkimudgalāḥ |
śātātapaśca likhitaḥ śilādaḥ śaṃkhauṃchabhuk || 15 ||
[Analyze grammar]

jamadagniśca saṃvarto mataṃgo bharatoṃśumān |
vyāsaḥ kātyāyanaḥ kutsaḥ śaunakaḥ suśrutaḥ śukaḥ || 20 ||
[Analyze grammar]

ṛṣyaśṛṃgotha durvāsā rucirnāradatuṃburū |
uttaṃko vāmadevaśca cyavanositadevalau || 21 ||
[Analyze grammar]

śālaṃkāyanahārī tau viśvāmitrothabhārgavaḥ |
mṛkaṃḍaḥ saha putreṇa dālbhya uddālakastathā || 22 ||
[Analyze grammar]

dhaumyopamanyuvatsādyā munayo munikanyakāḥ |
tacchāṃtyarthaṃ samājagmurdhanyaṃ viśvānarāśramam || 23 ||
[Analyze grammar]

brahmā bṛhaspatiyuto devo garuḍavāhanaḥ |
naṃdi bhṛṃgi samāyukto gauryā saha vṛṣadhvajaḥ || 24 ||
[Analyze grammar]

maheṃdramukhyā gīrvāṇā nāgāḥ pātālavāsinaḥ |
ratnānyādāya bahuśaḥ sasaritkā mahābdhayaḥ || 25 ||
[Analyze grammar]

sthāvarā jaṃgamaṃ rūpaṃ dhṛtvā yātāḥ sahasraśaḥ |
mahāmahotsave tasminbabhūvākālakaumudī || 26 ||
[Analyze grammar]

jātakarma svayaṃ cakre tasya devaḥ pitāmahaḥ |
śrutiṃ vicārya tadrūpāṃ nāmnā gṛhapatistvayam || 27 ||
[Analyze grammar]

iti nāma dadau tasmai deyamekādaśehani |
nāmakarmavidhānena tadarthaṃ śrutimuccaran || 28 ||
[Analyze grammar]

ayamagnirgṛhapatirgārhapatyaḥ prajāyā vasuvittamaḥ |
agne gṛhapatebhidyumnamabhi saha āyacchasva || 29 ||
[Analyze grammar]

agne gṛhapate sthityā parāmapi nidarśayan |
caturnigamamaṃtroktairāśīrbhirabhinaṃdya ca || 30 ||
[Analyze grammar]

kṛtvā bālocitāṃ rakṣāṃ hareṇa hariṇā saha |
niryayau haṃsamāruhya sarveṣāṃ prapitāmahaḥ || 31 ||
[Analyze grammar]

ahorūpamaho tejastvaho sarvāṃgalakṣaṇam |
aho śuciṣmatībhāgyamāvirāsītsvayaṃ haraḥ || 32 ||
[Analyze grammar]

athavā kimidaṃ citraṃ śarvabhaktajaneṣvaho |
āvirbhavetsvayaṃ rudro yatorudrāstadarcakāḥ || 33 ||
[Analyze grammar]

iti stuvaṃtastvanyonyaṃ jagmuḥ sarve yathāgatam |
viśvānaraṃ samāpṛcchya saṃprahṛṣṭatanūruhāḥ || 34 ||
[Analyze grammar]

ataḥ putraṃ samīhaṃte gṛhasthāśramavāsinaḥ |
putreṇa lokāñjayati śrutireṣā sanātanī || 35 ||
[Analyze grammar]

aputrasya gṛhaṃ śūnyamaputrasyārjanaṃ vṛthā |
aputrasyānvayaśchinno nāpavitraṃ hyaputrataḥ || 36 ||
[Analyze grammar]

na putrātparamo lābho na putrātparamaṃ sukham |
na putrātparamaṃ mitraṃ paratreha ca kutracit || 37 ||
[Analyze grammar]

aurasaḥ kṣetrajaḥ krīto dattaḥ prāptaḥ sutāsutaḥ |
āpatsurakṣitaścānyaḥ putrāḥ saptātra kīrtitāḥ || 38 ||
[Analyze grammar]

eṣāmanyatamaḥ kāryo gṛhasthena vipaścitā |
pūrvapūrvaḥ sutaḥ śreyānhīnaḥsyāduttarottaraḥ || 39 ||
[Analyze grammar]

gaṇāvūcatuḥ |
niṣkramotha caturthe'sya māsi pitrākṛto gṛhāt |
annaprāśanamabdārdhe cūḍābde cārthavatkṛtā || 40 ||
[Analyze grammar]

karṇavedhaṃ tataḥ kṛtvā śravaṇarkṣe sakarmavit |
brahmatejobhivṛddhyarthaṃ paṃcame'bde vrataṃ dadau || 41 ||
[Analyze grammar]

upākarma tataḥ kṛtvā vedānadhyāpayatsudhīḥ |
tryabdaṃ vedānsavidhinā'dhyaiṣṭa sāṃgapadakramān || 42 ||
[Analyze grammar]

vidyājātaṃ samastaṃ ca sākṣimātrādgurormukhāt |
vinayādiguṇānāviṣkurvañjagrāha śaktimān || 43 ||
[Analyze grammar]

tatotha navame varṣe pitroḥ śuśrūṣaṇe ratam |
vaiśvānaraṃ gṛhapatiṃ dṛṣṭvā kāmacaro muniḥ || 44 ||
[Analyze grammar]

viśvānaroṭajaṃ prāpya devarṣirnāradaḥ sudhīḥ |
papraccha kuśalaṃ tatra gṛhītārghāsanaḥ kramāt || 45 ||
[Analyze grammar]

nārada uvāca |
viśvānara mahābhāga śuciṣmati śubhavrate |
kurute yuvayorvākyamayaṃ gṛhapatiḥ śiśuḥ || 46 ||
[Analyze grammar]

nānyattīrthaṃ na vā devo na gururna ca satkiyā |
vihāya pitrorvacanaṃ nānyo dharmaḥ sutasya hi || 47 ||
[Analyze grammar]

na pitroradhikaṃ kiṃcittrilokyāṃ tanayasya hi |
garbhadhāraṇapoṣābhyāṃ piturmātā garīyasī || 48 ||
[Analyze grammar]

aṃbhobhirabhiṣicyasvaṃ jananīcaraṇacyutaiḥ |
prāpnuyātsvardhunīśuddha kabaṃdhādhikaśuddhatām || 49 ||
[Analyze grammar]

saṃnyastākhilakarmāpi piturvaṃdyo himaskarī |
sarvavaṃdyena yatinā prasūrvaṃdyā prayatnataḥ || 50 ||
[Analyze grammar]

idameva tapotyugramidamevaparaṃ vratam |
ayameva paro dharmo yatpitroḥ paritoṣaṇam || 51 ||
[Analyze grammar]

manyemānyo nādhamasya tathānyasya yathā yuvām |
sukhākārairvinītasya śiśorgṛhapateraham || 52 ||
[Analyze grammar]

vaiśvānarasamabhyehi mamotsaṃge niṣīda bho |
lakṣaṇāni parīkṣehaṃ pāṇiṃ darśaya dakṣiṇam || 53 ||
[Analyze grammar]

ityukto muninā bālaḥ pitrorājñāmavāpya saḥ |
praṇamya nāradaṃ śrīmānbhaktyāprahva upāviśat || 54 ||
[Analyze grammar]

tato dṛṣṭvāsya sarvāṃgaṃ tālujihvādvijānapi |
ānīya kuṃkumāraktaṃ sūtraṃ ca triguṇīkṛtam || 55 ||
[Analyze grammar]

smṛtvā śivau gaṇādhyakṣamūrdhvībhūtamudaṅmukham |
muniḥ parimamau bālamāpādatalamastakam || 56 ||
[Analyze grammar]

tiryagūrdhvaṃ samo māne yoṣṭottaraśatāṃgulaḥ |
sa bhavetpṛthivīpālo bālo'yaṃ te yathā dvija || 57 ||
[Analyze grammar]

paṃcasūkṣmaḥ paṃcadīrghaḥ saptaraktaḥ ṣaḍunnataḥ |
tripṛthurlaghugaṃbhīro dvātriṃśallakṣaṇastviti || 58 ||
[Analyze grammar]

paṃcadīrghāṇi śasyāni yathādīrghāyuṣosya vai |
bhujau netre hanurjānu nāsā'sya tanayasya te || 59 ||
[Analyze grammar]

grīvājaṃghā mehanaiśca tribhirhrasvoyamīḍitaḥ |
svareṇa sattvanābhibhyāṃ trigaṃbhīraḥ śiśuḥ śubhaḥ || 60 ||
[Analyze grammar]

tvakkeśāṃgulidaśanāḥ parvāṇyaṃgulijānyapi |
tathāsya paṃcasūkṣmāṇi dikpālapadabhāgyathā || 61 ||
[Analyze grammar]

vakṣaḥ kukṣyalakaṃ skaṃdha karaṃ vaktraṃ ṣaḍunnatam |
tathā'tra dṛśyate bāle mahadaiśvaryabhāgyathā || 62 ||
[Analyze grammar]

pāṇyostale ca netrāṃte tālujihvādharauṣṭhakam |
saptāruṇaṃ ca sanakhamasminrājyasukhapradam || 63 ||
[Analyze grammar]

lalāṭakaṭivakṣobhistrivistīrṇo yathāhyasau |
sarvatejotiraiśvaryaṃ tathā prāpsyati nānyathā || 64 ||
[Analyze grammar]

kamaṭhīpṛṣṭhakaṭhināvakarmakaraṇau karau |
rājyahetū śiśorasya pādau cādhvani komalau || 65 ||
[Analyze grammar]

acchinnā tarjanīṃ vyāpya tathā rekhāsya dṛśyate |
kaniṣṭhā pṛṣṭhaniryātā dīrghāyuṣyaṃ yathārpayet || 66 ||
[Analyze grammar]

pādau sumāṃsalau raktau samau sūkṣmau suśaubhanau |
samagulphau svedahīnau snigdhāvaiśvaryasūcakau || 67 ||
[Analyze grammar]

svalpābhiḥ kararekhābhirāraktābhiḥ sadāsukhī |
liṃgena kṛśahrasvena rājarājo bhaviṣyati || 68 ||
[Analyze grammar]

utkaṃṭāsanagulphāsphignābhirasyāpi vartulā |
dakṣiṇāvartamaruṇaṃ mahadaiśvaryasūcikā || 69 ||
[Analyze grammar]

dhāraikā mūtrayatyasmindakṣiṇāvartinī yadi |
gaṃdhaśca mīnamadhunoryadi vīrye tadā nṛpaḥ || 70 ||
[Analyze grammar]

vistīrṇau māṃsalau snigdhau sphicāvasya sukhocitau |
vāmāvartau supralaṃbau doṣau digrakṣaṇocitau || 71 ||
[Analyze grammar]

śrīvatsavajracakrābja matsyakodaṃḍadaṃḍabhṛt |
tathāsya karagā rekhā yathā syāttridivaspatiḥ || 72 ||
[Analyze grammar]

dvātriṃśaddaśanaścāyaṃ karakaṃbu śirodharaḥ |
kauṃcaduṃdubhihaṃsābhra svaraḥ sarveśvarādhikaḥ || 73 ||
[Analyze grammar]

madhupiṃgalanetro'sau nainaṃ śrīstyajati kvacit |
paṃcarekhalalāṭastu tathā siṃhodaraḥ śubhaḥ || 74 ||
[Analyze grammar]

ūrdhvarekhāṃkitapado niḥśvasanpadmagaṃdhavān |
acchidrapāṇiḥ sunakho mahālakṣaṇavānayam || 75 ||
[Analyze grammar]

kiṃtu sarvaguṇopetaṃ sarvalakṣaṇalakṣitam |
saṃpūrṇanirmalakalaṃ pātayedvidhuvadvidhiḥ || 76 ||
[Analyze grammar]

tasmātsarvaprayatnena rakṣaṇīyastvasau śiśuḥ |
guṇopi doṣatāṃ yāti vakrībhūte vidhātari || 77 ||
[Analyze grammar]

śaṃke'sya dvādaśevarṣe pratyūho vidyudagnitaḥ |
ityuktvā nārado dhīmānsa jagāma yathāgatam || 78 ||
[Analyze grammar]

viśvānaraḥ sapatnīkastacchrutvā nāraderitam |
tadaiva manyamānobhūdvajrapātaṃ sudāruṇam || 79 ||
[Analyze grammar]

hāhatosmīti vacasā hṛdayaṃ samatāḍayat |
mūrcchāmavāpa mahatīṃ putraśokasamākulaḥ || 80 ||
[Analyze grammar]

śuciṣmatyapi duḥkhārtā rurodātīva duḥsaham |
ārtasvareṇa hārāvairatyaṃta vyākuledriyā || 81 ||
[Analyze grammar]

hāśiśo hāguṇanidhe hā piturvākyakāraka |
hā kuto maṃdabhāgyāyā jaṭhare me samāgataḥ || 82 ||
[Analyze grammar]

tvadekaputrāṃ hāputrako'tra māṃ trāyate purā |
tvadṛte tvadguṇormyāḍhye patitāṃ śokasāgare || 83 ||
[Analyze grammar]

hā bāla hā vimala hā kamalāyatākṣa hā lokalocanacakora kuraṃgalakṣman |
hā tāta tāta nayanābja mayūkhamālinhā māturutsavasahasrasukhaikaheto || 84 ||
[Analyze grammar]

hā pūrṇacaṃdramukha hā sunakhāṃgulīka hā cāṭukāravacanāmṛtavīcipūra |
duḥkhaiḥ kiyadbhirahahāṃ gamayātvamāptaḥ kiṃ kiṃ kṛtaṃ gṛhapate na mayā tvadāptyai || 85 ||
[Analyze grammar]

nopto balirna bata kāsu ca devatā sutīrthāni kāni na mayādhyuṣitāni vatsa |
ke ke mayā na niyamauṣadhamaṃtrayaṃtrāḥ saṃsādhitāstava kṛte sukṛtaikalabhya || 86 ||
[Analyze grammar]

saṃsārasāgaratare hara duḥkhabhāraṃ sāraṃ mukheṃdumabhidarśaya saukhyasiṃdho |
punnāmatīvranarakārṇava vāḍavāgnessaṃjīvayasva pitaraṃ nijavāksudhokṣaiḥ || 87 ||
[Analyze grammar]

kiṃdevatā ahaha janmamahotsave'sya jñātveti bhāvimilitā yugapatsamastāḥ |
ekastha sarvaguṇa śīla kalākalāpa sauṃdaryalakṣaṇaparīkṣaṇapūrṇaharṣāḥ || 88 ||
[Analyze grammar]

śaṃbho maheśa karuṇākara śūlapāṇe mṛtyuṃjayastvamiti vedavido vadaṃti |
tvaddatta bālatanaye yadi kālakālaḥ syādevamatra vada kasya bhavenna pātaḥ || 89 ||
[Analyze grammar]

hā haṃtahaṃtabhavatā bhava tāpahārī kasmādvidhe'tra vidadhe bahubhiḥ prayatnaiḥ |
bālo viśālaguṇasiṃdhumagādhamadhyaṃ sadratnasāramakhilaṃ savidhaṃ vidhāya || 90 ||
[Analyze grammar]

hā kālabālakavatī kimutena rājñī tvatkālatāṃ na hṛtavānnasutānaneṃduḥ |
bāleti komalamṛṇāla latāṃgalīlaṃ daṃbholiniṣṭhurakaṭhorakuṭhāradaṃṣṭraḥ || 91 ||
[Analyze grammar]

itthaṃ vilapya bahuśo nayanāṃbudhārāsaṃpātajāta taṭinī śatamuttaraṃgam |
sā tokaśokajanitānala tāpataptā procchvasyadīrghavipuloṣṇamaho śuśoṣa || 92 ||
[Analyze grammar]

ākarṇya tatkaruṇavatparidevitāni tāni drumā vratatayaḥ kusumāśrupātaiḥ |
prāyo rudaṃti patatāṃ virutārtarāvairālolyamaulimasakṛtpavanacchalena || 93 ||
[Analyze grammar]

ruṇṇaṃ tayā kila tathā bahumuktakaṃṭhamārtasvaraiḥ pratiravacchalato yathoccaiḥ |
tadduḥkhatonururudurgirikaṃdarāsyāḥ sarvā diśaḥ sthagitapatrimṛgāgamā hi || 94 ||
[Analyze grammar]

śrutvārtanādamiti viśvanaropi mohaṃ hitvotthitaḥ kimiti kiṃtviti kiṃkimetat |
uccairvadangṛhapatiḥ kva same bahisthaḥ prāṇoṃtarātmanilayaḥ sakaleṃdriyeśaḥ || 95 ||
[Analyze grammar]

agastya uvāca |
tato dṛṣṭvā sa pitarau bahuśokasamāvṛtau |
smitvovāca tato mātastrāsastvīdṛkkuto hi vām || 96 ||
[Analyze grammar]

na māṃkṛta vapustrāṇaṃ bhavaccaraṇareṇubhiḥ |
kālaḥ kalayituṃ śakto varākī caṃcalālpikā || 97 ||
[Analyze grammar]

pratijñāṃ śṛṇutaṃ tātau yadi vāṃ tanayo hyaham |
kariṣyehaṃ tathā tena vidyunmattastrasiṣyati || 98 ||
[Analyze grammar]

mṛtyuṃjayaṃ samārādhya sarvajñaṃ sarvadaṃ satām |
kālakālaṃ mahākālaṃ kālakūṭaviṣādinam || 99 ||
[Analyze grammar]

iti śrutvā vacastasya jaritau dvijadaṃpatī |
akālāmṛtavarṣaugha śāṃtatāpau tadocatuḥ || 100 ||
[Analyze grammar]

apayodapayovṛṣṭiradugdhābdhiḥ sudhodayaḥ |
aniṃduḥ kaumudīkāṃtiḥ kuto nau sukhayatyalam || 1 ||
[Analyze grammar]

punarbrūhipunarbrūhi kīdṛkkīdṛkpunaḥpunaḥ |
kālaḥ kalayituṃ nālaṃ varākī caṃcalālpikā || 2 ||
[Analyze grammar]

āvayostāpanāśāya mahopāyastvayeritaḥ |
mṛtyuṃjayasya devasya samārādhanalakṣaṇaḥ || 3 ||
[Analyze grammar]

tadgaccha śaraṇaṃ tāta nātaḥ parataraṃ hitam |
manorathapathātīta kāriṇaḥ kālahāriṇaḥ || 4 ||
[Analyze grammar]

kiṃ na śrutaṃ tvayā tāta śvetaketu yathā purā |
pāśitaṃ kālapāśena rarakṣa tripurāṃtakaḥ || 5 ||
[Analyze grammar]

śilādatanayaṃ mṛtyugrastamaṣṭābdamarbhakam |
śivo nijajanaṃ cakre naṃdinaṃ viśvanaṃdinam || 6 ||
[Analyze grammar]

kṣīrodamathanodbhūtapralayānalasaṃnibham |
pītvā hālāhalaṃ ghoramarakṣadbhuvanatrayam || 7 ||
[Analyze grammar]

jālaṃdharaṃ mahādarpaṃ hṛtatrailokyasaṃpadam |
caraṇāṃguṣṭharekhotthacakreṇanijaghānayaḥ || 8 ||
[Analyze grammar]

ya ekeṣu nipātottha jvalanaistripuraṃ purā |
vidhāya patriṇaṃ viṣṇuṃ jvālayāmāsa dhūrjaṭiḥ || 9 ||
[Analyze grammar]

aṃdhakaṃ yastriśūlāgraprotaṃ varṣāyutaṃ purā |
trailokyaiśvaryasaṃmūḍhaṃ śoṣayāmāsa bhānunā || 110 ||
[Analyze grammar]

kāmaṃ dṛṣṭinipātena trailokyavijayorjitam |
nināyānaṃgapadavīṃ vīkṣamāṇeṣvajādiṣu || 11 ||
[Analyze grammar]

taṃ brahmādyekakartāraṃ meghavāhanamacyutam |
prayāhi putra śaraṇaṃ viśvarakṣāmaṇiṃ śivam || 12 ||
[Analyze grammar]

pitroranujñāṃ prāpyeti praṇamya caraṇau tayoḥ |
pradakṣiṇamupāvṛtya bahvāśvāsya viniryayau || 13 ||
[Analyze grammar]

sa prāpya kāśīṃ duṣprāpāṃ brahmanārāyaṇādibhiḥ |
mahāsaṃvartasaṃvṛtta tāpādviśveśapālitām || 14 ||
[Analyze grammar]

phirasvardhunyā hārayaṣṭyeva rājitāṃ kaṃṭhabhūmiṣu |
vicitraguṇaśālinyāhāranīhāragaurayā || 15 ||
[Analyze grammar]

bahusaṃsārasaṃtāpasaṃtaptajanatodbhavam |
vārayaṃtīṃ varaṇayā chiṃdaṃtīmasidhārayā || 16 ||
[Analyze grammar]

yallabhyate ca kaivalyaṃ sudṛḍhāṣṭāṃgayogataḥ |
vikāsayaṃtīṃ tatsamyakkāśikāṃyāṃjagurbudhāḥ || 17 ||
[Analyze grammar]

saṃsāratāpataptābhyāṃ locanābhyāṃ sa dṛṣṭavān |
karṇākarṇaprakīrṇābhyāṃ prāgyayau maṇikarṇikām || 18 ||
[Analyze grammar]

tatra snātvā vidhānena dṛṣṭvā viśveśvaraṃ vibhum |
trailokyaprāṇisaṃtrāṇakāriṇaṃ praṇanāma ha || 19 ||
[Analyze grammar]

ālokyālokya talliṃgaṃ tutoṣa hṛdaye bahu |
paramānaṃdakaṃdākhyaṃ sphuṭametanna saṃśayaḥ || 120 ||
[Analyze grammar]

aho na matto dhanyosti trailokye sacarācare |
yadadrākṣiṣamadyāhaṃ śrīmadviśveśvaraṃ vibhum || 21 ||
[Analyze grammar]

trilokīsārasarvasvaṃ piṃḍībhūtamidaṃ kila |
kiṃ vā pīyūṣapiṃḍoyamudgataḥ kṣīranīradheḥ || 22 ||
[Analyze grammar]

ātmāvabodhamahasaḥ kimasau prathamāṃkuraḥ |
brahmānaṃda sukaṃdo vā kimu brahmarasāyanam || 23 ||
[Analyze grammar]

yogihṛtpadmanilayaṃ yadanākāramucyate |
tadākāratvamāpede kimidaṃ liṃgakaitavāt || 24 ||
[Analyze grammar]

brahmāṃḍabhāṃḍamathavā nānā ratnaughapūritam |
athavā mokṣavṛkṣasya phalametannasaṃśayaḥ || 25 ||
[Analyze grammar]

nirvāṇalakṣmyāḥ kimatha keśapāśaḥ supuṣpayuka |
kaivalyamallīvallyāḥ kiṃstabakaḥ stāvakārthadaḥ || 26 ||
[Analyze grammar]

niḥśreyasaśriyaḥ kiṃvā'naṃdakrīḍanakaṃdukaḥ |
apavargo dayādreḥ kimudiyāya sudhākaraḥ || 27 ||
[Analyze grammar]

saṃsāramohatimirabhiduraḥkimasau raviḥ |
kimu kalyāṇaramaṇīramyaśṛṃgāradarpaṇaḥ || 28 ||
[Analyze grammar]

ājñātaṃ nabhavedanyatsarveṣāṃ dehadhāriṇām |
anekakarmabījānāṃ bījapūro'yamadbhutaḥ || 29 ||
[Analyze grammar]

viśveṣāṃ viśvabījānāṃ karmākhyānāṃ layo yataḥ |
asminnirvāṇade liṃge viśvaliṃgamidaṃ tataḥ || 130 ||
[Analyze grammar]

mama bhāgyodayenaiva nāradena maharṣiṇā |
tadāgatya tathoktaṃ yatkṛtakṛtyosmyahaṃ tataḥ || 31 ||
[Analyze grammar]

ityānaṃdāmṛtarasairvidhāyasahi pāraṇam |
tataḥśubhe'hni saṃsthāpya liṃgaṃ sarvahitapradam || 32 ||
[Analyze grammar]

jagrāha niyamānghorānduṣkarānakṛtātmanām |
aṣṭottaraśataiḥ kuṃbhaiḥ pūrṇairgaṃgāmṛtodravaiḥ || 33 ||
[Analyze grammar]

saṃsnāpya vāsasā pūtaiḥ pūtātmā pratyahaṃ śivam |
nīlotpalamayīṃ mālāṃ samarpayati so'nvaham || 34 ||
[Analyze grammar]

aṣṭādhikasahasraistu sumanobhirvinirmitām |
sapakṣārdhena ṣaṇmāsaṃ kaṃdamūlaphalāśanaḥ || 35 ||
[Analyze grammar]

śīrṇaparṇāśanaḥ pakṣe tvāṣaṇmāsaṃ babhūva saḥ |
ṣaṇmāsaṃ vāyubhakṣobhūtṣaṇmāsaṃ jalabiṃdubhuk || 36 ||
[Analyze grammar]

evaṃ varṣadvayaṃ tasya vyatikrāṃtaṃ tathā sataḥ |
janmato dvādaśe varṣe tadvaco nāraderitam || 37 ||
[Analyze grammar]

satyaṃ kariṣyannivatamabhyagātkuliśāyudhaḥ |
uvāca ca varaṃ brūhi dadmi tanmanasi sthitam || 38 ||
[Analyze grammar]

ahaṃ śatakraturvipra prasannosmi śubhavrataiḥ |
ityākarṇya maheṃdrasya vākyaṃ munikumārakaḥ || 39 ||
[Analyze grammar]

uvāca madhuraṃ dhīraḥ kīravanmadhurākṣaram |
maghavanvṛtraśatro tvāṃ jāne kuliśapāṇinam || 140 ||
[Analyze grammar]

nāhaṃ vṛṇe varaṃ tvattaḥ śaṃkaro varadosti me || 41 ||
[Analyze grammar]

iṃdra uvāca |
na mattaḥ śaṃkarostvanyo devadevosmyahaṃ śiśo |
vihāya bāliśatvaṃ tvaṃ varayācasva māṃ varam || 42 ||
[Analyze grammar]

brāhmaṇa uvāca |
gacchāhalyāpate'sādho gotrāre pākaśāsana |
na prārthaye paśupateranyadevāṃtaraṃ sphuṭam || 43 ||
[Analyze grammar]

iti tasya vacaḥ śrutvā krodhasaṃraktalocanaḥ |
udyamya kuliśaṃ ghoraṃ bhīṣayāmāsa bālakam || 44 ||
[Analyze grammar]

sa dṛṣṭvā bālako vajraṃ vidyujjvālāśatākulam |
smarannāradavākyaṃ ca mumūrccha bhayavihvalaḥ || 45 ||
[Analyze grammar]

atha gaurīpatiḥ śaṃbhurāvirāsīttamonudaḥ |
uttiṣṭhottiṣṭha bhadraṃ te sparśaiḥ saṃjīvayanniva || 46 ||
[Analyze grammar]

unmīlya netrakamale supte iva divākṣaye |
apaśyadagre cotthāya śaṃbhumarkaśatādhikam || 47 ||
[Analyze grammar]

bhāle locanamālokya kaṃṭhe kālaṃ vṛṣadhvajam |
vāmāṃgasaṃniviṣṭādritanayaṃ caṃ draśekharam || 48 ||
[Analyze grammar]

kapardena virājaṃtaṃ triśūlājagavāyudham |
sphuratkarpūragaurāṃgaṃ pariṇaddha gajājinam || 49 ||
[Analyze grammar]

parijñāya mahādevaṃ guruvākyata āgamāt |
harṣa bāṣpākulaḥ sanna kaṭho romāṃcakaṃcukaḥ || 150 ||
[Analyze grammar]

kṣaṇaṃsthagitavattasthau citrakṛtrimaputrakaḥ |
yathātathā susaṃpanno vismṛtyātmānameva ca || 51 ||
[Analyze grammar]

na stotuṃ na namaskartuṃ kiṃcidvijñaptumeva ca |
yadāsanaśaśākālaṃ tadā smitvā'ha śaṃkaraḥ || 52 ||
[Analyze grammar]

īśvara uvāca |
śiśo gṛhapate śakrādvajrodyataparādaho |
jñāto bhītosi mā bhaiṣīrjijñāsā te kṛtā mayā || 53 ||
[Analyze grammar]

mama bhaktasya no śakro na vajraṃ nāṃtakopi vā |
prabhavediṃdrarūpeṇa mayaiva tvaṃ hi bhāṣitaḥ || 54 ||
[Analyze grammar]

varaṃ dadāmi te bhadra tvamagnipadabhāgbhava |
sarveṣāmeva devānāṃ vadanaṃ tvaṃ bhaviṣyasi || 55 ||
[Analyze grammar]

sarveṣāmeva bhūtānāṃ tvamagneṃ'taścaro bhava |
dharmarājeṃdrayormadhye digīśo rājyamāpnuhi || 56 ||
[Analyze grammar]

tvayedaṃ sthāpitaṃ liṃgaṃ tava nāmnā bhaviṣyati |
agnīśvaraṃ iti khyātaṃ sarvatejobhibṛṃhaṇam || 57 ||
[Analyze grammar]

agnīśvarasya bhaktānāṃ na bhayaṃ vidyudagnijam |
agnimāṃdya bhayaṃ naiva nākālamaraṇaṃ kvacit || 58 ||
[Analyze grammar]

agnīśvaraṃ samabhyarcya kāśyāṃ sarvasamṛddhidam |
anyatrāpi mṛto daivādagniloke mahīyate || 59 ||
[Analyze grammar]

tataḥ kāśīṃ punaḥ prāpya kalpāṃte mokṣamāpnuyāt |
vīreśvarasya pūrveṇa gaṃgāyāḥ paścime taṭe || 160 ||
[Analyze grammar]

agnīśvaraṃ samārādhya vahniloke vasennaraḥ |
pitṛbhyāṃ svajanaiḥ sārdhaṃ mitrabaṃdhusamāyutaḥ || 61 ||
[Analyze grammar]

vimānamidamāruhya prayāhyeva diśaḥpate |
ityuktvānīya tadbaṃdhūn pitrośca paripaśyatoḥ |
dikpatitve'bhiṣicyāgniṃ tatra liṃge śivoviśat || 62 ||
[Analyze grammar]

gaṇāvūcatuḥ |
itthamagnisvarūpaṃ te śivaśarmanpravarṇitam |
kimanyacchrotukāmosi kathayāvastadīraya || 163 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvāddheṃ vahnilokavarṇanaṃ nāmaikādaśo'dhyāyaḥ || 11 ||
[Analyze grammar]