Chapter 39

[English text for this chapter is available]

śrīsūta uvāca |
athātaḥ saṃpravakṣyāmi kapitīrthasya vaibhavam |
tattīrthaṃ sakalaiḥ pūrvaṃ gaṃdhamādanaparvate || 1 ||
[Analyze grammar]

sarveṣāmupakārāya kapibhirnirmitaṃ dvijāḥ |
rāvaṇādiṣu rakṣaḥsu hateṣu tadanaṃtaram || 2 ||
[Analyze grammar]

tīrthaṃ nirmāya tatraiva sasnuste kapayo mudā |
tīrthāya ca varaṃ prāduḥ kapayaḥ kāmarūpiṇaḥ || 3 ||
[Analyze grammar]

asmiṃstīrthe nimagnā ye bhaktipravaṇacetasaḥ |
te sarve muktibhājaḥ syurmahāpātakamocitāḥ || 4 ||
[Analyze grammar]

atra tīrthe nimagnānāṃ na syānnarakajaṃ bhayam |
atra snātā narāḥ sarve dāridrayaṃ nāpnuvaṃti hi || 5 ||
[Analyze grammar]

atra tīrthe nimagnānāṃ yamapīḍāpi no bhavet |
kapitīrthaṃ prayāsye'hamiti yaḥ satataṃ bruvan || 6 ||
[Analyze grammar]

vrajecchatapadaṃ viprāḥ sa yāyātparamaṃ padam |
etattīrthasamaṃ tīrthaṃ na bhūtaṃ na bhaviṣyati || 7 ||
[Analyze grammar]

evaṃ varaṃ tu te dattvā tīrthāyāsmai kapīśvarāḥ |
rāmaṃ dāśarathiṃ sarve praṇamyātha yayācire || 8 ||
[Analyze grammar]

svāmiṃstvayāsmai tīrthāya dīyatāṃ varamadbhutam |
kapibhiḥ prārthito viprā rāmacaṃdro'tiharṣitaḥ || 9 ||
[Analyze grammar]

tattīrthāya varaṃ prādātkapīnāṃ prītikāraṇāt |
atra tīrthe nimagnānāṃ gaṃgāsnānaphalaṃ labhet || 10 ||
[Analyze grammar]

prayāgasnānajaṃ puṇyaṃ sarvatīrthaphalaṃ tathā |
agniṣṭomādiyāgānāṃ phalaṃ bhūyādanuttamam || 11 ||
[Analyze grammar]

gāyatryādimahāmaṃtrajapapuṇyaṃ tathā bhavet |
gosahasrapradanṛṇāṃ prāpnotyavikalaṃ phalam || 12 ||
[Analyze grammar]

caturṇāmapi vedānāṃ pārāyaṇaphalaṃ labhet |
brahmaviṣṇumaheśādidevapūjāphalaṃ labhet || 13 ||
[Analyze grammar]

kapitīrthāya rāmoyaṃ prādādevaṃ varaṃ dvijāḥ |
evaṃ rāmeṇa datte tu vare tatra kutūhalāt || 14 ||
[Analyze grammar]

ṣaḍardhanayano brahmā sahasrākṣo yamastathā |
varuṇognistathā vāyuḥ kuberaścaṃdramā api || 15 ||
[Analyze grammar]

ādityo nirṛtiścaiva sādhyāśca vasavastathā |
anye'pi tridaśāḥ sarve viśvedevādayastathā || 16 ||
[Analyze grammar]

atrirbhṛgustathā kutso gautamaśca parāśaraḥ |
kaṇvo'gastyaḥ sutīkṣṇaśca viśvāmitrādayo'pare || 17 ||
[Analyze grammar]

yoginaḥ sanakādyāśca nāradādyāḥ surarṣayaḥ |
rāmadattavaraṃ tīrthaṃ ślāghaṃte bahudhā tadā || 18 ||
[Analyze grammar]

sasnuśca tatra tīrthe te sarvābhīṣṭapradāyini |
kapibhirnirmitaṃ yasmādetattīrthamanuttamam || 19 ||
[Analyze grammar]

kapitīrthamiti khyātimato loke prayāsyati |
ityapyavocaṃste sarve devāśca munayastathā || 20 ||
[Analyze grammar]

tasmādavaśyaṃ gaṃtavyaṃ kapitīrthaṃ mumukṣubhiḥ |
raṃbhā kauśikaśāpena śilābhūtā purā dvijāḥ || 21 ||
[Analyze grammar]

tatra snātvā nijaṃ rūpaṃ prapede ca divaṃ yayau |
asya tīrthasya māhātmyaṃ mayā vaktuṃ na śakyate || 22 ||
[Analyze grammar]

munaya ūcuḥ |
raṃbhāṃ kimarthamaśapatkauśikaḥ sūtanaṃdana |
kathaṃ gatā śilābhūtā kapitīrthaṃ surāṃganā |
etannaḥ sarvamācakṣva vistarānmunisattama || 23 ||
[Analyze grammar]

śrīsūta uvāca |
viśvāmitrābhidho rājā prāgabhūtkuśikānvaye || 24 ||
[Analyze grammar]

sa kadācinmahārājaḥ senāparivṛto balī |
medinīṃ paricakrāma rājyavīkṣaṇakautukī || 25 ||
[Analyze grammar]

aṭitvā sa bahūndeśānvasiṣṭhasyāśramaṃ yayau |
ātithyāya vṛtaḥ so'yaṃ vasiṣṭhena mahātmanā || 26 ||
[Analyze grammar]

tathāstvityabravītsoyaṃ daṃḍavatpraṇato nṛpaḥ |
kāmadhenuprabhāvena viśvāmitrāya bhūbhuje || 27 ||
[Analyze grammar]

ātithyamakarodviprā vasiṣṭho brahmanaṃdanaḥ |
kāmadhenuprabhāvaṃ vai jñātvā kuśikanaṃdanaḥ || 28 ||
[Analyze grammar]

vasiṣṭhaṃ prārthayāmāsa kāmadhenumabhīṣṭadām |
pratyākhyāto vasiṣṭhena pracakarṣa ca tāṃ balāt || 29 ||
[Analyze grammar]

kāmadhenuvisṛṣṭaistu mlecchādyaiḥ sa parājitaḥ |
mahādevaṃ samārādhya tasmādastrāṇyavāpya ca || 30 ||
[Analyze grammar]

vasiṣṭhasyāśramaṃ gatvā vyasṛjaccharasaṃcayān |
sarvāṇyastrāṇi mumuce brahmāstraṃ ca nṛpottamaḥ || 31 ||
[Analyze grammar]

tāni sarvāṇi cāstrāṇi vasiṣṭho brahmanaṃdanaḥ |
ekena brahmadaṃḍena nijaghna svatapobalāt || 32 ||
[Analyze grammar]

tataḥ parājito viprā viśvāmitro'tilajjitaḥ |
brāhmaṇyāvāptaye svasya tapaḥ kartuṃ vanaṃ yayau || 33 ||
[Analyze grammar]

pūrvāsu paścimāṃtāsu triṣu dikṣu tapo'carat |
prādurbhūtamahā vighnastattaddikṣu sa kauśikaḥ || 34 ||
[Analyze grammar]

uttarāṃ diśamāsādya himavatparvate'male |
kauśikyāssaritastīre puṇye pāpavināśini || 35 ||
[Analyze grammar]

divyaṃ varṣasahasraṃ tu nirāhāro jiteṃdriyaḥ |
nirāloko jitaśvāso jitakrodhaḥ suniścalaḥ || 36 ||
[Analyze grammar]

grīṣme paṃcāgnimadhyasthaḥ śiśire vāriṣu sthitaḥ |
varṣāsvākāśago nityamūrdhvabāhurnirāśrayaḥ || 37 ||
[Analyze grammar]

brāhmaṇyasiddhaye'tyugraṃ cacāra sumahattapaḥ |
udvignamanasastasya tridaśāstridivālayāḥ |
jaṃbhāriṇā ca sahitā raṃbhāṃ procuridaṃ vacaḥ || 39 ||
[Analyze grammar]

devā ūcuḥ |
raṃbhe tvaṃ himavacchaile kauśikītīragaṃ munim || 39 ||
[Analyze grammar]

viśvāmitraṃ tapasyaṃtaṃ vilobhaya viceṣṭitaiḥ |
yathā tattapaso vighno bhaviṣyati tathā kuru || 40 ||
[Analyze grammar]

evamuktā tadā raṃbhā devairiṃdrapurogamaiḥ |
pratyuvāca surānsarvānprāṃjaliḥ praṇatā tadā || 41 ||
[Analyze grammar]

raṃbhovāca |
atikrūro mahākrodho viśvāmitro mahāmuniḥ |
sa śapsyate māṃ krodhena bibhemyasmādahaṃ surāḥ || 42 ||
[Analyze grammar]

trāyadhvaṃ kṛpayā yūyaṃ māṃ yuṣmatparicārikām |
ityukto raṃbhayā tatra jaṃbhāristāma bhāṣata || 43 ||
[Analyze grammar]

indra uvāca |
raṃbhe tvayā na bhīḥ kāryā viśvāmitrāttapodhanāt |
ahamapyāgamiṣyāmi tvatsahāyaḥ samanmathaḥ || 44 ||
[Analyze grammar]

kokilālāpamadhuro vasanto'pyāgamiṣyati |
atisuṃdararūpā tvaṃ pralobhaya mahāmunim || 45 ||
[Analyze grammar]

itīṃdrakathitā raṃbhā viśvāmitrāśramaṃ yayau |
taddṛṣṭigocarā sthitvā lalitaṃ rūpamāsthitā || 46 ||
[Analyze grammar]

sā muniṃ lobhayāmāsa manoharaviceṣṭitaḥ |
pikopi tasminsamaye cukūjānaṃdayanmanaḥ || 47 ||
[Analyze grammar]

śrutvā pikasvaraṃ raṃbhāṃ dṛṣṭvā ca munipuṃgavaḥ |
saṃśayāviṣṭahṛdayo viditvā śakrakarma tat |
śaśāpa raṃbhāṃ krodhena viśvāmitrastapodhanaḥ || 48 ||
[Analyze grammar]

viśvāmitra uvāca |
yasmātkopayase raṃbhe māṃ tvaṃ kopajayaiṣiṇam || 49 ||
[Analyze grammar]

śilā bhavātra tasmāttvaṃ raṃbhe varṣaśatāyutam |
tadaṃtare brāhmaṇena rakṣitā mokṣamāpsyasi || 50 ||
[Analyze grammar]

viśvāmitrasya śāpena tadaṃte sā śilā'bhavat |
bahukālaṃ śilābhūtā tasthau tasyāśrame dvijāḥ || 51 ||
[Analyze grammar]

viśvāmitropi dharmātmā punastaptvā mahattapaḥ |
lebhe vasiṣṭhavākyena brāhmaṇyaṃ durlabhaṃ nṛpaiḥ || 52 ||
[Analyze grammar]

bahukālaṃ śilābhūtā raṃbhāpyāsīttadāśrame |
tasminnevāśrame puṇye śiṣyo'gastyasya saṃmataḥ || 53 ||
[Analyze grammar]

śvetonāma muniścakre mumukṣuḥ paramaṃ tapaḥ |
cirakālaṃ tapastasminprakurvati mahāmunau || 54 ||
[Analyze grammar]

aṃgāraketi vikhyātā rākṣasī kācidāgatā |
tasyāśramamatikrūrā meghasvanamahāsvanā || 55 ||
[Analyze grammar]

mūtraraktapurīṣādyairdūṣayāmāsa bhīṣaṇā |
upadravaistathā cānyairbādhayāmāsa taṃ munim || 56 ||
[Analyze grammar]

atha kruddho muniḥ śveto vāyavyāstreṇa yojayan |
śaptāṃ kuśikaputreṇa rākṣasyai prākṣipacchilām || 57 ||
[Analyze grammar]

rākṣasī sā pradudrāva vāyavyāstreṇa yojitā |
vāyavyāstraprayuktena dṛṣadānudrutā ca sā || 58 ||
[Analyze grammar]

dakṣiṇāṃbunidhestīraṃ dhāvati sma bhayārditā |
dhāvantīmanudhāvantī sā śilāstraprayojitā || 59 ||
[Analyze grammar]

papātopari rākṣasyā majjaṃtyāḥ kapitīrthake |
mṛtā sā rākṣasī tatra śilāpātātsvamūrddhani || 60 ||
[Analyze grammar]

viśvāmitreṇa śaptā sā kapitīrthe nimajjanāt |
śilārūpaṃ parityajya raṃbhārūpamupeyuṣī || 61 ||
[Analyze grammar]

devaiḥ kusumadhārābhirabhivṛṣṭā manoramā |
divyaṃ vimānamārūḍhā divyāṃbaravirājitā || 62 ||
[Analyze grammar]

hārakeyūrakaṭakanāsābharaṇabhūṣitā |
urvaśyādyapsarobhiśca sakhibhiḥ parivāritā || 63 ||
[Analyze grammar]

kapitīrthasya māhātmyaṃ praśaṃsantī punaḥpunaḥ |
niṣevya rāmanāthaṃ ca śaṃkaraṃ śaśibhūṣaṇam || 64 ||
[Analyze grammar]

ākhaṇḍalapurīṃ ramyāṃ prayayāvamarāvatīm |
rākṣasī sāpi śāpena kumbhajasya mahaujasaḥ || 65 ||
[Analyze grammar]

ghṛtācī devaveśyā hi rākṣasīrūpamāgatā |
sāpyatra kapitīrthāpsu snānātsvaṃ rūpamāyayau || 66 ||
[Analyze grammar]

evaṃ raṃbhāghṛtācyau te kapitīrthe nimajjanāt |
agastyaśiṣyaśvetasya prasādāddvijasattamāḥ || 67 ||
[Analyze grammar]

rākṣasītvaṃ śilātvaṃ ca hitvā svaṃ rūpamāgate |
tasmātsarvaprayatnena snātavyaṃ kapitīrthake || 68 ||
[Analyze grammar]

yaḥ śṛṇotīmamadhyāyaṃ paṭhate vāpi mānavaḥ |
prāpnoti kapitīrthasya snānajaṃ phalamuttamam || 69 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye kapitīrthapraśaṃsāyāṃ raṃbhāghṛtācīśāpavimokṣaṇavarṇanaṃ nāmaikonacatvāriṃśo'dhyāyaḥ || 39 ||
[Analyze grammar]