Chapter 28

[English text for this chapter is available]

śrīnārāyaṇa uvāca |
ācamya prāṇānāyamya tatosau svasthamānasaḥ |
namaskṛtyeṣṭadevādīndeśakālau ca kīrtayet || 1 ||
[Analyze grammar]

ekāntadharmasidyarthaṃ vāsudevasya pūjanam |
kariṣya iti saṃkalpya kuryānnyāsavidhiṃ tataḥ || 2 ||
[Analyze grammar]

nyāse mantrā dvādaśārṇo gāyatrī vaiṣṇavī tathā |
nārāyaṇāṣṭākṣaraśca jñeyā viṣṇuṣaḍakṣaraḥ || 3 ||
[Analyze grammar]

ete dvijānāṃ vihitāstadanyeṣāṃ tviha trayaḥ |
vāsudevāṣṭākṣaraśca haripañcākṣarastathā |
ṣaḍarṇaḥ keśavasyeti nyāse home ca saṃmatāḥ || 4 ||
[Analyze grammar]

śrīviṣṇupratimāṃgeṣu svāṃgeṣviva tato'khilān |
kuryānyāsāṃśca tairmantraistatorcāṃ vāsasā'mṛjet || 5 ||
[Analyze grammar]

kalaśaṃ vāmabhāge sve saṃsthāpyāvāhya tatra ca |
tīrthāni gandhapuṣpādyairupacāraistamarcayet || 6 ||
[Analyze grammar]

pūjādravyāṇi cātmānaṃ prokṣayitvā tadambunā |
śaṃkhaṃ ghaṇṭāṃ ca saṃpūjya bhūtaśuddhiṃ samācaret || 7 ||
[Analyze grammar]

ābhyantarāgnivāyubhyāṃ dagdhvā pāpātmakaṃ vapuḥ |
śuddhasya svātmanastvaikyaṃ bhāvayedbrahmaṇā sthiraḥ || 8 ||
[Analyze grammar]

tato'kṣarabrahmarūpo rādhākṛṣṇaṃ hṛdi prabhum |
dhyāyedavyagramanasā prāṇāyāmaṃ samācaran || 9 ||
[Analyze grammar]

adhomukhaṃ nābhipadmaṃ kadalīpuṣpavatsthitam |
vibhāvyāpānapavanaṃ prāṇenaikyamupānayet || 10 ||
[Analyze grammar]

padmanāle tamānīya saha tena tadambujam |
ākarṣedūrdhvamatha tannadattīvramupaiti hṛt |
praphullati ca tatraitaddhṛdayākāśa ullasat || 11 ||
[Analyze grammar]

tejorāśimaye tatra tatopyadhikatejasā |
darśanīyatamaṃ śāntaṃ dhyāyecchrīrādhikāpatim || 12 ||
[Analyze grammar]

upaviṣṭaṃ sthitaṃ vā taṃ divyacinmayavigraham |
dhyāyetkiśoravayasaṃ koṭikandarpasundaram || 13 ||
[Analyze grammar]

rūpānurūpasaṃpūrṇadivyāvayavalakṣitam |
śaraccandrāvadātāṃgaṃ dīrghacārubhujadvayam || 14 ||
[Analyze grammar]

āraktakomalatalaramyāṃgulipadāmbujam |
tuṃgāruṇasnigdhanakhadyutilajjāyitoḍupam || 15 ||
[Analyze grammar]

śiñjatkiṃkiṇimañjīrahaṃsakāṃghriyugaśriyam |
suvṛttajaṃghāyugalaṃ samajānūruśobhanam || 16 ||
[Analyze grammar]

sadratnaraśanābaddhapītāmbarakaṭiśriyam |
uttuṃgakukṣinābhyantarnimnanābhivalitrayam || 17 ||
[Analyze grammar]

vitatottuṃgahṛdayaṃ śrīvatsāvarttaśobhitam |
lalantīgucchagucchārddhadevacchandādibhūṣitam || 18 ||
[Analyze grammar]

nānāsugandhipuṣpasraksvarṇayajñopavītinam |
unnidraśoṇapadmābhakarakaṃkaṇabhūṣaṇam || 19 ||
[Analyze grammar]

sūkṣmaparvāṃgulidyotannaikasadratnamudrikam |
ninādayantaṃ madhuraṃ veṇuṃ sarvamanoharam || 20 ||
[Analyze grammar]

vipulāṃsaṃ gūḍhajatruṃ mahābāhvaṃgadadyutim |
bhramatsugandhalubdhālijhaṃkāritavanasrajam || 21 ||
[Analyze grammar]

kambūpamagalabhrājatsadgraiveyakakaustubham |
śobhamānahanuṃ bimbīphalaśoṇādharadyutim || 22 ||
[Analyze grammar]

sitasmitakalārājatpūrṇacandranibhānanam |
tilapuṣpasamākāradarśanīyasunāsikam || 23 ||
[Analyze grammar]

samānakarṇavibhrājanmakarākṛtikuṇḍalam |
karṇoparilasaccitrapuṣpagucchāvataṃsakam || 24 ||
[Analyze grammar]

samasūkṣmaradajyotsnollasadgaṇḍasthalaśriyam |
padmapatrāyatāraktaprāntaramyavilocanam || 25 ||
[Analyze grammar]

pṛthutuṃgalalāṭaṃ ca kāmacāpāyitabhruvam |
vakrasūkṣmāsitasnigdhamanoharaśiroruham || 26 ||
[Analyze grammar]

nānāsadratnakhacitakirīṭadhṛtaśekharam |
premṇā nijaṃ vīkṣamāṇaṃ prasannaṃ snigdhayā dṛśā || 27 ||
[Analyze grammar]

dhyātvetthaṃ kṛṣṇamatha tadvāme rādhāṃ vicintayet |
dvibhujāṃ svarṇagaurāṃgīṃ kausumbhāmalavāsasam || 28 ||
[Analyze grammar]

samakarṇollasadratnabhūṣaṇāṃśukanāsikām |
kiśorīṃ mṛgaśāvākṣīṃ pīnonnataghanastanīm || 29 ||
[Analyze grammar]

kṛśamadhyāṃ pṛthuśroṇiṃ ratnakāñcīvibhūṣitām |
anekadivyābharaṇāṃ vikacābjānanasmitām || 30 ||
[Analyze grammar]

ratnāṃgulīyakeyūrakaṅkaṇādilasatkarām |
śiñjaddhaṃsakamañjīraśobhamānāṃghripaṅkajām || 31 ||
[Analyze grammar]

viśālabhālavilasatsatkāśmīralalāṭikām |
bimboṣṭhīṃ sukapolāṃ ca veṇīgrathitamālatīm || 32 ||
[Analyze grammar]

prekṣamāṇāṃ prabhuṃ premṇā dadhānāmambujaṃ kare |
dhyātvaivaṃ rādhikāṃ tatra prabhumarcettayā saha || 33 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye kriyāyoge śrīrādhākṛṣṇasvarūpadhyānanirūpaṇaṃ nāmā'ṣṭāviṃśo'dhyāyaḥ || 28 ||
[Analyze grammar]