Chapter 29

[English text for this chapter is available]

śrīnārāyaṇa uvāca |
upacārairbahuvidhairmānasaistaṃ prapūjya saḥ |
āvāhya sthāpayedbhakto mūrtau sthāpanamudrayā || 1 ||
[Analyze grammar]

tatastadaṃgadevāṃśca tattanmantraiḥ pṛthakpṛthak |
āvāhya nāmamantrairvā supratiṣṭhāpayecca saḥ || 2 ||
[Analyze grammar]

ghaṇṭādi vādayedvādyaṃ kuryādvā tālikādhvanim |
suptotthitamivā'thainaṃ kārayeddantadhāvanam || 3 ||
[Analyze grammar]

śyāmākaviṣṇukāntābhyāṃ dūrvābjābhyāṃ sahodakam |
pādyametatprabhordadyāttatorghyācamanīyake || 4 ||
[Analyze grammar]

candanākṣatapuṣpāṇi darbhāgratilasarṣapān |
yavāndūrvā cārghyapātre nikṣipedambunā bhṛte || 5 ||
[Analyze grammar]

jātīphalalavaṃgailākaṅkolośīravāsitam |
dadyādācamanīyāmbu tataḥ saṃsnapayeddharim || 6 ||
[Analyze grammar]

sugandhipuṣpatailena kuryādabhyaṃgamāditaḥ |
surabhidravyakalkena kuryāccodvartanaṃ tataḥ || 7 ||
[Analyze grammar]

kṣīreṇa dadhnā cājyena madhunā sitayā tathā |
snapayeddharimavyagrastattanmantraiḥ pṛthakpṛthak || 8 ||
[Analyze grammar]

sugandhinā ca śuddhena snānamuṣṇena cāmbunā |
taṃ kārayitvā gandhādyaiḥ snānapīṭhe'rcayellaghu || 9 ||
[Analyze grammar]

nirmālyapuṣpādi tato visṛjyottarato dvijaḥ |
rājanādyaiḥ sāmabhirvā mahāpuruṣavidyayā |
śrīsūktaviṣṇusūktaktābhyāmabhiṣekaṃ samācaret || 10 ||
[Analyze grammar]

nāmnāṃ sahasreṇa hareraṣṭottaraśatena vā |
abhiṣekaṃ tu kurvīranstriyaḥ śūdrāśca dīkṣitāḥ || 11 ||
[Analyze grammar]

tataḥ pramārjya vastreṇa tamanarghyāṃśukāni ca |
paridhāpayedatipremṇā rādhāṃ cānyāṃśca śaktitaḥ || 12 ||
[Analyze grammar]

upavītaṃ bhagavate dadyātsūkṣmaṃ sitaṃ śubham |
ratnahemādyalaṃkārānsāṃgāyāsmai ca dhārayet || 13 ||
[Analyze grammar]

yathāṛtu yathāsthānaṃ candanena yathocitam |
tilakānulepanaṃ kuryātsakeśaraghanādinā || 14 ||
[Analyze grammar]

yathocitamalaṃkārāndhārayitvā ca rādhikām |
patralekhāṃ ca tilakaṃ vidadhyātkuṅkumākṣataiḥ || 15 ||
[Analyze grammar]

ādarśaṃ darśayitvā'tha puṣpasrakchekharādibhiḥ |
pūjayettaṃ sahasreṇa tulasīmañjarīdalaiḥ || 16 ||
[Analyze grammar]

tulasyā vā'tha puṣpeṇa pratyekaṃ nāma vaiṣṇavam |
namaḥ prāntacaturthyantaṃ kīrttayannarcayetprabhum || 17 ||
[Analyze grammar]

sugandhidravyacūrṇāni tataḥ saubhāgyavanti ca |
samarpya dhūpaṃ kurvīta daśāṃgaṃ vāmṛtādikam || 18 ||
[Analyze grammar]

dīpaṃ ghṛtena kurvīta varttikādvayadīpitam |
kṛtaṃ svaśaktitaḥ śuddhaṃ mahānaivedyamarpayet || 19 ||
[Analyze grammar]

saṃyāvapāyasāpūpaśaṣkulīkhaṇḍalaḍḍakān |
pūrikāḥ polikā maudgamodanaṃ vyañjanāni ca |
dadhidugdhaghṛtādīni catuṣpadyāṃ nidhārayet || 20 ||
[Analyze grammar]

bhojayettaṃ tataḥ premṇā madhye pānīyamarpayan |
muhūrttārddhe gate dadyāddhastaprakṣālanāṃbu ca || 21 ||
[Analyze grammar]

uccheṣaṇaṃ bhagavato viṣvaksenādidevatāḥ |
upakalpyānyataḥ sthāpya svārthaṃ tadbhuvamāmṛjet || 22 ||
[Analyze grammar]

mukhavāsaṃ tato dadyātkṛtāṃ tāmbūlavīṭikām |
pūgacūrṇalavaṅgailājātījādisamanvitām || 23 ||
[Analyze grammar]

phalaṃ ca nālikerādi dattvā śaktyā ca dakṣiṇām |
mahānīrājanaṃ kuryādgītavāditrapūrvakam || 24 ||
[Analyze grammar]

stuyātpuṣpāñjalīndattvā tatstotreṇaiva taṃ tataḥ |
nāmasaṃkīrtanaṃ kuryādgāyannṛtyaṃśca tatpuraḥ || 25 ||
[Analyze grammar]

muhūrttaṃ sa vidhāyetthaṃ kṛtvā caiva pradakṣiṇām |
praṇāmaṃ daṇḍavatkuryāttiryaktaddakṣiṇe bhuvi || 26 ||
[Analyze grammar]

aṣṭāṃgaṃ vāpi pañcāgaṃ praṇāmaṃ puruṣaścaret |
pañcāṃgameva nārī tu nānyathā munisattama || 27 ||
[Analyze grammar]

padbhyāṃ karābhyāṃ jānubhyāmurasā śirasā dṛśā |
vacasā manasā ceti praṇāmo'ṣṭāṃga īritaḥ || 28 ||
[Analyze grammar]

bāhubhyāṃ caiva manasā śirasā vacasā dṛśā |
pañcāṃgoyaṃ praṇāmaḥ syātpūjāsu pravarāvimau || 29 ||
[Analyze grammar]

bhītaṃ māṃ saṃsṛteḥ pāhi prapannaṃ tvāṃ prabho iti |
tataḥ saṃprārtha svādhyāyaṃ śaktyā kurvīta naityakam || 30 ||
[Analyze grammar]

dhyātvā śeṣāṃ ca taddattāṃ gṛhītvā śirasādarāt |
āvāhitaṃ yathāpūrvaṃ rādhākṛṣṇaṃ hṛdambuje |
saṃsthāpayeccāṃgadevānsvasvasthānaṃ visarjayet || 31 ||
[Analyze grammar]

karaṇḍake vā śayyāyāṃ mandire pratimāṃ hareḥ |
śāyayitvā pidhāya dvārvaiśvadevaṃ samācaret || 32 ||
[Analyze grammar]

prāsādikaṃ harerannaṃ svapoṣyebhyo vibhajya saḥ |
svayaṃ bhuktvā tatkathādyairdinaśeṣamatikramet || 33 ||
[Analyze grammar]

mahāpūjāvidhānena proktenānena yonvaham |
bhaktyā samarcayedviṣṇuṃ sa bhavettasya pārṣadaḥ || 34 ||
[Analyze grammar]

divyaṃ vimānamāruhya bhāsvaraṃ devatepsitam |
golokākhyaṃ harerddhāma divyāṅgo yāti pūjakaḥ || 35 ||
[Analyze grammar]

phalābhisaṃdhinā vāpi yastamarceddinedine |
sopi dharmaṃ kāmamarthaṃ mokṣaṃ cāpnotyabhīpsitam || 36 ||
[Analyze grammar]

itthaṃ pūjāvidhiṃ karttumaśakto rādhayā saha |
harimekaṃ yathā labdhairarcedbhaktyopacārakaiḥ || 37 ||
[Analyze grammar]

dvādaśākṣaramantreṇa dvijo'nyo nāmamantrataḥ |
śrīrādhākṛṣṇamabhyarcedbhaktirevā'tra siddhidā || 38 ||
[Analyze grammar]

ekādaśyāṃ harerjanmotsavādau tu viśeṣataḥ |
mahāpūjaiva karttavyā svaśaktyā'khilavaiṣṇavaiḥ || 39 ||
[Analyze grammar]

pratiṣṭhāmātramapi yaḥ kuryādanyakṛtālaye |
sa sārvabhauma rājyaṃ vai prāpnuyānnaṣṭakilviṣaḥ || 40 ||
[Analyze grammar]

kārayenmandiraṃ ramyaṃ dhanāḍhyaśca harerdṛḍham |
yaḥ sa tu prāpnuyādrājyaṃ trailokyasyāpyakaṇṭakam || 41 ||
[Analyze grammar]

vṛttidānena pūjāyāḥ pravāhaṃ varddhayettu yaḥ |
sa pumānprāpnuyānnūnaṃ viṣṇuloke mahatsukham || 42 ||
[Analyze grammar]

pratiṣṭhāṃ mandiraṃ pūjāṃ kāraye ttrīṇyapīha yaḥ |
samānaiśvaryamāpnoti vāsudevasya sa dhuvam || 43 ||
[Analyze grammar]

harervṛrttiṃ haredyastu kṛtāṃ svena pareṇa vā |
kalpamekaṃ sa vai bhuṃkte narake yamayātanāḥ || 44 ||
[Analyze grammar]

karttā kārayitā yaśca sahāyaścānumodakaḥ |
caturṇāṃ hi phale bhāgaḥ sukṛtasyetarasya ca || 45 ||
[Analyze grammar]

iti kriyāyogavidhirmayā nārada kīrttitaḥ |
yenaikāntikadharmo'tra siddhyettatpravaṇātmanām || 46 ||
[Analyze grammar]

viṣayāṃścintayaṃścitte bahiḥ pūjāṃ hareścaran |
saṃbhāreṇāpi mahatā na yathoktaṃ phalaṃ labhet || 47 ||
[Analyze grammar]

itastato grāmyasukhe bhramatsvīyaṃ manastataḥ |
niyamya viṣṇupūjāyāṃ mumukṣuḥ prayato bhavet || 48 ||
[Analyze grammar]

mahāvratā bhūritapasvinopi svadhītavedā api buddhimantaḥ |
sāṃkhyaṃ ca yogaṃ pariśīlayantaḥ siddhiṃ na yāntyeva vinārcanaṃ hareḥ || 49 ||
[Analyze grammar]

iti śrīskānde mahāpurāṇa ekāśītisāhasryāṃ sahitāyāṃ dvitīye vaiṣṇavakhaṇḍe śrīvāsudevamāhātmye kriyāyoge śrīvāsudevapūjāvidhinirūpaṇaṃ nāmaikonatriṃśo'dhyāyaḥ || 29 ||
[Analyze grammar]