Chapter 27

[English text for this chapter is available]

śrīnārāyaṇa uvāca |
khananokṣaṇalepādyaiḥ śodhite dharaṇītale |
catuṣpādaṃ nyasetpīṭhaṃ nānāraṅgasuśobhite || 1 ||
[Analyze grammar]

arcakaḥ prāṅmukhaḥ pīṭhapādānkoṇeṣu kārayet |
caturṣu teṣu dharmādīnsthāpayetsiṃharūpiṇaḥ || 2 ||
[Analyze grammar]

agnau dharmaṃ nyasecchvetaṃ jñānaṃ śoṇaṃ ca nairṛte |
vāyau tu pītaṃ vairāgyaṃ śyāmamaiśvaryamaiśake || 3 ||
[Analyze grammar]

manodhīcittāhaṅkārānkramātpūrvādidikṣva'tha |
vinyasetpīṭhagātreṣu haridraktasitāsitān || 4 ||
[Analyze grammar]

sthāpyā raktasitaśyāmā rajaḥsattvatamoguṇāḥ |
pīṭhasya paṭṭikāyāṃ tu trayopi munisattama || 5 ||
[Analyze grammar]

antaḥkaraṇarūpeṣu gātreṣvatha caturṣvapi |
vimalādyā nyasecchaktīrdvedve ekaikagātrake || 6 ||
[Analyze grammar]

vimalotkarṣiṇīti dve gaurāṅgyau pūrvato nyaset |
vādayantyau śubhāṃ vīṇāṃ haridvastre svalaṃkṛte || 7 ||
[Analyze grammar]

jñānākriye nyasedyāmye pītavastre'ruṇadyutī |
ekā tālaṃ vādayantī mṛdaṅgamaparā tathā || 8 ||
[Analyze grammar]

yogāpraddhyau nyasetpaścācchyāme aruṇavāsasau |
saheva muralī cobhe vādayantyau pṛthakpṛthak || 9 ||
[Analyze grammar]

satyeśāne hemavarṇe uttarasyāṃ tato nyaset |
śyāmāṃśuke vādayantyāvubhe te parivādinīm || 10 ||
[Analyze grammar]

anugrahākhyā paṭṭikāyāṃ sthāpyaikā ca kṛtāñjaliḥ |
sarvā etāstu kartavyā dvibhujāḥ suvibhūṣaṇāḥ || 11 ||
[Analyze grammar]

pīṭhopari sitadvīpaṃ kurvīta śvetavāsasā |
tanmadhye'ṣṭadalaṃ padmaṃ kurvītojvalakarṇikam || 12 ||
[Analyze grammar]

dvādaśāṃśaṃ parityajya padmakṣetrasya bāhyataḥ |
vṛttaistribhistasya madhyaṃ vibhajetsamabhāgataḥ || 13 ||
[Analyze grammar]

tatrādyaṃ karṇikāsthānaṃ kesarāṇāṃ tu madhyamam |
patrāṇāṃ tu tṛtīyaṃ syāddalāgrāṇi tu bāhyataḥ || 14 ||
[Analyze grammar]

paritastasya ca puraṃ caturdvāraṃ prakalpayet |
raṅgadravyairbahuvidhairharidrākuṃkumādibhiḥ || 15 ||
[Analyze grammar]

kurvīta taṇḍulairvāpi tatra padmādi śobhanam |
padmasya karṇikāṃ madhye hemavarṇā suśobhayet || 16 ||
[Analyze grammar]

śoṇavarṇāni patrāṇi paritastasya cārcakaḥ |
 kuryādaṣṭāpyaṣṭadikṣu svarṇavarṇāni vā mune || 17 ||
[Analyze grammar]

pūrvaṃ tu gopuraṃ śoṇaṃ śyāmaṃ kuryācca dakṣiṇam |
pītavarṇaṃ paścimaṃ ca sphaṭikābhaṃ tathottaram || 18 ||
[Analyze grammar]

antarāle ca puṣpāṇi citrāṇi purapadmayoḥ |
kṛtvā madhye'tha śrīkṛṣṇaṃ tadvāme rādhikāṃ nyaset || 19 ||
[Analyze grammar]

rādhākṛṣṇasyāsya tataḥ pṛṣṭhe saṃkarṣaṇaṃ nyaset |
caturbāhuṃ dhṛtacchatraṃ gaurāṅgaṃ nīlavāsasam || 20 ||
[Analyze grammar]

dakṣe nyasedbhagavataḥ pradyumnaṃ pītavāsasam |
caturbhujaṃ ghanaśyāmaṃ dhṛtvā cāmaramāsthitam || 21 ||
[Analyze grammar]

vāme'niruddhaṃ ca harernyasedaruṇavāsasam |
indranīlamaṇiśyāmaṃ saṃsthitaṃ dhṛtacāmaram || 22 ||
[Analyze grammar]

trayopyete tu kartavyā nānālaṃkāraśobhitāḥ |
anarghyaratnamukuṭāstāruṇyena manoharāḥ || 23 ||
[Analyze grammar]

tato'vatārāṃstu hareḥ kesareṣvaṣṭasu kramāt |
ekaikasminnyased dvaudvāvaṣṭasvevaṃ hi ṣoḍaśa || 24 ||
[Analyze grammar]

sthāpayedvāmanaṃ buddhaṃ pūrvasminkesare'grataḥ |
ghanaśyāmāvubhau hyetau karuṇau brahmacāriṇau || 25 ||
[Analyze grammar]

sitāṃśukau kare dakṣe bibhratau phullapaṅkajam |
abhayaṃ vāmahaste ca śāntau yajñopavītinau || 26 ||
[Analyze grammar]

kalkinaṃ parśurāmaṃ ca vahnikoṇe'tha vinyaset |
khaṅgapāṇistatra kalkī parśupāṇistathā'paraḥ || 27 ||
[Analyze grammar]

ubhau gaurau ca tāmrākṣau jaṭilau sitavāsasau |
yajñopavītinau kāryau tyaktakrodhamahārayau || 28 ||
[Analyze grammar]

hayagrīvavarāhau ca sthāpayedyāmyakesare |
hayagrīvo hayāsyaḥ syānnarāṃgaśca caturbhujaḥ || 29 ||
[Analyze grammar]

śaṅkhādibhṛtsvarṇavarṇo dhṛtadivyasitāmbaraḥ |
varāhastu varāhāsyo narāṃgaḥ syāccaturbhujaḥ || 30 ||
[Analyze grammar]

śaṅkhacakragadābjāni dadhatpītāmbaraṃ tathā |
madhupiṃgalavarṇaśca karttavyo dvibhujo'tha vā || 31 ||
[Analyze grammar]

matsyakūrmmau nairṛte ca sthāpayetkesare tataḥ |
kaṭeradhastadākārāvūrddhvaṃ tau tu narākṛtī || 32 ||
[Analyze grammar]

vāme śaṃkhaṃ gadāṃ dakṣe pāṇau ca dadhatāvubhau |
śyāmasundaradehau ca karttavyau dhṛtabhūṣaṇau || 33 ||
[Analyze grammar]

dhanvantariṃ nṛsiṃhaṃ ca paścime kesare nyaset |
dhanvantariḥ śuklavāsā gaurāṃgo'mṛtakumbhadhṛt || 34 ||
[Analyze grammar]

siṃhavaktro nṛsiṃhastu nṛdehaḥ kesarānvitaḥ |
nīlotpalābho dvibhujo gadācakradharo bhaveta || 35 ||
[Analyze grammar]

vāyau nyasedubhau haṃsadattātreyau jaṭādharau |
yogiveṣau sitau daṇḍakamaṇḍalukarau tathā || 36 ||
[Analyze grammar]

uttare kesare vyāsaṃ nyasedgaṇapatiṃ tataḥ |
tatra vyāso viśālākṣaḥ kṛṣṇavarṇaḥ sitāmbaraḥ || 37 ||
[Analyze grammar]

dvibhujo dhṛtavedaśca supiśaṃgajaṭādharaḥ |
sitayajñopavītaśca karttavyaḥ sapavitrakaḥ || 38 ||
[Analyze grammar]

gajāsya ekadantaśca rakto gaṇapatirbhavet |
raktāmbaradharaścaiva nāgayajñopavītavān || 39 ||
[Analyze grammar]

tundilaśca caturbāhuḥ pāśāṅkuśavarāndadhat |
kareṇaikena ca dadhadramyāṃ pustakalekhinīm || 40 ||
[Analyze grammar]

nyasetkesara īśāne kapilaṃ pūjakastataḥ |
sanatkumāraṃ ca muniṃ naiṣṭhikabrahmacāriṇam || 41 ||
[Analyze grammar]

śuklāṃgaḥ kapilaḥ kāryo dhṛtacārusitāmbaraḥ |
dadhatkarābhyāmambhojamabhayaṃ śāntavigraham || 42 ||
[Analyze grammar]

pañcavārṣikabālābho digvastro'lpajaṭādharaḥ |
sanatkumāraśca muniḥ karttavyaḥ pūjakena tu || 43 ||
[Analyze grammar]

saṃsthāpya kesareṣvitthaṃ devatāḥ paṅkajasya tu |
nyasecca dalamadhyeṣu pārṣadānarccako'ṣṭasu || 44 ||
[Analyze grammar]

viṣvaksenaṃ ca garuḍaṃ tatrādau pūrvato nyaset |
tato dakṣakrameṇaiva prabalaṃ ca balaṃ nyaset || 45 ||
[Analyze grammar]

kumudaṃ kumudākṣaṃ ca sunandaṃ nandameva ca |
śrutadevaṃ jayantaṃ ca vinyasedvijayaṃ jayam || 46 ||
[Analyze grammar]

tataḥ pracaṇḍaṃ caṇḍaṃ ca puṣpadantaṃ ca sātvatam |
dvaudvāvevaṃ krameṇaiva sthāneṣvaṣṭasu vinyaset || 47 ||
[Analyze grammar]

caturbhujāḥ sarva ete śaṅkhāryabjagadādharāḥ |
kāryāḥ kiriṭinaḥ śyāmāḥ pītavastrāḥ subhūṣaṇāḥ || 48 ||
[Analyze grammar]

dalamadhyāntarāleṣu siddhīraṣṭasu vinyaset |
nānā maṃgalavādyānāṃ vādane nipuṇāḥ kramāt || 49 ||
[Analyze grammar]

aṇimā laghimā prāptiḥ prākāmyaṃ mahimā tathā |
īśitā vaśitā caivāṣṭamī kāmāvasāyitā || 50 ||
[Analyze grammar]

etāḥ suvarṇavarṇābhāḥ sarvābharaṇabhūṣitāḥ |
veṇuvīṇādihastāśca karttavyāścitravāsasaḥ || 51 ||
[Analyze grammar]

dalāgreṣvaṣṭasu tato vedāñchāstrāṇi ca nyaset |
tatra vedānnyaseddikṣu śāstrāṇi tu vidikṣu saḥ || 52 ||
[Analyze grammar]

pūrve nyasettu ṛgvedamakṣamālādharaṃ sitam |
kharvaṃ lambodaraṃ saumyaṃ padmanetraṃ sitāmbaram || 53 ||
[Analyze grammar]

yāmye nyasedyajurvedaṃ madhyamāṃgaṃ kṛśodaram |
piṃgākṣaṃ sthūlakaṇṭhaṃ ca pītaṃ cāruṇavāsasam || 54 ||
[Analyze grammar]

akṣasrajaṃ kare vāme dakṣe vajraṃ ca bibhratam |
paścime sāmavedaṃ ca prāṃśumādityavarcasam || 55 ||
[Analyze grammar]

dakṣe'kṣamālāṃ vāme ca dhṛtavantaṃ kare daram |
svarṇavastraṃ viśālākṣaṃ vinyasedgāyanodyatam || 56 ||
[Analyze grammar]

atharvāṇaṃ nyasetsaumye sitāṃgaṃ nīlavāsasam |
vāme'kṣasūtraṃ dakṣe ca khaṭvāṃgaṃ bibhrataṃ kare |
vahnyojasaṃ ca tāmrākṣaṃ vayasā sthaviraṃ tathā || 57 ||
[Analyze grammar]

agnikoṇe dharmaśāstraṃ nyasecca kamalāsanam |
śvetaṃ ca bibhrataṃ dorbhyāṃ muktāmālāṃ tathātulām || 58 ||
[Analyze grammar]

dīrghakeśanakhaṃ sāṃkhyaṃ nairṛte tundilaṃ nyaset || 3 ||
[Analyze grammar]

japamālāṃ ca daṇḍaṃ ca karābhyāṃ bibhrataṃ sitam || 59 ||
[Analyze grammar]

nyasedvāyau tato yogaṃ svarṇavarṇaṃ kṛśodaram |
ūrunyastakaradvandvaṃ svanāsāgrakṛtekṣaṇam || 60 ||
[Analyze grammar]

pañcarātraṃ tatheśāne dhavalaṃ vanamālinam |
nyasetkarābhyāṃ dadhatamakṣamālāṃ ca lāṃgalam || 61 ||
[Analyze grammar]

eṣāṃ caturṇāṃ vāsāṃsi śvetasūkṣmaghanāni ca |
karttavyāni tathākṣīṇi padmapatrāyatāni ca || 62 ||
[Analyze grammar]

agrāṇāmantarāleṣu maharṣīṃśca sayoṣitaḥ |
vinyasetpaṭhato vedānpūrvāgneyādyanukramāt || 63 ||
[Analyze grammar]

marīciṃ kalayā yuktamatriṃ cāpyanasūyayā |
śraddhayāṃgirasaṃ sākaṃ pulastyaṃ ca havirbhuvā || 64 ||
[Analyze grammar]

gatyā yuktaṃ ca pulahaṃ kriyayā ca saha kratum |
khyātyā bhṛgumarundhatyā vaśiṣṭhaṃ saha vinyaset || 65 ||
[Analyze grammar]

dvibhujāḥ sarva evaite jaṭāśmaśrudharāḥ kṛśāḥ |
kāryāstapasvino daṇḍāndadhataśca kamaṇḍalūn || 66 ||
[Analyze grammar]

padmādbahirnyaseccā'ṣṭau diśāsu vidiśāsu ca |
dikpālānindrapramukhānsahayānānyathādiśam || 67 ||
[Analyze grammar]

prācyāmairāvatārūḍhaṃ nyasedindraṃ caturbhujam |
vajrāṃkuśāmbujavarāndadhataṃ svarṇasannibham || 68 ||
[Analyze grammar]

kausumbharamyavasanaṃ nānālaṃkāraśobhitam |
śoṇāpāṃgaṃ viśālākṣaṃ sarvalakṣaṇalakṣitam || 69 ||
[Analyze grammar]

agnikoṇe nyasedagniṃ tāmravarṇaṃ caturbhujam |
dadhānaṃ pāṇibhiścaiva śūlaṃ śaktiṃ srucaṃ sruvam || 70 ||
[Analyze grammar]

catuḥśuke haimarathe niṣaṇṇaṃ vāyusārathim |
trinetraṃ dhūmravasanaṃ piṅgaśmaśrujaṭekṣaṇam || 71 ||
[Analyze grammar]

yamaṃ nyaseddakṣiṇataḥ śyāmaṃ cāmīkarāmbaram |
caturbhujaṃ daṇḍakhaḍgaparaśuṃ pāśadhāriṇam |
unmattamahiṣārūḍhaṃ nānābhūṣaṇabhūṣitam || 72 ||
[Analyze grammar]

ūrddhvakeśaṃ virūpākṣaṃ nairṛtaṃ nairṛte nyaset |
khaḍgaṃ pāśaṃ ca dadhataṃ dvibhujaṃ naravāhanam || 73 ||
[Analyze grammar]

hariśmaśruṃ dhūmravarṇaṃ parivītāsitāmbaram |
hāṭakānekabhūṣāḍhyamavaiṣṇavabhayaṃkaram || 74 ||
[Analyze grammar]

tataḥ pratīcyāṃ varuṇamindranīlamaṇiprabham |
śvetāmbaraṃ caturbāhuṃ muktāhāra vibhūṣitam || 75 ||
[Analyze grammar]

saptahaṃsarathārūḍhaṃ dorbhyāṃ pāśaṃ ca bibhratam |
anyābhyāṃ ratnapātraṃ ca śaṃkhaṃ ca dadhataṃ nyaset || 76 ||
[Analyze grammar]

vāyau vāyuṃ haridvarṇaṃ dvibhujaṃ kṛṣṇavāsasam |
pṛṣatsthaṃ muktakeśaṃ ca vyāttāsyaṃ dhvajinaṃ nyaset || 77 ||
[Analyze grammar]

saumye nyasetkuberaṃ ca svarṇavarṇaṃ caturbhujam |
gadāśaktitriśūlāni ratnapātraṃ ca bibhratam || 78 ||
[Analyze grammar]

nīlāmbaraṃ śmaśrulaṃ ca śibikāyāṃ samāsthitam |
piśaṃgavāmanayanaṃ naikabhūṣaṃ ca varmiṇam || 79 ||
[Analyze grammar]

īśāne'tha mūhārudramarddhanārīśvaraṃ nyaset |
vāmārddhe pārvatī kāryā dakṣārddhe tatra śaṃkaraḥ || 80 ||
[Analyze grammar]

īśvarārddhe jaṭājūṭaṃ kartavyaṃ candrabhūṣitam |
umārddhe tilakaṃ kāryaṃ sīmantamalike tathā || 81 ||
[Analyze grammar]

bhasmanoddhūlitaṃ cārddhamarddhaṃ kuṃkumabhūṣitam |
nāgopavītaṃ cāpyarddhamarddhaṃ hāravibhūṣitam || 82 ||
[Analyze grammar]

vāmārddhe ca stanaḥ pīnaḥ karttavyaḥ kaṃcukīvṛtaḥ |
kaṭyāṃ ca raśanā haimī pāde kāñcananūpuram || 83 ||
[Analyze grammar]

kausumbhaṃ vasanaṃ caiva karau kaṃkaṇabhūṣitau |
triśūlamakṣasūtraṃ ca dadhatau ratnamudrikau || 84 ||
[Analyze grammar]

dakṣārddhe raśanā sārpī kāryā vastraṃ gajājinam |
karau ca nāgavalayau darpaṇotpaladhāriṇau || 85 ||
[Analyze grammar]

evaṃvidhaṃ mahādevaṃ nyasedvṛṣabhavāhanam |
itthamaṣṭadigīśānāṃ kuryātsthāpanamarcakaḥ || 86 ||
[Analyze grammar]

purādbahistataścāṣṭau sthāpayedarcako grahān |
svasvadikṣu sthitānsvasvānyārūḍhānsyandanāni ca || 87 ||
[Analyze grammar]

prācyāṃ diśi nyasettatra bhāskaraṃ pītavāsasam |
sindūravarṇaṃ dvibhujaṃ padmahastaṃ rathe sthitam || 88 ||
[Analyze grammar]

ekaṃ cakraṃ dvādaśāraṃ rathasyāsyātitejasaḥ |
saptāśvāśca haridvarṇā vāme santi niyojitāḥ || 89 ||
[Analyze grammar]

agnikoṇe tataḥ sthāpyo bhṛguḥ śvetaḥ sitāmbaraḥ |
daṇḍaṃ kamaṇḍaluṃ bibhraddvibāhuḥ saumyadarśanaḥ || 90 ||
[Analyze grammar]

citravarṇāśvadaśake sthito hemamaye rathe |
dakṣiṇe ca nyasedbhaumaṃ raktaṃ raktāmbaraṃ tathā || 91 ||
[Analyze grammar]

caturbhujaṃ gadāśaktitriśūlavaradhāriṇam |
tasya haimaṃ rathaṃ kuryādaruṇāṣṭahayānvitam || 92 ||
[Analyze grammar]

rāhuśca nairṛte koṇe nīlavāsāścaturbhujaḥ |
karālāsyastamorūpaścarmāsiśaktiśūladhṛt || 93 ||
[Analyze grammar]

bhṛṅgavarṇāṣṭaturage sthitaḥ kāryastvayorathe |
sauriśca paścime sthāpya indranīlasamadyutiḥ || 94 ||
[Analyze grammar]

dhanvī triśūlī dvibhujo mandākṣaścāsitāmbaraḥ |
śabalāṣṭāśvasaṃyukte sthitaḥ kārṣṇāyase rathe || 95 ||
[Analyze grammar]

vāyukoṇe tataścandraṃ sthāpayecca sitāmbaram |
śvetavarṇaṃ gadāhastaṃ dvibhujaṃ ca rathe sthitam || 96 ||
[Analyze grammar]

śatāracakratritaye syandane tasya cāmmaye |
kundābhāḥ santyubhayato yojitāsturagā daśa || 97 ||
[Analyze grammar]

uttare dvibhujaḥ saumyo varābhayakaroruṇaḥ |
haridvāsāṣṭapiṃgāśve kāryo haimarathe sthitaḥ || 98 ||
[Analyze grammar]

īśāne ca guruḥ sthāpyo hemavarṇaḥ sitāmbaraḥ |
dvibhujaḥ padmanayano dhṛtadaṇḍakamaṇḍaluḥ |
pāṇḍurāṣṭahaye haime niṣaṇṇaḥ syandanottame || 99 ||
[Analyze grammar]

aṃgadevānbhagavataḥ sthāpayeditthamarcakaḥ |
karṇikādripurāntāntasthāneṣu kramaśo'khilān || 100 ||
[Analyze grammar]

vāsudevāṃgadevānāṃ nyasenmūrttīstu vaibhavī |
pūgaphalānītarastu nyasetpuṣpākṣatādi vā || 101 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye kriyāyoge pūjāmaṇḍalaracanāvidhinirūpaṇaṃ nāma saptaviṃśo'dhyāyaḥ || 27 ||
[Analyze grammar]