Chapter 7

[English text for this chapter is available]

brahmovāca |
māhātmyaṃ vada deveśa puṣpajātisamudbhavam |
yenayena ca puṣpeṇa yatphalaṃ labhate naraḥ || 1 ||
[Analyze grammar]

śrībhagavānuvāca |
śṛṇu putra pravakṣyāmi māhātmyaṃ puṣpasaṃbhavam |
yena puṣpeṇa me prītirbhavetsamyaṅna saṃśayaḥ || 2 ||
[Analyze grammar]

mallikā mālatī caiva yūthikā cātimuktakā |
pāṭalā karavīraṃ ca jayantī vijayā tathā || 3 ||
[Analyze grammar]

kubjakastabakaścaiva karṇikāraṃ kuraṃṭakaḥ |
caṃpakaścātakaḥ kundo bāṇaḥ karcūramallikā || 4 ||
[Analyze grammar]

aśokastilakaścaiva tathaivā'parayūthikaḥ |
amī puṣpaprakārāstu śastā me pūjane suta || 5 ||
[Analyze grammar]

ketakīpatrapuṣpaṃ ca bhṛṃgarājastathaiva ca |
tulasīpatrapuṣpaṃ ca sadyaḥ prītikaraṃ mama || 6 ||
[Analyze grammar]

padmānyaṃbusamutthāni raktanīlotpale tathā |
sitotpalaṃ sahomāse mamā'tyantaṃ hi vallabham || 7 ||
[Analyze grammar]

tānyeva ca praśastāni kusumāni ca me suta |
yāni syurvarṇayuktāni rasagandhayutāni ca || 8 ||
[Analyze grammar]

nirgaṃdhānyapi śastāni kusumāni matāni me |
surabhīṇi tathā'nyāni varjayitvā tu ketakīm || 9 ||
[Analyze grammar]

bāṇaṃ ca caṃpakā'śokaṃ karavīraṃ ca yūthikā |
pāribhadraṃ pāṭalā ca bakulaṃ giriśālinī || 10 ||
[Analyze grammar]

bilvapatraṃ śamīpatraṃ patraṃ bhṛṃgirajasya ca |
tamālāmalakīpatraṃ śastaṃ me pūjane suta || 11 ||
[Analyze grammar]

puṣpairaraṇyasaṃbhūtaiḥ patrairvā girisaṃbhavaiḥ |
aparyuṣitaniśchidraiḥ prokṣitairjaṃtuvarjitaiḥ || 12 ||
[Analyze grammar]

athārāmodbhavairvāpi puṣpaiḥ saṃpūjayecca mām |
puṣpajātiviśeṣeṇa bhavetpuṇyaṃ viśeṣataḥ || 13 ||
[Analyze grammar]

tapaḥśīlaguṇopete pātre vedasya pārage |
daśa dattvā suvarṇāni yatphalaṃ labhate naraḥ |
tatphalaṃ labhate martyaḥ sahe kusumadānataḥ || 14 ||
[Analyze grammar]

droṇapuṣpe tathaikasminmahyaṃ ca vinivedite |
daśa dattvā suvarṇāni phalaṃ tadadhikaṃ suta || 15 ||
[Analyze grammar]

puṣpātpuṣpāṃtare bhedo yathā'sīttannibodha me || 16 ||
[Analyze grammar]

droṇapuṣpasahasrebhyaḥ khādiraṃ tu viśiṣyate |
khādirātpuṣpasāhasrācchamīpuṣpaṃ viśiṣyate || 17 ||
[Analyze grammar]

śamīpuṣpasahasrebhyo bilvapuṣpaṃ viśiṣyate |
bilvapuṣpasahasrebhyo bakapuṣpaṃ viśiṣyate || 18 ||
[Analyze grammar]

bakapuṣpasahasrebhyo naṃdyāvartaṃ viśiṣyate |
naṃdyāvartasahasrāddhi karavīraṃ viśiṣyate || 19 ||
[Analyze grammar]

karavīrasahasrasya kusumaṃ śvetamuttamam |
karavīraśvetapuṣpātpālāśaṃ puṣpamuttamam || 20 ||
[Analyze grammar]

pālāśapuṣpasāhasrātkuśapuṣpaṃ viśiṣyate |
kuśapuṣpasahasrāddhi vanamālā viśiṣyate || 21 ||
[Analyze grammar]

vanamālā sahasrāddhi caṃpakaṃ ca viśiṣyate |
caṃpakasya puṣpaśatādaśokaṃ puṣpamuttamam || 22 ||
[Analyze grammar]

aśokapuṣpasāhasrācchevantīpuṣpamuttamam |
śevantīpuṣpasāhasrātkujakaṃ puṣpamuttamam || 23 ||
[Analyze grammar]

kujapuṣpasahasrāddhi mālatīpuṣpamuttamam |
mālatīpuṣpasāhasrātsandhyāpuṣpaṃ viśiṣyate || 24 ||
[Analyze grammar]

sandhyā puṣpasahasrāddhi trisaṃdhyāpuṣpamuttamam || 25 ||
[Analyze grammar]

trisaṃdhyāraktasāhasrāttrisaṃdhyāśvetamuttamam |
trisandhyāśvetasāhasrātkundapuṣpaṃ viśiṣyate || 26 ||
[Analyze grammar]

kundapuṣpasahasrāddhi jātīpuṣpaṃ viśiṣyate |
sarvāsāṃ puṣpajātīnāṃ jātīpuṣpamihottamam || 27 ||
[Analyze grammar]

jātīpuṣpasahasreṇa yacchenmālāṃ suśobhanām |
mahyaṃ yo vidhivaddadyāttasya puṇyaphalaṃ śṛṇu || 28 ||
[Analyze grammar]

kalpakoṭisahasrāṇi kalpakoṭiśatāni ca |
matpure vasate nityaṃ mamatulya parākramaḥ || 29 ||
[Analyze grammar]

yeṣāṃ saṃti ca puṣpāṇi praśastāni mamā'rcane |
teṣāṃ patrāṇi śastāni tadabhāve phalāni ca || 30 ||
[Analyze grammar]

etaiḥ patraiśca puṣpaiśca phalaiścā'pi tathāhi mām |
arcandaśasuvarṇasya pratyekaṃ phalamāpnuyāt || 31 ||
[Analyze grammar]

etābhiḥ puṣpajātībhiḥ sahomāse'rcayaṃti ye |
bhaktiṃ dadāmi teṣāṃ vai tuṣṭaḥ sannātra saṃśayaḥ || 32 ||
[Analyze grammar]

dhanaṃ putrāṃstathā dārānyatkiṃcidvāṃchate hi saḥ |
tattaddadāmi deveśa puṣpairebhiḥ pratoṣitaḥ || 33 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇusaṃvāde mārgaśīrṣamāhātmye jātīpuṣpaśraiṣṭhyakathanapūrvakaṃ viṣṇukaṇṭhe tatsahasrapuṣpāṃkitamālāsthāpanaphalayovarṇanaṃnāma saptamo'dhyāyaḥ || 7 ||
[Analyze grammar]