Chapter 6

[English text for this chapter is available]

brahmovāca |
ghaṇṭānādasya māhātmyaṃ caṃdanasya tathā'cyuta |
yatphalaṃ labhate svāmiṃstatsarvaṃ brūhi tattvataḥ || 1 ||
[Analyze grammar]

śrībhagavānuvāca |
snānārcanakriyākāle ghaṃṭānādaṃ karoti yaḥ |
purato mama deveśa tasya puṇyaphalaṃ śṛṇu || 2 ||
[Analyze grammar]

varṣakoṭisahasrāṇi varṣakoṭiśatāni ca |
vasate māmake loke apsarogaṇasevitaḥ || 3 ||
[Analyze grammar]

sarvavādyamayī ghaṇṭā sarvadevamayī yataḥ |
tasmātsarvaprayatnena ghaṇṭānādaṃ tu kārayet || 4 ||
[Analyze grammar]

sarvavādyamayī ghaṇṭā sarvadā mama vallabhā |
vādanāllabhate puṇyaṃ yajñakoṭiśatodbhavam || 5 ||
[Analyze grammar]

ghaṃṭānādaḥ sadā kāryaḥ pūjākāle viśeṣataḥ |
manvaṃtarasahasrāṇi manvataraśatāni ca || 6 ||
[Analyze grammar]

prīto bhavāmi satataṃ ghaṃṭānādena putraka |
bherīśaṃkhaninādena ghaṃṭānādānvitena ca || 7 ||
[Analyze grammar]

mṛdaṃgaśaṃkhena yutaṃ praṇavena samanvitam |
arcanaṃ mama deveśa satataṃ mokṣadaṃ nṛṇām || 8 ||
[Analyze grammar]

yatra tiṣṭheta purato ghaṃṭā nādānvitā mama |
arcitā vaiṣṇavairyatra tatra māṃ viddhi putraka || 9 ||
[Analyze grammar]

vainateyāṃ'kitā ghaṃṭā sudarśanayutā'thavā |
mamāgre sthāpayedyastu tasya pāpaṃ harāmyaham || 10 ||
[Analyze grammar]

madīyārcanavelāyāṃ ghaṃṭānādaṃ karoti yaḥ |
naśyaṃti tasya pāpāni śatajanmārjitānyapi || 11 ||
[Analyze grammar]

svāpakāle prakurvīta ghaṇṭānādaṃ svabhaktitaḥ |
mamaivārcanavelāyāṃ phalaṃ koṭiguṇodbhavam || 12 ||
[Analyze grammar]

ye māmarcaṃti deveśa suparṇoparisaṃsthitam |
śaṃkhapadmagadāyuktaṃ sacakraṃ ca śriyā yutam || 13 ||
[Analyze grammar]

kiṃ kariṣyaṃti te tīrthairdevatānāṃ ca darśanaiḥ |
kiṃ yajñaiḥ kiṃ vratairvāpi kiṃ dānaiḥ kimupoṣaṇaiḥ || 14 ||
[Analyze grammar]

mūrtirnārāyaṇī yaiśca māmakī garuḍopari |
sthāpitā te kalau yāṃti kalpakoṭiṃ padaṃ mama || 15 ||
[Analyze grammar]

mamā'gre sthāpayedyastu prāsāde'tha gṛhe'thavā |
tīrthakoṭisahasrāṇi tatra tiṣṭhaṃti devatāḥ || 16 ||
[Analyze grammar]

yastu pūjayate dhanyo garuḍoparisaṃsthitam |
ekādaśyāṃ tathā rātrau vāsanāsaṃyuto mama |
kṛtvā gītaṃ ca nṛtyaṃ ca tārayennarakātpitṝn || 17 ||
[Analyze grammar]

punaśca kathayiṣyāmi śṛṇu ghaṃṭāmahaṃ suta || 18 ||
[Analyze grammar]

mama nāmāṃkitā ghaṇṭā purato yā ca tiṣṭhati |
arcitā vaiṣṇavī yatra tatra māṃ viddhi putraka || 19 ||
[Analyze grammar]

yastu vādayate ghaṃṭāṃ vainateyavicihnitām |
dhūpe nīrājane snāne pūjākāle vilepane || 20 ||
[Analyze grammar]

mamāgre pratyahaṃ vatsa pratyekaṃ labhate phalam |
makhāyutaṃ go'yutaṃ ca cāṃdrāyaṇaśatodbhavam || 21 ||
[Analyze grammar]

vidhibāhyakṛtā pṛjā saphalā jāyate nṛṇām |
ghaṇṭānādena tuṣṭo'haṃ prayacchāmi svakaṃ padam || 22 ||
[Analyze grammar]

nāgā'ricihnitā ghaṃṭā rathāṃgena samanvitā |
vādanātkurute nāśaṃ janmakoṭibhayasya vai || 23 ||
[Analyze grammar]

garuḍenāṃ'kitāṃ ghaṃṭāṃ dṛṣṭvāhaṃ pratyahaṃ mudā |
prītiṃ karomi deveśa lakṣmīṃ prāpya yathā'dhanaḥ || 24 ||
[Analyze grammar]

ghaṃṭādaṇḍasya śirasi sucakraṃ sthāpayettu yaḥ |
matpriyaṃ vainateyaṃ vā sthāpitaṃ bhuvanatrayam || 25 ||
[Analyze grammar]

ghaṃṭānādaṃ sacakraṃ ca aṃtakāle śṛṇoti yaḥ |
pāpakoṭiyutasyā'pi naśyaṃti yamakiṃkarāḥ || 26 ||
[Analyze grammar]

sarvadoṣāḥ praṇaśyaṃti ghaṃṭānādena vai suta |
devatānāṃ sarudrāṇāṃ pitṝṇāmutsavo bhavet || 27 ||
[Analyze grammar]

abhāve vainateyasya cakrasyā'pi na saṃśayaḥ |
ghaṃṭānādena bhaktānāṃ prasādaṃ prakaromyaham || 28 ||
[Analyze grammar]

gṛhe yasminbhavennityaṃ ghaṇṭā nāgārisaṃyutā |
sarpāṇāṃ na bhayaṃ tatra nāgnividyutsamudbhavam || 29 ||
[Analyze grammar]

yasya ghaṃṭā gṛhe nāsti śaṃkho na purato mama |
kathaṃ bhāgavato jñeyaḥ kathaṃ bhavati vallabhaḥ || 30 ||
[Analyze grammar]

caṃdanasya pravakṣyāma māhātmyaṃ tava putraka |
yasminkṛte bhavetprītirmamātyaṃtaṃ na saṃśayaḥ || 31 ||
[Analyze grammar]

sacaṃdanaṃ sakusumaṃ karpūrāgarumiśritam |
mṛganābhisamāyuktaṃ jātīphalasamanvitam || 32 ||
[Analyze grammar]

tulasīcaṃdanopetaṃ mamātyaṃtasukhāvaham |
yo dadāti hi māṃ nityaṃ tulasīkāṣṭhasaṃbhavam || 33 ||
[Analyze grammar]

yugāni vasate svarge hyanaṃtāni narottamaḥ |
mahāviṣṇoḥ kalau bhaktyā dattvā tulasicaṃdanam || 34 ||
[Analyze grammar]

arcayenmālatīpuṣpairna bhūyaḥ stanapo bhavet |
tulasīkāṣṭhasaṃbhūtaṃ caṃdanaṃ yacchate mama || 35 ||
[Analyze grammar]

dahāmi pātakaṃ sarvaṃ pūrvajanmaśataiḥ kṛtam |
sarveṣāmeva devānāṃ tulasīkāṣṭhacaṃdanam || 36 ||
[Analyze grammar]

pitṝṇāṃ ca viśeṣeṇa sadā'bhīṣṭaṃ yathā mama || 37 ||
[Analyze grammar]

śrīkhaṃḍaṃ caṃdanaṃ tāvacchreṣṭhaṃ kṛṣṇāguruṃ tathā |
yāvanna dīyate mahyaṃ tulasīkāṣṭhacaṃdanam || 38 ||
[Analyze grammar]

tāvatkastūrikā'modaḥ karpūrasya sugaṃdhitā |
yāvanna dīyate mahyaṃ tulasīkāṣṭhacaṃdanam || 39 ||
[Analyze grammar]

kalau yacchaṃti ye mahyaṃ tulasīkāṣṭhacaṃdanam |
mārgaśīrṣaśubhemāse te kṛtārthā na saṃśayaḥ || 40 ||
[Analyze grammar]

yo hi bhāgavato bhūtvā kalau tulasicaṃdanam |
nārpayedvai sahomāse nā'sau bhāgavato naraḥ || 41 ||
[Analyze grammar]

kuṃkumāguruśrīkhaṇḍakardamairmama vigraham |
ālipedvai sahomāse kalpakoṭiṃ vaseddivi || 42 ||
[Analyze grammar]

karpūrāgurumiśreṇa caṃdanenā'nuliṃpayet |
mṛgadarpaṃ viśeṣeṇa abhīṣṭaṃ ca sadā mama || 43 ||
[Analyze grammar]

vilepayati yo māṃ vai śaṃkhe kṛtvā tu caṃdanam |
mārgaśīrṣe tadā prītiṃ karomi śatavārṣikīm || 44 ||
[Analyze grammar]

sevate tulasīpatrairnityamāmalakaiśca yaḥ |
mārgaśīrṣe sadā bhaktyā sa labhedvāṃchitaṃ phalam || 45 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇusaṃvāde mārgaśīrṣamāhātmye bhagavate tulasīkāṣṭhacaṃdanārpaṇaphalakathanaṃnāma ṣaṣṭho'dhyāyaḥ || 6 ||
[Analyze grammar]