Chapter 8

[English text for this chapter is available]

brahmovāca |
śrīmattulasimāhātmyaṃ yathāvadvarṇaya prabho |
yasyāḥ sannidhimātreṇa prītirbhavati te'dhikā || 1 ||
[Analyze grammar]

śrībhagavānuvāca |
maṇikāṃcanapuṣpāṇi tathā muktāmayāni ca |
tulasīpatradānasya kalāṃ nārhaṃti ṣoḍaśīm || 2 ||
[Analyze grammar]

tulasīmaṃjarībhiryaḥ kuryādvai mama pūjanam |
na sa garbhagṛhaṃ yāyānmuktibhāgī bhavennaraḥ || 3 ||
[Analyze grammar]

āropya tulasīṃ vatsa pūjayettaddalaiśca mām |
divi saṃmodamānaḥ sa śvetadvīpe ca me gṛhe || 4 ||
[Analyze grammar]

śrīmattulasyārcayate sakṛddhi māṃ patraiḥ sugandhairvimalairakhaṃḍitaiḥ |
yastasya pāpaṃ paṭasaṃsthitaṃ tadā nirīkṣayitvā parimārjayedyamaḥ || 5 ||
[Analyze grammar]

tulasī na yeṣāṃ mama pūjanārthaṃ saṃpāditaikādaśipuṇyavāsare |
dhigyauvanaṃ jīvitamarthasantatisteṣāṃ sukhaṃ neha ca dṛśyate pare || 6 ||
[Analyze grammar]

liṃgamabhyarcitaṃ dṛṣṭvā sahomāse ca māmakam |
tulasīpatranikarairmucyate brahmahatyayā || 7 ||
[Analyze grammar]

nityamabhyarcayedyo vai tulasyā māṃ rameśvaram |
mahāpāpāni naśyaṃti kiṃ punaścopapātakam || 8 ||
[Analyze grammar]

varjyaṃ paryuṣitaṃ puṣpaṃ varjyaṃ paryuṣitaṃ jalam |
na varjyaṃ tulasīpatraṃ na varjyaṃ jāhnavījalam || 9 ||
[Analyze grammar]

tāvadgarjaṃti puṣpāṇi mālatyādīni bhoḥ suta |
yāvanna prāpyate puṇyā tulasī mama vallabhā || 10 ||
[Analyze grammar]

sakṛdabhyarcayedyo māṃ bilvapatreṇa mānavaḥ |
muktibhāgī nirātaṃko mama pārśvagato bhavet || 11 ||
[Analyze grammar]

bilvapatrācchamīpatrājjātīpatrātsaroruhāt |
vallabhaṃ tulasīpatraṃ kaustubhādadhikaṃ mama || 12 ||
[Analyze grammar]

abhinnapatrā tulasī hṛdyā maṃjarisaṃyutā |
kṣīrodārṇavasaṃbhūtā padmeveyaṃ sadā mama || 13 ||
[Analyze grammar]

akṛṣṇā'pyathavā kṛṣṇā tulasī mama vallabhā |
sitā vā'pyasitā vāpi dvādaśī vallabhā yathā || 14 ||
[Analyze grammar]

gṛhītvā tulasīpatraṃ bhaktyā yo māṃ samarcayet |
arcitaṃ tena sakalaṃ sadevāsuramānuṣam || 15 ||
[Analyze grammar]

tāvadgarjaṃti ratnāni kaustubhādīnyanantaśaḥ |
yāvanna prāpyate kṛṣṇa tulasīkṛṣṇamaṃjarī || 16 ||
[Analyze grammar]

kṛṣṇaṃ kṛṣṇatulasyā hi yo bhaktyā pūjayennaraḥ |
sa yāti bhuvanaṃ śubhraṃ yatra viṣṇuḥ śriyā saha || 17 ||
[Analyze grammar]

mamā'rcanārthaṃ bhikṣūṇāṃ yacchaṃti tulasīdalam |
anyeṣāmapi bhaktānāṃ yāṃti te padamavyayam || 18 ||
[Analyze grammar]

tulasī kṛṣṇagaurā yā tayā yo māṃ samarcayet |
naro yāti tanuṃ tyaktvā vaiṣṇavīṃ śāśvatīṃ gatim || 19 ||
[Analyze grammar]

brahmovāca |
dhūpadānasya māhātmyaṃ dīpasyā'pi ca keśava |
yatphalaṃ labhate martyastanme brūhi yathārthataḥ || 20 ||
[Analyze grammar]

śrībhagavānuvāca |
śṛṇu putra pravakṣyāmi dhūpadānasya yatphalam |
dīpadānasya māhātmyaṃ mama prītikaraṃ param || 21 ||
[Analyze grammar]

aguruṃ ca sakarpūraṃ divyacaṃdanasaurabham |
dattvā māṃ vai sahomāse kulānāṃ tārayecchatam || 22 ||
[Analyze grammar]

kṛṣṇāgurusamutthena dhūpena ca mamā'layam |
dhūpayedvaiṣṇavo yastu sa mukto narakā'rṇavāt || 23 ||
[Analyze grammar]

māhiṣaṃ guggulaṃ yastu ājyayuktaṃ saśarkaram |
dhūpaṃ dadāti yo vai māṃ tasyecchāṃ pradadāmyaham || 24 ||
[Analyze grammar]

guggulo haṃtyaśeṣāṇi ariṣṭāni ca dhūpitaḥ |
kāmānnānāvidhāṃścaiva aguruḥ saṃprayacchati || 25 ||
[Analyze grammar]

dehaṃ gehaṃ punātyeva dhūpastvagurusaṃbhavaḥ |
nāśayedyakṣarakṣāṃsi dhūpaḥ sarjarasodbhavaḥ || 26 ||
[Analyze grammar]

jātipuṣpamathailā ca guggulaśca harītakī |
kūṭaḥ sarjarasaścaiva guḍaḥsailācchaḍastathā |
nakhayuktāni caitāni daśāṃgo dhūpa ucyate || 27 ||
[Analyze grammar]

dhūpaṃ daśāṃgaṃ yadi cetkaroti māse sahe me ativallabhe ca |
dadāmi kāmānatidurlabhānapi balaṃ ca puṣṭiṃ sutadārabhaktim || 28 ||
[Analyze grammar]

mustādhūpe mānuṣāṇāṃ priyatvaṃ māṃgalyakaṃ vaśyakaraṃ guḍasya |
kuryātsahomāsi mamāgrato yo vihāya pāpāni sa māṃ samāpnuyāt || 29 ||
[Analyze grammar]

na bhayaṃ vidyate tasya divyabhaumāṃtarikṣajam |
mama dhūpāvaśeṣeṇa yasyāṃ'gaṃ parimārjitam || 30 ||
[Analyze grammar]

na cāpadvidyate tasya bhavaṃti saṃpado'khilāḥ |
dhūpe kṛte sahomāse mamāgre śraddhayā'niśam || 31 ||
[Analyze grammar]

dhūpaḥ surūpatāṃ dhatte dhūpaḥ pāvanamuttamam |
vanaspatiraso divyaḥ paramaḥ pāvanaḥ śuciḥ || 32 ||
[Analyze grammar]

ataḥ paraṃ pravakṣyāmi dīpamāhātmyamuttamam |
yasminkṛte naro yāti vaikuṇṭhaṃ nātra saṃśayaḥ || 33 ||
[Analyze grammar]

bahuvartisamāyuktaṃ ghṛtapūrasamanvitam |
kuryādārārtikaṃ yo vai kalpakoṭiṃ divaṃ vaset || 34 ||
[Analyze grammar]

nīrājanaṃ tu yaḥ paśyetsahomāse mamā'grataḥ |
saptajanma bhavedvipro hyaṃte ca paramaṃ padam || 35 ||
[Analyze grammar]

karpūreṇa tu yaḥ kuryādbhaktyā caiva mamāgrataḥ |
ārārtikaṃ dvijaśreṣṭha praviśenmāmanaṃtakam || 36 ||
[Analyze grammar]

mantrahīnaṃ kriyāhīnaṃ yatkṛtaṃ pūjanaṃ mama |
sarvaṃ saṃpūrṇatāmeti kṛte nīrājane suta || 37 ||
[Analyze grammar]

yaḥ karoti sahomāse karpūreṇa ca dīpakam |
aśvamedhamavāpnoti kulaṃ caiva samuddharet || 38 ||
[Analyze grammar]

mamā'gre vai dvijānāṃ ca dīpaṃ dadyāccatuṣpathe |
medhāvī jñānasaṃpannaścakṣuṣmāñjāyate naraḥ || 39 ||
[Analyze grammar]

ghṛtena vā'tha tailena dīpaṃ prajvālayennaraḥ |
sahomāse mamā'gre ca tasya puṇyaphalaṃ śṛṇu || 40 ||
[Analyze grammar]

vihāya sakalaṃ pāpaṃ sahasrādityasannibhaḥ |
jyotiṣmatā vimānena mama loke mahīyate || 41 ||
[Analyze grammar]

tasmātsarvaprayatnena dīpaṃ dadyādvicakṣaṇaḥ |
taṃ ca dattvā vihiṃsedyaḥ sa patennarake dhuvam || 42 ||
[Analyze grammar]

dīpaṃ yo vai haretpāpī lobhāddveṣāddvijottama |
taddīpaharaṇātso'pi mūkoṃ'dhaśca prajāyate || 43 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇusaṃvāde mārgaśīrṣamāhātmye dīpamāhātmyavarṇanaṃnāma aṣṭamo'dhyāyaḥ || 8 ||
[Analyze grammar]