Chapter 35

[English text for this chapter is available]

brahmovāca |
vaikuṇṭhākhyacaturdaśyā māhātmyaṃ te vadāmyaham |
vālakhilyaiḥ purā proktaṃ saṃkṣepeṇa śṛṇuṣva tat || 1 ||
[Analyze grammar]

vālakhilyā ūcuḥ |
kārtikasya site pakṣe caturdaśyāṃ samāgamat |
vaikuṇṭheśastu vaikuṇṭhādvārāṇasyāṃ kṛte yuge || 2 ||
[Analyze grammar]

rātryāṃ turyāṃśaśeṣāyāṃ snātvā'sau maṇikarṇike |
gṛhītvā hemapadmānāṃ sahasraṃ vai tato'vrajat || 3 ||
[Analyze grammar]

atibhaktyā pūjayituṃ śivayā sahitaṃ śivam |
vidhāya pūjāṃ vaiśveśīṃ tataḥ padmairapūjayat || 4 ||
[Analyze grammar]

sahasrasaṃkhyāṃ kṛtvādāvekanāmnā tataḥ param |
ārabdhaṃ pūjanaṃ tena śivastadbhaktimaikṣata || 5 ||
[Analyze grammar]

ekaṃ padmaṃ padmamadhyānnilīyā'ttaṃ hareṇa tu |
tataḥ pūjitavānviṣṇurekonaṃ kamalaṃ tvabhūt || 6 ||
[Analyze grammar]

itastatastena dṛṣṭaṃ padmaṃ tiṣṭhati na kvacit |
kamaleṣu bhramo jāto'thavā nāmasu me bhramaḥ || 7 ||
[Analyze grammar]

kṣaṇaṃ vicārya sa harirna me nāmabhramo'bhavat |
padme caiva bhramo jāto vicāryaivaṃ punaḥpunaḥ || 8 ||
[Analyze grammar]

sahasrapadmasaṃkalpaḥ pūjārthaṃ tu kṛto mayā |
arcyaḥ kathaṃ mahādeva ekonakamalairmayā || 9 ||
[Analyze grammar]

yadyānetuṃ gamiṣyāmi bhaṃgaḥ syādāsanasya tu |
ataḥ paraṃ kiṃ vidheyaṃ cintodvigno haristadā || 10 ||
[Analyze grammar]

ekaḥ prakāra utpanno hṛdaye'sya munīśvarāḥ |
puṇḍarīkākṣa ityevaṃ māṃ vadaṃti munīśvarāḥ || 11 ||
[Analyze grammar]

netraṃ me padmasadṛśe padmārthe tvarpayāmyaham |
iti niścitya manasā dattvā tarjanikāṃ sa tu || 12 ||
[Analyze grammar]

netramadhyāttadutpāṭya mahādevastu pūjitaḥ |
tato maheśvarastuṣṭo vākyametaduvāca ha || 13 ||
[Analyze grammar]

mahādeva uvāca |
tvatsamo nāsti madbhaktastrailokye sacarācare |
rājyaṃ dattaṃ trilokyāste bhava tvaṃ lokapālakaḥ || 14 ||
[Analyze grammar]

anyaṃ varaya bhadraṃ te varaṃ yanmanasepsitam |
avaśyameva dāsyāmi nātra kāryā vicāraṇā || 15 ||
[Analyze grammar]

madbhaktiṃ tu samālaṃbya ye dviṣaṃti janārdanam |
te maddveṣyā narā viṣṇo vrajeyurnarakaṃ dhruvam || 16 ||
[Analyze grammar]

viṣṇuruvāca |
trailokyarakṣākaraṇaṃ mamādiṣṭaṃ maheśvara |
dumardāśca mahāsattvā daityā māryāḥ kathaṃ mayā || 17 ||
[Analyze grammar]

śiva uvāca |
etatsudarśanaṃ cakraṃ mahādaityanikṛṃtanam |
gṛhāṇa bhagavanviṣṇo mayā tubhya niveditam || 18 ||
[Analyze grammar]

anena sarvadaityānāṃ bhagavankadanaṃ kuru |
evaṃ cakraṃ harerdattvā tato vacanamabravīt || 19 ||
[Analyze grammar]

śiva uvāca |
varṣe ca hemalaṃbākhye māse śrīmati kārtike |
śuklapakṣe caturdaśyāmaruṇābhyudayaṃ prati || 20 ||
[Analyze grammar]

mahādevatithau brāhme muhūrte maṇikarṇike |
snātvā vaiśveśvaraṃ liṃgaṃ vaikuṇṭhādetya pūjitam || 21 ||
[Analyze grammar]

sahasrakamalaistasmādbhaviṣyati mama priyā |
vikhyātā sarvalokeṣu vaikuṇṭhākhyā caturdaśī || 22 ||
[Analyze grammar]

anyaṃ varaṃ prayacchāmi śṛṇu viṣṇo vaco mama |
pūrvarātreṣu te pūjā kartavyā sarvajātibhiḥ || 23 ||
[Analyze grammar]

upavāsaṃ divā kuryātsāyaṃkāle tavārcanam |
paścānmamārcanaṃ kāryamanyathā niṣphalaṃ bhavet || 24 ||
[Analyze grammar]

grāhyā tu haripūjāyāṃ rātrivyāptā caturdaśī |
aruṇodayavelāyāṃ śivapūjāṃ samācaret || 25 ||
[Analyze grammar]

sahasrakamalairviṣṇurādau yaiḥ pūjito naraiḥ |
paścācchivaḥ pūjitaścejjīvanmuktāsta eva hi || 26 ||
[Analyze grammar]

sāyaṃ snātvā paṃcanade biṃdumādhavamarcayet |
snātvā yo viṣṇukāṃcyāṃ vā'naṃtasenaṃ samarcayet || 27 ||
[Analyze grammar]

rudrakāṃcyāṃ tataḥ snātvā praṇaveśaṃ samarcayet |
ādau snātvā vahnitīrthe yajennārāyaṇaṃ tataḥ || 28 ||
[Analyze grammar]

retodake tataḥ snātvā kedāreśaṃ samarcayet |
ādau snātvā sūryaputryāṃ veṇīmādhavamarcayet || 29 ||
[Analyze grammar]

jāhnavyāṃ ca tataḥ snātvā saṃgameśaṃ prapūjayet |
sarvāḥ śriyastasya vaśyāḥ satyaṃ viṣṇo mayoditam || 30 ||
[Analyze grammar]

evaṃ tasmai varāndattvā hyaṃtardhānaṃ yayau śivaḥ |
tasmātsarvaprayatnena pūjyau hariharāvubhau || 31 ||
[Analyze grammar]

kalau daśasahasrāṇi viṣṇustyajati medinīm |
tadarddhaṃ jāhnavītoyaṃ tadarddhaṃ grāmadevatāḥ || 32 ||
[Analyze grammar]

kārtikyāṃ pūrṇimāyāṃ tu kuryāttraipuramutsavam |
dīpo deyo'vaśyameva sāyaṃkāle śivālaye || 33 ||
[Analyze grammar]

tripuro nāma daityeṃdraḥ prayāge tapa āsthitaḥ |
tapasā tasya saṃtuṣṭo dadau brahmā varaṃ param || 34 ||
[Analyze grammar]

devāsuramanuṣyebhyo na te mṛtyurbhaviṣyati |
iti labdhavaro daityo viśvakarmavinirmitam || 35 ||
[Analyze grammar]

tripurākhyaṃ vimānaṃ tamāruhya bhuvanatrayam |
yadā vai pīḍayāmāsa tadā devaiḥ stuto haraḥ || 36 ||
[Analyze grammar]

tripuraṃ ghātayāmāsa bāṇenaikena śatruhā |
kārtikyāṃ pūrṇimāyāṃ tu sarve devāḥ pratuṣṭuvuḥ || 37 ||
[Analyze grammar]

tasmindine sarvadevairdīpā dattā harāya ca |
sarvathaiva pradeyāśca dīpāstu haratuṣṭaye || 38 ||
[Analyze grammar]

viṃśatiḥ saptaśatakāḥ sahitā dīpavartayaḥ |
dadaddīpaṃ pūrṇimāyāṃ sarvapāpaiḥ pramucyate || 39 ||
[Analyze grammar]

paurṇamāsyāṃ tu saṃdhyāyāṃ kartavyastripurotsavaḥ |
dadyādanena mantreṇa pradīpāṃśca surālaye || 40 ||
[Analyze grammar]

kīṭāḥ pataṃgā maśakāśca vṛkṣā jale sthale ye vicaraṃti jīvāḥ |
dṛṣṭvā pradīpaṃ na ca janmabhāgino bhavaṃtu nityaṃ śvapacā hi viprāḥ || 41 ||
[Analyze grammar]

kāryastasmātpaurṇamāsyāṃ tripurāya mahotsavaḥ |
kārtikyāṃ kṛttikāyoge yaḥ kuryātsvāmidarśanam || 42 ||
[Analyze grammar]

sapta janma bhavedvipro dhanāḍhyo vedapāragaḥ |
atra kṛtvā vṛṣotsargaṃ naktācchaivapuraṃ vrajet || 43 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye vaikuṇṭhacaturdaśī tripurīpūrṇimāvratavidhānakathanaṃnāma paṃcatriṃśo'dhyāyaḥ || 35 ||
[Analyze grammar]