Chapter 36

[English text for this chapter is available]

brahmovāca |
yāstisrastithayaḥ puṇyā aṃtike śuklapakṣake |
kārtike māsi vipreṃdra pūrṇimāṃtāḥ śubhavahāḥ || 1 ||
[Analyze grammar]

aṃtipuṣkariṇī saṃjñā sarvapāpakṣayāvahā |
kārttike māsi saṃpūrṇaṃ yo vai snānaṃ karoti ha || 2 ||
[Analyze grammar]

tithiṣvetāsu saḥ snānātpūrṇameva phalaṃ labhet |
sarve vedāstrayodaśyāṃ gatvā jantūnpunaṃti hi || 3 ||
[Analyze grammar]

caturdaśyāṃ sayajñāśca devā jaṃtūnpunaṃti hi |
pūrṇimāyāṃ sutīrthāni viṣṇunā saṃsthitāni hi || 4 ||
[Analyze grammar]

brahmaghnānvā surāpānvā sarvāñjaṃtūnpunaṃti hi |
uṣṇodakena yaḥ snāyātkārttikyādidinatraye || 5 ||
[Analyze grammar]

rauravaṃ narakaṃ yāti yāvadiṃdrāścaturdaśa |
āmāsaniyamāśaktaḥ kuryādetaddinatraye || 6 ||
[Analyze grammar]

tena pūrṇaphalaṃ prāpya modate viṣṇumaṃdire |
yo vai devānpitṝnviṣṇuṃ gurumuddiśya mānavaḥ || 7 ||
[Analyze grammar]

na snānādi karotyaddhā sa yāti narakaṃ dhruvam |
kuṭuṃbabhojana yastu gṛhasthastu dinatraye || 8 ||
[Analyze grammar]

sarvānpitṝnsamuddhṛtya sa yāti paramaṃ padam |
gītāpāṭhaṃ tu yaḥ kuryādaṃtime ca dinatraye || 9 ||
[Analyze grammar]

dinedine'śvamedhānāṃ phalameti na saṃśayaḥ |
sahasranāmapaṭhanaṃ yaḥ kuryāttu dinatraye || 10 ||
[Analyze grammar]

na pāpairlipyate kvā'pi padmapatramivāṃ'bhasā |
devatvaṃ manujaiḥ kaiścitkaiścitsiddhatvameva ca || 11 ||
[Analyze grammar]

tasya puṇyaphalaṃ vaktuṃ kaḥ śakto divi vā bhuvi |
yo vai bhāgavataṃ śāstraṃ śṛṇoti ca dinatrayam || 12 ||
[Analyze grammar]

kaiścitprāpto brahmabhāvo dinatrayaniṣevaṇāt |
brahmajñānena vā muktiḥ prayāgamaraṇena vā || 13 ||
[Analyze grammar]

atha vā kārttike māsi dinatrayaniṣevaṇāt |
kārttike haripūjāṃ tu yaḥ karoti dinatraye || 14 ||
[Analyze grammar]

na tasya punarāvṛttiḥ kalpakoṭiśatairapi |
kārttike māsi vipreṃdra sarvamaṃtyadinatraye || 15 ||
[Analyze grammar]

puṇyaṃ tatrā'pi vaiśeṣyaṃ rākāyāṃ vartate'nagha |
prātaḥkāle samutthāya śaucaṃ snānādikaṃ caret || 16 ||
[Analyze grammar]

samāpya sarvakarmāṇi viṣṇupūjāṃ samācaret |
udyāne vā gṛhe vā'pi kārttikyāṃ viṣṇutatparaḥ || 17 ||
[Analyze grammar]

maṃḍapaṃ tatra kurvīta kadalīstaṃbhamaṃḍitam |
cūtapallavasaṃvītamikṣudaṃḍaiḥ sumaṃḍitam || 18 ||
[Analyze grammar]

citravastraiḥ svalaṃkṛtya tatra devaṃ prapūjayet |
cūtapallavapuṣpāḍhyaiḥ phalādyaiḥ pūjayeddharim || 19 ||
[Analyze grammar]

śṛṇuyādūrjamāhātmyaṃ niyamena śuciḥ pumān |
saṃpūrṇamatha vā'dhyāyamekaślokamathā'pi vā || 20 ||
[Analyze grammar]

muhūrtaṃ vā'pi śṛṇuyātkathāṃ puṇyāṃ dinedine |
yadi pratidinaṃ śrotumaśaktaḥ syāttu mānavaḥ || 21 ||
[Analyze grammar]

puṇyamāse'thavā puṇyatithau saṃśṛṇuyādapi |
tena puṇyaprabhāvena pāpānmukto bhavennaraḥ || 22 ||
[Analyze grammar]

purāṇajñaḥ śucirdakṣaḥ śāṃto vigatamatsaraḥ |
sādhuḥ kāruṇiko vāggmī vadetpuṇyāṃ kathāṃ sudhīḥ || 23 ||
[Analyze grammar]

vyāsāsanaṃ samārūḍho yadā paurāṇiko bhavet |
āsamāpteḥ prasaṃgasya namaskuryānna kasyacit || 24 ||
[Analyze grammar]

na durjanasamākīrṇe na śūdraśvāpadāvṛte |
deśe na dyūtasadane vadetpuṇyakathāṃ sudhīḥ || 25 ||
[Analyze grammar]

śraddhābhaktisamāyuktā nā'nyakāryeṣu lālasā |
vāgyatāḥ śucayo dakṣāḥ śrotāraḥ puṇyabhāginaḥ || 26 ||
[Analyze grammar]

abhaktā ye kathāṃ puṇyāṃ śṛṇvaṃti manujā'dhamāḥ |
teṣāṃ puṇyaphalaṃ nā'sti duḥkhaṃ syājanmajanmani || 27 ||
[Analyze grammar]

paurāṇikaṃ ca māsāṃte pūjayedbhaktitatparaḥ |
gandhamālyaistathā vastrairalaṃkārairdhanena ca || 28 ||
[Analyze grammar]

śṛṇvaṃti ca kathāṃ bhaktyā na daridrā na pāpinaḥ || 29 ||
[Analyze grammar]

kathāyāṃ kīrtyamānāyāṃ ye gacchaṃtyanyato narāḥ |
bhogāṃtare praṇaśyaṃti teṣāṃ dārāśca saṃpadaḥ || 30 ||
[Analyze grammar]

uccāsanasamārūḍho na naraḥ praṇato bhavet |
viṣavṛkṣastathā svāpe vane cā'jagaro bhavet || 31 ||
[Analyze grammar]

kathāyāṃ kīrtyamānāyāṃ vighnaṃ kurvaṃti ye narāḥ |
koṭyabdanarakānbhuktvā bhavaṃti grāmasūkarāḥ || 32 ||
[Analyze grammar]

ye śrāvayaṃti manujāḥ kathāṃ paurāṇikīṃ śubhām |
kalpakoṭiśataṃ sāgraṃ tiṣṭhaṃti brahmaṇaḥ pade || 33 ||
[Analyze grammar]

āsanārthe prayacchati purāṇajñasya ye narāḥ |
kambalājinavāsāṃsi maṃcaṃ phalakameva vā || 34 ||
[Analyze grammar]

paridhānīyavastrāṇi prayacchaṃti ca ye narāḥ |
bhūṣaṇādi prayacchaṃti vaseyurbrahmasadmani || 35 ||
[Analyze grammar]

vācake parituṣṭe tu tuṣṭāḥ syuḥ sarvadevatāḥ |
ataḥ saṃtoṣayedbhaktyā bhaktiśraddhānvitaḥ pumān |
tasya puṇyaphalaṃ pūrṇaṃ bhavatyeva na saṃśayaḥ || 36 ||
[Analyze grammar]

yatphalaṃ sarvayajñeṣu sarvadāneṣu yatphalam |
sakṛtpurāṇaśravaṇāttatphalaṃ viṃdate naraḥ || 37 ||
[Analyze grammar]

kalau yuge viśeṣeṇa purāṇaśravaṇādṛte |
nāsti dharmaḥ paraḥ puṃsāṃ nāsti muktipathaḥ paraḥ |
purāṇaśravaṇādviṣṇornāsti saṃkīrtanātparam || 38 ||
[Analyze grammar]

ya etadūrjamāhātmyaṃ śṛṇuyācchrāvayedapi |
sa tīrtharāja badarīgamanasya phalaṃ labhet || 39 ||
[Analyze grammar]

sarvarogāpahaṃ sarvapāpanāśakaraṃ śubham || 40 ||
[Analyze grammar]

śrutvā caikapade yo vai agamyāgamane rataḥ |
kanyāsvasrorvikrayiṇamubhayaṃ tu vimocayet || 41 ||
[Analyze grammar]

māhātmyametadākarṇya pūjayedyastu pāṭhakam |
gobhūhiraṇyavastraiśca viṣṇutulyo yato hi saḥ || 42 ||
[Analyze grammar]

dharmaśāstraṃ purāṇaṃ ca vedavidyādikaṃ ca yat |
pustakaṃ vācakāyaiva dātavyaṃ dharmamicchatā |
purāṇavidyādātāro hyanaṃtaphalabhoginaḥ || 43 ||
[Analyze grammar]

idaṃ yaḥ paṭhate bhaktyā śrutvā caivā'vadhārayet |
mucyate sarvapāpebhyo viṣṇulokaṃ sa gacchati || 44 ||
[Analyze grammar]

na kasyā'pīdamākhyeyaṃ śraddhāhīnāya durmateḥ || 45 ||
[Analyze grammar]

apūjayitvā gurumagrabuddhyā dharmapravaktāramananyabuddhiḥ |
bhuktvā tu bhogānnarakeṣu caiva tato hi janmāntara duḥkhabhogī || 46 ||
[Analyze grammar]

tasmātsaṃpūjayedbhaktyā guruṃ tattvāvabodhakam |
māhātmyasya ca leśo'yaṃ tava cokto mayā'nagha || 47 ||
[Analyze grammar]

na śakyate hi saṃpūrṇaṃ vaktuṃ varṣaśatairapi |
purā kailāsaśikhare pārvatyai proktavāñcchivaḥ || 48 ||
[Analyze grammar]

kārtikasya tu māhātmyaṃ yāvadvarṣaśataṃ vadan |
tathāpi nāṃtamagamadaśakto virarāma ha || 49 ||
[Analyze grammar]

putrārthī ca dhanārthī ca rājyārthī svaphalaṃ labhet |
kimatra bahunoktena mokṣārthī mokṣamāpnuyāt || 50 ||
[Analyze grammar]

sūta uvāca |
ityukto brahmaṇā caiva nāradaḥ premanirbharaḥ |
bhūyobhūyo namaskṛtya yayau yādṛcchiko muniḥ || 51 ||
[Analyze grammar]

kathitaṃ śaṃkareṇā'pi putrāya hitakāmyayā |
pitustadvākyamākarṇya ṣaṇmukho harṣanirbharaḥ || 52 ||
[Analyze grammar]

kṛṣṇena satyabhāmāyai kārtikasya ca vaibhavaḥ |
kathitastena saṃtuṣṭā satyā vratamathā'karot || 53 ||
[Analyze grammar]

ṛṣayo vālakhilyebhyaḥ śrutvā māhātmyamuttamam |
ūrjavrataparā jātāstasmādūrjo'tivallabhaḥ || 54 ||
[Analyze grammar]

adhītya sarvaśāstrāṇi payaḥsāramivoddhṛtam |
nā'nena sadṛśaṃ śāstraṃ viṣṇuprītikaraṃ śubham || 55 ||
[Analyze grammar]

vyāsa uvāca |
ityuktvā tānṛṣīnsarvānsūto vai dharmavittamaḥ |
virarāma tataste tu pūjāṃ cakrustadāsya ca || 56 ||
[Analyze grammar]

te punaḥ svāśramaṃ gatvā hṛṣṭāste paramarṣayaḥ |
yathā sūtenopadiṣṭaṃ tathā cakrurvrataṃ śubham || 57 ||
[Analyze grammar]

anena vidhinā ye vai kurvaṃti kārtikavratam |
te sarvapāpanirmuktā gacchaṃti viṣṇumaṃdiram || 58 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye puṣkariṇīsaṃjñikāṃtimatithitrayamāhātmyakathanapūrvakapurāṇa śravaṇamahimavarṇanaṃnāma ṣaṭtriṃśo'dhyāyaḥ || 36 ||
[Analyze grammar]