Chapter 19

[English text for this chapter is available]

nārada uvāca |
te gaṇādhipatīndṛṣṭvā naṃdībhamukhaṣaṇmukhān |
amarṣādabhyadhāvaṃta dvaṃdvayuddhāya dānavāḥ || 1 ||
[Analyze grammar]

naṃdinaṃ kālanemiśca śumbho laṃbodaraṃ tathā |
niśumbhaḥ ṣaṇmukhaṃ vegādabhyadhāvata daṃśitaḥ || 2 ||
[Analyze grammar]

niśumbhaḥ kārtikeyasya mayūraṃ paṃcabhiḥ śaraiḥ |
hṛdi vivyādha vegena mūrcchitaḥ sa papāta ca || 3 ||
[Analyze grammar]

tataḥ śaktidharaḥ śaktiṃ yāvajjagrāha roṣitaḥ |
tāvanniśuṃbho vegena svaśaktyā tamapātayat || 4 ||
[Analyze grammar]

naṃdīśvaraḥ śaravrātaiḥ kālanemimavadhyata |
saptabhiśca hayānketuṃ tribhiḥ sārathimacchinat || 5 ||
[Analyze grammar]

kālanemistu saṃkruddho dhanuściccheda naṃdinaḥ |
tadapāsya sa śūlena taṃ vakṣasyahanadbalī || 6 ||
[Analyze grammar]

sa śūlabhinnahṛdayo hatāśvo hatasārathiḥ |
adreḥ śikharamāmucya śailādiṃ so'pyapātayat || 7 ||
[Analyze grammar]

atha śumbho gaṇeśaśca rathamūṣakavāhanau |
yudhyamānau śaravrātaiḥ parasparamavidhyatām || 8 ||
[Analyze grammar]

gaṇeśastu tadā śumbhaṃ hṛdi vivyādha patriṇā |
sārathiṃ ca tribhirbāṇaiḥ pātayāmāsa bhūtale || 9 ||
[Analyze grammar]

tato'tikruddhaḥ śumbho'pi bāṇaṣaṣṭyā gaṇādhipam |
mūṣakaṃ ca tribhirviddhvā nanāda jaladasvanaḥ || 10 ||
[Analyze grammar]

mūṣakaḥ śarabhinnāṃgaścacāla dṛḍhavedanaḥ |
laṃbodaraśca patitaḥ padātirabhavannṛpa || 11 ||
[Analyze grammar]

tato laṃbodaraḥ śumbhaṃ hatvā paraśunā hṛdi |
apātayattadā bhūmau mūṣakaṃ cāruhatpunaḥ || 12 ||
[Analyze grammar]

kālanemirniśuṃbhaścā'pyubhau laṃbodaraṃ śaraiḥ |
yugapajjaghnatuḥ krodhāttotrairiva mahādvipam || 13 ||
[Analyze grammar]

taṃ pīḍayamānamālokya vīrabhadro mahābalaḥ |
abhyadhāvata vegena bhūtakoṭiyutastadā || 14 ||
[Analyze grammar]

kūṣmāṃḍabhairavāścā'pi vetālā yoginīgaṇāḥ |
piśācayoginīsaṃghā gaṇāścā'pi tamanvayuḥ || 15 ||
[Analyze grammar]

tataḥ kilakilāśabdaiḥ siṃhanādaiḥ sughargharaiḥ |
bherītālamṛdaṃgaiśca pṛthivī samakaṃpata || 16 ||
[Analyze grammar]

tato bhūtānyadhāvaṃta bhakṣayaṃtisma dānavān |
utpataṃtyāpataṃti sma nanṛtuśca raṇāṃgaṇe || 17 ||
[Analyze grammar]

nandī ca kārtikeyaśca samāśvasya tvaratvitau |
nijaghnatū raṇe daityānniraṃtaraśaravrajaiḥ || 18 ||
[Analyze grammar]

chinnabhinnā hatairdetyaiḥ patitairbhakṣitaistadā |
vyākulā sā'bhavatsenā viṣaṇṇavadanā tadā || 19 ||
[Analyze grammar]

pravidhvastāṃ tadā senāṃ dṛṣṭvā sāgaranaṃdanaḥ |
rathenā'tipatākena gaṇānabhiyayau balī || 20 ||
[Analyze grammar]

hastyaśvarathasaṃhrādāḥ śaṃkhabherīsvanāstathā |
abhavansiṃhanādāśca senayorubhayostadā || 21 ||
[Analyze grammar]

jalaṃdharaśaravrātairnīhārapaṭalairiva |
dyāvāpṛthivyorācchinnamaṃtaraṃ samapadyata || 22 ||
[Analyze grammar]

gaṇeśaṃ paṃcabhirviddhvā śailādiṃ navabhiḥ śaraiḥ |
vīrabhadraṃ ca viṃśatyā nanāda jaladasvanaḥ || 23 ||
[Analyze grammar]

kārtikeyastadā daityaṃ śaktyā vivyādha satvaraḥ |
yuyudhe śaktinirbhinnaḥ kiṃcidvyākulamānasaḥ || 24 ||
[Analyze grammar]

tataḥ krodhaparītākṣaḥ kārtikeyaṃ jalaṃdharaḥ |
gadayā tāḍayāmāsa sa ca bhūmitale'patat || 25 ||
[Analyze grammar]

tathaiva naṃdinaṃ vegādapātayata bhūtale |
tato gaṇeśvaraḥ kruddho gadāṃ paraśunā'hanat || 26 ||
[Analyze grammar]

vīrabhadrastribhirbāṇairhṛdi vivyādha dānavam |
saptabhiśca hayānketuṃ dhanuśchatraṃ ca cicchide || 27 ||
[Analyze grammar]

tato'tikruddho daityeṃdraḥ śaktimudyamya dāruṇām |
gaṇeśaṃ pātayāmāsa rathaṃ cā'nyamathā'ruhat || 28 ||
[Analyze grammar]

abhyayādatha vegena vīrabhadraṃ ruṣānvitaḥ |
tatastau sūryasaṃkāśau yuyudhāte parasparam || 29 ||
[Analyze grammar]

vīrabhadraḥ punastasya hayānbāṇairapātayat |
dhanuściccheda daityeṃdraḥ pupluve parighāyudhaḥ || 30 ||
[Analyze grammar]

sa vīrabhadraṃ tvarayā'bhigamya jaghāna daityaḥ parigheṇa mūrdhni |
sa cā'pi vīraḥ pravibhinnamūrddhā papāta bhūmau rudhiraṃ samudgiran || 31 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye jalaṃdharopākhyāne vīrabhadrapatananāmaikonaviṃśo'dhyāyaḥ || 19 ||
[Analyze grammar]