Chapter 20

[English text for this chapter is available]

nārada uvāca |
patitaṃ vīrabhadraṃ tu dṛṣṭvā rudragaṇā bhayāt |
agamaṃste raṇaṃ hitvā krośamānā maheśvaram || 1 ||
[Analyze grammar]

atha kolāhalaṃ śrutvā gaṇānāṃ caṃdraśekharaḥ |
abhyayādvṛṣabhārūḍhaḥ saṃgrāmaṃ prahasanniva || 2 ||
[Analyze grammar]

rudramāyāṃtamālokya siṃhanādairgaṇāḥ punaḥ |
nivṛttāḥ saṃgare daityānnirjaghnuḥ śaravṛṣṭibhiḥ || 3 ||
[Analyze grammar]

daityāśca bhīṣaṇaṃ dṛṣṭvā sarve caiva vidudruvuḥ |
kārtikavratinaṃ dṛṣṭvā pātakānīva tadbhayāt || 4 ||
[Analyze grammar]

jalaṃdharotha tāndaityānnivṛttānprekṣya saṃgare |
roṣādadhāvaccaṃḍīśaṃ muṃcanbāṇānsahasraśaḥ || 5 ||
[Analyze grammar]

śuṃbho niśuṃbho'śvamukhaḥ kālanemirbalāhakaḥ |
khaḍgaromā pracaṃḍaśca ghasmarādyāḥ śivaṃ yayuḥ || 6 ||
[Analyze grammar]

bāṇāṃdhakārasaṃchannaṃ dṛṣṭvā gaṇabalaṃ śivaḥ |
bāṇajālamavācchidya svabāṇairāvṛṇonnabhaḥ || 7 ||
[Analyze grammar]

daityāṃśca bāṇavātyābhiḥ pīḍitānakarottadā |
pracaṃḍabāṇajālaughairapātayata bhūtale || 8 ||
[Analyze grammar]

khaḍgaromṇaḥ śiraḥ kāyāttadā paraśunā'cchinat |
balāhakasya ca śiraḥ khaṭvāṃgenā'karoddvidhā || 9 ||
[Analyze grammar]

baddhvā ca ghasmaraṃ daityaṃ pāśenābhyahanadbhuvi |
vṛṣabheṇa hatāḥ kecitkecidbāṇairnipātitāḥ || 10 ||
[Analyze grammar]

na śekurasurāḥ sthātuṃ gajāḥ siṃhārditā iva |
tataḥ krodhaparītātmā vegādrudraṃ jalaṃdharaḥ || 11 ||
[Analyze grammar]

āhvayāmāsa samare tīvrāśanisamasvanaḥ |
jalaṃdhara uvāca |
yudhyasva ca mayā sārddhaṃ kimebhirnihitaistava || 12 ||
[Analyze grammar]

yacca kiṃcidbalaṃ te'sti taddarśaya jaṭādhara |
ityuktvā bāṇasaptatyā jaghāna vṛṣabhadhvajam || 13 ||
[Analyze grammar]

tānprāptānniśitairbāṇaiściccheda prahasanniva |
tato hayāndhvajaṃ chatraṃ dhanuściccheda śaktibhiḥ || 14 ||
[Analyze grammar]

sa cchinnadhanvā viratho gadāmudyamya vegavān |
abhyadhāvacchivastāvadgadāṃ bāṇairdvidhā'cchinat || 15 ||
[Analyze grammar]

tathā'pi muṣṭimudyamya yayau rudraṃ jighāṃsayā |
tāvacchivena bāṇaughaiḥ krośamātramapākṛtaḥ || 16 ||
[Analyze grammar]

tato jalaṃdharo daityo matvā rudraṃ balādhikam |
sasarja māyāṃ gāṃdharvīmadbhutāṃ rudramohinīm || 17 ||
[Analyze grammar]

tato jaguśca nanṛturgaṃdharvāpsarasāṃ gaṇāḥ |
tālaveṇumṛdaṃgādyānvādayaṃti sma cā'pare || 18 ||
[Analyze grammar]

taddṛṣṭvā mahadāścaryaṃ rudro nādavimohitaḥ |
patitānyapi śastrāṇi karebhyo na viveda saḥ || 19 ||
[Analyze grammar]

ekāgrībhūtamālokya rudraṃ daityo jalaṃdharaḥ |
kāmārtaḥ sa jagāmāśu yatra gaurī sthitā'bhavat || 20 ||
[Analyze grammar]

yuddhe śuṃbhaniśuṃbhākhyau sthāpayitvā mahābalī |
daśadordaṃḍapacāsyastrinetraśca jaṭādharaḥ || 21 ||
[Analyze grammar]

mahāvṛṣabhamārūḍhaḥ sa babhūva jalaṃdharaḥ |
atho rudraṃ samāyāṃtamālokya bhavavallabhā || 22 ||
[Analyze grammar]

abhyāyayau sakhīmadhyāttaddarśanapathe'bhavat |
yāvaddadarśa cārvaṃgī pārvatī danujeśvaraḥ || 23 ||
[Analyze grammar]

tāvatsvavīryaṃ mumuce jaḍāṃgaścā'bhavattadā |
atha jñātvā tadā gaurī dānavaṃ bhayavihvalā || 24 ||
[Analyze grammar]

jagāmā'ntarhitā vegātsā tadottaramānase |
tāmadṛṣṭvā tato daityaḥ kṣaṇādvidyullatāmiva || 25 ||
[Analyze grammar]

javenā'gātpunaryuddhaṃ yatra devo vṛṣadhvajaḥ |
pārvatyapi bhayādviṣṇuṃ sasmāra manasā tadā || 26 ||
[Analyze grammar]

tāvaddadarśa taṃ devaṃ sūpaviṣṭaṃ samīpagam |
pārvatyuvāca |
viṣṇo jalaṃdharo daityaḥ kṛtavānparamādbhutam || 27 ||
[Analyze grammar]

tatkiṃ na viditaṃ te'sti ceṣṭitaṃ tasya durmateḥ |
viṣṇuruvāca |
tenaiva darśitaḥ paṃthā vayamapyanvayāmahe || 28 ||
[Analyze grammar]

nā'nyathā sa bhavedvadhyaḥ pātivratyasurakṣitḥ |
nārada uvāca |
jagāma viṣṇurityuktvā punarjālaṃdharaṃ puram || 29 ||
[Analyze grammar]

atha rudraśca gaṃdharvā'nugataḥ saṃgare sthitaḥ |
aṃtardhānaṃ gatāṃ māyāṃ dṛṣṭvā sa bubudhe tadā || 30 ||
[Analyze grammar]

tato bhavo vismitamānasaḥ punarjagāma yuddhāya jalaṃdharaṃ ruṣā |
sa cā'pi daityaḥ punarāgataṃ śivaṃ dṛṣṭvā śaraughaiḥ samavākiradraṇe || 31 ||
[Analyze grammar]

iti śrīskāṃde mahāpurāṇa ekāśītisāhasryāṃ sahitāyāṃ dvitīye vaiṣṇavakhaṇḍe kārtikamāsamāhātmye jalaṃdharopākhyāne śivajalaṃdharayuddhavarṇanaṃnāma viṃśo'dhyāyaḥ || 20 ||
[Analyze grammar]