Chapter 5

[English text for this chapter is available]

nārada uvāca |
kadā snānaṃ prakartavyaṃ kathaṃ stheyaṃ dināvadhi |
āhnikaṃ tatsamācakṣva viśeṣeṇa pitāmaha || 1 ||
[Analyze grammar]

brahmovāca |
rātryāṃ turyāṃśaśeṣāyāmuttiṣṭhetsarvadā vratī |
viṣṇuṃ stutvā bahustotrairdinakāryaṃ vicārayet || 2 ||
[Analyze grammar]

grāmanairṛtyadigbhāge malotsargaṃ yathāvidhi |
brahmasūtraṃ dakṣakarṇe sthāpya tatra udaṅmukhaḥ || 3 ||
[Analyze grammar]

aṃtardhāya tṛṇaṃ bhūmau śiraḥ prāvṛtya vāsasā |
vaktraṃ niyamya vastreṇā'saṃgaḥ sodakabhājanaḥ || 4 ||
[Analyze grammar]

kuryānmūtrapurīṣaṃ tu rātrau ceddakṣiṇāmukhaḥ |
tata utthāya cā'gacchetsamīpaṃ kalaśasya hi || 5 ||
[Analyze grammar]

gaṃdhalepakṣayakaraṃ mṛttikāśaucamācaret |
ekā liṃge kare tisra ubhayormṛddvayaṃ smṛtam || 6 ||
[Analyze grammar]

mūtraśauce tvidaṃ jñeyaṃ viṣṭhāśaucamataḥ śṛṇu |
paṃcāpāne'thavā sapta daśa vāmakare tathā || 7 ||
[Analyze grammar]

ubhayoḥ sapta dātavyāḥ pādayormṛttikātrayam |
etacchaucaṃ gṛhasthasya dviguṇaṃ brahmacāriṇaḥ || 8 ||
[Analyze grammar]

vānaprasthasya triguṇaṃ yatīnāṃ ca caturguṇam |
etacchaucaṃ divā proktaṃ rātrāvarddhaṃ samācaret || 9 ||
[Analyze grammar]

mārgasthasya tadardhaṃ syātstrīśūdrāṇāṃ tadardhakam |
śaucakarmavihīnasya samastā niṣphalāḥ kriyāḥ || 10 ||
[Analyze grammar]

daṃtajihvāviśuddhiṃ ca tataḥ kuryādataṃdritaḥ |
āyurbalaṃ yaśo varcaḥ prajāḥ paśuvasūni ca || 11 ||
[Analyze grammar]

brahma prajñāṃ ca medhāṃ ca tvaṃ no dehi vanaspate |
daṃtakāṣṭhaṃ tu gṛhṇīyāddvādaśāṃgulasaṃmitam || 12 ||
[Analyze grammar]

kṣīravṛkṣasya na grāhyaṃ kārpāsasya tathaiva ca |
kaṃṭakasya ca vṛkṣasya dagdhavṛkṣasya caiva hi || 13 ||
[Analyze grammar]

sadvāsanaṃ mṛdutaraṃ daṃtadhāvanamāditaḥ || 14 ||
[Analyze grammar]

upavāse navamyāṃ ca ṣaṣṭhyāṃ śrāddhadine ravau |
grahaṇe pratipaddarśe na kuryāddaṃtadhāvanam |
kuryāddvādaśagaṃḍūṣānanukte daṃtadhāvane || 15 ||
[Analyze grammar]

daṃtānviśodhya vidhivanmukhaṃ saṃmārjya vāriṇā |
lalāṭe cordhvapuṃḍraṃ tu dhṛtvā cācamya vāriṇā || 16 ||
[Analyze grammar]

devālaye nadītīre rājamārge viśeṣataḥ |
dattvā cākāśadīpaṃ tu tulasīsannidhāvatha || 17 ||
[Analyze grammar]

gṛhītvārcanasāmagrīmiṣṭadevagṛhaṃ vrajet |
tato gāyeta nṛtyeta pūjāṃ kṛtvā tu buddhimān || 18 ||
[Analyze grammar]

paṭhitvā viṣṇunāmāni kuryyānnīrājanaṃ hareḥ |
nāḍīdvayāvaśiṣṭāyāṃ rātryāṃ gacchejjalāśayam || 19 ||
[Analyze grammar]

tatroktavidhinā snānaṃ kuryādvai kārtikavratī |
vastraniṣpīḍanaṃ kṛtvā kuryācca tilakaṃ tathā || 20 ||
[Analyze grammar]

tataḥ saṃdhyāmupāsīta svasūtroktena vartmanā |
tataḥ kāryo japo devyā yāvadakoṃdayo bhavet || 21 ||
[Analyze grammar]

etatproktaṃ rātriśeṣakṛtyaṃ dainamathocyate |
yasminkṛte kārtiko'yaṃ sakalaḥ saphalo bhavet || 22 ||
[Analyze grammar]

viṣṇoḥ sahasranāmā'dyaṃ saṃdhyāṃte ca paṭhettataḥ |
devālaye samāgatya punaḥ pūjanamārabhet || 23 ||
[Analyze grammar]

nṛtyagānādikāryeṣu praharaṃ divasaṃ nayet |
tataḥ purāṇaśravaṇaṃ yāmārdhaṃ samyagācaret || 24 ||
[Analyze grammar]

paurāṇikasya pūjāṃ tu tulasīpūjanaṃ tathā |
kṛtvā mādhyāhnikaṃ karma bhuṃjīta dvidalojjhitam || 25 ||
[Analyze grammar]

balidānaṃ vaiśvadevamatithīnāṃ samarpaṇam |
kṛtvā bhuṃkte tu yo martyaḥ kevalaṃ cā'mṛtaṃ hi tat || 26 ||
[Analyze grammar]

yathāśakti dvijā bhojyāḥ pratyahaṃ vā'tha parvaṇi |
haviṣyabhojanaṃ kuryādāmiṣaṃ parivarjayet || 27 ||
[Analyze grammar]

bhakṣayettulasīṃ vaktraśuddhyarthaṃ tīrthavāriṇā |
saṃsāravyavahāreṇa dinaśeṣaṃ samāpayet || 28 ||
[Analyze grammar]

sāyaṃkāle punargacchedviṣṇordevālayaṃ prati |
saṃdhyāṃ kṛtvā prayuṃjīta tatra dīpanyathābalam || 29 ||
[Analyze grammar]

viṣṇuṃ praṇamya haraye kṛtvā nīrājanaṃ śubham |
stotrapāṭhādikaṃ kurvannādyayāme tu jāgaram || 30 ||
[Analyze grammar]

yāme tu prathame'tīte nidrāṃ kuryādvicakṣaṇaḥ |
brahmacaryavrataṃ kuryādbhāryāmīyādṛtau tathā || 31 ||
[Analyze grammar]

tayā kāmayamāno vā bhāryāṃ gacchenna doṣabhāk |
evaṃ pratidinaṃ kuryādāmāsaṃ tu yathāvidhi || 32 ||
[Analyze grammar]

evaṃ tu kārtike māsi yaḥ kuryātparamaṃ vratam |
sarvapāpavinirmukto yāti viṣṇoḥ salokatām || 33 ||
[Analyze grammar]

rogāpahaṃ pātakanāśakṛtparaṃ sadbuddhidaṃ putradhanādisādhakam |
mukternidānaṃ nahi kārtikavratādviṣṇupriyādanyadihā'sti bhūtale || 34 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye nityakarmakathanaṃnāma paṃcamo'dhyāyaḥ || 5 ||
[Analyze grammar]