Chapter 4

[English text for this chapter is available]

brahmovāca |
nāḍīdvayāvaśiṣṭāyāṃ rātryāṃ gacchejjalāśayam |
tulasīmṛttikāyuktaḥ savastrakalaśo mune || 1 ||
[Analyze grammar]

āgatya toyanikaṭe tīre saṃsthāpya pātrakam |
pādaprakṣālanaṃ kṛtvā deśakālādi coccaret || 2 ||
[Analyze grammar]

smaredgaṃgādikā nadyo viṣṇuśarvādidevatāḥ |
nābhimātre jale sthitvā maṃtrametamudīrayet || 3 ||
[Analyze grammar]

kārtike'haṃ kariṣyāmi prātaḥsnānaṃ janārdana |
prītyarthaṃ tava deveśa dāmodara mayā saha || 4 ||
[Analyze grammar]

nitye naimittike kṛtvā kārtike pāpanāśana |
snānaṃ cārghaṃ pradāsyāmi nirvighnaṃ kuru keśava || 5 ||
[Analyze grammar]

tīrthādidevatābhyaśca kramādarghyādi dāpayet |
gṛhāṇārghyaṃ mayā dattaṃ rādhayā sahito hare || 6 ||
[Analyze grammar]

namaḥ kamalanābhāya namaste jalaśāyine |
namaste'stu hṛṣīkeśa gṛhāṇārghyaṃ namo'stu te || 7 ||
[Analyze grammar]

vratinaḥ kārtike māsi snātasya vidhivanmama |
gṛhāṇārghyaṃ mayā dattaṃ danujeṃdraniṣūdana || 8 ||
[Analyze grammar]

kiraṇā dhūtapāpā ca puṇyatoyā sarasvatī |
gaṃgā ca yamunā caiva paṃcanadyaḥ punaṃtu mām || 9 ||
[Analyze grammar]

anyāsāṃ ca nadīnāṃ ca dadyādarghyaṃ yathāvidhi |
jāhnavīsmaraṇaṃ kuryātsarvatīrtheṣu mānavaḥ || 10 ||
[Analyze grammar]

nānyattīrthaṃ tu jāhnavyāṃ smaraṇīyaṃ kadācana |
etānmaṃtrānsamuccārya malasnānaṃ samācaret || 11 ||
[Analyze grammar]

mṛtsnānaṃ ca pitṛsnānaṃ gurusnānaṃ tataḥ param |
tatastu pāvamānībhirabhiṣiṃcetsvamastakam || 12 ||
[Analyze grammar]

aghamarṣaṇakaṃ kṛtvā snānāṃgaṃ tarpaṇaṃ tathā |
tataḥ puruṣasūktena jalaṃ śirasi siṃcayet || 13 ||
[Analyze grammar]

tatastu bahirāgatya tīrthaṃ śirasi nikṣipet |
tīrthaṃ pītvā trivāraṃ tu tulasīṃ gṛhya pāṇinā || 14 ||
[Analyze grammar]

tato jalādviniṣkramya cāṃcalaṃ pīḍayedbahiḥ |
yanmayā dūṣitaṃ toyaṃ śārīramalasaṃcayaiḥ || 15 ||
[Analyze grammar]

taddoṣaparihārārthaṃ yakṣmaṇaṃ tarpayāmyaham |
vastraniṣpīḍanaṃ kṛtvā kuryācca tilakādikam || 16 ||
[Analyze grammar]

sūta uvāca |
śṛṇudhvamṛṣayaḥ sarve kārtikasnānajaṃ phalam |
aruṇaṃ prati sūryeṇa yaduktaṃ ca savistaram || 17 ||
[Analyze grammar]

aruṇa uvāca |
kasmiṃstīrthe viśeṣeṇa phalaṃ kārtikasaṃbhavam |
kṣetre vā etadā'khyāhi bhagavansnānayogataḥ || 18 ||
[Analyze grammar]

sūrya uvāca |
yatra kutrā'pi kartavyaṃ jale snānaṃ tu kārtikaṃ |
uṣṇodakena kartavyaṃ snānaṃ kutrā'pi kārtike || 19 ||
[Analyze grammar]

tato daśaguṇaṃ puṇyaṃ śītatoyanimajjanāt |
tataḥ śataguṇaṃ puṇyaṃ bahiḥ kūpodake kṛtam || 20 ||
[Analyze grammar]

kūpātsahasraguṇitaṃ phalaṃ vāpīniṣekataḥ |
tato'yutaguṇaṃ puṇyaṃ taḍāgasnānato bhavet || 21 ||
[Analyze grammar]

tato daśaguṇaṃ puṇyaṃ nirjhareṣu nimajjanāt |
tato'dhikataraṃ puṇyaṃ nadīsnānasya kārtike || 22 ||
[Analyze grammar]

nadyā daśaguṇaṃ proktaṃ tīrthasnānaṃ khagottama |
tato daśaguṇaṃ puṇyaṃ nadyoryatra ca saṃgamaḥ || 23 ||
[Analyze grammar]

nadītrayasya saṃyoge puṇyasyāṃ'to na vidyate |
siṃdhuḥ kṛṣṇā ca veṇī ca yamunā ca sarasvatī || 24 ||
[Analyze grammar]

godāvarī vipāśā ca narmadā tamasā mahī |
kāverī śarayūḥ śiprā tathā carmaṇvatī nadī || 25 ||
[Analyze grammar]

vitastā vedikā śoṇo vetravatyaparājitā |
gaṃḍakī gomatī pūrṇā brahmaputrā sarovaram || 26 ||
[Analyze grammar]

vāgmatī ca śatadruśca tathā badarikāśramaḥ |
durlabhāḥ kārtike tvete tīrthānyatha nibodha me || 27 ||
[Analyze grammar]

sarvebhyaśca sthalebhyaśca āryāvartaṃ tu puṇyadam |
kolhāpurī tataḥ śreṣṭhā tataḥ kāṃcīdvayaṃ smṛtam || 28 ||
[Analyze grammar]

anaṃtasenavasatirvarāhakṣetrameva ca |
cakrakṣetraṃ tataḥ puṇyaṃ muktikṣetraṃ tato'dhikam || 29 ||
[Analyze grammar]

avaṃtikā tataḥ śreṣṭhā tato badarikāśramaḥ |
ayodhyā ca tataḥ śreṣṭhā gaṃgādvāraṃ tato'dhikam || 30 ||
[Analyze grammar]

tataḥ kanakhalaṃ tīrthaṃ tato madhupurī varā |
eko'pi kārtiko māso mathurāyamunājale || 31 ||
[Analyze grammar]

yaiḥ snātaste tu vaikuṃṭhe bahukālaṃ vasaṃti hi |
rādhādāmodarastatra svayaṃ snātastu kārtike || 32 ||
[Analyze grammar]

ato madhupurī śreṣṭhā yamunā ca viśeṣataḥ || 33 ||
[Analyze grammar]

dvārāvatī tataḥ śreṣṭhā pratyahaṃ snāti keśavaḥ |
ṣoḍaśastrīsahasreṇa sārddhaṃ yādavasaṃyutaḥ || 34 ||
[Analyze grammar]

dvārakāyāṃ mṛttikāyāstilako yena mastake |
dhāryate'sau naro jñeyo jīvanmukto na saṃśayaḥ |
dvārakāsnānamāhātmyaṃ na vaktuṃ śakyate mayā || 35 ||
[Analyze grammar]

goviṃdārpitacittānāṃ jāyate puṇyabhāskarā |
tato bhāgīrathī śreṣṭhā yatra viṃdhyena saṃgatā || 36 ||
[Analyze grammar]

tasmāddaśaguṇaṃ puṇyaṃ tīrtharāje'tra jāyate || 37 ||
[Analyze grammar]

kalau daśasahasrāṃ'te viṣṇustyakṣyati medinīm |
tadarddhaṃ jāhnavītoyaṃ tadardhaṃ devatāgaṇāḥ || 38 ||
[Analyze grammar]

yāvattiṣṭhati gaṃgā'tra tāvattīrthāni saṃti ca |
svasvasthāne nṛṇāṃ pāpaṃ tāvadeva haraṃti ca || 39 ||
[Analyze grammar]

yadaiva gaṃgā naṣṭā syātko vā tatpāpamāharet |
vicāryaivaṃ sutīrthāni gamiṣyaṃti dharātale || 40 ||
[Analyze grammar]

tasmānmunīśvarāḥ sarve yāvattiṣṭhati jāhnavī |
tāvacca kriyatāṃ dharmastato bhūmau nilīyatām || 41 ||
[Analyze grammar]

samādhiṃ gṛhya sudṛḍhāṃ yāvatkṛtayugaṃ bhavet |
anyathā kalikālena bhraṃśanīyo bhavetsudhīḥ || 42 ||
[Analyze grammar]

tataḥ śreṣṭhatarā kāśī yasyā nāśo na jāyate |
yadāśrayeṇa gaṃgāpi sarvapāpaṃ vyapohati || 43 ||
[Analyze grammar]

kāśikāyā naiva nāśo brahmaṇyapi mṛte sati |
yaddarśanārthaṃ gaṃgā'pi jātā cottaravāhinī |
tasyāṃ paṃcanadaṃ tīrthaṃ triṣu lokeṣu viśrutam || 44 ||
[Analyze grammar]

āgate kārtike māsi rauravaṃ narakaṃ gatāḥ |
ākrośaṃte tu pitaro vaṃśe'smākaṃ bhaviṣyati || 45 ||
[Analyze grammar]

kaścidbhāgyavatāṃ śreṣṭho gatvā paṃcanade śubhe |
asmākaṃ tarpaṇaṃ kuryānnarakārṇavatārakam || 46 ||
[Analyze grammar]

tīrtharājāditīrthāni prāpte kārtikamāsake |
snānārthaṃ pañcagaṃgaṃ tu samāyāṃti na saṃśayaḥ || 47 ||
[Analyze grammar]

kṛtvā tu lakṣapāpāni snātvā paṃcanade śubhe |
biṃdumādhavamabhyarcya vilayaṃ yāṃti tatkṣaṇāt || 48 ||
[Analyze grammar]

yaiḥ snātaṃ kārtike māsi sakṛtpaṃcanade śubhe |
sarvatīrthakṛtāsnānātphalaṃ koṭiguṇaṃ bhavet || 49 ||
[Analyze grammar]

brahmovāca |
kārtike māsi kāveryyāṃ yaḥ snānaṃ kartumicchati |
tāvatā vai vimuktā'gho viṣṇusāyujyamāpnuyāt || 50 ||
[Analyze grammar]

kāveryyāścaiva māhātmyaṃ ko vadetparamuttamam |
atra te varṇayiṣyāmi itihāsaṃ purātanam || 51 ||
[Analyze grammar]

kāveryā viṣaye brahmansāvadhānamanāḥ śṛṇu |
gautamyā uttare tīre viṣṇupādābjasaṃbhavā || 52 ||
[Analyze grammar]

gaṃgā trailokyapāpaghnī vartate lokapūjitā |
sā gaṃgā ciṃtayāmāsa kadācitpāpaśaṃkitā || 53 ||
[Analyze grammar]

sarvalokāḥ samāgatya mayi pāpaṃ tyajaṃti hi |
tatpāpaṃ tu kathaṃ gacchediti cintāparā tadā || 54 ||
[Analyze grammar]

praṣṭuṃ jagāma kailāsaṃ girijāvallabhaṃ bhavam |
tatra dṛṣṭvā mahārudraṃ provāca haripādajā || 55 ||
[Analyze grammar]

gaṅgovāca |
mahārudra namaste'stu tvāṃ praṣṭumahamāgatā |
sarve lokāḥ samāgatya mayi pāpaṃ tyajaṃti hi || 56 ||
[Analyze grammar]

tatpāpaṃ tu mayā soḍhuṃ na śakyaṃ pārvatīpate |
yenopāyena tatpāpaṃ nā'gacchenmama tadvada || 57 ||
[Analyze grammar]

evaṃ gaṃgāvacaḥ śrutvā pratyāha parameśvaraḥ |
rudra uvāca |
pāpanirharaṇāyādau padmanābhāṃghripaṃkajāt || 58 ||
[Analyze grammar]

prādurbhūtā'si tvaṃ devi kimarthaṃ tapyate tvayā |
pāpaprahārā'dhipatyaṃ kalpitaṃ tava viṣṇunā || 59 ||
[Analyze grammar]

tathā'pi pāpanirhāra upāyaṃ te bravīmyaham |
kaveśca tanayā devī kāverī saritāṃ varā || 60 ||
[Analyze grammar]

sarvotkṛṣṭā ca sarveṣāṃ harerbalavaśāttu sā |
sarvapāpapraharaṇe sāmarthyaṃ tatra vartate || 61 ||
[Analyze grammar]

kārtike māsi kāveryāṃ yaḥ snānaṃ kurute naraḥ |
sa tu pāpavinirmukto yāti viṣṇoḥ paraṃ padam || 62 ||
[Analyze grammar]

tasmāttāṃ gaccha devi tvaṃ tataḥ pāpādvimokṣyase |
ityuktā sā tadāgacchatkāverīṃ pāpahāriṇīm || 63 ||
[Analyze grammar]

tajjalasparśamātreṇa kārtike viṣṇupādajā |
nirdhūtapātakā gaṃgā jagāma svaniketanam || 64 ||
[Analyze grammar]

kārtike prativarṣaṃ tu gaṃgā trailokyapāvanīm |
snātuṃ bhaktyā samāyāti kāverīṃ pāpahāriṇīm || 65 ||
[Analyze grammar]

tajjalasparśamātreṇa kārtike viṣṇupādajā |
nirdhūtapātakā gaṃgā jagāma svaniketanam || 66 ||
[Analyze grammar]

tasmācchastaṃ tulāsnānaṃ kāveryyāṃ śasyate budhaiḥ |
yaḥ kāveryāṃ tulāsnānaṃ bhaktyā tu kurute mune || 67 ||
[Analyze grammar]

vimuktaduritaḥ sadyastato yāti parāṃ gatim |
tasmātsnānaṃ tu kāveryāṃ kārtike māsi śasyate || 68 ||
[Analyze grammar]

itihāsamimaṃ śrutvā kārtikavratatatparaḥ |
sa kāverī snānaphalaṃ prāpnoti ca parāṃ gatim || 69 ||
[Analyze grammar]

rātriśeṣe bhavetsnānamuttamaṃ viṣṇutuṣṭikṛt |
sūryodaye madhyamaṃ syādyāvannā'stā tu kṛttikā || 70 ||
[Analyze grammar]

tāvadeva bhavetsnānamanyathā tanna kārtikam |
snānaṃ strībhirvidhātavyaṃ gṛhītvā'jñāṃ dhavasya ca || 71 ||
[Analyze grammar]

apṛṣṭvā yatkṛtaṃ dharmyaṃ bhartāraṃ tatkṣayaṃ nayet |
strīṇāṃ nāstyaparo dharmo bhartāraṃ projjhya kaścana || 72 ||
[Analyze grammar]

kuryātsahasrapāpāni bhartrā'jñāṃ yā samācaret |
saiṣā dharmavatī loke na jāyeta vratādinā || 73 ||
[Analyze grammar]

daridraḥ patito mūrkho dīno'pi yadi cetpatiḥ |
tādṛśaḥ śaraṇaṃ strīṇāṃ tattyāgānnirayaṃ vrajet || 74 ||
[Analyze grammar]

kalau vatsa manuṣyāṇāṃ śaithilyaṃ snānakarmaṇi |
tathāpi kathayiṣyāmi snānaṃ kārtikamāghayoḥ || 75 ||
[Analyze grammar]

yasya hastau ca pādau ca vāṅmanaśca susaṃyatam |
vidyā tapaśca kīrtiśca sa tīrthaphalabhāṅnaraḥ || 76 ||
[Analyze grammar]

aśraddadhānaḥ pāpātmā nāstikaśchinnamānasaḥ |
hetuvādī ca paṃcaite na tīrthaphalabhāginaḥ || 77 ||
[Analyze grammar]

prātarutthāya yo viprastīrthasnāyī sadā bhavet |
sarvapāpavinirmuktaḥ paraṃ brahmā'dhigacchati || 78 ||
[Analyze grammar]

snānaṃ caturvidhaṃ proktaṃ snānavidbhirmanīṣibhiḥ |
vāyavyaṃ vāruṇaṃ divyaṃ brāhmaṃ ceti tathā smṛtam || 79 ||
[Analyze grammar]

vāyavyaṃ gorajaḥsnānaṃ vāruṇaṃ sāgarādiṣu |
brāhmaṃ brāhmaṇamaṃtroktaṃ divyaṃ meghāṃ'bu bhāskaram || 80 ||
[Analyze grammar]

snānānāṃ caiva sarveṣāṃ viśiṣṭaṃ tatra vāruṇam |
brāhmaṇaḥ kṣatriyo vaiśyo maṃtravatsnānamācaret || 81 ||
[Analyze grammar]

tūṣṇīmeva hi śūdrasya strīṇāṃ caiva tathā smṛtam |
bālā ca taruṇī vṛddhā naranārīnapuṃsakāḥ || 82 ||
[Analyze grammar]

pāpaiḥ sarvaiḥ pramucyaṃte snānātkārtikamāghayoḥ |
snātā vai kārtike lokāḥ prāpnuvaṃtīpsitaṃ phalam || 83 ||
[Analyze grammar]

puṣkare tīrthavarye tu naṃdāyāḥ saṃgame purā |
prabhaṃjanaśca muktobhūttadaiva vyāghrajanmataḥ || 84 ||
[Analyze grammar]

naṃdāyā vacanenaiva kārtike sā paraṃ yayau |
evaṃ snānavidhiḥ proktaḥ kiṃ bhūyaḥ śrotumicchasi || 85 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye kārtikasnānavidhinirūpaṇaṃnāma caturtho'dhyāyaḥ || 4 ||
[Analyze grammar]