Chapter 14

[English text for this chapter is available]

atha sumatyākhyadvijavṛttāntaḥ |
śrīsūta uvāca |
bhobhostapodhanāḥ sarve naimiṣāraṇyavāsinaḥ |
svāmitīrthasya māhātmyaṃ bhūyo'pi pravadāmyaham || 1 ||
[Analyze grammar]

purā kirātīsaṃsargātsumatirbrāhmaṇaḥ surām |
pītavānpuṣkariṇyāṃ sa snātvā pāpādvimocitaḥ || 2 ||
[Analyze grammar]

ṛṣaya ūcuḥ |
sumatiḥ kasya putro'sau kathaṃ sa ca surāṃ papau |
kathaṃ kirātyāsakto'bhūtsūta paurāṇikottama || 3 ||
[Analyze grammar]

sarveṣāṃ vistarādetadvada tvaṃ kṛpayādhunā || 4 ||
[Analyze grammar]

śrīsūta uvāca |
mahārāṣṭrābhidhe deśe brāhmaṇaḥ kaścidāstikaḥ |
yajñadeva iti khyāto vedavedāṃgapāragaḥ || 5 ||
[Analyze grammar]

dayālurātitheyaśca śivanārāyaṇārcakaḥ |
sumatirnāmaputro'bhūdyajñadevasya tasya vai || 6 ||
[Analyze grammar]

pitaraṃ sa parityajya bhāryāmapi pativratām |
prayayāvutkale deśe viṭagoṣṭhīparāyaṇaḥ || 7 ||
[Analyze grammar]

kācitkirātī taddeśe vasantī yuvamohanī |
yūnāṃ samastadravyāṇi pralobhya jagṛhe ciram || 8 ||
[Analyze grammar]

tasyā gṛhaṃ sa prayayau sumatirbrāhmaṇādhamaḥ |
sumatiṃ sā ca jagrāha kirātī nirdhanaṃ dvijam || 9 ||
[Analyze grammar]

atha sumatyākhyadvijasya kirātīsaṅgānmahāpātakaprāptiḥ |
tayā yukto'tha sumatistatsaṃyogaikatatparaḥ |
itastataścorayitvā bahudravyāṇi santatam || 10 ||
[Analyze grammar]

dattvā tayā ciraṃ reme tadgṛhe bubhuje ca saḥ |
ekena caṣakeṇāsau tayā saha surāṃ papau || 11 ||
[Analyze grammar]

evaṃ sa bahukālaṃ vai ramamāṇastayā saha |
pitarau nijapatnīṃ ca nāsmaradviṣayāturaḥ || 12 ||
[Analyze grammar]

sa kadācitkirātaistu cauryaṃ kartuṃ yayau saha |
viprasya kasyacidgehe so'pi kairātaveṣabhṛt || 13 ||
[Analyze grammar]

yayau corayituṃ dravyaṃ sāhasī khaṅgahastavān |
tadgṛhasvāminaṃ vipraṃ hatvā khaṅgena sāhasāt || 14 ||
[Analyze grammar]

samādāya bahu dravyaṃ kirātībhavanaṃ yayau |
taṃ yāntamanuyāti sma brahmahatyā bhayaṃkarī || 15 ||
[Analyze grammar]

nīlavastradharā bhīmā bhṛśaṃ raktaśiroruhā |
garjantī sāṭṭahāsaṃ sā kampayantī ca rodasī || 16 ||
[Analyze grammar]

anudrutastayā so'yaṃ babhrāma jagatītale |
evaṃ bhramanbhuvaṃ sarvāṃ kadācitsumatiḥ svayam || 17 ||
[Analyze grammar]

svagrāmaṃ prayayau bhītyā viprabandhurdurātmavān |
anudrutastayā bhītaḥ prayayau svagṛhaṃ prati || 18 ||
[Analyze grammar]

brahmahatyāpyanudrutya tena sākaṃ gṛhaṃ yayau |
pitaraṃ rakṣarakṣeti sumatiḥ śaraṇaṃ yayau || 19 ||
[Analyze grammar]

mā bhaiṣīriti taṃ procya pitā rakṣitumudyataḥ |
tadānīṃ brahmahatyeyaṃ tattātaṃ pratyabhāṣata || 20 ||
[Analyze grammar]

brahmahatyovāca |
maiva tvaṃ pratigṛhṇīṣva yajñadeva dvijottama |
asau surāpī steyī ca brahmahā cātipātakī || 21 ||
[Analyze grammar]

mātṛdrohī pitṛdrohī bhāryātyāgī ca pātakī |
kirātīsaṃgaduṣṭaśca hyenaṃ muṃca durātmakam || 22 ||
[Analyze grammar]

gṛhṇāsi cedimaṃ vipra mahāpātakinaṃ sutam |
tvadbhāryāmasya bhāryāṃ ca tvāṃ ca putramimaṃ dvija || 23 ||
[Analyze grammar]

bhakṣayiṣyāmi vaṃśaṃ ca tasmānmuñca sutaṃ tvimam |
imaṃ tyajasi cetputraṃ yuṣmānmucāṃmi sāṃpratam || 24 ||
[Analyze grammar]

naikasyārthe kulaṃ hantumarhasi tvaṃ mahāmate |
ityuktaḥ sa tayā tatra yajñadevo'bravīcca tām || 25 ||
[Analyze grammar]

yajñadeva uvāca |
bādhate māṃ sutasnehaḥ kathamenaṃ parityaje |
brahmahatyā tadākarṇya dvijoktaṃ tamabhāṣata || 26 ||
[Analyze grammar]

brahmahatyovāca |
ayaṃ hi patito bhūtvā varṇāśrama bahiṣkṛtaḥ |
putresminmā kuru snehaṃ ninditaṃ cāsya darśanam || 27 ||
[Analyze grammar]

ityuktvā brahmahatyā sā yajñadevasya paśyataḥ |
talena prajahārāsya putraṃ sumatināmakam || 28 ||
[Analyze grammar]

ruroda tātatāteti pitaraṃ prabruvanmuhuḥ || 29 ||
[Analyze grammar]

atha sumatiṃ prati durvāsaḥ kathita brahmahatyāmuktyupāyaḥ |
ruru durjanako mātā bhāryāpi sumatestadā |
etasminnaṃtare tatra durvāsāḥ śaṃkarāṃśakaḥ || 30 ||
[Analyze grammar]

diṣṭyā samāyayau yogī dhārmiko munisattamaḥ |
yajñadevo'tha taṃ dṛṣṭvā muniṃ rudrāvatārakam || 31 ||
[Analyze grammar]

stutvā praṇamya śaraṇaṃ yayāce putrakāraṇāt |
durvāsāstvaṃ mahāyoginsākṣādvai śaṃkarāṃśakaḥ || 32 ||
[Analyze grammar]

tvaddarśanamapuṇyānāṃ bhavitā na kadācana |
brahmahā ca surāpī ca steyī cābhūtsuto mama || 33 ||
[Analyze grammar]

enaṃ prahartumāyātā brahmahatyāpi vartate |
syādyathā me putro'yaṃ mahāpātakamocitaḥ || 34 ||
[Analyze grammar]

ghorā ca brahmahatyeyaṃ yathā śīghraṃ layaṃ vrajet |
tamupāyaṃ vadasvādya mama putre dayāṃ kuru || 35 ||
[Analyze grammar]

ayameva hi putro me nānyo'sti tanayo mune |
asminmṛte tu vaṃśo me samucchidyeta mūlataḥ || 36 ||
[Analyze grammar]

tataḥ pitṛbhyaḥ piṇḍānāṃ dātāpi na bhaveddhruvam |
tataḥ kṛpāṃ kuruṣva tvamasmāsu bhagavanmune || 37 ||
[Analyze grammar]

ityuktaḥ sa tadovāca durvāsāḥ śaṃkarāṃśakaḥ |
dhyātvāthasuciraṃ kālaṃ yajñadevaṃ dvijottamam || 38 ||
[Analyze grammar]

durvāsā uvāca |
yajñadevakṛtaṃ ṣāpamatidūra sutena te |
nāsya pāpasya śātiḥ syātprāyaścittāyutairapi || 39 ||
[Analyze grammar]

tathāpi te sutasyāhaṃ tasya pāpasya śāntaye |
prāyaścittaṃ vadiṣyāmi śṛṇu nānyamanā dvija || 40 ||
[Analyze grammar]

veṃkaṭādrau mahāpuṇye sarvapātakanāśane |
svāmipuṣkariṇī ceti vartate maṃgalapradā || 41 ||
[Analyze grammar]

atha sumateḥ svāmipuṣkariṇīsnānādbrahmahatyā vimuktiḥ |
snāti cettava putro'yaṃ pātakānmucyate kṣaṇāt |
evaṃ śrutvā munervākyaṃ yajñadevo mahāmatiḥ || 42 ||
[Analyze grammar]

putramādāya sumatiṃ svāmipuṣkariṇīṃgataḥ |
snāpayāmāsa sumatiṃ hatyayā pīḍitaṃ sutam || 43 ||
[Analyze grammar]

ākāśavāṇī taṃ vipramuvāca madhurasvarā |
yajñadeva mahābhāga snānenānena suvrata || 44 ||
[Analyze grammar]

pūto'bhavattava sutaḥ saṃśayaṃ mā kṛthā dvija |
evaṃprabhāvaṃ tattīrthaṃ pāpavṛkṣakuṭhārakam || 45 ||
[Analyze grammar]

evaṃ vaḥ kathitaṃ viprā itihāsaṃ purātanam |
śṛṇvatāṃ paṭhatāṃ cāpi vājapeyaphalaṃ labhet || 46 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye svāmipuṣkariṇītīrthamahimānuvarṇanaṃnāma caturdaśo'dhyāyaḥ || 14 ||
[Analyze grammar]