Chapter 63

[English text for this chapter is available]

sūta uvāca |
aśvatthalākṣāvahnau ca sarṣapānkesaraplutān |
juhvato maṃtramukhyaiśca balātibalasaṃjñakaiḥ || 1 ||
[Analyze grammar]

yāme tu prathame yāte kācinnārī samāyayau |
śoṇitāktaikavasanā mahoccordhvaśiroruhā || 2 ||
[Analyze grammar]

dāruṇākṣī śukladantī bhayasyāpi bhayaṃkarī |
sā ruroda mahārāvaṃ prāpya tāṃ homabhūmikām || 3 ||
[Analyze grammar]

tāṃ dṛṣṭvā cukṣubhe sadyo vijayo bhītimāniva |
barbarīkaśca nirbhītistasyāḥ saṃmukhamāyayau || 4 ||
[Analyze grammar]

tataḥ kaṇṭhaṃ samāśliṣya tasyā matimatāṃ varaḥ |
ruroda dviguṇaṃ vīro meghavannādayanbahu || 5 ||
[Analyze grammar]

taṃ dṛṣṭvā vismitā sā ca yāvanmuṃcati kartikām |
tāvanniṣpīḍite kaṃṭhe moktuṃ tasminna cāśakat || 6 ||
[Analyze grammar]

pīḍyamāne ca balinā kaṃṭhe tasyā muhurmuhuḥ |
mumuोca vividhāñchabdānvajrāhata ivācalaḥ || 7 ||
[Analyze grammar]

kṣaṇaṃ rāvāṃstato muktvā trāhi muñceti vaktyaṇu |
tataḥ kṛpālunā muktā pādayoḥ patitā'bravīt || 8 ||
[Analyze grammar]

śaraṇaṃ te prapannāsmi dāsī karmakarī tava |
mahājihveti māṃ viddhi rākṣasīṃ kāmarūpiṇīm || 9 ||
[Analyze grammar]

kāśīśmaśānanilayāṃ devadānavadarpahām |
dadāsi yadi me vīra durlabhāṃ prāṇadakṣiṇām || 10 ||
[Analyze grammar]

tatastapaścariṣyāmi sarvabhūtābhayapradā |
asminnarthe svadevasya śapathā me tathātmanaḥ || 11 ||
[Analyze grammar]

yadyetadvyatyayaṃ kuryāṃ bhasmībhūyāṃ tataḥ kṣaṇam |
evaṃ bruvāṇāṃ tāṃ vīro nigṛhya śapathairdṛḍham || 12 ||
[Analyze grammar]

mumoca sāpi saṃhṛṣṭā kṛcchrānmuktā yayau vanam |
so'pi vīraḥ khaṅgadhārī tatraivāvasthito'bhavat || 13 ||
[Analyze grammar]

tato madhyamarātrau ca garjitaṃ śrūyate mahat |
andhakāraṃ ca saṃjajñe tamoṃ'dhanarakaprabham || 14 ||
[Analyze grammar]

dadṛśe ca tataḥ śailaḥ śataśṛṃgo'tivistaraḥ |
nānāśilāḥ pramumuce nānāvṛkṣāṃśca socchrayān || 15 ||
[Analyze grammar]

nānānirjhara saṃghoṣaṃ vavṛṣe śoṇitaṃ vahu |
taṃ tathā nagamālokya nirbhīto bhaiminaṃdanaḥ || 16 ||
[Analyze grammar]

parvato dviguṇo bhūtvā parvataṃ sahasāplutaḥ |
tadābhijaghne saṃhṛtya parvataṃ svena bhūbhṛtā || 17 ||
[Analyze grammar]

tadā viśīrṇaḥ so'bhūcca parvato bhūmimaṃḍale |
tato yojanadehātmā śataśīrṣaḥ śatodaraḥ || 18 ||
[Analyze grammar]

vaktrairmuṃcanmahājvālāṃ repalendro'bhyadhāvata |
taṃ dhāvamānaṃ dṛṣṭvaiva barbarīko mahābalaḥ || 19 ||
[Analyze grammar]

vidhāya tādṛśaṃ rūpaṃ nardantaṃ cāpyadhāvata |
tato madhyamarātrau tī laghu citraṃ ca suṣṭhu ca || 20 ||
[Analyze grammar]

yuyudhāte bāṇajālairyathā prāvṛṣi toyadau |
chinnacāpau ca khaṅgābhyāṃ chinnakhaḍgau ca muṣṭibhiḥ || 21 ||
[Analyze grammar]

parvatāviva satpakṣau ciraṃ yuyudhatuḥ sthiram |
tataḥ kakṣe samutpāṭya bhrāmayitvā muhūrtakam || 22 ||
[Analyze grammar]

bhūmau pradharṣayāmāsa prasṛtaṃ ca mumoca ha |
cikṣepa cāgnikoṇe taṃ mahīsāgararodhasi || 23 ||
[Analyze grammar]

taddūre repalendrākhyaṃ grāmamadyāpi vartate |
evaṃ sa repalonāma vṛtratulyaparākramaḥ || 24 ||
[Analyze grammar]

nāthaḥ śmaśānasyāvantyā vighnakṛnnihato'bhavat |
taṃ nihatya punarvīro barbarīkaḥ sthito'bhavat || 25 ||
[Analyze grammar]

tatastṛtīyayāme ca pratīcyā diśa āyayau |
parvatābhā mahānādā pādaiḥ kampayatīva bhūḥ || 26 ||
[Analyze grammar]

duhadruhākhyāśvatarī meghabhraṣṭā taḍidyathā |
tāmāyāṃtīṃ tathā dṛṣṭvā sūryavaiśvānaraprabhām || 27 ||
[Analyze grammar]

upasṛtya javādbhaimī ruroha prahasanniva |
vegāttataḥ pradravatīṃ tuṇḍe prāhatya muṣṭibhiḥ || 28 ||
[Analyze grammar]

sthāpayāmāsa tatraiva tasthau sā cātipīḍitā |
tataḥ kruddhā mahārāvaṃ kṛtvāplutya duhadruhā || 29 ||
[Analyze grammar]

jagatyāmāśu cikṣepa barbarīkaṃ tathecchakam |
tato naditvā cātīva pādaghātamamuṃcata || 30 ||
[Analyze grammar]

pādau ca vīraḥ saṃgṛhya cikṣepa bhuvi līlayā |
tataḥ punaḥ samutthāya dhāvaṃtīṃ tāṃ nigṛhya saḥ || 31 ||
[Analyze grammar]

muṣṭinā pātayitvaiva daṃtānkaṃṭhamapīḍayat |
klinnaṃ vāsa ivāpīḍya prāṇānatyājayaddrutam || 32 ||
[Analyze grammar]

evaṃ sīkottarasthāne smaśānaikapado dbhavā |
śākinīnāmadhīśā sā barbarīkeṇa sūditā || 33 ||
[Analyze grammar]

hatvā tāṃ cāpi cikṣepa pratīcyāmeva līlayā |
duhadruhākhyamadyāpi tatra grāmaṃ sma vartate || 34 ||
[Analyze grammar]

tatastathaiva saṃtasthau barbarīko'bhirakṣaṇe |
tataścaturthe yāme ca prāptaḥ kṣapaṇako'dbhutaḥ || 35 ||
[Analyze grammar]

muṃḍī nagno mayūrāṇāṃ picchadhārī mahāvrataḥ |
provāca cedaṃ vacanaṃ hāhā kaṣṭamatīva bhoḥ || 36 ||
[Analyze grammar]

ahiṃsā paramo dharmastadagnirjvālyate kutaḥ |
hūyamāne yato vahnau sūkṣmajīvavadho mahān || 37 ||
[Analyze grammar]

śrutvedaṃ vacanaṃ tasya barbarīko'bravītsmayan |
vadane sarvadevānāṃ hūyamāne sma pāvake || 38 ||
[Analyze grammar]

anṛtaṃ bhāṣase pāpa śikṣāyogyo'si durmate |
ityuktvā sahasotpatya kakṣāmadhye sthiro'sya ca || 39 ||
[Analyze grammar]

dantānmuṣṭiprahāraiśca samāhatyābhyapātayat |
rudhirāvilavaktraṃ taṃ mumoca patitaṃ bhuvi || 40 ||
[Analyze grammar]

sa kṣaṇāccetanāṃ prāpya ghoradaityavapurdharaḥ |
bhayādbhaimeḥ pradudrāva guhāvivaramāviśat || 41 ||
[Analyze grammar]

bahuprabheti nagarī ṣaṣṭiyojanamāyatā |
tasyāṃ viveśa sahasā taṃ cānu barbarīkakaḥ || 42 ||
[Analyze grammar]

barbarīkaṃ tato dṛṣṭvā nādo'bhūcca palāśinām |
dhāvadhvaṃ hanyatāmeṣa chidyatāṃ bhidyatāmiti || 43 ||
[Analyze grammar]

tacchrutvā daityavīrāṇāṃ koṭayo nava bhīṣaṇāḥ |
nānāyudhadharā vīraṃ barbarīkamupādravan || 44 ||
[Analyze grammar]

dṛṣṭvā tānkoṭiśo daityānkruddho bhīmātmajātmajaḥ |
nimīlya sahasā netre teṣāṃ madhyamadhāvata || 45 ||
[Analyze grammar]

pādaghātaistataḥ kāṃścidbhujāghātaistathāparān |
hṛdayasyābhighātaiśca kṣaṇānninye yamakṣayam || 46 ||
[Analyze grammar]

yathā nalavanaṃ krruddhaḥ kuryādbhūmisamaṃ karī |
navakoṭīstathā jaghne saha tena palāśinā || 47 ||
[Analyze grammar]

tato nāgāḥ samāgamya vāsukipramukhāstadā |
tuṣṭuburvividhairvākyairūcuḥ suhṛdayaṃ ca te || 48 ||
[Analyze grammar]

nāgānāṃ paramaṃ kṛtyaṃ kṛtaṃ te bhaiminaṃdana |
palāśīnāma daityoyaṃ nīto yatsānugo yamam || 49 ||
[Analyze grammar]

anena hi vayaṃ vīra sānugena durātmanā |
pīḍitā vividhopāyaiḥ pātālādapyadhaḥ kṛtāḥ || 50 ||
[Analyze grammar]

varaṃ vṛṇīṣva tvaṃ tasmānnāgebhyo'bhimataṃ param |
varadāḥ sarva eva sma vayaṃ tubhyaṃ sutoṣitāḥ || 51 ||
[Analyze grammar]

suhṛdaya uvāca |
yadi deyo varo mahyaṃ tadenaṃ pravṛṇomyaham |
sarvavighnavinirmukto vijayaḥ siddhimāpnuyāt || 52 ||
[Analyze grammar]

tatastatheti taṃ procuḥ prahṛṣṭā vāyubhojanāḥ |
sa ca tebhyaḥ purīṃ dattvā nivṛtto nāgapūjitaḥ || 53 ||
[Analyze grammar]

vivarasya ca madhyena samāgacchanmahāprabham |
sarvaratnamayaṃ liṃgaṃ sthitaṃ kalpataroradhaḥ || 54 ||
[Analyze grammar]

arcyamānaṃ suvahnībhirnāgakanyābhiraikṣata |
tato'sau vismayāviṣṭo nāgakanyā hyapṛcchata || 55 ||
[Analyze grammar]

kenedaṃ sthāpitaṃ liṃgaṃ sūryavaiśvānaraprabham |
liṃgādapi caturdikṣu mārgāśceme tu kīdṛśāḥ || 56 ||
[Analyze grammar]

iti vīravacaḥ śrutvā bṛhatkaṭipayodharā |
savrīḍaṃ sasmitāpāṃganirmokṣamidamabravīt || 57 ||
[Analyze grammar]

sarvapannagarājena śeṣeṇa sumahātmanā |
tapa staptvā mahāliṃgamidamatra pratiṣṭhitam || 58 ||
[Analyze grammar]

darśanātsparśanāddhyānādarcanātsarvasiddhidam |
liṃgātpūrveṇa mārgoyaṃ yāti śrīparvataṃ bhuvi || 59 ||
[Analyze grammar]

elāpatreṇa vihito nāgānāṃ tatra prāptaye |
dakṣiṇena ca mārgo'yaṃ yāti śūrpārakaṃ bhuvi || 60 ||
[Analyze grammar]

karkoṭakena nāgena kṛto'yaṃ tatra prāptaye |
paścimena ca mārgo'yaṃ prabhāsaṃ yāti suprabham || 61 ||
[Analyze grammar]

airāvatena vihito nāgānāṃ gamanāya ca |
uttareṇa ca mārgoyaṃ yena yātuṃ bhavānsthitaḥ || 62 ||
[Analyze grammar]

guptakṣetre siddhaliṃgaṃ yāti śaktiguhā'kṛtaḥ |
vihitastakṣakeṇāsau yātuṃ tatra mahātmanā || 63 ||
[Analyze grammar]

itīdaṃ varṇitaṃ vīra vijñaptiḥ śrūyatāṃ mama |
ko bhavānadhunaiveto daityapṛṣṭha gato'bhavat |
adhunaiva tathaikākī samāyāto'tra no vada || 64 ||
[Analyze grammar]

vayaṃ ca sarvāste dāsyastvāṃ patiṃ pravṛṇīmahe |
asmābhiḥ sahitaḥ krīḍa vividhāsvatra bhūmiṣu || 65 ||
[Analyze grammar]

barbarīka uvāca |
ahaṃ kurukulotpannaḥ pāṃḍuputrasya pautrakaḥ |
barbarīka iti khyātastaṃ daityaṃ haṃtumāgataḥ || 66 ||
[Analyze grammar]

sa ca daityo hataḥ pāpaḥ punaryāsye mahītalam |
bhavatībhiśca me nāsti kṛtyaṃ bhobhoḥ kathaṃcana || 67 ||
[Analyze grammar]

brahmacārivrataṃ yasmādahaṃ satatamāsthitaḥ |
ityuktvābhyarcya talliṃgaṃ praṇipatya ca daṇḍavat || 68 ||
[Analyze grammar]

ūrdhvamācakrame vīraḥ kātaraṃ tābhirīkṣitaḥ |
tato bahiḥ samāgatya saprakāśaṃ mukhaṃ tadā || 69 ||
[Analyze grammar]

praharṣeṇaiva pūrvasyā vijayaṃ dadṛśe diśaḥ |
tasminkāle ca vijayaḥ karma sarvaṃ samāptavān || 70 ||
[Analyze grammar]

kāṃtyā sūryasamābhāsa ūrdhvamācakrame kṣaṇāt |
tato viyadgataṃ devaiḥ puṣpavarṣamabhūnmahat || 71 ||
[Analyze grammar]

jagurgaṃdharvamukhyāśca nanṛtuścāpsarogaṇāḥ |
vijayo barbarīkaṃ ca tato vacanamabravīt || 72 ||
[Analyze grammar]

tava prasādādvīreśa siddhiḥ prāptā mayātulā |
ciraṃ jīva ciraṃ naṃda ciraṃ vasa ciraṃ jaya || 73 ||
[Analyze grammar]

ata eva hi sādhṛnāṃ saṃgamicchaṃti sādhavaḥ |
auṣadhaṃ sarvadoṣāṇāṃ bhavetsatyaṃ gamo yataḥ || 74 ||
[Analyze grammar]

tvaṃ ca homasthitaṃ bhasma siṃdūrasadṛśaprabham |
niḥśalyaṃ savivarakaṃ pūryamāṇaṃ gṛhāṇa ca || 75 ||
[Analyze grammar]

akṣayyametatsaṃgrāme prathamaṃ te pramuṃcataḥ |
śatrūṇāṃ sthānakaṃ mṛtyordehaṃ dhvastaṃ kariṣyati || 76 ||
[Analyze grammar]

evaṃ sukhena vijayaḥ śatrūṇāṃ te bhaviṣyati || 77 ||
[Analyze grammar]

barbarīka uvāca |
upakuryānnirākāṃkṣo yaḥ sa sādhuritīryate |
sākāṃkṣamupakuryādyaḥ sādhutve tasya ko guṇaḥ || 78 ||
[Analyze grammar]

taddehi bhasma cānyasmai kenāpyartho na me'ṇvapi |
prasādasumukhāṃ dṛṣṭiṃ vinā nānyadvṛṇomi te || 79 ||
[Analyze grammar]

devā ūcuḥ |
kurūṇāṃ pāṃḍavānāṃ ca bhaviṣyati mahānraṇaḥ |
tato bhūmisthitaṃ bhasma prāpsyaṃti yadi kauravāḥ || 80 ||
[Analyze grammar]

mahānanartho bhavitā pāṃḍavānāṃ tataḥ sphuṭam |
tasmādgṛhāṇa tvaṃ bhasma sopi cakre tatho vacaḥ || 81 ||
[Analyze grammar]

devībhiḥ sahitā devāḥ saṃmānya vijayaṃ ca te |
siddhaiśvaryaṃ dadustasmai siddhaseneti nāma ca || 82 ||
[Analyze grammar]

evaṃ sa vijayo vipraḥ siddhiṃ lebhe sudurlabhām |
barbarīkaśca kṛtvaitaddevībhaktirato'vasat || 83 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṃḍe kāryasiddhivarṇanaṃnāma triṣaṣṭitamo'dhyāyaḥ || 63 ||
[Analyze grammar]