Chapter 64

[English text for this chapter is available]

evaṃ tatra sthite tīre devyārādhanatatpare |
saptaliṃgārcanarate bhīmanandananandane || 1 ||
[Analyze grammar]

tataḥ kālena kenāpi pāṃḍavā dyūtanirjitāḥ |
tatrājagmuśca kramatastīrthasnānakṛte bhuvam || 2 ||
[Analyze grammar]

prāgeva caṃḍikāṃ devīṃ kṣetrādīśānataḥ sthitām |
āsedurmārgakhinnāste draupadīpaṃcamāstadā || 3 ||
[Analyze grammar]

tatraiva copaviṣṭo'bhūttadānīṃ caṃḍikāgaṇaḥ |
barbarīkaśca tānvīrānsamāyātānapaśyata || 4 ||
[Analyze grammar]

paraṃ nāsau veda pāṇḍūnpāṇḍavāstaṃ ca no viduḥ |
ājanma yasmānnaivābhūtpāṇḍūnāṃ cāsya saṃgamaḥ || 5 ||
[Analyze grammar]

tataḥ praviśya vai tasmindevīmāsādya pāṃḍavāḥ |
piṃḍakādyaṃ tatra muktvā tṛṣā praikṣi jalaṃ tadā || 6 ||
[Analyze grammar]

tato bhīmaḥ kuṇḍamadhyaṃ jalaṃ pātuṃ viveśa ha |
praviśaṃtaṃ ca taṃ prāha yudhiṣṭhira idaṃ vacaḥ || 7 ||
[Analyze grammar]

uddhṛtya bhīma toyaṃ tvaṃ pādau prakṣālya bho bahiḥ |
tataḥ pibā'nyathā doṣo mahāṃstvāmupapatsyate || 8 ||
[Analyze grammar]

etadrājño vaco bhīmastṛṣā vyākulalocanaḥ |
aśrutvaiva viveśāsau kuṇḍamadhye jalecchayā || 9 ||
[Analyze grammar]

sa ca dṛṣṭvā jalaṃ pātuṃ tatraiva kṛtaniścayaḥ |
mukhaṃ hastau ca caraṇau kṣālayāmāsa śuddhaye || 10 ||
[Analyze grammar]

yataḥ pītaṃ jalaṃ puṃsāmaprakṣālya ca yadbhavet |
pretāḥ piśācāstadrūpaṃ saṃkramya prapibaṃti tat || 11 ||
[Analyze grammar]

evaṃ prakṣālayāne ca pādau tatra vṛkodare |
uparisthastadā prāha satyaṃ suhṛdayo vacaḥ || 12 ||
[Analyze grammar]

durmate bhoḥ kimetattvaṃ kuruṣe pāpaniścayaḥ |
devīkuṇḍe kṣālayasi mukhaṃ pādau karau ca yat || 13 ||
[Analyze grammar]

yato devī sadānena jalena snāpyate mayā |
datra prakṣipaṃstoyaṃ malapāpānna bibhyasi || 14 ||
[Analyze grammar]

malāktatoyaṃ yannāma aspṛśyaṃ tannarairapi |
kuto devaiśca tatpāpaṃ spṛśyate tattvato vada || 15 ||
[Analyze grammar]

śīghraṃ ca tvaṃ niḥsarāsmātkuṇḍādbhūtvā bahiḥ piba |
yadyevaṃ pāpa mūḍho'si tīrtheṣu bhramase kutaḥ || 16 ||
[Analyze grammar]

bhīma uvāca |
kimetadbhāṣase krūra paruṣaṃ rākṣasādhama |
yatastoyāni jaṃtūnāmupabho gārthameva hi || 17 ||
[Analyze grammar]

tīrtheṣu kāryaṃ snānaṃ cetyuktaṃ munivarairapi |
aṃgaprakṣālanaṃ snānamuktaṃ māṃ niṃdase kutaḥ || 18 ||
[Analyze grammar]

yadi na kriyate pānamaṃgaprakṣālanaṃ tathā |
tatkimarthaṃ pūrtadharmāḥ kriyante dharmaśālibhiḥ || 19 ||
[Analyze grammar]

suhṛdaya uvāca |
snātavyaṃ tīrthamukhyeṣu satyametanna saṃśayaḥ |
careṣu kiṃ tu saṃviśya sthāvareṣu bahiḥ sthitaḥ || 20 ||
[Analyze grammar]

sthāvareṣvapi saṃviśya tanna snānaṃ vidhīyate |
na yatra devasnānārthaṃ bhaktaiḥ saṃgṛhyate jalam || 21 ||
[Analyze grammar]

yacca hastaśatādūrdhvaṃ sarastatra vidhīyate |
saṃveśe'pi kramaścāyaṃ pādau prakṣālya yadbahiḥ || 22 ||
[Analyze grammar]

tataḥ snānaṃ prakartavyamanyathā doṣa ucyate |
kiṃ na śrutastvayā proktaḥ ślokaḥ padmabhuvā purā || 23 ||
[Analyze grammar]

malaṃ mūtraṃ purīṣaṃ ca śleṣma niṣṭhīnāśru ca |
gaṃḍūṣāścaiva muñcati ye te brahmahaṇaiḥ samāḥ || 24 ||
[Analyze grammar]

tasmānniḥsara śīghraṃ tvaṃ yadyevamajitendriyaḥ |
tatkimarthaṃ durācāra tīrtheṣvaṭasi bāliśa || 25 ||
[Analyze grammar]

yasya hastau ca pādau ca manaścaiva susaṃyatam |
nirvikārāḥ kriyāḥ sarvāḥ sa hi tīrthaphalaṃ labhet || 26 ||
[Analyze grammar]

bhīma uvāca |
adharmo vāpi dharmo'stu nirgaṃtuṃ naiva śaknuyām |
kṣudhā tṛṣā mayā nityaṃ vārituṃ naiva śakyate || 27 ||
[Analyze grammar]

suhṛdaya uvāca |
jīvitārthe bhavānkasmātpāpaṃ prakurute vada |
kiṃ na śrutastvayā ślokaḥ śibinā yaḥ samīritaḥ || 28 ||
[Analyze grammar]

muhūrtamapi jīveta naraḥ śuklena karmaṇā |
na kalpamapi jīveta lokadvayavirodhinā || 29 ||
[Analyze grammar]

bhīma uvāca |
kākāraveṇa te mahyaṃ karṇau badhiratāṃ gatau |
pāsyāmyeva jalaṃ cātra kāmaṃ vilapa śuṣya vā || 30 ||
[Analyze grammar]

suhṛdaya uvāca |
kṣatriyāṇāṃ kule jātastvahaṃ dharmābhirakṣiṇām |
tasmātte pātakaṃ kartuṃ na dāsyāmi kathaṃcana || 31 ||
[Analyze grammar]

tadvarākātha śīghraṃ tvamasmātkuṃḍādviniḥsara || 32 ||
[Analyze grammar]

iṣṭakāśakalaiḥ śīghraṃ cūrṇayiṣye'nyathā śiraḥ |
ityuktvā ceṣṭakāṃ gṛhya mumoca śirasaḥ prati || 33 ||
[Analyze grammar]

bhīmaśca vaṃcayitvā tāmutplutya bahirāvrajat |
bhartsayaṃtau tataścobhāvanyonyaṃ bhīmavikramau || 34 ||
[Analyze grammar]

yuyudhāte pralaṃbābhyāṃ bāhubhyāṃ yuddhapāragau |
vyūḍhoraskau dīrghabhujau niyuddhakuśalāvubhau || 35 ||
[Analyze grammar]

muṣṭibhiḥ pārṣṇighātaiśca jānubhiścābhijaghnatuḥ |
tato muhūrtātkauravyaḥ paryahīyata pāṃḍavaḥ || 36 ||
[Analyze grammar]

hīyamānastato bhīma udyato'bhūtpunaḥ punaḥ |
ahīyata tato'pyaṃga vavṛdhe barbarīkakaḥ || 37 ||
[Analyze grammar]

tato bhīmaṃ samutpāṭya barbarīko balādiva |
niṣpipeṣa tataḥ kruddhastadadbhutamivābhavat || 38 ||
[Analyze grammar]

mūrchitaṃ caivamādāya visphurantaṃ punaḥpunaḥ |
sāgarāya pracalitaḥ kṣeptuṃ tatra mahāṃbhasi || 39 ||
[Analyze grammar]

dadṛśuḥ pāṃḍavā naitaddevyā nayanayaṃtritāḥ || 40 ||
[Analyze grammar]

tathā gṛhīte kuruvīramukhye vīreṇa tenādbhutavikrameṇa |
āścaryamāsīddivi devatānāṃ devībhirākāśatale nirīkṣya tam || 41 ||
[Analyze grammar]

sāgarasya tatastīre barbarīkaṃ gataṃ tadā |
nirīkṣya bhagavānrudro viyatsthaḥ samabhāṣata || 42 ||
[Analyze grammar]

bhobho rākṣasaśārdūla barbarīka mahābala |
muṃcainaṃ bharataśreṣṭhaṃ bhīmaṃ tava pitāmaham || 43 ||
[Analyze grammar]

ayaṃ hi tīrthayātrāyāṃ vicaranbhrātṛbhiryutaḥ |
kṛṣṇayā cāpyadastīrthaṃ snātumevābhyupāyayau || 44 ||
[Analyze grammar]

sammānaṃ sarvathā tasmādarhaḥ kauravanaṃdanaḥ |
apāpo vā sapāpo vā pūjya eva pitāmahaḥ || 45 ||
[Analyze grammar]

sūta uvāca |
iti rudravacaḥ śrutvā sahasā taṃ vimucya saḥ |
nyapatatpādayorhā dhikkaṣṭaṃ kaṣṭaṃ ca prāha saḥ || 46 ||
[Analyze grammar]

kṣamyatāṃ kṣamyatāṃ ceti punaḥ punaravocata |
śiraśca tāḍayansvīyaṃ ruroda ca muhurmuhuḥ || 47 ||
[Analyze grammar]

taṃ tathā pariśocaṃtaṃ muhyamānaṃ muhurmuhuḥ |
bhīmasenaḥ samāliṃgya āghrāya ca vaco'bravīt || 48 ||
[Analyze grammar]

vayaṃ tvāṃ naiva jānīmastvaṃ cāsmāñjanmakālataḥ |
atra vāsaśca te putra bhaimeḥ kṛṣṇācca saṃśrutaḥ || 49 ||
[Analyze grammar]

paraṃ no vismṛtaṃ sarvaṃ nānāduḥkhaiḥ pramuhyatām |
duḥkhitānāṃ yataḥ sarvā smṛtirluptā bhavetsphuṭam || 50 ||
[Analyze grammar]

tadasmākamidaṃ duḥkhaṃ sarvakālavidhānataḥ |
mā śocastvaṃ ca tanaya na te doṣo'sti cāṇvapi || 51 ||
[Analyze grammar]

yataḥ sarvaḥ kṣatriyasya daṃḍyo vipathisaṃsthi taḥ |
ātmāpidaṃḍyaḥ sādhūnāṃ pravṛttaḥ kupathādyadi || 52 ||
[Analyze grammar]

pitṛmātṛsuhṛdbhrātṛputrādīnāṃ kimucyate |
atīva mama harṣo'yaṃ dhanyohaṃ pūrvajāśca me || 53 ||
[Analyze grammar]

yasya tvīdṛśakaḥ pautro dharmajño dharmapālakaḥ |
varārhastvaṃ praśaṃsārho bhavānyeṣāṃ satāṃ tathā || 54 ||
[Analyze grammar]

tasmācchokaṃ vihāyemaṃ svastho bhavi tumarhasi || 55 ||
[Analyze grammar]

barbarīka uvāca |
pāpaṃ māṃ tātatāta tvaṃ brahmaghnādapi kutsitam |
apraśasyaṃ nārhasīha draṣṭuṃ spraṣṭumapi prabho || 56 ||
[Analyze grammar]

sarveṣāmeva pāpānāṃ niṣkṛtiḥ procyate budhaiḥ |
pitrorabhaktasya punarniṣkṛtirnaiva vidyate || 57 ||
[Analyze grammar]

tadyena dehena mayā tātatāto'bhipīḍitaḥ |
tattvameva samutsrakṣye mahīsāgarasaṃgame || 58 ||
[Analyze grammar]

maivaṃ bhaveyamanyeṣu api janmasu pātakī |
na māmasmādabhiprāyādarhaḥ ko'pi nivartitum || 59 ||
[Analyze grammar]

yatoṃ'śena vilupyeta prāyaścittānnivārakaḥ |
evamuktvā samutplutya yayau caivārṇavaṃ balī || 60 ||
[Analyze grammar]

samudro'pi cakaṃpe ca kathamenaṃ nihanmyaham |
tataḥ siddhāṃbikāyāśca devyastatra caturdaśa || 61 ||
[Analyze grammar]

samāliṃgya ca saṃsthāpya rudreṇa sahitā jaguḥ |
ajñātavihite pāpe nāsti vīreṃdra kalmaṣam || 62 ||
[Analyze grammar]

śāstreṣūktamidaṃ vākyaṃ nānyathā kartumarhasi |
amuṃ ca pṛṣṭhalagnaṃ tvaṃ paśya bhoḥ svaṃ pitāmaham || 63 ||
[Analyze grammar]

putraputreti bhāṣaṃtamanu tvā maraṇonmukham |
adhunā cetsvakaṃ dehaṃ vīra tvaṃ parityakṣyasi || 64 ||
[Analyze grammar]

tatastyakṣyati bhīmo'pi pātakaṃ tanmahattava |
evaṃ jñātvā dhāraya tvaṃ svaśarīraṃ mahāmate || 65 ||
[Analyze grammar]

atha cettyaktukāmastvaṃ tatrāpi vacanaṃ śṛṇu |
svalpenaiva ca kālena kṛṣṇāddevakinaṃdanāt || 66 ||
[Analyze grammar]

dehapātastava proktastaṃ pratīkṣa yadīccha si |
yato viṣṇukarādvatsa dehapāto viśiṣyate || 67 ||
[Analyze grammar]

tasmātpratīkṣa taṃ kālamasmākaṃ prārthitena ca |
evamukto nivavṛte barbarīko'pi durmanāḥ || 68 ||
[Analyze grammar]

rudraṃ devīśca cāmuṃḍāṃ sopālaṃbhaṃ vaco'bravīt |
tvameva devi jānāsi rakṣyate śārṅgadhanvinā || 69 ||
[Analyze grammar]

pāṃḍavā bhūmilābhārthe tatte kasmādupekṣitam |
tvayā ca samupāgatya rakṣito'yaṃ vṛkodaraḥ || 70 ||
[Analyze grammar]

devyuvāca |
ahaṃ ca rakṣayiṣyāmi svabhaktaṃ kṛṣṇamṛtyutaḥ |
yasmācca caṃḍikākṛtye kṛto'nena mahāraṇaḥ |
tasmāccaṃḍilanāmnāyaṃ viśvapūjyo bhaviṣyati || 71 ||
[Analyze grammar]

evamuktvā gatāḥ sarve devā devyastvadṛśyatām |
bhīmo'pi taṃ samādāya pāṃḍubhyaḥ sarvamūcivān || 72 ||
[Analyze grammar]

vismitāḥ pāṃḍavāstaṃ ca pūjayitvā punaḥ punaḥ |
yathoktavidhinā cakrustīrthasnānamataṃdritāḥ || 73 ||
[Analyze grammar]

bhīmopi yatra rudreṇa mokṣitastatra suprabham |
liṃgaṃ saṃsthāpayāmāsa bhīmeśvaramiti śrutam || 74 ||
[Analyze grammar]

jyeṣṭhamāse kṛṣṇapakṣe caturdaśyāmupoṣitaḥ |
rātrau saṃpūjya bhīmeśaṃ janmapāpādvimucyate || 75 ||
[Analyze grammar]

yathaiva liṃgāni supūjitāni saptātra mukhyāni mahāphalāni |
bhīmeśvaraṃ liṃgamidaṃ tathaiva samastapāpāpaharaṃ supūjyam || 76 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe bhīmeśvaramāhātmyavarṇanaṃnāma catuḥṣaṣṭitamo'dhyāyaḥ || 64 ||
[Analyze grammar]