Chapter 27

[English text for this chapter is available]

| nārada uvāca |
tato nirupamaṃ divyaṃ sarvaratnamayaṃ śubham |
īśānanirmitaṃ sākṣātsaha devyāviśadgṛham || 1 ||
[Analyze grammar]

tatrāsau maṃdaragirau saha devyā bhagākṣahā |
prāsāde tatra codyāne reme saṃhṛṣṭamānasaḥ || 2 ||
[Analyze grammar]

etasminnaṃtare devāstārakeṇātipīḍitāḥ |
protsāhitena cātyarthaṃ mayā kalicikīrṣuṇā || 3 ||
[Analyze grammar]

āsādya te bhavaṃ devaṃ tuṣṭuburbahudhā stavaiḥ |
etasminnaṃtare devī prodvartayata gātrakam || 4 ||
[Analyze grammar]

udvartanamalenātha naraṃ cakre gajānanam |
devānāṃ saṃstavaiḥ puṇyaiḥ kṛpayābhipariplutā || 5 ||
[Analyze grammar]

putretyuvāca taṃ devī tataḥ saṃhṛṣṭamānasā |
etasminnaṃtare śarvastatrāgatya vaco'bravīt || 6 ||
[Analyze grammar]

putrastavāyaṃ girije śrṛṇu yādṛgbhaviṣyati |
vikrameṇa ca vīryeṇa kṛpayā sadṛśo mayā || 7 ||
[Analyze grammar]

yathāhaṃ tādṛśaścāsau putraste bhavitā guṇaiḥ |
ye ca pāpā durācārā vedāndharmaṃ dviṣaṃti ca || 8 ||
[Analyze grammar]

teṣāmāmaraṇāṃtāni vighnānyeṣa kariṣyati |
ye ca māṃ naiva manyaṃte viṣṇuṃ vāpi jagadgurum || 9 ||
[Analyze grammar]

vighnitā vighnarājena te yāsyaṃti mahattamaḥ |
teṣāṃ gṛheṣu kalahaḥ sadā naivopasāmyati || 10 ||
[Analyze grammar]

putrasya tava vighnena samūlaṃ tasya naśyati |
yeṣāṃ na pūjyāḥ pūjyaṃte krodhāsatyaparāśca ye || 11 ||
[Analyze grammar]

raudrasāhasikā ye ca teṣāṃ vighnaṃ kariṣyati |
śrutidharmāñjñātidharmānpālayaṃti gurūṃśca ye || 12 ||
[Analyze grammar]

kṛpālavo gatakrodhāsteṣāṃ vighnaṃ hariṣyati |
sarve dharmāśca karmāṇi tathā nānāvidhāni ca || 13 ||
[Analyze grammar]

savighnāni bhivaṣyaṃti pūjayāsya vinā śubhe |
evaṃ śrutvā umā prāha evamastviti śaṃkaram || 14 ||
[Analyze grammar]

tato bṛhattanuḥ so'bhūttejasā dyotayandiśaḥ |
tato gaṇaiḥ samaṃ śarvaḥ surāṇāṃ pradadau ca tam |
yāvattāra kahaṃtā vo bhavettāvadayaṃ prabhuḥ || 15 ||
[Analyze grammar]

tato vighnapatirdevaiḥ saṃstutaḥ pramatārtihā |
cakāra teṣāṃ kṛtyāni vighnāni ditijanmanām || 16 ||
[Analyze grammar]

pārvatī ca punardevī putratve parikalpya ca |
aśokasyāṃkuraṃ vārbhiravarddhayata svādṛtaiḥ || 17 ||
[Analyze grammar]

saptarṣīnatha cāhūya saṃskāramaṃgalaṃ taroḥ |
kārayāmāsa tanvaṃgī tatastāṃ munayo'bruvan || 18 ||
[Analyze grammar]

tvayaiva darśite mārge maryādāṃ kartumarhasi |
kiṃ phalaṃ bhavitā devi kalpitaistaruputrakaiḥ || 19 ||
[Analyze grammar]

devyuvāca |
yo vai nirudake grāme kūpaṃ kārayate budhaḥ |
yāvattoyaṃ bhavetkūpe tāvatsvarge sa modate || 20 ||
[Analyze grammar]

daśakūpasamāvāpī daśavāpī samaṃ saraḥ |
daśasaraḥsamā kanyā daśakanyāsamaḥ kratuḥ || 21 ||
[Analyze grammar]

daśakratusamaḥ putro daśaputrasamo drumaḥ || 22 ||
[Analyze grammar]

eṣaiva mama maryādā niyatā lokabhāvinī |
jīrṇoddhāre kṛte vāpi phalaṃ taddviguṇaṃ matam || 23 ||
[Analyze grammar]

iti gaṇeśotpattiḥ |
tataḥ kadācidbhagavānumayā saha maṃdare |
maṃdire harṣajanane kaladhautamaye śubhe || 24 ||
[Analyze grammar]

prakīrṇakusumāmodamahālikulakūjite |
kiṃnarodgītasaṃgīta pratiśabditamadhyake || 25 ||
[Analyze grammar]

krīḍāmayūrairhasaiśca śrutaiścaivābhinādite |
mauktikairvividha ratnairvinirmitagavākṣake || 26 ||
[Analyze grammar]

tatra puṇyakathābhiśca krīḍato rubhayostayoḥ |
prādurabhūnmahāñchabdaḥ pūritāṃbaragocaraḥ || 27 ||
[Analyze grammar]

taṃ śrutvā kautukāddevī kimetaditi śaṃkaram |
paryapṛcchacchubhatanūrharaṃ vismayapūrvakam || 28 ||
[Analyze grammar]

tāmāha devīṃ giriśo dṛṣṭapūrvāstu te tvayā |
ete gaṇā me krīḍaṃti śaile'smiṃstvatpriyāḥ śubhe || 29 ||
[Analyze grammar]

tapasā brahmacaryeṇa kleśena kṣetrasādhanaiḥ |
yairahaṃ toṣitaḥ pṛthvyāṃ ta ete manujottamāḥ || 30 ||
[Analyze grammar]

matsamīpamanuprāptā mama lokaṃ varānane |
carācarasya jagataḥ sṛṣṭisaṃhāraṇakṣamāḥ || 31 ||
[Analyze grammar]

vinaitānnaiva me prītirnaibhirvirahito rame |
ete ahamahaṃ caite tānetānpasya pārvati || 32 ||
[Analyze grammar]

ityuktā vismitā devī dadṛśe tāngavākṣake |
sthitā padmapalāśākṣī mahādevena bhāṣitā || 33 ||
[Analyze grammar]

kecitkṛśā hrasvadīrghāḥ kecitsthūlamahodarāḥ |
vyāghrebhameṣājamukhā nānāprāṇimahāmukhāḥ || 34 ||
[Analyze grammar]

vyāghracarmaparīdhānā nagnā jvālāmukhāḥ pare |
gokarṇā gajakarṇāśca bahupādamukhekṣaṇāḥ || 35 ||
[Analyze grammar]

vicitravāhanāścaiva nānāyudhadharāstathā |
gītavāditratattvajñāḥ sattvagītarasapriyāḥ || 36 ||
[Analyze grammar]

tāndṛṣṭvā pārvatī prāha katisaṃkhyābhidhāstvamī || 37 ||
[Analyze grammar]

śrīśaṃkara uvāca |
asaṃkhye yāstvamī devī asaṃkhyeyābhidhāstathā |
jagadāpūritaṃ sarvametairbhīmairmahābalaiḥ || 38 ||
[Analyze grammar]

siddhakṣetreṣu rathyāsu jīrṇodyāneṣu veśmasu |
dānavānāṃ śarīreṣu bāleṣūnmattakeṣu ca || 39 ||
[Analyze grammar]

ete viśati muditā nānāhāravihāriṇaḥ |
ūṣmapāḥ phenapāścaiva dhūmrapā madhupāyinaḥ |
madāhārāḥ sarvabhakṣyāstathānye cāpyabhojanāḥ || 40 ||
[Analyze grammar]

gītanṛtyopahārāśca nānāvādyaravapriyāḥ |
anaṃtatvādamīṣāṃ ca vaktuṃ śakyā na vai guṇāḥ || 41 ||
[Analyze grammar]

śrīdevyuvāca |
manaḥśilena kalkena ya eṣa cchuritānanaḥ |
tejasā bhāskarākāro rūpeṇa sadṛśastava || 42 ||
[Analyze grammar]

ākarṇyākarṇya te deva gaṇairgītānmahāguṇān |
muhurnṛtyati hāsyaṃ ca vidadhāti muhurmuhuḥ || 43 ||
[Analyze grammar]

sadāśivaśivetyevaṃ vihvalo vakti yo muhuḥ |
dhanyo'mīdṛśī yasya bhaktistvayi maheśvare || 44 ||
[Analyze grammar]

enaṃ vijñātumicchāmi kiṃnāmāsau gaṇastava |
śrīśaṃkara uvāca |
sa eṣa vīraka devī sadā medrisute priyaḥ || 45 ||
[Analyze grammar]

nānāścaryaguṇādhāraḥ pratīhāro matoṃ'bike |
devyuvāca |
īdṛśasya sutasyāpi mamo'kaṃṭhā purāṃtaka || 46 ||
[Analyze grammar]

kadāhamīdṛśaṃ putraṃ lapsyāmyānaṃdadāyakam |
śarva uvāca |
eṣa eva sutastestu yāvadīdṛkparo bhavet || 47 ||
[Analyze grammar]

ityuktā vijayāṃ prāha śīghramānaya vīrakam |
vijayā ca tato gatvā vīrakaṃ vākyamabravīt || 48 ||
[Analyze grammar]

ehi vīraka te devī girijā toṣitā śubhā |
tvamamāhvayati sā devī bhavasyānumate svayam || 49 ||
[Analyze grammar]

ityuktaḥ saṃbhramayuto mukhaṃ saṃmārjya pāṇinā |
devyāḥ samīpamāgacchajjayayā'nugataḥ śanaiḥ || 50 ||
[Analyze grammar]

taṃ dṛṣṭvā girijā prāha girāmadhuravarṇayā |
ehyehi putra dattastvaṃ bhavena mama putrakaḥ || 51 ||
[Analyze grammar]

ityukto daṃḍavaddevīṃ praṇamyāvasthitaḥ puraḥ |
mātā tatastamāliṃgya kṛtvotsaṃge ca vīrakam || 52 ||
[Analyze grammar]

cucuṃba ca kapole taṃ gātrāṇi ca pramārjayat |
bhūṣayāmāsa divyaistaṃ svayaṃ nānāvibhūṣaṇaiḥ || 53 ||
[Analyze grammar]

evaṃ saṃkalpya taṃ putraṃ lālayitvā umāciram |
uvāca putra krīḍeti gaccha sārdhaṃ gaṇairiti || 54 ||
[Analyze grammar]

tataścikrīḍa madhye sa gaṇānāṃ pārvatīsutaḥ |
muhurmuhuḥ svamanasi stuvanbhaktiṃ sa śāṃkarīm || 55 ||
[Analyze grammar]

praṇamya sarvabhūtāni prārthayāmyasmi duṣkaram |
bhaktyā bhajadhvamīśānaṃ yasyā bhakteridaṃ phalam || 56 ||
[Analyze grammar]

krīḍituṃ vīrake yāte tato devī ca pārvatī |
nānākathābhiscikrīḍa punareva jaṭābhṛtā || 57 ||
[Analyze grammar]

tato girisutākaṇṭhe kṣiptabāhurmaheśvaraḥ |
tapasastu viśeṣārthaṃ narma devīṃ kilābravīt || 58 ||
[Analyze grammar]

sa hi gauratanuḥ śarvo viśeṣācchaśiśobhitaḥ |
raṃjitā ca vibhāvaryā devī nīlotpalacchaviḥ || 59 ||
[Analyze grammar]

śarva uvāca |
śarīre mama tanvaṃgī site bhāsyasitadyutiḥ |
bhujaṃgīvāsitā śubhre saṃśliṣṭā candane tarau || 60 ||
[Analyze grammar]

caṃdrajyotsnābhisaṃpṛktā tāmasī rajanī yathā |
rajanī vā site pakṣe dṛṣṭidoṣaṃ dadāsi me || 61 ||
[Analyze grammar]

ityuktā girijā tena kaṇṭhaṃ śarvādvimucya sā |
uvāca koparaktākṣī bhṛkuṭīvikṛtānanā || 62 ||
[Analyze grammar]

svakṛtena janaḥ sarvo janena paribhūyate |
avaśyamarthī prāpnoti khaṇḍanāṃ śaśikhaṃḍabhṛt || 63 ||
[Analyze grammar]

tapobhirdīptacaritairyattvāṃ prārthitavatyaham |
tasya me niyamasyaivamavamānaḥ padepade || 64 ||
[Analyze grammar]

naivāhaṃ kuṭilā śarva viṣamā na ca dhūrjaṭe |
svadoṣaistvaṃ gataḥ kṣāṃtiṃ tathā doṣākaraśriyaḥ || 65 ||
[Analyze grammar]

nāhaṃ muṣṇāmi nayane netrahaṃtā bhavānbhava |
bhagastatte vijānāti tathaivedaṃ jagattrayamā || 66 ||
[Analyze grammar]

mūrdhni śūlaṃ janayase svairdoṣairmāmadikṣipan |
yattvaṃ māmāha kṛṣṇeti mahākālo'si viśrutaḥ || 67 ||
[Analyze grammar]

yāsyāmyahaṃ parityaktumātmānaṃ tapasā girim |
jīvaṃtyā nāsti me kṛtyaṃ dhūrtena paribhūtayā || 68 ||
[Analyze grammar]

niśamya tasyā vacanaṃ kopatīkṣṇākṣaraṃ bhavaḥ |
uvācātha ca saṃbhrāṃto durjñeyacarito haraḥ || 69 ||
[Analyze grammar]

na tattvajñāsi girije nāhaṃ niṃdāparastava |
cāṭūktibuddhyā kṛtavāṃsta vāhaṃ narmakīrtanam || 70 ||
[Analyze grammar]

vikalpaḥ svacchacitteti girijaiṣā mama priyā |
prāyeṇa bhūtiliptānāmanyathā ciṃtitā hṛdi || 71 ||
[Analyze grammar]

asmādṛśānāṃ kṛṣṇāṃgi pravartaṃte'nyathā giraḥ |
yadyevaṃ kupitā bhīru na te vakṣyāmyahaṃ punaḥ || 72 ||
[Analyze grammar]

narmavādī bhaviṣyāmi jahi kopaṃ sucismite |
śirasā praṇataste'haṃ racitaste mayāñjaliḥ || 73 ||
[Analyze grammar]

dīnenāpyapamānena niṃditā nami vikriyām |
varamasmi vinamro'pi na tvaṃ devi guṇānvitā || 74 ||
[Analyze grammar]

ityanekaiścāṭuvākyaiḥ sūktairdevena bodhitā |
kopaṃ tīvraṃ na tatyāja satī marmaṇi ghaṭṭitā || 75 ||
[Analyze grammar]

avaṣṭabdhāvatha kṣiptvā pādau śaṃkarapāṇinā |
viparyastālakā vegādgantumaicchata śailajā || 76 ||
[Analyze grammar]

tasyāṃ vrajantyāṃ kopena punarāha purāṃtakaḥ |
satyaṃ sarvairavayavaiḥ suteti sadṛśī pituḥ || 77 ||
[Analyze grammar]

himācalasya śrṛṃgaistairmeghamālākulairmanaḥ |
tathā duravāgāhyo'sau hṛdayebhyastavāśayaḥ || 78 ||
[Analyze grammar]

kāṭhinyaṃ kaṣṭamasmiṃste vanebhyo bahudhā gatam |
kuṭilatvaṃ nadībhyaste duḥsevyatvaṃ himādapi || 79 ||
[Analyze grammar]

saṃkrāṃtaṃ sarvamevaitattava devī himācalāt |
ityuktā sā punaḥ prāha giriśaṃ sailajā tadā || 80 ||
[Analyze grammar]

kopakaṃpitadhūmrāsyā prasphuraddaśanacchadā |
mā śarvātmopamānena niṃda tvaṃ guṇino janān || 81 ||
[Analyze grammar]

tavāpi duṣṭasaṃparkātsaṃkrāṃtaṃ sarvamevahi |
vyālebhyo'nekajihvatvaṃ bhasmanaḥ snehavandhyatā || 82 ||
[Analyze grammar]

hṛtkāluṣyaṃ śaśāṃkātte durbodhatvaṃ vṛṣādapi |
athavā bahunoktena alaṃ vācā śrameṇa me || 83 ||
[Analyze grammar]

śmaśānavāsa āsīstvaṃ nagnatvānna tava trapā |
nirghṛṇatvaṃ kapālitvādevaṃ kaḥ śaknuyāttavaṃ || 84 ||
[Analyze grammar]