Chapter 12

[English text for this chapter is available]

|| sanatkumāra uvāca |
pānīyadānaṃ paramaṃ dānānāmuttamaṃ sadā |
sarveṣāṃ jīvapuṃjānāṃ tarpaṇaṃ jīvanaṃ smṛtam || 1 ||
[Analyze grammar]

prapādānamataḥ kuryātsusnehādanivāritam |
jalāśrayavinirmāṇaṃ mahānandakaraṃ bhavet || 2 ||
[Analyze grammar]

iha loke pare vāpi satyaṃ satyaṃ na saṃśayaḥ |
tasmādvāpīśca kūpāṃśca taḍāgānkārayennaraḥ || 3 ||
[Analyze grammar]

arddhaṃ pāpasya harati puruṣasya vikarmaṇaḥ |
kūpaḥ pravṛttapānīyaḥ supravṛttasya nityaśaḥ || 4 ||
[Analyze grammar]

sarvaṃ tārayate vaṃśaṃ yasya khāte jalāśaye |
gāvaḥ pibaṃti viprāśca sādhavaśca narāssadā || 5 ||
[Analyze grammar]

nidāghakāle pānīyaṃ yasya tiṣṭhatyavāritam |
sudurgaṃ viṣamaṃ kṛcchraṃ na kadācidavāpyate || 6 ||
[Analyze grammar]

taḍāgānāṃ ca vakṣyāmi kṛtānāṃ ye guṇāḥ smṛtā |
triṣu lokeṣu sarvatra pūjito yastaḍāgavān || 7 ||
[Analyze grammar]

athavā mitrasadane maitraṃ mitrārtivarjitam |
kīrtisaṃjananaṃ śreṣṭhaṃ taḍāgānāṃ niveśanam || 8 ||
[Analyze grammar]

dharmasyārthasya kāmasya phalamāhurmanīṣiṇaḥ |
taḍāgaṃ sukṛte yena tasya puṇyamanantakam || 9 ||
[Analyze grammar]

caturvidhānāṃ bhūtānāṃ taḍāgaḥ paramāśrayaḥ |
taḍāgādīni sarvāṇi diśanti śriyamuttamām || 10 ||
[Analyze grammar]

devā manuṣyā gandharvāḥ pitaro nāgarākṣasāḥ |
sthāvarāṇi ca bhūtāni saṃśrayaṃti jalāśayam || 11 ||
[Analyze grammar]

prāvṛḍṛtau taḍāge tu salilaṃ yasya tiṣṭhati |
agnihotraphalaṃ tasya bhavatītyāha cātmabhūḥ || 12 ||
[Analyze grammar]

śaratkāle tu salilaṃ taḍāge yasya tiṣṭhati |
gosahasraphalaṃ tasya bhavennaivātra saṃśayaḥ || 13 ||
[Analyze grammar]

hemante śiśire caiva salilaṃ yasya tiṣṭhati |
sa vai bahusuvarṇasya yajñasya labhate phalam || 14 ||
[Analyze grammar]

vasaṃte ca tathā grīṣme salilaṃ yasya tiṣṭhati |
atirātrāśvamedhānāṃ phalamāhurmanīṣiṇaḥ || 15 ||
[Analyze grammar]

mune vyāsātha vṛkṣāṇāṃ ropaṇe ca guṇāñchṛṇu |
proktaṃ jalāśayaphalaṃ jīvaprīṇanamuttamam || 16 ||
[Analyze grammar]

atītānāgatānsarvānpitṛvaṃśāṃstu tārayet |
kāṃtāre vṛkṣaropī yastasmādvṛkṣāṃstu ropayet || 17 ||
[Analyze grammar]

tatra putrā bhavaṃtyete pādapā nātra saṃśayaḥ |
paraṃ lokaṃ gatasso'pi lokānāpnoti cākṣayān || 18 ||
[Analyze grammar]

puṣpaissuragaṇānsarvānphalaiścāpi tathā pitṝn |
chāyayā cātithīnsarvānpūjayaṃti mahīruhāḥ || 19 ||
[Analyze grammar]

kinnaroragarakṣāṃsi devagaṃdharvamānavāḥ |
tathaivarṣigaṇāścaiva saṃśrayaṃti mahīruhān || 20 ||
[Analyze grammar]

puṣpitāḥ phalavaṃtaśca tarpayaṃtīha mānavān |
iha loke pare caiva putrāste dharmataḥ smṛtāḥ || 21 ||
[Analyze grammar]

taḍāgakṛdvṛkṣaropī ceṣṭayajñaśca yo dvijaḥ |
ete svargānna hīyaṃte ye cānye satyavādinaḥ || 22 ||
[Analyze grammar]

satyameva paraṃ brahma satyameva paraṃ tapaḥ |
satyameva paro yajñassatyameva paraṃ śrutam || 23 ||
[Analyze grammar]

satyaṃ supteṣu jāgarti satyaṃ ca paramaṃ padam |
satyenaiva dhṛtā pṛthvī satye sarvaṃ pratiṣṭhitam || 24 ||
[Analyze grammar]

tato yajñaśca puṇyaṃ ca devarṣipitṛpūjane |
āpo vidyā ca te sarve sarvaṃ satye pratiṣṭhitam || 25 ||
[Analyze grammar]

satyaṃ yajñastapo dānaṃ maṃtrā devī sarasvatī |
brahmacaryyaṃ tathā satyamoṃkārassatyameva ca || 26 ||
[Analyze grammar]

satyena vāyurabhyeti satyena tapate raviḥ |
satyenāgnirnirdahati svargassatyena tiṣṭhati || 27 ||
[Analyze grammar]

pālanaṃ sarvavedānāṃ sarvatīrthāvagāhanam |
satyena vahate loke sarvamāpnotyasaṃśayam || 28 ||
[Analyze grammar]

aśvamedhasahasraṃ ca satyaṃ ca tulayā dhṛtam |
lakṣāṇi kratavaścaiva satyameva viśiṣyate || 29 ||
[Analyze grammar]

satyena devāḥ pitaro mānavoragarākṣasāḥ |
prīyaṃte satyatassarve lokāśca sacarācarāḥ || 30 ||
[Analyze grammar]

satyamāhuḥ paraṃ dharmaṃ satyamāhuḥ paraṃ padam |
satyamāhuḥ paraṃ brahma tasmātsatyaṃ sadā vadet || 31 ||
[Analyze grammar]

munayassatyaniratāstapastaptvā suduścaram |
satyadharmaratāssiddhāstatassvargaṃ ca te gatāḥ || 32 ||
[Analyze grammar]

apsarogaṇasaṃviṣṭairvimānaiḥparimātṛbhiḥ |
vaktavyaṃ ca sadā satyaṃ na satyādvidyate param || 33 ||
[Analyze grammar]

agādhe vipule siddhe satyatīrthe śucihrade |
snātavyaṃ manasā yuktaṃ sthānaṃ tatparamaṃ smṛtam || 34 ||
[Analyze grammar]

ātmārthe vā parārthe vā putrārthe vāpi mānavāḥ |
anṛtaṃ ye na bhāṣaṃte te narāssvargagāminaḥ || 35 ||
[Analyze grammar]

vedā yajñāstathā maṃtrāssaṃti vipreṣu nityaśaḥ |
nobhāṃtyapi hyasatyeṣu tasmātsatyaṃ samācaret || 36 ||
[Analyze grammar]

|| vyāsa uvāca |
tapaso me phalaṃ brūhi punareva viśeṣataḥ |
sarveṣāṃ caiva varṇānāṃ brāhmaṇānāṃ tapodhana || 37 ||
[Analyze grammar]

sanatkumāra uvāca |
pravakṣyāmi tapo'dhyāyaṃ sarva kāmārthasādhakam |
suduścaraṃ dvijātīnāṃ tanme nigadataḥ śṛṇu || 38 ||
[Analyze grammar]

tapo hi paramaṃ proktaṃ tapasā vidyate phalam |
taporatā hi ye nityaṃ modaṃte saha daivataiḥ || 39 ||
[Analyze grammar]

tapasā prāpyate svargastapasā prāpyate yaśaḥ |
tapasā prāpyate kāmastapassarvārthasādhanam || 40 ||
[Analyze grammar]

tapasā mokṣamāpnoti tapasā viṃdate mahat |
jñānavijñānasaṃpattiḥ saubhāgyaṃ rūpameva ca || 41 ||
[Analyze grammar]

nānāvidhāni vastūni tapasā labhate naraḥ |
tapasā labhate sarvaṃ manasā yadyadicchati || 42 ||
[Analyze grammar]

nātaptatapaso yāṃti brahmalokaṃ kadācana |
nātaptatapasāṃ prāpyaśśaṃkaraḥ parameśvaraḥ || 43 ||
[Analyze grammar]

yatkāryaṃ kiṃcidāsthāya puruṣastapate tapaḥ |
tatsarvaṃ samavāpnoti paratreha ca mānavaḥ || 44 ||
[Analyze grammar]

surāpaḥ pāradārī ca brahmahā gurutalpagaḥ |
tapasā tarate sarvaṃ sarvataśca vimuṃcati || 45 ||
[Analyze grammar]

api sarveśvaraḥ sthāṇurviṣṇu ścaiva sanātanaḥ |
brahmā hutāśanaḥ śakro ye cānye tapasānvitāḥ || 46 ||
[Analyze grammar]

aṣṭāśītisahasrāṇi munīnāmūrddhvaretasām |
tapasā divi modaṃte sametā daivataissaha || 47 ||
[Analyze grammar]

tapasā labhyate rājyaṃ sa ca śakrassureśvaraḥ |
tapasā'pālayatsarvamahanyahani vṛtrahā || 48 ||
[Analyze grammar]

sūryyācandramasau devau sarvalokahite ratau |
tapasaiva prakāśaṃte nakṣatrāṇi grahāstathā || 49 ||
[Analyze grammar]

na cāsti tatsukhaṃ loke yadvinā tapasā kila |
tapasaiva sukhaṃ sarvamiti vedavido viduḥ || 50 ||
[Analyze grammar]

jñānaṃ vijñānamārogyaṃ rūpavattvaṃ tathaiva ca |
saubhāgyaṃ caiva tapasā prāpyate sarvadā sukham || 51 ||
[Analyze grammar]

tapasā sṛjyate viśvaṃ brahmā viśvaṃ vināśramam |
pāti viṣṇurharo'pyatti dhatte śeṣo'khilāṃ mahīm || 52 ||
[Analyze grammar]

viśvāmitro gādhisutastapasaiva mahāmune |
kṣatriyo'thābhavadvipraḥ prasiddhaṃ tribhavetvidam || 53 ||
[Analyze grammar]

ityuktaṃ te mahāprājña tapomāhātmyamuttamam |
śṛṇvadhyayanamāhātmyaṃ tapaso'dhikamuttamam || 54 ||
[Analyze grammar]

iti śrīśivamahāpurāṇe paṃcamyāmumāsaṃhitāyāṃ tapomāhātmyavarṇanaṃ nāma dvādaśo'dhyāyaḥ || 12 ||
[Analyze grammar]